March

Niu world hem no kam yet. Bat, tingim samfala samting wea iumi savve lukim distaem, olsem olketa star, tree, animal, and iumi olketa human being. Olketa samting hia no stap bifor, nomata olsem iumi lukim dat evri samting hia really stap raonem iumi. Olketa stap bikos Jehovah nao creatim. (Gen. 1:​1, 26, 27) God promis for wakem wanfala niu world. Hem bae fulfillim datfala promis. Lo niu world, pipol bae healthy and enjoyim laef olowe. Lo taem wea God markem, bae iumi lukim datfala niu world kamap real olsem evri samting wea iumi lukim raonem iumi distaem. (Isa. 65:17; Rev. 21:​3, 4) Go kasem datfala taem, iusim evri chance wea iu garem for strongim faith blo iu. Gohed strongim wei wea iu tinghae lo ransom. Ting abaotem paoa blo Jehovah. Spendem staka taem for duim olketa spiritual samting. Taem iu duim datwan, iu bae wanfala lo ‘olketa wea kasem samting wea God promisim bikos iufala garem faith and iufala patient.’—Heb. 6:​11, 12. w23.04 31 ¶18-19

Jesus luk ap lo heven and prea front lo evriwan. Hem laekem evriwan for luksavve Jehovah nao duim samting wea redi for happen. Then Jesus singaot olsem: “Lazarus, iu kamaot!” And Lazarus wakabaot kamaot from datfala tomb! Jesus duim samting wea pipol tingse hem hard for happen. Disfala story strongim faith blo iumi lo resurrection hope. Hao nao olsem? Tingim wat Jesus promisim lo Martha: “Brata bilong iu bae laef bak.” (John 11:23) Olsem Dadi blo hem, Jesus laek duim wanem hem promisim and hem garem paoa for duim datwan. Olketa tias blo Jesus showimaot hem laek for finisim dae and sorre wea kamaot from datwan. And taem Lazarus wakabaot kamaot from datfala tomb, datwan pruvim hao Jesus garem paoa for resurrectim pipol. And tu, tingim wanem Jesus talem lo Martha wea stap lo text for tuday. Iumi garem gud reason for bilivim hao God bae fulfillim promis blo hem abaotem resurrection. w23.04 11-12 ¶15-16

Taem iumi start for luksavve lo will blo Jehovah for iumi, maet iumi need for changem wanem iumi prea for hem. Iumi mas tingim hao Jehovah garem plan and hem bae fulfillim lo taem wea hem markem. Insaed datfala plan, hem bae finisim for olowe evri nogud samting wea kosim iumi for safa distaem, olsem natural disaster, sik, and dae. Jehovah bae iusim Kingdom blo hem for mekem plan blo hem kamap tru. (Dan. 2:44; Rev. 21:​3, 4) Bat, go kasem datfala taem, Jehovah letem Satan for gohed rulim world. (John 12:31; Rev. 12:9) If Jehovah stretem evri problem lo world distaem, then maet bae hem luk olsem rul blo Satan hem gud nomoa. So nomata iumi mas weit for Jehovah fulfillim samfala promis blo hem, datwan no minim bae hem no helpem iumi. Jehovah savve duim samting for helpem iumi. w23.05 8 ¶4; 9-10 ¶7-8

Hao nao iumi savve helpem olketa narawan for kasem gud samting from Memorial? First samting, hem for invaetem olketa. Iumi savve invaetem olketa wea iumi meetim lo ministry. And tu, iumi savve mekem list lo olketa wea iumi laek invaetem, olsem olketa relative, workmate, skulmate, and olketa narawan wea iumi savve lo olketa. Nomata sapos iumi no garem inaf printed copy blo invitation, iumi savve sendem link for olketa. Maet iumi sapraes hao staka maet disaed for attend! (Eccl. 11:6) Hem gud for iumi tingim hao samwan wea iumi invaetem maet garem olketa kwestin, especially if no enitaem olketa attendim eni meeting blo iumi. So iumi savve redi for ansarem eni kwestin wea olketa maet garem. Even afta olketa attendim Memorial, maet olketa niu wan wea interest garem samfala kwestin moa. Taem iumi duim datwan, iumi helpem olketa wea “laekem laef olowe” for kasem gud samting from datfala program.—Acts 13:48. w24.01 12 ¶13, 15; 13 ¶16

Bible storyim eitfala resurrection wea happen lo earth. Hem gud for studyim each wan lo olketa story hia. And trae for lanem samting from olketa story hia. Tingim hao each story showimaot God barava laek for resurrection pipol and hem garem paoa for duim datwan. Barava important resurrection wea iumi need for ting raonem nao, hem resurrection blo Jesus. Remember, staka handred pipol nao witnessim dat Jesus hem laef bak, and datwan hem strong faondeson lo faith blo iumi. (1 Cor. 15:​3-6, 20-22) Iumi thankiu lo Jehovah for datfala promis blo hem for resurrectim olketa wea dae! Iumi sure disfala promis bae kamap tru bikos Jehovah barava laek for duim and garem paoa for duim datwan. Iumi laek gohed strongim faith blo iumi lo datfala nambawan hope. Taem iumi duim datwan, iumi bae fren gud witim God wea talem disfala promis lo each wan lo iumi, ‘Olketa wea iu lovem bae laef bak!’—John 11:23. w23.04 8 ¶2; 12 ¶17; 13 ¶20

For luksavve lo limit blo man hem join witim wei for hambol. Iumi luksavve lo limit blo iumi taem iumi garem balance tingting abaotem iumiseleva and luksavve iumi no fit for duim samfala samting. Iumi showim iumi hambol taem iumi no ting lo iumiseleva olsem iumi important. (Phil. 2:3) So man wea luksavve lo limit blo hem, hem hambol tu. Gideon hem man wea luksavve lo limit blo hem and hem hambol. Taem angel blo Jehovah talem Gideon dat Jehovah chusim hem for sevem Israel from olketa paoaful Midianite, datfala hambol man sei: “Lo tribe blo Manasseh, famili laen blo mifala hem smol nomoa, and lo famili blo dadi blo mi, mi no important nomoa.” (Judg. 6:15) Gideon feel hem no qualify, bat Jehovah savve hem fit for duim. And Jehovah helpem Gideon for barava duim gud datfala assignment. Olketa elder duim best for luksavve lo limit blo olketa and hambol taem olketa duim evri waka blo olketa. (Acts 20:​18, 19) Olketa no tok praod abaotem wat olketa duim and knowledge blo olketa, and lo semtaem olketa no ting daonem olketa seleva from olketa no perfect and savve mekem mistek. w23.06 3 ¶4-5

Jesus bae smasem hed blo Satan, and datwan bae happen winim 1,000 year yet lo future. (Rev. 20:​7-10) Bifor datwan happen, Bible sei olketa big samting hia bae happen firstaem. First samting, olketa nation bae sei “iumi garem peace and stap gud nao!” (1 Thess. 5:​2, 3) Then “seknomoa,” big trabol bae start taem olketa nation attakim false religion. (Rev. 17:16) Bihaen datwan, Jesus bae judgem evri pipol and separatem olketa sheep from olketa goat. (Matt. 25:​31-33, 46) Bat lo datfala taem, Satan bae no stop for againstim Jehovah. From hem heitim pipol blo God, hem bae iusim olketa nation wea Bible kolem Gog from land blo Magog for attakim pipol blo Jehovah. (Ezek. 38:​2, 10, 11) Enitaem during lo big trabol, olketa anointed wan bae joinim Christ and army blo hem lo heven for faet lo war blo Armageddon, wea hem end blo datfala big trabol. (Matt. 24:31; Rev. 16:​14, 16) Then Wan Thousand Year Rul blo Christ ovarem earth bae start.—Rev. 20:6. w23.10 20-21 ¶9-10

Distaem staka servant blo Jehovah stap lo olketa kantri wea gavman banim waka blo iumi. Olsem Obadiah, olketa brata and sista hia showim respect lo olketa wea garem paoa, bat olketa no stop for worshipim Jehovah. (Matt. 22:21) Olketa showim olketa fraet lo God taem olketa obeyim God winim olketa man. (Acts 5:29) Olketa gohed for preach and duim olketa meeting lo secret wei. (Matt. 10:​16, 28) And olketa mek sure olketa brata and sista kasem spiritual kaikai wea olketa needim. Tingim example blo Henri wea stap lo wanfala kantri lo Africa wea gavman banim waka blo iumi for samfala taem. Lo datfala taem, Henri volunteer for givimaot spiritual kaikai lo olketa nara Witness. Henri sei: “Mi man for shame . . . Jehovah nao helpem mi for brave.” Hao, bae iu savve brave olsem Henri? Iu savve brave, if iu garem stretfala wei for fraet lo God. w23.06 16 ¶9, 11

Taem Adam and Eve againstim Jehovah, datwan maet luk olsem hem no possible for plan blo God for perfect pipol wea obey for fulimap disfala earth. Satan maet tingse Jehovah hem garem tu-thri option nomoa. Wanfala option hem for killim dae Adam and Eve and creatim nara perfect couple for fulfillim plan blo hem for iumi olketa man. Bat if God duim datwan, Satan bae accusim God and sei hem laea. Why nao olsem? Bikos lo Genesis 1:​28, Jehovah talem finis lo Adam and Eve hao olketa pikinini blo tufala bae fulimap disfala earth. Or maet Satan tingse Jehovah bae letem Adam and Eve for garem olketa pikinini, bat olketa bae no savve kamap perfect. (Eccl. 7:20; Rome 3:23) If olsem, Satan bae accusim Jehovah and sei plan blo hem fail. Why nao olsem? Bikos disfala option bae no fulfillim plan God for olketa perfect pikinini blo Adam and Eve wea obey, for fulimap Paradaes earth. w23.11 6 ¶15-16

Jehovah iusim Bible and organization blo hem for givim iumi klia direction. So iumi shud no addim moa eni instruction lo datwan. (Prov. 3:​5-7) Dastawe, iumi mas no duim olketa samting wea winim wanem olketa raetem finis lo Bible or mekem olketa rul for olketa brata and sista abaotem olketa personal samting. Satan iusim “tingting bilong man” and “olketa iusles samting bilong disfala world” for misleadim and divaedem pipol. (Col. 2:8) Lo first century, diswan includim olketa teaching wea base lo idea blo man, teaching blo olketa Jew wea no base lo olketa scripture, and teaching wea sei olketa Christian mas keepim Law blo Moses. Olketa information hia misleadim pipol bikos hem mekem pipol for no laek lisin lo tru wisdom wea kam from Jehovah. Distaem, Satan iusim media and social network for spredim olketa laea story wea no garem pruv and olketa false report wea olketa leader blo politik nao promotim. w23.07 16-17 ¶11-12

Nomata Satan and Adam and Eve againstim Jehovah, Jehovah garem best wei for fulfillim plan blo hem wea Satan nating imaginim. For pruvim Jehovah hem no laea, hem letem Adam and Eve for garem olketa pikinini. And Jehovah showimaot if hem talem samting, hem bae duim and no eni samting savve stopem hem. Jehovah mek sure plan blo hem bae kamap tru, taem hem provaedem wanfala “pikinini” wea bae sevem olketa pikinini blo Adam and Eve wea obey. (Gen. 3:15; 22:18) Satan hem no expectim datfala ransom arrangement blo Jehovah! Why nao olsem? Bikos datfala arrangement hem base lo trufala love. (Matt. 20:28; John 3:16) Satan hem selfish, hem no garem datfala wei. So wat nao bae happen bikos lo disfala ransom arrangement? Lo end blo 1,000 year rul blo Christ, olketa perfect pikinini blo Adam and Eve wea obey bae fulimap disfala paradaes earth, wea hem nao original plan blo Jehovah. w23.11 6 ¶17

Iumi obeyim law blo Jehovah abaotem hao laef and blood hem holy. Why? Bikos Jehovah sei blood hem representim laef, and laef hem spesol present from hem. (Lev. 17:14) Lo firstaem wea Jehovah letem man for kaikaim animal, hem talem for mas no kaikaim blood. (Gen. 9:4) Hem repeatim sem komand taem hem givim Law blo Moses lo olketa Israelite. (Lev. 17:10) And hem givim direction lo governing body lo first century for talem evri Christian for mas “stap klia long blood.” (Acts 15:​28, 29) Iumi faithful for obeyim datfala komand taem iumi disaedem wanem kaen medical treatment for acceptim. Iumi barava obeyim tu hae standard blo Jehovah abaotem sex. Aposol Paul iusim interesting tokpiksa taem hem sei iumi mas “killim dae feeling” for laek durong, diswan minim iumi mas barava waka hard for aotem eni feeling for laek durong. Iumi no laek for lukim or duim eni samting wea savve lead go for durong.—Col. 3:5; Job 31:1. w23.07 15 ¶5-6

Waswe, Samson lovem Delilah tumas dastawe hem no luksavve wat Delilah plan for duim? Nomata wat nao reason, Delilah gohed putim pressure lo Samson for talem wat nao mekem hem strong tumas, and gogo Samson talem hem nao. Sorre samting, bad disison wea Samson mekem leadim hem for lusim strong blo hem and hem no kasem help from Jehovah for lelebet taem. (Judg. 16:​16-20) Samson kasem olketa barava nogud samting bikos hem trustim Delilah and no trustim Jehovah. Olketa Philistine kasholem hem and aotem tufala eye blo hem. Olketa prisonim hem lo Gaza, and pipol lo there mekem hem slave for smasem grain. Then olketa mek shame lo Samson lo taem blo wanfala celebration blo olketa Philistine. Lo datfala taem, olketa offerim sakrifaes lo false god blo olketa, Dagon, bikos olketa sei hem nao helpem olketa for kasholem Samson. Olketa tekem kam Samson from prison lo datfala party for hem “duim samfala samting for [olketa] laf lo hem,” and for mekfani lo hem.—Judg. 16:​21-25. w23.09 5-6 ¶13-14

Maet wanfala workmate or skulmate kwestinim why iumi followim olketa hae standard lo Bible. Iumi bae duim best for defendim biliv blo iumi, bat lo semtaem respectim tingting blo hem tu. (1 Pet. 3:15) So instead for iumi ting lo kwestin blo hem olsem hem challengem iumi, hem gud for iumi ting lo datwan olsem wanfala kwestin wea important lo hem. Nomata wat nao maet mekem samwan for askem wanfala kwestin, hem gud for iumi respond lo kaen and hambol wei. Maet wanem iumi talem savve changem tingting blo hem. If wanfala workmate askem why iumi no celebratem birthday, hem gud for tingim diswan: Hao, hem askem disfala kwestin bikos hem tingse iumi no savve garem olketa hapitaem? Iumi savve helpem workmate blo iumi for no feel olsem taem iumi appreciatim wei wea hem tingim olketa workmate. Datwan maet givim iumi chance for story gud abaotem wat Bible talem abaotem topic blo birthday. w23.09 17 ¶10-11

Iumi garem spesol privilege for iusim lelebet taem wea stap for preach lo pipol evriwea lo world. Aposol Peter encouragem iumi for “tingim evritaem datfala day” blo Jehovah. (2 Pet. 3:​11, 12) Wat nao iumi savve duim? Each day, hem gud for iumi trae ting abaotem olketa blessing lo niu world. Imaginim dat iu brithim fresh air, kaikaim healthy kaikai, welkamim bak olketa loved wan wea resurrect, and for teachim pipol wea dae long taem go finis abaotem olketa Bible profesi wea fulfill. For ting raonem olketa samting hia savve helpem iumi for weit patient for datfala taem, and helpem iumi for sure hao end hem barava klosap. From iumi ‘savve long olketa samting’ wea bae happen lo future, olketa false teacher bae no ‘leadim iumi go rong.’ w23.09 27 ¶5-6

Olketa young wan savve stap between olketa nara young wan wea “no obeyim dadi and mami.” (2 Tim. 3:​1, 2) Why nao staka no laek obey? Samfala parents duim opposite samting from wat olketa talem lo pikinini. And pikinini feel hao datwan hem unfair. Olketa narawan tingse advaes blo parents hem aot-of-date, no practical, and strict tumas. Olketa young wan, hao samfala taem iu feel olsem tu? Staka faendem hard for followim disfala komand blo Jehovah wea stap lo text for tuday. Wat nao savve helpem iu for obey? Jesus showimaot best example lo wei for obey and iu savve lane from hem. (1 Pet. 2:​21-24) Hem perfect bat parents blo hem no perfect. Bat Jesus honorim tufala nomata tufala mekem mistek and no minim hem samfala taem.—Ex. 20:12. w23.10 7 ¶4-5

Aposol Paul explainim hao olketa sakrifaes wea Law sei olketa mas givim, hem no mekem olketa for kasem forgiveness for olowe. Dastawe ‘God aotem’ datfala Law. Then Paul teachim samfala deep teaching lo olketa. Hem storyim wanfala “hope wea winim datwan” wea base lo sakrifaes blo Jesus wea savve barava helpem olketa for “fren gud witim God.” (Heb. 7:19) Paul explainim lo olketa Hebrew Christian dat hao olketa worshipim Jehovah distaem, hem barava gud winim hao olketa worshipim Jehovah bifor lo Jew religion. Arrangement wea olketa Jew followim hem “shadow nomoa bilong olketa samting wea bae kam, bat Christ nao . . . datfala shadow [or real samting].” (Col. 2:17) Shadow blo wanfala samting hem sheip nomoa blo wanfala real samting. So pattern lo worship blo olketa Jew bifor hem shadow nomoa bikos real samting bae kamap. Disfala real samting hem arrangement blo Jehovah wea helpem iumi for kasem forgiveness for olketa sin blo iumi mekem hem acceptim worship blo iumi. So hem barava important for minim gud datwan. w23.10 25 ¶4-5

Daniel chapter 11 storyim tufala king, or politikol paoa, wea compete witim each other for paoa. Taem iumi comparem disfala profesi witim olketa nara profesi lo Bible, iumi luksavve “king blo north” hem nao Russia and olketa allies blo hem, and “king blo south” hem nao England-America World Paoa. Pipol blo God wea stap anda lo rul blo “king blo north” olketa kasem persecution from datfala king. Olketa killim nogud samfala Witness and putim olketa lo prison from olketa faithful lo Jehovah. Instead for olketa brata and sista fraet bikos lo persecution wea olketa kasem from “king blo north,” datwan just buildim go moa faith blo olketa. Why nao olsem? Bikos olketa brata and sista hia luksavve persecution wea kasem pipol blo God hem fulfillim profesi blo Daniel. (Dan. 11:41) For luksavve lo datwan, hem savve strongim hope blo iumi and helpem iumi for gohed faithful. w23.08 11 ¶15-16

From Jehovah lovem iumi, hem kwiktaem for minim feeling blo iumi and laek for protectim iumi. Taem iumi sorre, hem tu sorre. So iumi savve sure hem bae ansarem iumi taem iumi prea lo hem: “Protectim mi olsem pupil lo eye blo iu.” (Ps. 17:8) Eye hem wanfala sensitive and spesol part lo body. So taem Jehovah comparem iumi witim pupil lo eye blo hem, hem olsem Jehovah sei, ‘Eniwan wea spoelem iufala, pipol blo mi, hem spoelem wat hem spesol lo mi.’ Jehovah laekem iumi for trustim dat hem lovem iumi each wan. Bat Jehovah savve from olketa samting wea iumi duim bifor, maet hem mekem iumi wonder if hem bae lovem iumi. Or maet iumi feisim wanfala situation distaem wea mekem iumi daotem love blo Jehovah. Wat nao bae strongim trust blo iumi lo hem? Bae iumi lane abaotem hao Jehovah showim hem lovem Jesus, olketa anointed Christian, and iumi evriwan. w24.01 27-28 ¶6-7

Ezra bin lukim hao Jehovah helpem pipol blo Hem lo taem blo test. Staka year go finis, lo 484 B.C.E., luk olsem Ezra stap lo Babylon taem King Ahasuerus givim order for killim dae evri Jew wea stap anda lo rul blo Persia. (Esther 3:​7, 13-15) So laef blo Ezra and evri Jew stap lo danger! Taem olketa herem diswan, olketa wari tumas so olketa fasting and gohed for krae taem olketa prea lo Jehovah for help. (Esther 4:3) Imaginim hao Ezra and olketa Jew mas feel taem olketa wea plan for killim olketa, olketa nao dae! (Esther 9:​1, 2) For sure, wat happen lo datfala taem redyim Ezra for olketa hard taem lo future, and strongim go moa trust blo hem lo hao Jehovah savve protectim pipol blo Hem. w23.11 17 ¶12-13

Aposol Paul storyim wei for “duim samting wea law talem,” wea hem nao Law blo Moses, wea Jehovah givim lo Maunt Sinai. (Rome 3:​21, 28) Luk olsem lo taem blo Paul, samfala Jew Christian faendem hard for acceptim hao Law blo Moses and olketa samting wea Law sei for man duim hem finis. So Paul iusim example blo Abraham for pruvim hao man no need for followim Law for God sei hem raeteous. Bat Paul sei iumi need for garem faith. Datwan hem encouragem iumi bikos taem iumi savve dat if iumi garem faith lo God and Christ, God savve ting lo iumi olsem iumi raeteous. Bat olketa waka wea James chapter 2 storyim hem no wei for “duim samting wea law talem,” olsem Paul storyim. James story abaotem olketa gud samting or waka wea olketa Christian duim evriday for helpem olketa narawan. (Jas. 2:24) Olketa samting wea wanfala Christian duim hem showim if hem garem strong faith lo God or nomoa. w23.12 3 ¶8; 4-5 ¶10-11

Olketa sista wea chus for marit shud chusim gud brata wea olketa bae maritim. Diswan hem wanfala barava important disison wea iu bae mekem. Hem gud for tingim tu hao taem iu marit, bae iu stap anda lo hedship blo man wea iu maritim. (Rome 7:2; Eph. 5:33) So tingim diswan: ‘Hao, hem wanfala mature Christian brata? Hao, olketa spiritual samting hem main samting lo laef blo hem? Hao, hem mekem olketa wise disison? Hao, hem savve talem sapos hem nao rong? Hao, hem respectim olketa woman? Waswe, hem savve helpem mi for gohed fren gud witim Jehovah, provaed for mi, and kamap gud fren blo mi? Tru samting nao, if iu laek for faendem wanfala gud hasband, iu tu need for prepare for kamap wanfala gud waef. Wanfala gud waef hem “wanfala helper” wea “barava fitim” hasband blo hem. (Gen. 2:18) And bikos waef lovem Jehovah, hem duim best blo hem for pipol lukim olketa gudfala wei blo hasband blo hem. (Prov. 31:​11, 12; 1 Tim. 3:11) Iu savve prepare for disfala responsibility taem iu strongim love blo iu for Jehovah, and gohed helpem olketa narawan lo famili and lo kongregeson. w23.12 22-23 ¶18-19

Jehovah promis for givim wisdom wea iumi needim for mekem olketa gud disison. Iumi barava needim wisdom from Jehovah especially taem iumi bae mekem disison wea bae affectim full laef blo iumi. Hem givim iumi tu paoa for no givap taem iumi feisim hard taem. Olsem hem duim for aposol Paul, Jehovah bae givim iumi paoa for deal witim olketa hard taem wea iumi feisim. (Phil. 4:13) Wanfala samting wea hem iusim nao, hem olketa brata and sista. Lo naet bifor Jesus sakrifaesim laef blo hem, hem prea strong lo Jehovah. Hem begim Jehovah for no letem pipol for tingse hem man wea againstim God and for olketa judgem hem bikos lo datwan. Jehovah no duim datwan, bat hem sendem wanfala angel for strongim hem. (Luke 22:​42, 43) Jehovah maet helpem iumi tu taem hem iusim wanfala brata or sista for ringim or visitim iumi for encouragem iumi. Iumi evriwan savve lukaotem chance for talem “gud toktok” lo olketa brata and sista.—Provebs 12:​25, SIPB. w23.05 10-11 ¶9-11

Olketa inactive wan wea attendim Memorial maet olketa fraet nogud iumi talem or duim eni samting wea no kaen lo olketa. So iumi shud no askem olketa kaen kwestin wea maet mekem olketa feel shame or feel nogud. Olketa brata and sista hia olketa part lo spiritual famili blo iumi. Iumi hapi for worshipim Jehovah tugeta moa witim olketa! (Ps. 119:176; Acts 20:35) Iumi barava hapi hao Jesus talem iumi for rememberim dae blo hem each year, and iumi understandim why datwan important. Taem iumi attendim Memorial, iumiseleva and olketa narawan kasem staka gud samting. (Isa. 48:​17, 18) Iumi strongim go moa love blo iumi for Jehovah and Jesus. Iumi duim samting wea showimaot iumi appreciatim wat tufala duim for iumi. Iumi fren klos go moa witim olketa brata and sista. And iumi helpem olketa narawan for savve abaotem hao olketa tu savve enjoyim olketa blessing wea ransom mekem hem possible. So iumi evriwan laek duim best blo iumi distaem, for redi for Memorial dis year, wea hem wanfala barava important day lo year! w24.01 14 ¶18-19

Hao nao Jehovah leadim iumi? Main samting wea hem iusim, hem Bible. Hem iusim tu olketa man for leadim iumi. For example, hem iusim “datfala wakaman wea faithful and wise” for provaedem spiritual kaikai wea helpem iumi for mekem olketa wise disison. (Matt. 24:45) Jehovah iusim tu olketa man olsem olketa circuit overseer and olketa elder for leadim iumi. Olketa savve encouragem and givim instruction wea savve helpem iumi for deal witim olketa hard taem wea kasem iumi. Iumi barava hapi for kasem direction from Jehovah wea iumi savve trustim lo olketa last day distaem wea no isi! Datwan helpem iumi for fren gud witim Jehovah and for gohed followim road for kasem laef olowe. Bat samfala taem maet hem challenging for iumi followim direction blo Jehovah, especially taem hem iusim olketa man wea no perfect for givim. Lo taem olsem, iumi need for trustim hao Jehovah nao leadim pipol blo hem and taem iumi gohed followim direction blo Hem, datwan bae helpem iumi. w24.02 20 ¶2-3

Iumi savve gohed strongim love blo iumi for God taem iumi studyim gud Bible. Taem iu readim Bible, trae for ting raonem wat nao diswan teachim mi abaotem Jehovah. Tingim diswan: ‘Hao nao disfala story showim Jehovah lovem mi? Wat nao mi lanem from disfala story wea mekem mi for lovem Jehovah?’ Iumi savve gohed strongim love blo iumi for Jehovah tu taem iumi prea evritaem from heart. (Ps. 25:​4, 5) Taem iumi duim olsem, Jehovah bae ansarem prea blo iumi. (1 John 3:​21, 22) Iumi tu mas strongim love blo iumi for olketa narawan. Samfala year bihaen aposol Paul kamap Christian hem meetim Timothy, wanfala young man wea lovem Jehovah and pipol. Paul talem kongregeson lo Philippi: “Mi no savve tingim eniwan wea olsem Timothy wea bae barava tingim and lukaftarem iufala.” (Phil. 2:20) Paul barava tinghae lo Timothy bikos hem lovem olketa brata and sista. Masbi olketa kongregeson wea Timothy visitim luk forward for hem visitim olketa.—1 Cor. 4:17. w23.07 9 ¶7-10

Bifor olketa Israelite go insaed Promis Land, Moses hem dae. Hao, Jehovah stop nao for helpem pipol blo hem afta datfala faithful servant blo hem dae? Nomoa. Taem olketa faithful, Jehovah gohed provaed for olketa. Bifor Moses dae, Jehovah talem hem for markem Joshua for leadim pipol blo hem. Moses hem bin trainim Joshua for staka year. (Ex. 33:11; Deut. 34:9) And tu, staka man wea fit for lead olketa stap. Olketa hia hed ovarem wan thousand pipol, hed ovarem wan handred, hed ovarem fifti, and even hed ovarem ten. (Deut. 1:15) God barava lukaftarem gud pipol blo hem. Iumi lukim sem samting tu lo example blo Elijah. For staka year, hem leadim olketa Israelite lo tru worship. Bat gogo, assignment blo Elijah hem change, and Jehovah transfarem hem go lo south Judah. (2 Ki. 2:1; 2 Chron. 21:12) Hao, datwan minim God lusim faithful pipol blo hem lo ten-tribe kingdom blo Israel? Nomoa. Elijah bin trainim Elisha for staka year. So no eni samting spoelem plan blo Jehovah and hem kea for olketa wea faithful for worshipim hem. w24.02 5 ¶12

Olketa Christian lo Ephesus acceptim laet from Word blo God. (Ps. 119:105) Olketa lusim false religion and olketa nogud wei. Olketa “followim wei” blo God and duim best blo olketa for worshipim Jehovah and mekem hem hapi. (Eph. 5:1) Lo sem wei, taem iumi no lanem truth yet iumi tu stap lo darkness bikos lo false religion and nogud wei blo iumi. Samfala lo iumi celebratem olketa holiday blo false religion, and samfala garem laef stael blo world. Bat iumi mekem olketa change lo laef blo iumi taem iumi lanem standard blo Jehovah abaotem samting wea hem stret and no stret. Iumi start for followim olketa raeteous standard blo hem. From datwan, iumi enjoyim staka blessing. (Isa. 48:17) Nomata olsem, iumi still feisim olketa challenge distaem. Iumi need for stap klia lo darkness wea iumi lusim finis and ‘gohed for showimaot lo laef blo iumi, hao iumi olketa pikinini blo laet.’ w24.03 21 ¶6-7

Maet iu ting iu no redi yet for dedicate and baptaes. Maet iu need for mekem samfala change lo laef blo iu for followim olketa standard blo Jehovah, or maet iu still needim taem for strongim faith blo iu. (Col. 2:​6, 7) Hao evri student muv ahed hem no semsem, and age blo olketa young wan wea disaed for dedicate and baptaes tu hem no semsem. Trae for ting raonem wat iu savve duim for impruvim spiritual laef blo iu and no comparem datwan witim narawan. (Gal. 6:​4, 5) Maet iu luksavve iu no redi yet for dedicatem iuseleva lo Jehovah. Nomata olsem, gohed for markem datwan olsem goal blo iu. Prea lo Jehovah for helpem iu for mekem eni change wea iu need for duim lo laef blo iu. (Phil. 2:13) Iu savve barava sure Jehovah bae herem prea blo iu and helpem iu.—1 John 5:14. w24.03 5 ¶9-10

Wantaem, Sarah feel nogud and talem feeling blo hem lo Abraham, and hem blamem Abraham tu. Abraham savve hao Sarah evritaem respectim and sapotim hem. Abraham lisin lo hem and trae for stretem datfala problem. (Gen. 16:​5, 6) Wat nao iumi savve lanem? Olketa hasband, iufala garem authority for mekem disison for famili blo iu. (1 Cor. 11:3) Nomata olsem, iu showimaot love taem iu lisin gud and askem tingting blo waef bifor iu mekem wanfala disison, especially if datfala disison bae affectim waef. (1 Cor. 13:​4, 5) Lo narataem, Abraham disaed for welkamim olketa visitor wea tufala no expectim. Hem askem Sarah for lusim waka wea hem duim and talem hem for wakem staka bred. (Gen. 18:6) Sarah kwiktaem sapotim disison blo Abraham. Olketa waef, iufala savve followim example blo Sarah taem iufala sapotim disison blo hasband. Taem iu duim datwan, iu strongim marit blo iu.—1 Pet. 3:​5, 6. w23.05 24-25 ¶16-17

Bihaen Gideon kamap judge, hem mas deal witim situation wea hem challenging for hem obey and for no fraet. Hem kasem wanfala dangerous assignment for distroem Baal altar blo dadi blo hem. (Judg. 6:​25, 26) Then, taem Gideon garem wanfala army, hem kasem direction tufala taem for katem daon namba blo olketa soldia. (Judg. 7:​2-7) And last samting, hem kasem instruction for attakim camp blo enemy lo midol naet. (Judg. 7:​9-11) Olketa elder shud “willing for obey.” Elder wea obey hem willing for followim wat Bible talem and direction wea kam from organization blo God. Taem hem duim olsem, hem showim gud example for olketa narawan. Bat, situation maet kamap wea mekem hem challenging for obey. For example, maet hem faendem hard for gohed followim olketa direction. Lo samfala situation, maet hem tingse samfala direction hem no really practical or wise. Or maet hem kasem assignment wea end ap, olketa savve arrestim hem. Hao nao olketa elder savve followim example blo Gideon for obey lo olketa situation olsem? Lisin gud lo direction and followim. w23.06 4-5 ¶9-11