February

Taem King Hezekiah barava sik, hem begim Jehovah for helpem hem gud bak. Jehovah ansarem prea blo hem taem hem healim hem. (2 Ki. 20:​1-6) Bat, taem aposol Paul begim Jehovah for aotem “wanfala nila wea stap long body” blo hem, Jehovah no finisim datwan. (2 Cor. 12:​7-9) King Herod laek for killim dae aposol James and Peter. Gogo, olketa killim dae James, bat wanfala angel rescuem Peter. (Acts 12:​1-11) Maet iumi wonder, ‘Why nao Jehovah sevem Peter bat James nomoa?’ Bible no talem eniting abaotem datwan. Wat iumi sure lo hem nao, olketa wei blo Jehovah hem evritaem “followim justice.” (Deut. 32:4) Samfala taem, Jehovah maet no ansarem olketa prea blo iumi lo hao iumi expectim. Bat bikos iumi sure hao Jehovah lovem iumi and hem fair taem hem ansarem olketa prea blo iumi, iumi no kwestinim hao hem chus for ansarem iumi.—Job 33:13. w23.11 21 ¶6

James sei pipol wea wise olketa “willing for obey.” Datwan minim iumi shud redi and willing for obeyim olketa wea Jehovah givim authority lo olketa for lukaftarem iumi. Bat, Jehovah no expectim iumi for obeyim samwan wea askem iumi for duim samting wea againstim law blo Hem. (Acts 4:​18-20) Maet iumi faendem hem isi for obeyim Jehovah winim olketa man. Tingim, Jehovah evritaem givim perfect direction. (Ps. 19:7) Bat olketa man wea garem authority no perfect. Nomata olsem, Jehovah givim authority lo olketa parents, olketa gavman official, and olketa elder. (Prov. 6:20; 1 Thess. 5:12; 1 Pet. 2:​13, 14) Taem iumi obeyim olketa, really iumi obeyim Jehovah. w23.10 6 ¶2-3

Wanfala samting iumi savve duim for strongim faith blo iumi, hem for ting abaotem paoa blo Jehovah. Hem garem paoa for fulfillim evri promis blo hem. Datwan hem fitim bikos hem Olmaeti God. (Job 42:2; Mark 10:27; Eph. 3:20) Hem promisim Abraham and Sarah hao tufala bae garem pikinini taem tufala olo. (Gen. 17:​15-17) Hem talem tu lo Abraham hao hem bae givim land blo Canaan lo olketa pikinini blo hem. Taem olketa Israelite wea olketa nao pikinini blo Abraham, slave lo Egypt for staka year, luk olsem datfala promis hem hard for happen. Bat gogo hem kamap tru. Hem talem tu Mary, wea hem virgin, dat bae hem bornem Son blo Hem, wea datwan fulfillim promis blo Jehovah wea hem talem staka thousand year finis lo garden blo Eden! (Gen. 3:15) Taem iumi ting raonem wei wea Jehovah talem samting and hem fulfill, datwan strongim faith blo iumi dat Jehovah garem paoa for mekem wanfala niu world.—Josh. 23:14; Isa. 55:​10, 11. w23.04 28 ¶10-12

Jehovah ansarem prea blo David and sevem hem. (1 Sam. 19:​10, 18-20; 2 Sam. 5:​17-25) Iumi tu savve sure lo datwan. (Ps. 145:18) Jehovah maet no ansarem prea blo iumi lo wei wea iumi expectim. Paul askem God for finisim wanfala problem wea olsem “wanfala nila wea stap long body” blo hem. Thrifala taem nao Paul prea abaotem datwan lo God. Waswe, Jehovah ansarem olketa prea hia? Yes, bat no lo wei wea Paul expectim. Jehovah no finisim datfala problem, bat hem givim paoa wea Paul needim for gohed faithful for worshipim Hem. (2 Cor. 12:​7-10) Samfala taem, maet iumi tu kasem ansa for olketa prea blo iumi wea difren from wat iumi expectim. Nomata olsem, iumi sure Jehovah savve lo best wei for helpem iumi. Hem savve duim tu samting wea ‘barava winim wanem iumi askem or tingim.’ (Eph. 3:20) So, hao hem ansarem olketa prea blo iumi hem savve kam lo taem or lo wei wea iumi no expectim. w23.05 8-9 ¶4-6

Samfala taem hem gud for ting raonem promis lo Bible abaotem resurrection lo future. Why nao olsem? Bikos iumi no savve wat taem maet wanfala big sik kasem iumi or seknomoa iumi lusim samwan wea iumi lovem lo dae. (Eccl. 9:11; Jas. 4:​13, 14) Resurrection hope savve helpem iumi for deal witim olketa challenge olsem. (1 Thess. 4:13) Bible helpem iumi for luksavve Dadi blo iumi lo heven savve gud lo iumi and barava lovem iumi. (Luke 12:7) Samting wea showimaot Jehovah barava savve gud lo iumi, hem nao wei wea hem bae givim bak memory and evri wei blo iumi taem hem resurrectim iumi. Jehovah lovem iumi tumas dastawe hem givim iumi chance for kasem laef olowe. And nomata iumi dae, bae hem resurrectim iumi! Why nao iumi bilivim promis blo God abaotem resurrection? Bikos man wea mekem datfala promis barava laek for duim and garem paoa, or savve, for duim datwan. w23.04 8-9 ¶2-4

Joseph and Mary waka tugeta for strongim frenship blo tufala witim Jehovah. Tufala luksavve hao hem important for famili worshipim Jehovah tugeta. (Luke 2:​22-24; 4:16) Datwan nambawan example for olketa marit couple distaem! If iu garem olketa pikinini, olsem Joseph and Mary, maet hem no isi for attendim olketa meeting or markem taem for duim famili worship. And maet hem hard go moa for faendem taem for tufala study or prea tugeta. Bat tingim, taem iutufala worshipim Jehovah tugeta, datwan bae mekem iutufala fren gud witim hem and witim each other. So mekem worship main samting lo laef blo iutufala. Sapos iutufala garem samfala problem lo marit blo iutufala, maet bae iutufala no hapi for duim famili worship tugeta. Sapos olsem, start witim wanfala topic wea iutufala enjoyim. Taem iutufala duim datwan, hem bae strongim frenship blo iutufala and feeling for laek for duim spiritual samting tugeta. w23.05 22 ¶7-8

Hao nao wei wea Obadiah fraet lo Jehovah helpem hem? From hem honest and pipol trustim hem, king appointim hem for in charge lo palace blo hem. (Comparem Nehemiah 7:2.) From Obadiah fraet lo God hem barava brave. Datwan hem important bikos hem stap lo taem wea King Ahab hem rul. (1 Ki. 16:30) And tu, Jezebel, waef blo Ahab wea worshipim Baal, heitim tumas Jehovah, so hem trae for finisim tru worship lo ten-tribe kingdom lo Israel. Hem killim dae tu staka profet blo God. (1 Ki. 18:4) Taem Jezebel lukaotem olketa profet blo God for killim olketa dae, Obadiah tekem 100 lo olketa profet hia and haedem “50 lo wanfala cave, and nara 50 lo nara cave and gohed provaedem kaikai and wata for olketa.” (1 Ki. 18:​13, 14) If Jezebel faendaot, hem bae killim dae Obadiah. Obadiah hem human being nomoa and hem no laek for dae tu. Bat Obadiah lovem Jehovah and olketa wea worshipim God winim laef blo hemseleva. w23.06 16 ¶9-10

Jehovah continue for leadim pipol blo hem distaem olsem hem duim bifor. Hem iusim Bible and Son blo hem, wea hed lo kongregeson for duim datwan. Waswe, iumi lukim olketa evidence wea pruvim God continue for iusim olketa man for leadim iumi distaem? Yes. For example, tingim wat happen bihaen lo year 1870. Charles Taze Russell and olketa fren blo hem start for luksavve dat year 1914 bae Kingdom blo God hem start for rul. (Dan. 4:​25, 26) Olketa faendaot lo diswan bikos olketa studyim Bible and sure olketa Bible profesi bae fulfill. Waswe, Jehovah leadim research wea olketa duim lo Bible? Barava nao. Wat hem happen lo world lo year 1914 confirmim Kingdom blo God start for rul lo datfala taem. World War I hem happen, then olketa barava nogud sik kamap, olketa earthquake, and bigfala hangere. (Luke 21:​10, 11) Tru nao, Jehovah iusim olketa man hia wea garem gud and honest heart for leadim pipol blo hem. w24.02 22 ¶11

Iumi pipol blo Jehovah, so iumi savve hem lovem iumi and laekem iumi for enjoyim laef. (Rome 8:​35-39) Iumi sure tu hao iumi savve evritaem kasem gud samting taem iumi followim Bible principle. (Isa. 48:​17, 18) Bat, hao if iumi feisim olketa challenge wea iumi no expectim? Iumi evriwan wea worshipim Jehovah deal witim olketa problem. For example, maet samwan lo famili duim samting wea mekem iumi feel nogud. Maet iumi garem health problem wea mekem iumi hard for duim staka samting lo service blo Jehovah. Maet iumi safa from wanfala natural disaster. Or maet iumi kasem persecution bikos lo wanem iumi bilivim. Taem iumi feisim olketa challenge olsem, maet iumi ting: ‘Why nao diswan happen lo mi? Waswe, mi duim eni rong samting? Hao, Jehovah no hapi lo mi?’ Waswe, enitaem iu feel olsem? If olsem, no discourage. Staka faithful servant blo Jehovah bifor tu stragol for deal witim olketa feeling olsem.—Ps. 22:​1, 2; Hab. 1:​2, 3. w23.04 14 ¶1-2

Taem iumi kasem temptation, iumi mas kwiktaem rejectim eni tingting or akson wea savve spoelem frenship blo iumi witim God. Jehovah expectim iumi for ‘barava laek for obeyim hem.’ (Rome 6:17) Evritaem, wat hem talem hem for gud blo iumi, and hard for iumi changem olketa law blo hem. (Isa. 48:​17, 18; 1 Cor. 6:​9, 10) Satan iusim violence and pressure from olketa narawan for trae spoelem disison blo iumi for gohed faithful. Aim blo Satan hem for “kaikaim” iumi, wea minim for spoelem frenship blo iumi witim Jehovah. (1 Pet. 5:8) Lo first century pipol threatenim, whipim, and killim dae olketa Christian bikos olketa disaed strong for gohed faithful. (Acts 5:​27, 28, 40; 7:​54-60) Distaem tu Satan gohed for persecutim pipol blo Jehovah. Diswan showaot klia lo hao olketa killim nogud olketa brata and sista lo Russia and olketa nara kantri. And pipol persecutim olketa brata and sista lo staka difren wei. And Satan iusim tu “olketa kleva trik” for attakim pipol blo Jehovah.—Eph. 6:11. w23.07 15-16 ¶6-9

Taem iu gohed studyim Bible, iu bae barava lovem go moa Jehovah. Datfala love bae mekem iu for laek followim wat iu lanem. Hem bae helpem iu for mekem gud disison followim olketa Bible principle. Attitude and wei blo iu tu hem impruv bikos iu laek for mekem God hapi. Olsem pikinini wea followim wei blo loving parents blo hem, iu traem best for followim wei blo Dadi blo iu lo heven. (Eph. 5:​1, 2) Maet iumi savve askem iumiseleva olsem: ‘Waswe, mi barava lovem Jehovah distaem winim taem wea mi kamap Christian? Bihaen mi baptaes, waswe, mi barava followim tingting and wei blo Jehovah, especially for showimaot love lo olketa brata and sista?’ If “love wea iu garem long firstaem” hem no strong distaem, no discourage. Sem samting tu happen lo olketa first century Christian. Bat Jesus no givap lo olketa, and hem no givap lo iumi tu. (Rev. 2:​4, 7) Hem savve bae iumi showim moa datfala love wea iumi garem taem iumi start for lanem truth. w23.07 8 ¶2-3

Aposol Peter mekem samfala mistek. First, Peter ova confident and tok praod and sei hem bae gohed faithful nomata olketa nara aposol lusim Jesus. (Mark 14:​27-29) Second, Peter fail for gohed lukaot. (Mark 14:​32, 37-41) Third, taem wanfala big grup kam for arrestim Jesus, Peter ranawe. (Mark 14:50) Then last samting, Peter denyim Jesus thrifala taem, and even sei sapos hem laea, fitim for God panisim hem. (Mark 14:​66-71) Wat nao reaction blo Peter taem hem luksavve hem duim wanfala serious sin? Hem sorre tumas and krae big nao. (Mark 14:72) Instead for Jesus tok lo Peter bikos lo olketa mistek wea hem duim, Jesus talem bae hem givim hem samfala big responsibility. (John 21:​15-17) Peter savve hem duim bigfala sin, bat hem no givap for duim stret samting. Why? Bikos hem luksavve hao Masta blo hem Jesus, no givap lo hem. Wat nao iumi lanem? Jehovah laekem iumi for sure hao hem lovem and redi for forgivim iumi.—Rome 8:​38, 39. w24.03 18-19 ¶13-15

For durong savve kosim wei for shame, feel iusles, babule nating, and famili brek daon. Tru nao, hem wise for rejectim invitation for go lo “haos” blo datfala stupid woman. Staka wea durong dae lo spiritual wei and kasem tu nogud sik wea killim olketa dae kwiktaem. (Prov. 7:23) Provebs 9:18 sei: ‘Olketa wea go insaet haos blo hem go daon finis insaet long grev.’ Why nao staka savve nomoa bae olketa kasem nogud samting, bat olketa acceptim invitation blo datfala stupid woman? (Prov. 9:13; Provebs 9:​14-18, SIPB) Wanfala trap nao hem pornography. Samfala tingse for lukluk lo pornography no savve spoelem man. Bat pornography savve spoelem man, mekem man no respectim hemseleva and olketa narawan, and man savve addict lo hem tu. Nomata man lukim for lelebet taem nomoa, hard for hem savve aotem from mind. And tu, pornography no savve killim dae feeling for durong, bat hem just strongim go moa datfala feeling. (Col. 3:5; Jas. 1:​14, 15) Tru nao, staka wea lukluk lo pornography gogo olketa durong. w23.06 23 ¶10-11

Nomata samfala taem maet olketa nara nation againstim England-America World Paoa, olketa bae no kamap world paoa for changem hem. Iumi savve lo datwan bikos “datfala ston” wea representim Kingdom blo God bae pisisim tufala foot blo datfala image, wea hem nao England-America World Paoa. (Dan. 2:​34, 35, 44, 45) Waswe, iu barava convince dat profesi blo Daniel abaotem tufala foot wea iron mix witim clay hem tru? If olsem, datwan bae affectim hao iu disaedem olketa samting lo laef blo iu. Bae iu no aftarem selen and material samting lo disfala world wea redi nomoa for distroe. (Luke 12:​16-21; 1 John 2:​15-17) Taem iu minim disfala profesi, datwan bae helpem iu tu for luksavve hem important for duim preaching and teaching waka. (Matt. 6:33; 28:​18-20) Bihaen iu studyim disfala profesi, hem gud for askem iuseleva, ‘Hao, olketa disison wea mi mekem showim mi convince dat Kingdom blo God klosap for distroem evri gavman blo man?’ w23.08 11 ¶13-14

Hem gud for hambol and luksavve dat maet iu no fit for duim samting wea iu fit for duim bifor bikos lo age, health, and situation blo iu distaem. Olsem Barzillai, mas willing for sei no if health or age blo iu hem mekem hem no isi for iu duim datwan. (2 Sam. 19:​35, 36) Olsem Moses, acceptim help and sharem responsibility lo olketa narawan taem need kamap. (Ex. 18:​21, 22) Taem iu hambol, iu bae no duim olketa samting winim wanem iu fit for duim bikos datwan bae mekem iu taed. Iumi mas no feel responsible for bad disison wea narawan mekem. Iumi no savve mekem disison for olketa narawan, and iumi no savve evritaem protectim olketa from nogud samting wea kasem olketa from bad disison wea olketa mekem. For example, wanfala son or dota maet gogo disaed for stop for worshipim Jehovah. Taem pikinini disaed olsem, datwan savve mekem parents sorre tumas. Bat, olketa parents wea blamem olketa seleva for bad disison blo pikinini karem load wea hevi tumas. Jehovah no expectim olketa parents for karem datfala hevi load. w23.08 29 ¶11-12

Samson no perfect olsem iumi tu, so samfala taem hem mekem olketa bad disison. Wanfala disison wea Samson mekem leadim hem for kasem nogud samting, bikos hem forgetim assignment wea God givim hem. No longtaem bihaen Samson kamap judge, hem “laekem tumas wanfala gele wea stap lo Valley blo Sorek wea nem blo hem Delilah.” Bifor datwan, Samson engage witim wanfala gele lo Philistine, bat Jehovah nao givim direction lo Samson for duim datwan bikos Jehovah “lukaotem chance for againstim olketa Philistine.” Then bihaen moa, Samson go stay lo haos blo wanfala jury woman lo taon blo Gaza lo Philistine. Lo datfala taem, God givim paoa lo Samson for karem olketa door lo gate blo datfala taon, wea mekem datfala taon for no sef. (Judg. 14:​1-4; 16:​1-3) Bat case blo Delilah hem difren, bikos luk olsem hem wanfala Israelite gele. Delilah acceptim big amount lo selen from olketa blo Philistine for givim Samson lo enemy. w23.09 5 ¶12-13

Wei for luksavve savve helpem iumi for hambol. Samwan wea luksavve lo samting savve kontrolem hemseleva taem narawan kwestinim biliv blo hem. Tingim disfala tokpiksa. Taem iumi lukim wanfala iceberg, smol part blo hem nomoa showaot antap lo wata bat big part hem stap haed andanit. Lo sem wei tu, maet samwan askem iumi wanfala kwestin, bat staka taem iumi no savve wat nao real reason wea mekem hem for askem datwan. So bifor iumi ansa, hem gud for luksavve wat nao maet muvim hem for askem wanfala kwestin. (Prov. 16:23) Tingim hao Gideon respond lo olketa man blo Ephraim. Olketa barava kros, and askem why hem no kolem olketa for joinim hem for faet againstim olketa enemy blo Israel. Wat nao mekem olketa for kros tumas? Maet olketa praod. Nomata wat nao maet mekem olketa olsem, from Gideon garem wei for luksavve, hem talem toktok wea showimaot hem hambol and respectim olketa. Wat nao result? Bible sei, “kros blo olketa katdaon nao.”—Judg. 8:​1-3. w23.09 16 ¶8-9

Frenship wea Jehovah and Jesus garem barava klos olsem hao wanfala dadi savve fren witim son blo hem. Taem Jehovah lukim pipol treatim nogud Son blo hem, rejectim, and hem safa tumas, datwan mas mekem Jehovah kasem bigfala pain. Wanfala parents wea pikinini blo hem dae, hem barava minim gud bigfala sorre feeling wea samwan garem taem hem lusim pikinini blo hem. Hem tru, iumi garem strong faith lo resurrection, bat datwan no finisim sorre feeling wea iumi garem taem iumi lusim wanfala loved wan. Disfala example helpem iumi for minim hao Jehovah feel taem hem lukim Son blo hem wea hem lovem tumas hem safa and dae lo Nisan 14, 33 C.E. (Matt. 3:17) Start distaem go kasem day blo Memorial, hao if iu garem wanfala personal study project or Famili Worship project wea focus lo ransom? And lo day blo Memorial, no forget for watchim datfala spesol Morning Worship program. Taem iumi redyim heart blo iumi for Memorial, iumi bae fit for helpem olketa wea interest for kasem gud samting from datwan tu.—Ezra 7:10. w24.01 11 ¶10-12

Wanfala samting wea iumi savve duim for kasem paoa from Jehovah, hem for prea lo hem. Jehovah bae ansarem olketa prea blo iumi taem hem givim iumi “strong wea winim strong bilong man.” (2 Cor. 4:7) Taem iumi readim Bible and ting raonem, datwan savve strongim iumi tu. (Ps. 86:11) Message blo Jehovah lo Bible hem “garem paoa.” (Heb. 4:12) Taem iu prea lo Jehovah and readim Bible, datwan bae mekem iu kasem strong wea iu needim for no givap, for gohed hapi, or for duim eni hard assignment wea iu kasem. Tingim hao Jehovah strongim profet Jonah. Jonah ranawe from wanfala challenging assignment wea Jehovah givim hem. From datwan, hem and pipol wea insaed ship klosap lusim laef blo olketa lo raf sea. Taem olketa crew torowem hem from ship, wanfala big fish swallom hem and Jonah insaed lo bele blo datfala fish. Wat nao Jonah duim for strongim hem taem hem insaed bele blo fish? Hem prea lo Jehovah.—Jonah 2:​1, 2, 7. w23.10 13 ¶4-6

Nomata aposol Peter hem raetem tufala leta for olketa Christian lo first century, Jehovah includim tufala leta hia for kamap part lo Bible. And iumi kasem gud samting from olketa leta hia. (Rome 15:4) Iumi stap witim olketa pipol wea no garem faith lo olketa Bible profesi. Maet pipol tok spoelem iumi bikos for long taem finis iumi preach abaotem end, bat hem no kam yet. Samfala sei end bae hard for kam. (2 Pet. 3:​3, 4) If iumi herem kaen koment olsem lo ministry, from wanfala workmate, or famili member, maet datwan savve mekem faith blo iumi for no stedy. Bat Peter storyim wat savve helpem iumi. Samfala maet tingse Jehovah delay for finisim disfala wicked system. Olketa toktok blo Peter savve helpem iumi for garem stretfala tingting abaotem day blo Jehovah. Hem remindim iumi, dat hao Jehovah ting lo taem hem barava difren from iumi. (2 Pet. 3:​8, 9) Wanday blo Jehovah, hem wan thousand year blo iumi. Jehovah hem patient, hem no laekem eniwan for dae. Bikos taem day blo Jehovah kam, disfala system bae end. w23.09 26-27 ¶2-5

Why nao aposol Paul raetem disfala leta for olketa Hebrew Christian lo Judea? Luk olsem, for tufala main reason. First wan, hem for encouragem olketa. Bifor olketa kamap Christian, olketa joinim Jew religion. Olketa leader lo religion wea olketa joinim bifor maet tok spoelem olketa bikos olketa kamap Christian. Why nao olsem? Bikos olketa Christian no garem temple for worship insaed, no garem altar for bonem sakrifaes, and olketa no garem olketa priest. Datwan maet savve mekem olketa disaepol blo Christ for discourage and mekem faith blo olketa for wikdaon. (Heb. 3:​12, 14) Samfala maet even tingting for go bak lo Jew religion. Second reason, Paul storyim hao olketa Hebrew Christian hia no waka hard for minim olketa niu or deep spiritual teaching, wea hem nao “strongfala kaikai” wea stap lo Bible. (Heb. 5:​11-14) Luk olsem, samfala lo olketa still followim Law blo Moses. w23.10 24-25 ¶3-4

Samfala gele disaed for no marit. (Matt. 19:​10-12) Jehovah and Jesus no ting daonem olketa singol sista. Evriwea lo world, olketa singol sista nao garem positive influence lo kongregeson. From olketa lovem and kea for olketa narawan, olketa kamap sista and mami blo staka lo kongregeson. (Mark 10:​29, 30) Samfala kamap full-taem servant. Olketa young sista duim staka samting saed lo preaching waka evriwea lo world. (Ps. 68:11) Hao, iu savve plan distaem for duim full-taem service? Maet iu savve pioneer, volunteer lo construction, or waka lo Bethel. Prea abaotem goal blo iu. Story witim olketa wea insaed full-taem service, and faendaot wat iu savve duim mekem iu qualify. Then plan for kasem datfala goal. Taem iu kasem, hem bae openem wei for iu kasem staka privilege lo service blo Jehovah. w23.12 22 ¶16-17

From big trabol barava klosap, iumi luksavve hem important for obeyim komand for duim preaching waka. Bat maet hem no isi for iumi focus lo ministry if iumi kasem problem saed lo selen or pipol againstim preaching waka blo iumi. Wat nao savve helpem iumi for focus lo waka blo Jehovah? Iumi need for trustim hao “Jehovah, komanda blo olketa army” hem stap witim iumi. Hem bae helpem iumi if iumi gohed focus lo waka blo hem winim wanem iumiseleva laekem. So iumi no need for fraetem eni samting. (Hag. 2:4) Jehovah laekem iumi for focus lo waka for mek disaepol wea savve sevem laef. Haggai encouragem pipol blo Jehovah for startim bak moa waka for buildim temple. If olketa duim olsem, Jehovah promis for ‘blessim olketa.’ (Hag. 2:​18, 19) Iumi tu savve sure hao Jehovah bae blessim iumi if iumi focus lo waka wea hem givim for iumi duim. w23.11 16 ¶8; 17 ¶11

Lo leta wea Paul raetem for olketa Christian lo Rome, hem sei iumi evriwan sin. So why nao God savve hapi lo iumi and ting lo iumi olsem iumi raeteous? For helpem olketa faithful Christian kasem ansa for datfala kwestin, Paul iusim example blo Abraham. Jehovah kolem Abraham raeteous taem hem stap lo Canaan. Why nao Jehovah ting lo Abraham olsem hem raeteous? Hao, hem bikos Abraham obeyim Law blo Moses? Nomoa. (Rome 4:13) Jehovah givim datfala Law lo olketa Israelite 400 year bihaen hem sei Abraham raeteous. If olsem, then why nao God sei Abraham raeteous? From Jehovah kaen tumas, hem sei Abraham raeteous bikos lo faith blo hem.—Rome 4:​2-4. w23.12 3 ¶4-5

Lo datfala sem naet wea Nathan talem lo King David wat hem stap lo text for tuday, Jehovah talem Nathan hao David bae no buildim datfala temple. (1 Chron. 17:​3, 4, 11, 12) Wat nao David duim taem hem herem datfala nius? Hem start for hipimap selen and building material wea son blo Solomon bae needim for datfala project. (1 Chron. 29:​1-5) Stretawe bihaen David herem dat bae hem no buildim temple, Jehovah mekem wanfala covenant witim hem. Jehovah promis hao wanfala lo laen blo David bae rul for olowe. (2 Sam. 7:16) Lo niu world, insaed datfala Thousand Year Rul blo Jesus, David bae hapi for savve hao King Jesus hem kam from laen blo hem! Disfala story helpem iumi for luksavve hao nomata iumi no fit for duim evri samting wea iumi hope for duim for Jehovah, God maet givim iumi olketa nara blessing wea iumi no expectim. w23.04 16 ¶8-10

Wei for readim samfala chapter or Bible buk maet savve comfortim iu taem iu fraet. For example, maet iu faendem samfala naes encouragement taem iu readim Bible buk Job, Psalms, and Proverbs, and samfala toktok blo Jesus lo Matthew chapter 6. Taem iu prea lo Jehovah and readim Bible, iu bae kasem comfort from hem. Iumi savve sure hao Jehovah bae evritaem helpem iumi taem iumi kasem hard taem. No enitaem bae Jehovah lusim iumi. (Ps. 23:4) Jehovah promis for gaedem, strongim, sapotim, and comfortim iumi. Isaiah 26:3 hem story olsem abaotem Jehovah: “Iu bae protectim olketa wea barava depend lo iu. Peace wea iu givim lo olketa bae no savve finis, bikos olketa putim trust blo olketa lo iu.” So trustim Jehovah, and duim evri samting wea iu savve duim for kasem gud samting from help blo hem. If iu duim datwan, iu bae kasem bak strong blo iu nomata iu kasem hard taem. w24.01 25 ¶16-17

Disfala profesi lo text for tuday hem fulfill distaem. Nara encouraging toktok hia hem fitim taem blo iumi tu: “Evri son blo iu, Jehovah nao bae teachim olketa, and peace wea olketa son blo iu garem bae kamap evriwea. Lo raeteous fasin blo mi, bae mi mekem iu kamap strong. . . . Iu bae no fraetem eni samting and no eniting for iu wari lo hem, bikos datfala samting bae no kam klosap lo iu.” (Isa. 54:​13, 14) Nomata Satan hem “god bilong disfala world,” hem no garem paoa for stopem waka wea pipol blo Jehovah duim for teachim olketa narawan abaotem Jehovah. (2 Cor. 4:4) Jehovah mekem tru worship kamap finis, and no eni samting bae spoelem moa. Tru worship bae gohed for olowe. No eni weapon wea olketa wakem for againstim iumi bae win! w24.02 4 ¶10

Iumi olketa Christian ting serious abaotem dedication vow blo iumi for Jehovah. Diswan affectim olketa disison and samfala samting wea iumi duim witim famili blo iumi. Iumi waka hard for kea for olketa responsibility blo iumi for famili, bat iumi bae no letem wat olketa famili member laekem for kamap first lo wat Jehovah laekem iumi for duim. (Matt. 10:​35, 36; 1 Tim. 5:8) Samfala taem, maet iumi mekem olketa disison wea olketa relative no hapi lo hem bikos iumi laek for mekem Jehovah nao hapi. Hem nao startim famili arrangement, and hem laekem iumi for garem hapi famili. (Eph. 3:​14, 15) If iumi laek for garem trufala hapi, iumi need for duim olketa samting followim wei blo Jehovah. Iumi sure Jehovah tinghae lo olketa sakrifaes wea iumi duim for worshipim hem taem iumi kea and showimaot love and respect for famili blo iumi.—Rome 12:10. w24.02 18 ¶11, 13