October

Waswe, samfala taem iu faendem hem hard for obey? Datwan happen lo King David, so hem prea lo God: “Plis mekem mi wiling fo obeim yu.” (Sams 51:​12, SIPB) David lovem Jehovah. Nomata olsem, samfala taem hem faendem hard for obey, and datwan savve happen lo iumi tu. Why nao iumi faendem hard for obey? First samting, iumi inheritim wei for disobey. Second samting, Satan gohed trae for mekem iumi bighed againstim Jehovah, olsem hem tu. (2 Cor. 11:3) Third samting, iumi stap lo world wea pipol garem bighed attitude, wea hem nao “tingting bilong pipol” wea garem “paoa ovarem olketa wea no obey.” (Eph. 2:2) So iumi mas waka hard for faet againstim wei wea iumi no perfect, Devil, and disfala world, mekem iumi obeyim Jehovah and olketa wea hem givim authority lo olketa. w23.10 6 ¶1

Wat nao iumi lanem from mirakol wea Jesus duim for changem wata for kamap wine? Iumi lanem wei for hambol. Jesus no tok praod abaotem datfala mirakol, and no enitaem Jesus tok praod abaotem eni samting hem duim. Bat hem evritaem hambol and mekhae lo Dadi blo hem. (John 5:​19, 30; 8:28) If iumi hambol olsem Jesus, bae iumi no tinghae lo iumiseleva and tok praod abaotem eni samting iumi duim. Iumi bae no laek tok praod abaotem iumiseleva, bat evritaem iumi laek mekhae lo nambawan God blo iumi. (Jer. 9:​23, 24) Iumi laek for mekhae lo Jehovah bikos hem nao fit for kasem praise. Datwan hem barava tru, bikos if Jehovah no helpem iumi hard for iumi duim eni gud samting! (1 Cor. 1:​26-31.) Taem iumi hambol bae iumi no mekhae lo gud samting wea iumi duim for olketa narawan. Iumi hapi nomoa bikos Jehovah nao lukim and tinghae lo wat iumi duim. (Comparem Matthew 6:​2-4; Heb. 13:16) Tru nao, iumi mekem Jehovah hapi taem iumi followim example blo Jesus for hambol.—1 Pet. 5:6. w23.04 4 ¶9; 5 ¶11-12

Spirit blo Jehovah muvim aposol Paul for encouragem olketa Christian for tingim narawan. Hao nao iumi savve followim datfala kaonsel lo olketa meeting? Iumi duim datwan, taem iumi tingim hao olketa narawan tu laek for koment. Tingim diswan. Taem iu story witim olketa frens blo iu, waswe, iuseleva nomoa bae story and no givim chance lo olketa narawan? Nomoa! Iu laekem olketa tu for story. Olsem tu, lo olketa meeting iumi laek for givim chance tu lo olketa narawan for koment. Wanfala best wei for encouragem olketa brata and sista blo iumi hem taem iumi givim chance for olketa talemaot faith blo olketa. (1 Cor. 10:24) So givim short koment, and datwan bae givim chance for olketa narawan for koment tu. Nomata taem iu givim short koment, no storyim staka point tumas. If iu storyim evri samting lo paragraf bae olketa narawan no garem eniting for koment lo hem. w23.04 22-23 ¶11-13

Iumi mas tingim dat hem important tumas for gohed helpem olketa narawan, especially lo ministry. Iumi need for flexible lo ministry. Iumi savve meetim pipol wea garem olketa difren biliv, attitude, and difren baekgraon. Iumi savve lane from example blo aposol Paul for flexible. Jesus appointim Paul for duim waka olsem “aposol for preach long pipol wea no Jew.” (Rome 11:13) So Paul preach lo olketa Jew, Greek, educated pipol, pipol lo vilij, gavman offficial, and olketa king. So for message blo Paul kasem heart blo olketa difren pipol hia, Paul mas “change for fitim evri didifren kaen man.” (1 Cor. 9:​19-22) Hem tingting abaotem culture, baekgraon, and biliv blo olketa and hem changem story for fitim olketa. Iumi tu savve impruv lo ministry if iumi flexible and change fitim each person wea iumi meetim lo ministry. w23.07 23 ¶11-12

Pipol wea hambol olketa strong, olketa no wik. Man need for strong mekem hem savve gohed keepim peace taem hem deal witim eni hard situation. Hambol fasin hem wanfala lo olketa frut blo “spirit.” (Gal. 5:​22, 23) Datfala Greek word for “hambol,” samfala taem olketa savve iusim for storyim wanfala wild horse wea olketa mekem for kamap tame. Tingim wanfala wild horse wea kamap tame. Hem savve tame bat hem barava strong. Olsem datfala wild horse, hao nao iumi savve impruv lo wei for hambol and lo semtaem keepim strong blo iumi? Iumi no savve duim diswan witim own strong blo iumi. Iumi need for prea for holy spirit blo God, and askem hem for helpem iumi for garem disfala naes wei. Staka experience showimaot hao olketa brata and sista duim diswan. For example, staka Witness respond lo hambol wei taem pipol argue witim olketa. And datwan givim gud witness lo olketa narawan.—2 Tim. 2:​24, 25. w23.09 15 ¶3

Aposol John lukim lo wanfala vision hao 24 elder lo heven gohed for worshipim Jehovah. Olketa praisem God and sei hem garem “bigfala paoa” and fit for kasem “glory and for evriwan mekhae” lo hem. (Rev. 4:​10, 11) Olketa faithful angel tu garem staka reason for praisem Jehovah. Olketa stap witim hem lo heven and savve gud lo hem. Olketa luksavve lo olketa wei blo Jehovah taem olketa lukim wanem hem duim. Taem olketa lukim datwan, hem mekem olketa laek for praisem hem. (Job 38:​4-7) Iumi tu laek for praisem Jehovah insaed prea blo iumi taem iumi talem hem why iumi lovem and tinghae lo hem. Taem iumi readim and studyim Bible, trae for luksavve lo olketa wei blo Jehovah wea iumi barava tinghae lo hem. (Job 37:23; Rome 11:33) Then talem Jehovah feeling blo iumi abaotem datwan. Iumi savve praisem Jehovah tu from hem helpem iumi and helpem evri brata and sista.—1 Sam. 2:​1, 2. w23.05 3-4 ¶6-7

Lo 1919, Bigfala Babylon no garem paoa nao ovarem pipol blo God. Lo datfala sem year, “datfala wakaman wea faithful and wise” start for duim waka for helpem pipol wea garem gud heart for followim datfala “Road wea Holy” wea just open. (Matt. 24:​45-47; Isa. 35:8) From olketa narawan bifor help for preparem datfala road, olketa wea just start for followim datfala road savve lanem moa samting abaotem Jehovah and plan blo hem. (Prov. 4:18) From datwan, olketa savve changem tu laef blo olketa for followim standard blo Jehovah. Jehovah no expectim pipol blo hem for kwiktaem nomoa change. Bat hem isisi mekem olketa for kamap klin. Iumi bae hapi tumas taem iumi fit for duim evri samting wea mekem Jehovah hapi! Olketa road needim maintenance evritaem. So start lo 1919, maintenance waka gohed lo datfala “Road wea Holy” for mekem hem isi for staka pipol lusim Bigfala Babylon. w23.05 17 ¶15-16

Governing Body seleva bin trainim olketa helper for duim waka lo olketa difren komiti blo Governing Body. Olketa helper hia faithful for duim staka responsibility distaem lo organization. Olketa barava redi for gohed duim waka for lukaftarem olketa sheepsheep blo Christ. Klosap lo end blo datfala big trabol, taem last wan blo olketa anointed wan go ap lo heven, tru worship bae still gohed lo disfala earth. From Jesus Christ nao leadim pipol blo God, olketa bae gohed faithful for worshipim Jehovah. Hem tru, lo datfala taem, grup blo olketa nation wea Bible kolem lo Gog blo Magog bae attakim pipol blo God. (Ezek. 38:​18-20) Bat datfala attak bae fail bikos hem bae no stopem pipol blo God for gohed worshipim hem. Hem bae rescuem olketa! Aposol John lukim lo vision wanfala “big crowd” blo olketa nara sheepsheep blo Christ. John herem hao disfala “big crowd” hem “olketa wea no dae long datfala big trabol.” (Rev. 7:​9, 14) So iumi sure Jehovah bae sevem olketa! w24.02 5-6 ¶13-14

Wat nao iumi savve duim for kasem holy spirit? Iumi savve prea and askem God for givim lo iumi, studyim Bible, and associate witim organization blo hem wea holy spirit leadim. Taem iumi duim olsem, datwan bae helpem iumi for garem olketa wei blo holy spirit. (Gal. 5:​22, 23) God only givim holy spirit lo olketa wea tingting and wei blo olketa klin. Hem bae no gohed givim holy spirit lo iumi if iumi gohed for ting abaotem and duim samting wea no klin. (1 Thess. 4:​7, 8) For iumi gohed kasem holy spirit, iumi mas “no ting daonem olketa profesi.” (1 Thess. 5:20) Lo disfala verse, “olketa profesi” hem minim olketa message wea kam from holy spirit blo God, olsem message abaotem day blo Jehovah and hao iumi stap lo taem wea barava important. Iumi mas no tingse day blo Jehovah hem farawe yet, and Armageddon bae no kam taem iumi laef yet. Bat gohed keepim wei blo iumi klin, busy for duim ‘samting wea showimaot iumi faithful’ and showimaot iumi evritaem tingim hao datfala day hem klosap.—2 Pet. 3:​11, 12. w23.06 12 ¶13-14

Wat nao iumi shud duim if seknomoa pornography piksa appear lo electronic device blo iumi? Lo semtaem, iumi shud stop for luk lo datfala piksa. Iumi savve duim datwan if iumi barava tinghae lo frenship blo iumi witim Jehovah. Samfala taem olketa piksa wea iumi tingse hem no pornography maet mekem iumi garem feeling for laek durong. Why nao iumi shud avoidim olketa piksa olsem? Bikos iumi no even laek for duim eniting wea bae mekem iumi duim adultery lo heart blo iumi. (Matt. 5:​28, 29) David, wanfala elder lo Thailand sei: “Mi askem miseleva: ‘Nomata olketa piksa hia no pornography, hao, Jehovah bae hapi lo mi if mi gohed lukluk lo olketa piksa hia?’ Taem mi ting olsem, hem helpem mi for duim wise samting.” Taem iumi fraet for duim samting wea bae mekem Jehovah no hapi, datwan bae helpem iumi for duim wise samting. For fraet lo God hem “stat” or faondeson “blong waes.” w23.06 23 ¶12-13

“Olketa rum” hia maet minim olketa kongregeson blo iumi. Lo taem blo bigfala trabol, Jehovah promisim hao hem bae protectim iumi if iumi gohed for wan mind witim olketa brata and sista. So iumi mas waka hard distaem, no for just acceptim nomoa olketa brata and sista, bat for lovem olketa tu. Maet laef blo iumi bae depend lo datwan! Taem “bigfala day blo Jehovah” hem kam, laef bae hem barava hard for evriwan. (Zeph. 1:​14, 15) Pipol blo Jehovah tu bae kasem hard taem. If iumi redi distaem, bae iumi no panic and iumi savve helpem olketa narawan. Iumi bae no givap lo eni challenge wea iumi feisim. Taem olketa brata and sista safa, iumi bae duim best for showimaot iumi sorre lo olketa and provaedem wanem olketa needim. And iumi bae fren gud witim olketa brata and sista wea iumi lovem finis distaem. Then, Jehovah bae rewardim iumi witim laef olowe lo wanfala world wea evri disaster and olketa hard taem bae nomoa nao.—Isa. 65:17. w23.07 7 ¶16-17

Staka taem Bible storyim olketa faithful man bifor wea barava strong. Bat samfala taem olketa savve discourage tu. For example, samfala taem King David feel olsem hem “barava strong olsem wanfala maunten,” bat lo olketa nara taem hem “fraet tumas” tu. (Ps. 30:7) Spirit blo God givim paoa lo Samson and hem strong tumas. Nomata olsem, hem luksavve if God no givim hem datfala paoa hem bae “wik olsem olketa nara man nomoa.” (Judg. 14:​5, 6; 16:17) Olketa faithful man hia strong, only bikos Jehovah givim paoa lo olketa. Aposol Paul luksavve hem tu needim paoa from Jehovah. (2 Cor. 12:​9, 10) Hem tu garem samfala health problem. (Gal. 4:​13, 14) Samfala taem hem hard tu for Paul duim stret samting. (Rome 7:​18, 19) And samfala taem hem fraet and no sure lo wat nao maet happen lo hem. (2 Cor. 1:​8, 9) Bat taem Paul wik, hem nao taem hem strong. Why nao olsem? Jehovah givim paoa wea Paul needim for strongim hem for deal witim olketa challenge wea hem feisim. w23.10 12 ¶1-2

If samfala taem iumi stragol for deal witim feeling for feel iusles, hem gud for tingim hao Jehovah nao leadim iumi kam lo hem. (John 6:44) Hem lukim gud samting lo iumi wea iumiseleva no savve lukim, and hem savve lo heart blo iumi. (2 Chron. 6:30) So iumi savve trustim hem taem hem sei iumi spesol. (1 John 3:​19, 20) Bifor iumi lanem truth, samfala lo iumi duim olketa nogud samting wea mekem iumi feel guilty yet. (1 Pet. 4:3) Even samfala faithful Christian stragol for deal witim feeling for duim samting wea no stret. Waswe, heart blo iu savve judgem iu? If olsem, iumi savve kasem comfort taem iumi savve hao samfala faithful servant blo Jehovah bifor tu stragol for deal witim semkaen feeling. For example, aposol Paul feel nogud taem hem ting abaotem olketa wik point blo hemseleva. (Rome 7:24) Paul repent finis from olketa sin blo hem and baptaes. Nomata olsem, Paul sei olketa nara aposol gud “winim” hem and hem nao “worst” sinner winim evriwan.—1 Cor. 15:9; 1 Tim. 1:15. w24.03 27 ¶5-6

Wanfala samting iumi savve lanem from bad disison wea King Jehoash mekem nao, iumi mas chusim olketa frens wea lovem Jehovah and wea laek mekem hem hapi. Olketa frens olsem bae helpem iumi for duim gud samting. Iumi savve frens witim olketa wea olo or young winim iumi. Remember, Jehoash hem barava young winim fren blo hem Jehoiada. Taem iu chusim olketa frens, askem iuseleva: ‘Hao, olketa frens hia bae helpem mi for garem strong faith lo Jehovah? Waswe, olketa encouragem mi for followim olketa standard blo God? Hao, olketa story abaotem Jehovah and olketa Bible truth? Waswe, olketa respectim standard blo Jehovah? Hao, olketa talem nomoa wat mi laek for herem, or olketa no fraet for stretem mi taem mi start for go difren?’ (Prov. 27:​5, 6, 17) For tok stret, if olketa frens blo iu no lovem Jehovah, iu shud no fren witim olketa. Bat if olketa frens blo iu lovem Jehovah, no let go lo olketa bikos bae olketa evritaem helpem iu!—Prov. 13:20. w23.09 9-10 ¶6-7

Alpha hem first leta lo Greek alphabet, and omega hem last leta. Taem Jehovah sei hem “Alpha and Omega,” diswan showim taem hem startim samting, hem mas finisim. Afta Jehovah creatim Adam and Eve, hem sei lo tufala: “Garem pikinini, kamap staka and fulimap disfala earth and lukaftarem earth.” (Gen. 1:28) Firstaem wea Jehovah talem plan blo hem, hem olsem hem sei “Alpha.” Plan blo hem klia hao gogo olketa perfect pikinini blo Adam and Eve wea obey bae stap evriwea lo earth and mekem full earth kamap paradaes. Lo future, taem datfala original plan blo Jehovah complete, hem olsem hem sei “Omega.” Bihaen “God finis for creatim skae and earth, and evriting wea stap insaed,” hem talem samting wea mekem iumi sure plan blo hem bae kamap tru. Jehovah sei plan blo hem for iumi olketa man and disfala earth bae kamap tru and succeed lo end blo datfala mek-seven day.—Gen. 2:​1-3. w23.11 5 ¶13-14

Datfala real road for travel followim from Babylon kasem Israel, hem no isi and savve tekem samting olsem fofala month. Bat Jehovah promis for kliarem eni hard samting wea maet stopem olketa Jew for go bak. Olketa Jew wea faithful savve if olketa go bak lo Israel, gud samting wea olketa bae kasem hem winim eni sakrifaes wea olketa mekem. Main blessing wea olketa bae kasem, hem saed lo worship. No eni temple blo Jehovah lo Babylon. No eni altar stap lo there for olketa Israelite offerim olketa sakrifaes followim Law blo Moses, and hard for olketa priest duim waka blo olketa for offerim olketa sakrifaes hia. And pipol lo there wea no tinghae lo Jehovah or olketa standard blo hem, olketa staka winim pipol blo Jehovah. Dastawe staka thousand faithful Jew luk forward for go bak lo hom for mekem tru worship kamap moa. w23.05 14-15 ¶3-4

Iumi needim help from holy spirit blo God mekem iumi savve gohed duim olketa samting wea showimaot iumi “olketa pikinini bilong laet.” Why? Bikos hem no isi for gohed stap klin insaed disfala world wea garem nogud wei. (1 Thess. 4:​3-5, 7, 8) Holy spirit savve helpem iumi for faet againstim tingting blo disfala world, wea includim olketa idea and teaching wea againstim tingting blo God. Holy spirit savve helpem iumi tu for garem olketa wei wea “gud and wea raeteous.” (Eph. 5:9) Wanfala wei for kasem holy spirit hem for askem datwan lo prea. Jesus sei Jehovah bae “givim holy spirit long olketa wea askem hem.” (Luke 11:13) And taem iumi praisem Jehovah lo olketa meeting, iumi kasem tu holy spirit. (Eph 5:​19, 20) Holy spirit mekem iumi garem olketa gudfala wei wea bae helpem iumi for duim olketa samting wea mekem God hapi. w24.03 23-24 ¶13-15

Waswe, iu needim wei for patient. If olsem, prea and askem lo Jehovah. Patient hem wanfala frut blo holy spirit. (Gal. 5:​22, 23) So iumi savve prea for holy spirit and askem Jehovah for helpem iumi patient. If iumi feisim wanfala situation wea testim patient fasin blo iumi, ‘gohed ask’ for holy spirit for helpem iumi. (Luke 11:13) And iumi savve askem Jehovah tu for helpem iumi for garem sem tingting olsem hem abaotem datfala situation. Bihaen iumi prea, iumi need for duim best for patient each day. Each taem iumi prea for patient and waka hard for showim datwan, Jehovah bae helpem iumi for garem datfala wei, and bae hem kamap part lo wei blo iumi. Hem gud for ting raonem tu olketa Bible example. Insaed Bible iumi savve read abaotem staka example blo pipol wea patient. Taem iumi ting raonem story blo olketa, bae iumi lanem hao for showimaot wei for patient. w23.08 22 ¶10-11

Jesus helpem aposol Peter for luksavve hao Jehovah bae sapotim hem. Bihaen Jesus resurrect, hem duim nara mirakol moa for Peter and olketa aposol for kasem staka fish. (John 21:​4-6) For sure, datfala mirakol helpem Peter for trustim dat Jehovah bae provaedem olketa material need blo hem. Maet Peter tingim bak toktok wea Jesus talem hao Jehovah bae provaed for olketa wea gohed putim “Kingdom . . . first samting long laef” blo olketa. (Matt. 6:33) Olketa samting hia helpem Peter for putim preaching waka first lo laef and no fishing bisnis blo hem. Lo Pentecost 33 C.E., hem no fraet for preach, and hem helpem staka thousand for acceptim gud nius. (Acts 2:​14, 37-41) Bihaen, hem helpem tu staka Samaritan and olketa Gentile for kamap follower blo Christ. (Acts 8:​14-17; 10:​44-48) Jehovah barava iusim Peter for duim olketa big samting for helpem staka pipol from olketa difren ples for kam insaed kongregeson. w23.09 20 ¶1; 23 ¶11

Samting olsem tufala year bihaen olketa blo Babylon distroem Jerusalem, King Nebuchadnezzar blo Babylon dreamim wanfala maeti image wea mekem hem fraet fogud. King sei hem bae killim dae evri wise man blo hem and Daniel tu, sapos olketa no talem hem datfala dream and mining blo hem. (Dan. 2:​3-5) Daniel mas kwiktaem duim samting, incase, staka laef hem lus. Hem “go lo king and askem king for givim hem taem mekem hem savve talem mining blo datfala dream.” (Dan. 2:16) Datwan showimaot hem brave and garem faith. Bikos no eni record showim dat Daniel explainim eni dream bifor. Hem askem olketa frens blo hem “for prea lo God wea rul lo heven for sorre lo olketa and showim datfala dream.” (Dan. 2:18) Jehovah ansarem prea blo olketa. Hem helpem Daniel explainim dream blo Nebuchadnezzar. From datwan, Daniel and olketa frens blo hem no lusim laef blo olketa. w23.08 3 ¶4

Tingim gud samting iumi savve kasem taem iumi patient. Taem iumi patient, iumi bae hapi and garem peace. Datwan helpem health blo iumi tu. Taem iumi patient witim narawan, iumi savve fren gud tugeta. Hem helpem kongregeson for wan mind. If samwan mekem iumi feel nogud, taem iumi no kros kwiktaem datwan bae mekem situation for no kamap worse. (Ps. 37:​8, ftn.; Prov. 14:29) Samting wea moa important, hem for followim example blo Dadi blo iumi lo heven and frenship blo iumi witim hem bae kamap moa klos. Tru nao, patient hem wanfala naes wei and hem savve barava helpem iumi! Nomata maet hem no isi for garem disfala wei, witim help blo Jehovah, iumi savve impruvim wei blo iumi for patient. Taem iumi patient and gohed weit for niu world, iumi savve sure hao “eye blo Jehovah lukluk for olketa wea fraet lo hem and olketa wea gohed weit for loyal love blo hem.” (Ps. 33:18) Iumi evriwan disaed strong for mekem wei for patient kamap olsem kaleko wea iumi werem evritaem. w23.08 22 ¶7; 25 ¶16-17

James storyim hao man maet sei hem garem faith, bat olketa samting wea hem duim no pruvim datwan. (Jas. 2:​1-5, 9) James storyim tu samwan wea lukim “wanfala brata or sista hem no garem kaleko and hem no garem inaf kaikai,” bat hem no helpem hem. Nomata datfala man sei hem garem faith, olketa samting wea hem duim showimaot hem no garem faith and datwan hem iusles nomoa. (Jas. 2:​14-16) James storyim Rehab olsem example blo samwan wea duim samting for showim hem garem faith. (Jas. 2:​25, 26) Rehab herem olketa samting wea Jehovah duim and luksavve hao Jehovah helpem olketa Israelite. (Josh. 2:​9-11) Hem duim samting wea showimaot hem garem faith, hem haedem tufala Israelite spae taem laef blo tufala stap lo danger. From datwan, nomata Rehab no perfect and hem no wanfala Israelite woman, God sei hem raeteous olsem Abraham tu. Example blo Rehab showim hao hem important for iumi duim samting for pruvim iumi garem faith. w23.12 5 ¶12-13

From iumi olketa Christian, iumi no laek for satisfae nomoa witim olketa main teaching lo Bible. Holy spirit blo God savve helpem iumi for barava laek for lane abaotem “wisdom bilong God wea big tumas.” (1 Cor. 2:​9, 10) Iu savve startim wanfala personal study project wea bae helpem iu for fren gud witim Jehovah! For example, iu savve duim research abaotem hao hem showimaot love for pipol blo hem bifor, and hao datwan pruvim hem lovem iu tu. Iu savve studyim tu arrangement blo Jehovah saed lo worship lo Israel bifor, and comparem datwan witim arrangement lo Christian kongregeson distaem. Or iu savve duim deep study lo olketa profesi wea Jesus fulfillim during lo ministry and laef blo hem lo earth. Iu savve iusim Watch Tower Publications Index or Research Index for Olketa Jehovah’s Witness for studyim olketa subject olsem. Taem iu duim deep study, datwan savve strongim faith blo iu and helpem iu for “faendem knowledge abaotem God.”—Prov. 2:​4, 5. w23.10 18-19 ¶3-5

Word wea aposol Peter iusim for “barava,” hem minim for “stretchim samting.” Second part lo datfala verse hem storyim samting wea iumi savve duim taem iumi barava lovem narawan. Datwan savve helpem iumi for evritaem willing for forgive. Tingim diswan: Wanfala tebol hem garem staka stain lo hem. Hem possible for tekem kaleko and stretchim antap lo tebol for kavarem no wan or tufala stain nomoa, bat for kavarem evri stain. Lo sem wei tu, if iumi barava lovem olketa brata and sista, iumi savve kavarem, or forgivim no wan or tufala mistek nomoa, bat for “evritaem willing for forgivim” mistek blo olketa. Love blo iumi for olketa brata and sista shud barava strong mekem iumi savve forgivim mistek blo olketa, nomata samfala taem hem barava no isi. (Col. 3:13) Taem iumi forgivim narawan, hem showim love blo iumi hem strong and iumi laek for mekem Jehovah hapi. w23.11 11-12 ¶13-15

Taem King Josiah adult, hem start for renovatim temple. During lo datfala waka, olketa faendem “buk blo Law blo Jehovah wea hem givim lo Moses bifor.” Taem King Josiah herem toktok insaed datfala Law, hem kwiktaem duim samting followim datwan. (2 Chron. 34:​14, 19-21) Hao, iu laek for readim Bible evriday? If iu startim finis Bible reading blo iu, hao iu enjoyim? Waswe, iu raetem olketa verse wea savve helpem iuseleva? Taem Josiah hem samting olsem 39 years old, hem mekem wanfala mistek wea lead go for dae blo hem. Instead for hem askem Jehovah for direction, hem trustim hemseleva. (2 Chron. 35:​20-25) Wat nao iumi lanem? Nomata iumi stap lo truth for long taem finis or hao long nao iumi bin studyim Bible, iumi mas gohed for lukaotem Jehovah. Diswan minim, iumi mas prea lo hem for direction, studyim Bible, and kasem gud samting from advaes blo olketa mature Christian. Datwan bae helpem iumi for no mekem olketa serious mistek and bae iumi hapi.—Jas. 1:25. w23.09 12 ¶15-16

Bible storyim example blo staka woman wea lovem Jehovah and servem hem. Olketa garem olketa wei wea theme text blo iumi storyim, olketa “no ova tumas long eni samting wea olketa duim,” and ‘olketa faithful long God long evri samting.’ (1 Tim. 3:11) And tu, iufala savve faendem olketa mature Christian sista lo kongregeson wea iufala savve followim example blo olketa. Olketa young sista, tingim which sista lo kongregeson nao hem showim gud example wea iu laek for followim. Tingim olketa gudfala wei blo hem, then ting abaotem hao iu savve followim. Hambol fasin hem wanfala important quality wea mature Christian sista need for garem. If wanfala sista hambol, hem bae fren gud witim Jehovah and olketa narawan. For example, wanfala sista wea lovem Jehovah bae hambol for gohed sapotim principle blo hedship arrangement wea Dadi blo iumi lo heven hem markem. (1 Cor. 11:3) Disfala principle blo hedship arrangement hem apply insaed kongregeson and lo famili tu. w23.12 18-19 ¶3-5

Jehovah expectim hasband for lovem and provaedem for waef, kamap fren blo hem, and helpem hem fren klos witim Jehovah. Taem iu garem wei for tingting gud raonem samting, respectim olketa sista, and for kamap samwan wea olketa narawan trustim, datwan bae helpem iu for kamap gud hasband. Bihaen iu marit, maet iu kamap wanfala dadi. Wat nao iu savve lanem from example blo Jehovah for kamap wanfala gud dadi? (Eph. 6:4) Jehovah talem Son blo hem Jesus, dat hem lovem and hapi lo hem. (Matt. 3:17) If iu kamap dadi, mek sure iu evritaem talem olketa pikinini blo iu dat iu lovem olketa. Praisem olketa for gud samting wea olketa duim. Taem olketa dadi followim example blo Jehovah for trainim pikinini, datwan bae helpem olketa pikinini for kamap mature Christian brata or sista. Iu savve redi distaem for kamap wanfala gud dadi taem iu showim love for olketa lo famili blo iu, kongregeson, and for lukaftarem olketa gud. And lane for talem hao iu lovem and tinghae lo olketa.—John 15:9. w23.12 28-29 ¶17-18

Nomata iumi faithful for worshipim Jehovah, iumi evriwan still savve kasem olketa hard taem and sik, olsem evri nara pipol tu. And tu, maet olketa wea heitim pipol blo God againstim or persecutim iumi. Jehovah no stopem olketa hard taem olsem for kasem iumi, bat hem promis for helpem iumi. (Isa. 41:10) Witim help blo God, nomata iumi feisim olketa situation wea barava hard, iumi savve gohed for hapi, mekem olketa gud disison, and gohed for loyal lo hem. Jehovah promis for givim iumi, wat Bible kolem “peace bilong God.” (Phil. 4:​6, 7) Diswan minim iumi garem peace lo mind and heart blo iumi. Iumi only garem disfala peace bikos iumi fren klos witim hem. Disfala peace hem “winim wanem man savve minim [or tingim],” wea minim hem barava spesol feeling wea man savve imaginim. Waswe, enitaem iu barava prea strong lo Jehovah and bihaen iu sapraes iu barava garem peace lo heart and mind blo iu? Iumi feel olsem bikos Jehovah givim iumi “peace bilong hem.” w24.01 20 ¶2; 21 ¶4

Olketa wea lovem God laek for praisem nem blo hem witim full heart blo olketa. King David luksavve dat for praisem nem blo Jehovah, hem olsem nomoa for praisem Jehovah. Taem iumi herem nem blo Jehovah, iumi savve tingim wat kaen person nao hem, olketa naesfala wei blo hem, and olketa nambawan samting wea hem duim. David laekem nem blo Jehovah for holy and for praisem hem. Hem laek duim datwan witim “evri samting insaed” lo hem, wea minim full heart blo hem. Olketa Levite tu showim example lo wei for praisem Jehovah. Olketa hambol for sei, toktok wea olketa talem hem no barava kasem yet praise wea holy nem blo Jehovah fit for kasem. (Neh. 9:5) From olketa hambol for praisem Jehovah olsem, datwan mas mekem heart blo Jehovah hapi tumas. w24.02 9 ¶6

Jehovah bae no ting iu fail, if iu no savve kasem goal wea iu markem wea no fitim iu. (2 Cor. 8:12) Lane from samting wea disturbim goal blo iu. Tingim olketa goal wea iu kasem finis. Bible sei “God hem raeteous so hard for hem forgetim waka wea iufala duim.” (Heb. 6:10) So iumi tu shud no forgetim wanem iumi duim finis. Ting raonem olketa goal wea iu kasem finis, olsem wei for fren witim Jehovah, story lo olketa narawan abaotem hem, or baptism blo iu. Iu bin kasem olketa goal hia finis, so bae iu savve gohed and no givap for kasem goal blo iu distaem tu. Iu savve kasem goal blo iu witim help blo Jehovah. Taem iu gohed waka hard for kasem spiritual goal blo iu, no forget for enjoy for lukim hao Jehovah helpem and blessim iu taem iu no givap for kasem datwan. (2 Cor. 4:7) If iu no givap, bae iu kasem staka blessing moa.—Gal. 6:9. w23.05 31 ¶16-18

Jehovah laekem tumas for showimaot hem appruvim pipol wea hem lovem. Bible storyim tufala taem wea Jehovah talem Jesus dat hem lovem hem and hapi lo hem. (Matt. 3:17; 17:5) Hao, iu tu laek for herem Jehovah talem dat hem hapi lo iu? Jehovah no story kam from heven for iumi, bat hem iusim Bible. Iumi savve herem Jehovah appruvim iumi taem iumi readim toktok blo Jesus lo olketa Gospel. Jesus showimaot wei blo Dadi blo hem lo perfect wei. So taem iumi readim toktok wea Jesus talem for showimaot hem appruvim olketa faithful follower blo hem wea no perfect, iumi savve imaginim hao Jehovah talem datwan for iumi tu. (John 15:​9, 15) If iumi kasem olketa hard taem hem no minim God no appruvim iumi. Bat, olketa hard taem hia givim iumi chance for showimaot hao strong nao love blo iumi for God and if iumi barava trustim hem.—Jas. 1:12. w24.03 28 ¶10-11