Jehovah Sendem Jeremiah for Preach

Jehovah chusim Jeremiah for hem profet for pipol blo Judah. Hem talem Jeremiah for preach lo pipol hia and warnim olketa for mas stop for duim olketa nogud samting. Bat Jeremiah sei: ‘Jehovah, mi young tumas. Mi no savve hao for story lo pipol.’ Jehovah sei lo hem: ‘Iu no fraet. Bae mi helpem iu for savve lo wat for talem.’

Jehovah talem Jeremiah for kolem kam olketa leader blo olketa pipol, smasem wanfala clay jar front lo eye blo olketa and sei: ‘Jerusalem bae pisis olsem diswan.’ Taem Jeremiah duim samting wea Jehovah talem, olketa leader hia kros tumas. Wanfala priest wea nem blo hem Pashhur hitim Jeremiah and putim hem lo stock. For full naet, Jeremiah no savve muv. Lo morning, Pashhur aotem hem from datfala stock. Jeremiah sei: ‘Mi no fit nao. Bae mi stop for preach nomoa.’ Bat hao, hem givap nao? Nomoa. Taem Jeremiah gohed for ting raonem datwan, hem sei: ‘Toktok blo Jehovah hem olsem wanfala fire insaed lo mi. Mi hard for stop for preach.’ Jeremiah gohed for warnim pipol.

Staka year go pas, and Judah garem wanfala niu king. Olketa priest and olketa false profet heitim message wea Jeremiah talem. Olketa sei lo olketa leader: ‘Disfala man hem fit for dae.’ Jeremiah sei: ‘Sapos iufala killim mi dae, iufala killim dae wanfala innocent man. Olketa toktok wea mi talem hem from Jehovah, hem no tingting blo miseleva.’ Taem olketa leader herem datwan, olketa sei: ‘Disfala man hem no fit for dae.’

Jeremiah gohed for preach and datwan mekem olketa leader kros fogud. So olketa askem king for killim dae Jeremiah. Datfala king sei olketa savve duim eni samting wea olketa laekem lo Jeremiah. So olketa tekem Jeremiah and torowem hem insaed wanfala deep well wea mud, mekem hem dae lo there. Then Jeremiah start for sink go daon lo mud hia.

Then wanfala kot official wea nem blo hem Ebed-melech talem king olsem: ‘Olketa leader torowem Jeremiah insaed lo wanfala well! If iumi leavim hem lo there bae hem dae.’ Datfala king komandim Ebed-melech for tekem 30-fala man witim hem and go pullimaot Jeremiah from datfala well. Iumi laek for olsem Jeremiah wea no letem eniting for stopem hem for preach, iaman?