January

Taem Jesus “lukim” woman hia hem krae for pikinini blo hem, feeling for “barava sorre” muvim hem for duim samting. (Luke 7:13) Jesus no just feel sorre lo hem nomoa, bat hem showimaot hem tingim hem. Taem hem story lo hem, masbi hem story kaen and sei: “Iu no krae.” Then hem duim samting for helpem hem. Hem resurrectim datfala boy and “givim hem long mami bilong hem.” (Luke 7:​14, 15) Wat nao iumi lanem from mirakol wea Jesus duim for resurrectim son blo datfala widow woman? Iumi lanem hao iumi need for showimaot iumi tingim olketa wea sorre. Bat olsem Jesus, if iumi garem wei for luksavve bae iumi savve showimaot iumi tingim olketa wea sorre, taem iumi duim samting for helpem and comfortim olketa. (Prov. 17:17; 2 Cor. 1:​3, 4; 1 Pet. 3:8) Nomata iumi talem tu-thri toktok nomoa and duim smol samting, datwan savve barava comfortim olketa. w23.04 5-6 ¶13-15

Nomata Jesus savve fren blo hem Lazarus just dae, hem disaed for stap for tufala day moa, then hem just go lo Bethany. Taem Jesus arrive lo Bethany, Lazarus hem dae for fofala day finis. Jesus ting for duim samting wea bae helpem olketa fren blo hem and for mekhae lo God. (John 11:​6, 11, 17) Disfala story teachim iumi wanfala leson abaotem frenship. Tingim: Taem Mary and Martha sendem message lo Jesus, olketa no askem hem for kam lo Bethany. Olketa just sei fren blo hem sik. (John 11:3) Jesus savve resurrectim nomoa Lazarus nomata hem stap farawe. Bat Jesus chus for go lo Bethany for sapotim olketa fren blo hem Mary and Martha. Waswe, iu garem eni fren wea bae helpem iu nomata iu no askem hem? If iu garem fren olsem, iu savve iu fit for depend lo hem for “helpem yu long hadtaem.” (Provebs 17:​17, SIPB) Olsem Jesus, iumi laek for helpem olketa fren blo iumi! w23.04 10 ¶10-11

Taem iumi insaed lo hard taem, maet iumi feel olsem niu world blo Jehovah hem hard for kam. If iu feel olsem, waswe, datwan minim faith blo iu hem wik? Nomoa. Tingim disfala example. If hem rain for longfala taem maet iumi feel olsem hem hard for sun nao, bat iumi savve hem bae sun. Hem olsem tu, taem iumi barava discourage iumi maet feel olsem niu world bae hard for kam. Bat if iumi garem strong faith iumi savve promis blo God bae kamap tru. (Ps. 94:​3, 14, 15; Heb. 6:​17-19) From iumi barava sure lo datwan, iumi bae gohed strong for worshipim Jehovah. Iumi needim strong faith tu mekem iumi gohed duim preaching waka. Staka pipol tingse niu world blo God bae hem hard tumas for kam. (Matt. 24:14; Ezek. 33:32) Bat no letem kaen tingting olsem for affectim iumi. For duim datwan, iumi mas gohed strongim faith blo iumi. w23.04 27 ¶6-7; 30 ¶14

Waswe, enitaem iu ting: ‘Hao, Jehovah ansarem olketa prea blo mi tu?’ Sapos olsem, hem no iuseleva nao ting olsem. Staka brata and sista talem tu sem samting, especially taem olketa feisim hard taem. Taem iumi safa from wanfala hard taem, maet iumi faendem hem lelebet hard for luksavve hao Jehovah ansarem prea blo iumi. Why nao iumi sure Jehovah savve ansarem prea blo olketa wea worshipim hem? Bible talem iumi hao Jehovah barava lovem iumi and iumi barava spesol lo hem. (Hag. 2:7; 1 John 4:10) Dastawe hem invaetem iumi for prea lo hem and askem hem for help. (1 Pet. 5:​6, 7) Hem laek helpem iumi for gohed fren klos witim hem and for deal witim olketa hard taem wea iumi feisim. Lo Bible, staka taem iumi read abaotem hao Jehovah ansarem prea blo olketa wea worshipim hem. Waswe, iu tingim eni example? w23.05 8 ¶1-4

Faith blo Mary no depend lo wanem Joseph duim, bikos hemseleva fren gud witim Jehovah. Hem savve gud lo olketa scripture. Hem savve spendem taem tu for ting raonem samting. (Luke 2:​19, 51) For sure Mary hem wanfala gud waef bikos hem fren gud witim Jehovah. Distaem staka waef traem best for duim sem samting olsem Mary. For example, Sista Emiko sei: “Taem mi singol, mi garem own spiritual schedule blo mi. Bat bihaen mi marit, hasband nao prea for mitufala and lead lo famili worship, so faith blo mi start for depend lo wanem hem duim. Gogo, mi luksavve miseleva need for strongim frenship blo mi witim Jehovah. So distaem, mi markem taem for miseleva spendem witim God blo mi for prea, readim Bible, and ting raonem wanem hem laekem.” (Gal. 6:5) Olketa waef, taem iufala strongim frenship blo iufala witim Jehovah, olketa hasband blo iufala bae garem staka moa reason for praisem and lovem iufala.—Prov. 31:30. w23.05 21 ¶6

From iumi no born witim wei for fraet lo Jehovah, iumi mas lane for duim datwan. Wanfala wei for duim datwan, hem for ting abaotem creation. Taem iumi luksavve creation blo God showim wisdom, paoa, and bigfala love blo hem for iumi, datwan mekem iumi for barava respectim and lovem hem. (Rome 1:20) Narafala wei iumi savve lane for fraet lo God, hem for prea evritaem. Each taem iumi prea lo Jehovah, iumi bae savve gud lo hem. For example, evritaem iumi askem Jehovah for strongim iumi for deal witim eni hard taem, datwan remindim iumi lo bigfala paoa blo hem. Taem iumi prea for talem thankiu for givim kam Son blo hem, datwan mekem iumi tingim hao hem lovem iumi. And taem iumi begim Jehovah for helpem iumi witim wanfala problem, iumi tingim hao hem barava wise. Olketa prea olsem helpem iumi for barava respectim Jehovah, and strongim iumi for no duim eniting wea bae spoelem frenship blo iumi witim hem. w23.06 15 ¶6-7

From Jehovah hem highest person for givim law, hem evritaem storyim klia olketa law wea hem givim lo pipol blo hem. For example, governing body lo first century storyim thrifala samting wea olketa Christian mas stand strong lo hem: (1) Iumi mas worshipim nomoa Jehovah and rejectim wei for worshipim idol, (2) respectim hao blood hem holy, and (3) followim hae standard blo Bible abaotem sex. (Acts 15:​28, 29) Hao nao olketa Christian distaem savve gohed stand strong lo thrifala samting hia? Iumi mas worshipim and obeyim Jehovah. Jehovah givim komand lo olketa Israelite for worshipim hem nomoa. (Deut. 5:​6-10) And taem Devil temptim Jesus, Jesus talem stret iumi mas worshipim nomoa Jehovah. (Matt. 4:​8-10) Dastawe iumi no worshipim olketa idol. And tu, iumi no treatim eniwan olsem idol blo iumi, olsem olketa leader lo religion, politik, famous pipol lo sports and entertainment. And tu, iumi no mekhae lo olketa olsem olketa god. Iumi worshipim Jehovah nomoa bikos hem nao “wakem evri samting.”—Rev. 4:11. w23.07 14-15 ¶3-4

World blo Satan barava laekem tumas sex and pornography. (Eph. 4:19) So iumi mas gohed fraet lo God and heitim nogud samting. Lo Proverbs chapter 9, hem storyim tufala tokpiksa woman. Wanfala representim wisdom and narawan representim stupid. Each wan lo tufala invaetem olketa wea no garem experience, wea minim olketa wea “no garem gudfala tingting.” Hem olsem each wan sei, ‘Iufala kam lo haos blo mi and iumi kaikai.’ (Provebs 9:​1, 4-6, SIPB) Bat wat hem happen lo olketa wea acceptim invitation blo tufala woman hia, hem barava difren. Iumi storyim invitation blo datfala “stupid woman.” (Provebs 9:​13-18, SIPB) Datfala “stupid woman” no shame for kolem olketa wea no garem gudfala tingting and sei: “Yufala kam” iumi kaikai. Wat nao result? “Dae blong olketa hemi insaet long haos ya.” Bible warnim iumi abaotem wanfala “nogud woman.” Hem sei: “Haos blong woman ya hemi ples fo dae.” (Provebs 2:​11-19, SIPB) Lo Provebs 5:​3-10 hem storyim nara ‘woman wea laek fo durong’ wea ‘lidim man go lo ples fo dae.’ w23.06 22 ¶6-7

Olketa elder mas showim gud example for flexible. (1 Tim. 3:​2, 3) For example, wanfala elder mas no tingse idea blo hem nao olketa nara elder mas followim bikos hem olo winim olketa. Hem luksavve hao holy spirit blo Jehovah savve helpem wanfala insaed lo body of elders for talem samting wea bae help for olketa elder mekem wanfala gud disison. And if wanfala disison hem no brekem eni Bible principle, elder wea flexible bae willing for sapotim disison wea majority lo body of elders agree lo hem, nomata wanem hem tingim hem difren. Olketa Christian kasem staka blessing from olketa gohed flexible. Iumi fren gud witim olketa brata and sista, and kongregeson garem peace. Iumi hapi for garem olketa brata and sista wea garem difren personality and culture wea wan mind for worshipim Jehovah. Bat main samting nao, iumi hapi bikos iumi savve iumi followim example blo God blo iumi Jehovah wea flexible. w23.07 25 ¶16-17

Taem Daniel hem studyim olketa profesi, hem garem raet motive, wea hem nao for savve lo truth. And Daniel hem hambol from hem luksavve Jehovah bae helpem hem for minim olketa profesi, if hem gohed fren gud witim Jehovah and obeyim olketa standard blo hem. (Dan. 2:​27, 28) Daniel showimaot hem hambol taem hem depend lo Jehovah for help. (Dan. 2:18) And tu, Daniel barava studyim gud olketa profesi. Hem duim research lo olketa scripture wea available lo datfala taem. (Jer. 25:​11, 12; Dan. 9:2) Hao nao iu savve followim example blo Daniel? Ting abaotem motive blo iu. Waswe, iu studyim olketa Bible profesi bikos iu barava laek for savve lo truth? If olsem, Jehovah bae helpem iu. (John 4:​23, 24; 14:​16, 17) Maet samfala laek faendem pruv wea showim Bible no kam from God. Olketa ting if Bible no kam from God, olketa seleva garem raet for disaedem standard lo wat nao hem stret and rong mekem olketa savve followim. Bat iumi no olsem, iumi mas garem raet motive for study. w23.08 9 ¶7-8

Taem iumi laek for duim samting wea iumi no fit for duim and iumi comparem iumiseleva witim olketa narawan, datwan savve spoelem iumi. (Gal. 6:4) If iumi duim olsem bae hem mekem iumi jealous and laek for compete. (Gal. 5:26) If iumi trae for duim wat olketa narawan duim nomata iumi no fit for duim, bae iumi spoelem iumiseleva. And if “samting wea man expectim hem delay savve mekem heart sik,” bae iumi spoelem iumi go moa if iumi laek for duim samting wea iumi no fit for duim! (Prov. 13:12) Taem iumi duim olsem, datwan savve mekem iumi wik and slow daon lo reis blo iumi for laef. Iu no laek for duim samting wea winim wanem Jehovah expectim iu for duim bikos hem no expectim iu for givim samting wea iu no garem. (2 Cor. 8:12) Hem gud for tingim Jehovah no comparem wanem iu duim witim wat olketa narawan duim. (Matt. 25:​20-23) Hem tinghae lo wat iu duim witim full heart, faithful fasin blo iu, and wei wea iu no givap. w23.08 29 ¶10-11

Taem Samson singaot lo Jehovah for help, Jehovah duim mirakol for creatim wanfala wata source. Taem Samson drinkim datfala wata, hem “kasem bak strong blo hem and hem feel gud.” (Judges 15:​19, ftn.) Luk olsem datfala niu wata source hem still stap staka year bihaen, taem profet Samuel raetem Bible buk Judges. Datfala wata maet remindim olketa Israelite hao if olketa faithful servant blo Jehovah depend lo hem taem olketa needim help, hem bae helpem olketa. Iumi tu need for depend lo Jehovah for help nomata wanem talent or ability iumi garem, or nomata iumi duim staka samting finis lo service blo Jehovah. Iumi shud hambol and acceptim hao iumi savve duim samting wea Jehovah askem only if iumi depend lo hem. Samson kasem strong taem hem drinkim wata wea Jehovah provaedem. Olsem Samson, iumi tu savve strong lo spiritual wei taem iumi mekius lo evri samting wea Jehovah provaedem.—Matt. 11:28. w23.09 4 ¶8-10

Wat nao iumi savve duim taem iumi feisim wanfala situation wea no isi, olsem taem samwan tok spoelem nem blo God or Bible? Iumi shud askem Jehovah for holy spirit and wisdom mekem iumi savve respond kaen. Bat hao sapos bihaen nao iumi just luksavve dat hao iumi respond hem no kaen? Iumi savve prea abaotem datfala situation and ting raonem hao for deal witim datwan next taem. Then, Jehovah bae helpem iumi witim holy spirit mekem iumi savve kontrolem kros and for hambol. Samfala Bible verse savve helpem iumi for kontrolem toktok blo iumi taem iumi feisim wanfala hard situation. Spirit blo God savve helpem iumi for rememberim olketa verse. (John 14:26) For example, olketa principle wea stap lo buk blo Proverbs savve helpem iumi for hambol. (Provebs 15:​18, SIPB) Disfala Bible buk Proverbs storyim tu olketa gud samting wea iumi savve kasem taem iumi kontrolem iumiseleva lo eni hard situation.—Prov. 10:19; 17:27; 21:23; 25:15. w23.09 15 ¶6-7

Aposol Peter faithful for worshipim Jehovah for staka year. Hem preach witim Jesus, hem first wan for preach lo olketa niu territory, and hem wanfala member blo governing body. Peter savve hao klosap nao bae hem dae. Nomata olsem, Jehovah givim hem staka waka for duim. Lo samting olsem 62-64 C.E., Jehovah iusim hem for raetem tufala leta wea hem nao Bible buk 1 Peter and 2 Peter. (2 Pet. 1:​13-15) Holy spirit helpem Peter for raetem tufala leta hia lo taem wea olketa brata and sista ‘safa long enikaen hard taem.’ (1 Pet. 1:6) Olketa wicked man tekem kam olketa false teaching and rabis wei insaed Christian kongregeson. (2 Pet. 2:​1, 2, 14) Klosap nao, olketa Christian wea stap lo Jerusalem bae feisim “taem wea evri samting bae finis,” wea minim army blo Rome bae distroem datfala city and system blo olketa Jew lo datfala taem bae finis. (1 Pet. 4:7) For sure, leta blo Peter helpem olketa Christian for savve lo wat for duim for deal witim hard taem wea kasem olketa and redyim olketa for hard taem wea bae kamap. w23.09 26 ¶1-2

Olsem Jesus, staka taem iumi savve lane for obey taem iumi kasem olketa challenging situation. For example, taem COVID-19 pandemic start, iumi kasem direction for stop for attendim meeting lo Kingdom Hall and for no preach from haos tu haos. Hao, iu faendem hem hard for obey lo datfala taem? Nomata olsem, from iu obey datwan protectim iu, helpem iu for wan mind witim olketa brata and sista, and iu mekem Jehovah hapi. From iumi lanem for obey, datwan helpem iumi evriwan distaem for barava redi for obeyim eni instruction lo taem blo big trabol. For obeyim olketa instruction lo datfala taem bae sevem laef blo iumi! (Job 36:11) Main samting wea mekem iumi for obeyim Jehovah hem bikos iumi lovem hem and laek for mekem hem hapi. (1 John 5:3) Iumi no savve changem bak evri gud samting wea Jehovah duim for iumi. (Ps. 116:12) Bat iumi savve obeyim Jehovah and olketa wea garem authority. If iumi obey, iumi showim iumi wise. And taem iumi wise, iumi mekem Jehovah hapi.—Prov. 27:11. w23.10 11 ¶18-19

If wanfala angel story lo iu, hao bae iu lisin lo wat hem talem? Distaem, wanfala angel gohed story lo “pipol bilong evri kantri, tribe, and languis.” Wat nao hem talem? Hem sei: “Fraet long God and givim glory long hem . . . Worshipim God wea wakem skae and graon.” (Rev. 14:​6, 7) Jehovah hem only tru God wea evriwan shud worshipim. Iumi barava tinghae lo spesol chance wea hem givim lo iumi for worshipim hem lo nambawan spiritual temple blo hem! So wat nao datfala spiritual temple, and wea nao iumi savve faendem olketa detail abaotem datwan? Spiritual temple hia hem no wanfala building. Hem arrangement blo Jehovah abaotem worship wea hem acceptim wea base lo ransom sakrifaes blo Jesus. Aposol Paul explainim disfala arrangement lo leta wea hem raetem for olketa first century Hebrew Christian wea stap lo Judea. w23.10 24 ¶1-2

Lo 522 B.C.E., olketa enemy blo olketa Jew succeed lo plan blo olketa for banim waka for buildim bak temple blo Jehovah. Bat Zechariah assurem olketa Jew hao Jehovah bae iusim spirit blo hem wea garem bigfala paoa for helpem olketa for gohed, nomata olketa kasem hard taem. And lo 520 B.C.E., King Darius liftim ap datfala ban for buildim bak temple, and hem givim selen for sapotim and talem olketa governor for help. (Ezra 6:​1, 6-10) Jehovah promisim lo olketa Jew hao hem bae helpem olketa, if olketa focus lo waka for buildim bak temple. (Hag. 1:​8, 13, 14; Zech. 1:​3, 16) Datwan encouragem olketa Jew for startim bak moa waka for buildim bak temple lo 520 B.C.E. and completim temple insaed faev year nomoa. From olketa Jew focus lo will blo God nomata laef blo olketa no isi, Jehovah sapotim olketa. From datwan, olketa gohed hapi for worshipim Jehovah.—Ezra 6:​14-16, 22. w23.11 15 ¶6-7

Nomata staka pipol herem story abaotem Abraham, staka lo olketa no savve gud lo hem. Bat iu savve lo staka samting abaotem Abraham. For example, iu savve hao Bible storyim Abraham hem “dadi bilong evriwan wea garem faith.” (Rome 4:11) Bat maet iu wonder, ‘Waswe, mi savve garem strong faith lo God olsem Abraham?’ Yes, iu savve garem strong faith olsem hem. Wanfala samting wea iumi savve duim for garem strong faith olsem Abraham, hem for studyim example blo hem. Abraham evritaem duim wat God talem hem for duim. Hem muv lo wanfala farawe ples from hom blo hem, stap lo olketa tent for staka year, and willing for sakrifaesim son blo hem Isaac, wea hem lovem tumas. Abraham duim evri samting hia bikos hem garem strong faith lo Jehovah. From Abraham garem faith and duim waka, datwan mekem God hapi and hem kamap fren blo God. (Jas. 2:​22, 23) Jehovah laekem iumi evriwan and iu tu, for duim samting wea mekem hem hapi and for kamap fren blo hem. From datwan, hem iusim holy spirit for helpem Paul and James for storyim example blo Abraham. w23.12 2 ¶1-2

Olketa sista, hem gud for lane for lisin and story gud lo pipol. Hem important for olketa Christian duim datwan. Disaepol James givim disfala advaes wea stap lo text blo iumi for tuday. For lisin gud taem narawan story, hem showim iu “tingim” hem. (1 Pet. 3:8) If iu no minim wat hem talem or hao hem feel, hem gud for askem olketa kwestin wea fitim. Tingting firstaem bifor iu story. (Prov. 15:​28, ftn.) Tingim diswan: ‘Hao, samting wea mi bae talem hem tru and encouragem narawan? Hao, hem showimaot respect and kaen?’ Lane from olketa mature sista wea savve lisin gud and story kaen. (Provebs 31:​26, SIPB) Lukluk gud lo hao olketa story. Taem iu lanem gud disfala skill, iu bae fren gud witim olketa narawan. w23.12 21 ¶12

Distaem, Jehovah savve iusim olketa famili, frens, or olketa elder for sapotim iumi. Bat taem iumi barava depress, maet iumi no laek for stap witim olketa narawan and iumi laek stap seleva nomoa. Datwan hem normal samting. Wat nao iumi savve duim for kasem help blo Jehovah? Traem best for no garem feeling for laek stap seleva, bikos taem iumi stap seleva bae iumi tingim iumiseleva nomoa and olketa problem wea iumi kasem. And if iumi garem tingting olsem, bae iumi no mekem olketa best disison. Hem tru, iumi evriwan needim taem for stap seleva, especially taem iumi kasem wanfala barava hard situation. Bat if iumi duim olsem for longtaem, bae iumi rejectim help blo pipol wea Jehovah iusim for sapotim iumi. So hem gud for acceptim help from famili blo iu, frens, and olketa elder. Tingim dat Jehovah iusim olketa for sapotim iu.—Prov. 17:17; Isa. 32:​1, 2. w24.01 24 ¶12-13

Olketa Nazirite mekem vow for no katem hair blo olketa. Datwan hem for showim olketa barava willing for obeyim Jehovah. Sorre samting, samfala taem lo Israel bifor, pipol no tinghae or sapotim olketa Nazirite. Samfala taem, olketa Nazirite need for no fraet for gohed keepim vow blo olketa and for difren from olketa narawan. (Amos 2:12) From iumi chus for obeyim Jehovah, pipol bae noticem tu hao iumi difren from olketa narawan. Iumi shud no fraet for talem olketa narawan lo waka ples or lo skul hao iumi wanfala Jehovah’s Witness. And taem attitude blo pipol and wei blo olketa gohed for kamap worst, bae hem no isi for iumi followim olketa Bible principle and for storyim gud nius lo olketa narawan. (2 Tim. 1:8; 3:13) Bat evritaem tingim hao iumi “mekem heart blo [Jehovah] hapi,” taem iumi no fraet for difren from olketa wea no worshipim hem.—Prov. 27:11; Mal. 3:18. w24.02 16 ¶7; 17 ¶9

Tingim hao kongregeson lo Rome garem olketa brata and sista wea kam from olketa difren baekgraon. Samfala hem olketa Jew wea obeyim Law blo Moses, bat olketa narawan hem olketa Gentile wea baekgraon blo olketa barava difren. Maet samfala Christian olketa slave, samfala free, and olketa narawan maet olketa boss blo olketa slave. Hao nao olketa Christian hia savve gohed strongim love for each other nomata olketa garem difren baekgraon? Aposol Paul encouragem olketa for mas “acceptim narawan.” Wat nao Paul minim? Word wea olketa transleitim “acceptim” hem minim for welkamim narawan or kaen lo hem, olsem for invaetem hem lo haos or for kamap fren blo hem. For example, Paul talem Philemon for “welkamim” Onesimus wea hem wanfala slave blo hem wea ranawe. (Philem. 17) Priscilla and Aquila tu welkamim Apollos, wea need for lanem moa samting abaotem Christ and tufala “tekem hem go long haos bilong tufala.” (Acts 18:26) Nomata olketa Christian hia garem olketa difren baekgraon, olketa no letem datwan for divaedem olketa, bat olketa acceptim and welkamim each other. w23.07 6 ¶13

Main reason why iu dedicatem iuseleva lo Jehovah hem bikos iu lovem hem. Love wea iu garem for hem, hem no wanfala feeling nomoa. Bat, hem base lo “stretfala savve” and “wei for minim samting,” wea iu kasem taem iu lane abaotem Jehovah and datwan mekem iu for barava lovem hem. (Col. 1:9) Taem iu studyim Bible hem mekem iu for sure (1) Jehovah hem real, (2) Bible hem kam from God, and (3) hem iusim organization blo hem for duim will blo hem. Olketa wea dedicate lo Jehovah shud savve finis lo olketa main teaching lo Bible and gohed obeyim olketa standard blo hem. Olketa duim best for talem olketa narawan abaotem wat olketa lanem. (Matt. 28:​19, 20) From love blo olketa for Jehovah hem kamap strong, olketa barava laek for worshipim Jehovah witim full heart. Hao, iu feel olsem tu? w24.03 4-5 ¶6-8

Abigail maritim Nabal wea raf tumas and savve treatim hem nogud. (1 Sam. 25:3) Masbi hem hard tumas for Abigail stap witim kaen man olsem. Hao, Abigail garem eni chance for lusim datfala man? Wanfala chance kamap taem David, future king blo Israel kam for killim dae hasband blo Abigail, Nabal, bikos hem tok spoelem David and olketa man blo hem. (1 Sam. 25:​9-13) Hem isi nomoa for Abigail ranawe, and letem David for duim samting wea hem planim. Bat Abigail no duim datwan, hem story witim David for no killim dae Nabal. (1 Sam. 25:​23-27) Why nao hem duim datwan? Abigail lovem Jehovah and respectim olketa standard blo hem saed lo marit. Abigail savve lo tingting blo Jehovah dat marit hem wanfala holy arrangement. Hem laek for mekem God hapi, dastawe hem duim best blo hem for sevem famili and hasband blo hem. Hem kwiktaem duim samting for David no killim dae Nabal. w24.03 16-17 ¶9-10

Waswe, samfala lo kongregeson blo iu trae for mekem laef blo olketa simpol mekem olketa duim moa samting lo service blo Jehovah? Hao, iu savve lo samfala young wan wea brave for difren from olketa narawan lo skul, nomata hem no isi for olketa duim datwan? Waswe, lo olketa wea maet stragol for gohed faithful bikos famili againstim olketa? Iumi laek duim evri samting wea iumi fit for duim for encouragem olketa and talem hao iumi tinghae lo wei wea olketa no fraet and for olketa sakrifaes wea olketa duim for Jehovah. (Philem. 4, 5, 7) Jehovah savve iumi laek for duim samting for mekem hem hapi and hao iumi willing for mekem olketa sakrifaes for keepim dedication vow blo iumi. Jehovah respectim iumi taem hem givim iumi chance for chus for duim samting for showimaot iumi lovem hem. (Prov. 23:​15, 16) Iumi laek disaed strong for continue for servem Jehovah, and willing for givim best blo iumi for hem. w24.02 18 ¶14; 19 ¶16

Tingim samting wea happen taem Jesus startim ministry blo hem lo end blo 29 C.E. Jesus and mami blo hem, Mary, go lo wanfala wedding feast lo Cana. Luk olsem Mary hem help for lukaftarem olketa guest wea kam. Bat taem wedding feast gohed, wanfala problem kamap. Wine blo olketa hem finis. Mary kwiktaem talem Jesus: “Olketa no garem eni wine nao.” (John 2:​1-3) Wat nao Jesus duim? Hem duim wanfala spesol samting, hem changem wata for kamap “gudfala wine.” (John 2:​9, 10) Jesus duim staka mirakol moa taem hem duim ministry blo hem. Hem duim olketa mirakol for helpem staka thousand pipol. For example, tingim tufala mirakol hia, wantaem hem feedim 5,000 man and narataem hem feedim 4,000 man. Luk olsem, lo tufala mirakol hia, hem feedim winim 27,000 pipol bikos olketa woman and pikinini tu stap lo datfala taem. (Matt. 14:​15-21; 15:​32-38) Lo tufala taem hia, Jesus healim tu olketa wea sik.—Matt. 14:14; 15:​30, 31. w23.04 2 ¶1-2

If iumi kasem wanfala barava hard taem, maet samfala day iumi savve feel wikdaon and sorre tumas. Olsem Elijah, maet hem hard for iumi getap, bat laek for sleep nomoa. (1 Ki. 19:​5-7) Maet iumi needim help for gohed duim waka blo Jehovah. Lo taem olsem, Jehovah promisim iumi hao hem bae helpem iumi olsem text for tuday talem. King David experiencem diswan. Taem hem feisim olketa hard taem and olketa enemy, hem sei lo Jehovah: “Raet hand blo iu sapotim mi.” (Ps. 18:​35, ftn.) Staka taem Jehovah sapotim iumi taem hem iusim olketa narawan for helpem iumi. For example, taem David barava discourage, fren blo hem Jonathan visitim hem for strongim and encouragem hem. (1 Sam. 23:​16, 17) And tu, Jehovah iusim Elisha for helpem Elijah.—1 Ki. 19:​16, 21; 2 Ki. 2:2. w24.01 23-24 ¶10-12

Jehovah kaen tumas and provaedem staka gud samting. Proverbs chapter 9 storyim hao datfala woman wea representim wisdom showimaot tufala wei hia. Lo datfala story, woman hia preparem meat, wine, and arrangem gud tebol lo haos blo hem. (Provebs 9:​2, SIPB) Then lo verse 4 and 5, woman hia sei: ‘Yufala wea no garem gudfala tingting, yufala kam kaikai.’ Why nao iumi shud go lo haos blo hem and kaikaim kaikai wea hem preparem? Jehovah laekem olketa pikinini blo hem for wise and sef. Hem no laekem iumi for duim olketa mistek wea bae mekem iumi for regret. Dastawe “hemi helpem stret pipol fo kamap waes.” (Provebs 2:​7, SIPB) Taem iumi fraet lo Jehovah, bae iumi laek for mekem hem hapi. Iumi herem olketa kaonsel blo hem and hapi for followim.—Jas. 1:25. w23.06 23-24 ¶14-15

Nomata iumi no fit for duim wat iumi laek for duim for Jehovah, iumi savve sure hao hem lukim evri samting wea iumi duim for hem from heart blo iumi. Hao nao iumi savve? Lo taem blo Zechariah, Jehovah talem profet blo hem for wakem wanfala kraon lo gold and silver. Hem bae wakem from gold and silver wea olketa Jew wea stap lo Babylon sendem kam. (Zech. 6:11) Datfala “spesol kraon” bae gohed remindim olketa lo olketa contribution wea olketa hapi for givim. (Zech. 6:​14, ftns.) Iumi savve sure hao Jehovah bae no savve forgetim wat iumi duim for hem from heart blo iumi lo taem wea laef hem hard. Iumi savve lo olketa last day distaem, iumi bae gohed feisim olketa hard situation, and olketa situation hia maet worse go moa lo future. (2 Tim. 3:​1, 13) Nomata olsem, iumi no need for wari tumas. Tingim toktok blo Jehovah for pipol blo hem lo taem blo Haggai: “Mi stap witim iufala. . . . Iufala mas no fraet.” (Hag. 2:​4, 5) Iumi tu savve sure Jehovah bae stap witim iumi if iumi gohed duim best blo iumi lo waka blo hem. w23.11 19 ¶20-21

Hem isi nomoa for Jehovah no letem olketa for raetem olketa mistek blo aposol Peter insaed Bible. Bat hem includim mekem iumi savve lane from datwan. (2 Tim. 3:​16, 17) Taem iumi lane abaotem Peter wea garem olketa wik point and feeling olsem iumi nomoa, datwan helpem iumi for savve dat Jehovah no expectim iumi for perfect. Hem laekem iumi for no givap, and for gohed traem best nomata iumi garem olketa wik point. Why nao iumi mas no givap? Bihaen iumi tingse iumi winim finis wanfala wik point, maet samfala taem iumi duim moa datfala mistek. Bat iumi need for gohed waka hard for impruv. Iumi evriwan savve talem or duim samting wea mekem iumi for regret, bat if iumi no givap, Jehovah bae helpem iumi for impruv. (1 Pet. 5:10) Wei wea Jesus helpem Peter taem hem mekem olketa mistek savve encouragem iumi for no givap for gohed worshipim Jehovah. w23.09 20-21 ¶2-3

Olsem Martha talem lo Jesus lo text for tuday, Jesus savve healim Lazarus, bat Jesus ting for duim wanfala spesol samting. Hem promis olsem: “Brata bilong iu bae laef bak.” Hem sei tu: “Mi nao givim laef long pipol and mekem olketa for laef bak moa.” (John 11:​23, 25) God givim paoa lo Jesus for resurrectim pipol. Hem bin resurrectim wanfala young gele no long taem bihaen hem dae and hem mekem wanfala young man for laef bak, luk olsem lo sem day wea hem dae. (Luke 7:​11-15; 8:​49-55) Bat waswe, hem fit for resurrectim samwan wea dae for fofala day and wea body blo hem start for rotten finis? Mary, nara sista blo Lazarus, hem go for meetim Jesus and repeatim sem toktok wea Martha talem. Hem sei: “Lord, sapos iu long hia, hard for brata bilong mi dae.” (John 11:32) Taem Jesus lukim and herem Mary and olketa narawan krae, hem sorre tumas. From hem tingim and lovem olketa fren blo hem, hem tu krae. Hem minim feeling blo olketa wea lusim samwan wea olketa lovem lo dae. Datwan mekem iumi sure, hem barava laek for finisim dae wea kosim olketa for krae! w23.04 10-11 ¶12-13