November

If iu wanfala mami or dadi, helpem pikinini blo iu for redyim koment wea fitim age blo hem. Samfala taem, olketa study article storyim olketa serious samting olsem marit problem or olketa serious samting wea pipol duim. Nomata olsem, maet olketa pikinini savve ansa lo samfala paragraf wea fitim olketa. And tu, hem gud for helpem pikinini blo iu for minim why conductor bae no kolem olketa evritaem olketa handsap. Taem iu duim olsem, datwan bae helpem olketa for no feel nogud taem conductor chusim narawan. (1 Tim. 6:18) Iumi evriwan savve preparem olketa koment wea givim praise lo Jehovah and encouragem olketa brata and sista. (Prov. 25:11) Samfala taem iumi savve givim short koment abaotem experience blo iumiseleva, bat iumi shud no story tumas abaotem iumiseleva. (Provebs 27:​2, SIPB; 2 Cor. 10:18) Main samting iumi laek storyim, hem Jehovah, Bible, and pipol blo hem.—Rev. 4:11. w23.04 24-25 ¶17-18

Love hem important for helpem man for gohed wekap and garem gudfala tingting. (Matt. 22:​37-39) Love for God savve helpem iumi for gohed preach nomata maet iumi kasem hard taem from datwan. (2 Tim. 1:​7, 8) From iumi lovem tu olketa wea no worshipim Jehovah iumi gohed preach, and duim tu telephone witnessing and leta raeting. Iumi hope wanday pipol bae change and duim stret samting. (Ezek. 18:​27, 28) Iumi lovem tu olketa brata and sista blo iumi. Iumi showimaot love taem iumi “encouragem and strongim” each other. (1 Thess. 5:11) Olsem olketa soldia wea faet saed bae saed, iumi gohed strongim each other. Iumi bae no min for duim samting for spoelem brata or sista or pei bak lo nogud samting wea hem duim. (1 Thess. 5:​13, 15) Iumi showimaot love tu taem iumi respectim olketa wea lead lo kongregeson.—1 Thess. 5:12. w23.06 10 ¶6; 11 ¶10-11

Wanfala samting iumi savve duim for strongim faith blo iumi hem for ting raonem ransom. Wei wea God givim datfala ransom sakrifaes hem pruvim hao olketa promis blo hem bae kamap tru. Taem iumi barava ting raonem why God givim datfala ransom and samting wea involve insaed, datwan savve strongim faith blo iumi hao promis blo God for laef olowe lo niu world bae kamap tru. Why nao iumi sei olsem? Tingim olketa samting wea involve insaed datfala ransom. Jehovah sendem kam first born son wea hem lovem tumas, and wea hem best fren blo hem for born olsem perfect man lo earth. Taem Jesus lo earth, hem kasem staka hard taem. Then hem barava safa and dae. Jehovah peim price wea hae tumas! Loving God blo iumi bae no letem son blo hem for safa and dae olsem just for givim iumi gudfala laef for lelebet taem nomoa. (John 3:16; 1 Pet. 1:​18, 19) From hem peim iumi lo price wea hae tumas, Jehovah bae mek sure promis blo hem for laef olowe lo niu world bae kamap tru. w23.04 27 ¶8-9

Waswe, Jehovah barava laek for resurrectim olketa wea dae? For sure, hem barava laek for duim datwan. Hem iusim samfala man wea raetem Bible for raetem daon promis blo hem abaotem resurrection lo future. (Isa. 26:19; Rev. 20:​11-13) Taem Jehovah mekem wanfala promis, hem evritaem kamap tru. (Josh. 23:14) Jehovah barava laek for resurrectim olketa wea dae finis. Tingim toktok blo datfala faithful man Job. Hem sure nomata hem dae Jehovah barava laek for mekem hem laef bak. (Job 14:​14, 15) Jehovah garem sem feeling for evriwan wea worshipim hem wea dae finis. Hem barava laek for mekem olketa laef bak and for stap healthy and hapi. Waswe, lo staka billion pipol wea dae finis wea no garem chance for lanem truth abaotem Jehovah? God blo iumi hem laek for resurrectim olketa tu. (Acts 24:15) Hem laekem olketa for garem chance for kamap fren blo hem and laef olowe lo earth.—John 3:16. w23.04 9 ¶5-6

Wat nao iu savve duim for strongim hope blo iu? For example, if iu garem hope for laef olowe lo earth, read abaotem hao Bible storyim datfala Paradaes and ting raonem. (Isa. 25:8; 32:​16-18) Imaginim laef lo niu world. Imaginim iu lo there. If iumi gohed tingim hope for niu world, bae iumi ting lo olketa hard taem blo iumi olsem hem for ‘lelebet taem nomoa and no big tumas.’ (2 Cor. 4:17) Hope wea Jehovah givim iu bae mekem iu strong. Hem provaedem finis wat iu needim for strongim iu. So taem iu needim help for duim wanfala assignment, deal witim hard taem, or for gohed hapi, prea lo Jehovah and duim personal study for kasem help from hem. Acceptim encouragement from olketa brata and sista. Gohed ting raonem hope blo iu for future. Then iu bae “kasem evri nambawan paoa bilong God wea [iu] needim mekem [iu] nating givap and [iu] gohed for patient and hapi.”—Col. 1:11. w23.10 17 ¶19-20

Iumi garem staka reason for prea and thankiu lo Jehovah. Iumi savve thankiu lo hem for eni gud samting iumi garem, bikos evri gud present kam from hem. (Jas. 1:17) For example, iumi savve thankiu lo Jehovah for earth wea luk naes and nambawan creation blo hem. Iumi savve thankiu tu for laef blo iumi, famili, olketa fren, and hope blo iumi. And iumi laek thankiu lo Jehovah for letem iumi for fren witim hem, wea datwan hem barava spesol. Maet each wan lo iumi need for barava ting abaotem samfala reason why iumi laek thankiu lo Jehovah. Staka pipol distaem no savve sei thankiu. Staka taem pipol ting abaotem nomoa wat olketa seleva laekem, and no duim samting for showimaot olketa tinghae lo wanem olketa garem finis. If iumi start for garem tingting olsem, maet evritaem iumi prea ask nomoa bae staka tumas. For prea blo iumi no olsem, iumi need for gohed garem wei for tinghae and talem thankiu for evri samting wea Jehovah duim for iumi.—Luke 6:45. w23.05 4 ¶8-9

Jehovah hem Dadi wea lovem iumi, so hem no laek for lukim iumi safa. (Isa. 63:9) Nomata olsem, hem no preventim evri hard situation from iumi, wea olsem olketa river or fire. (Isa. 43:2) Bat, hem promis for helpem iumi for winim olketa hard situation hia. And nomata wanem hard taem iumi feisim distaem, Jehovah bae evritaem mek sure iumi gohed faithful for worshipim hem. And tu, Jehovah bae givim holy spirit for strongim iumi for no givap. (Luke 11:13; Phil. 4:13) From datwan, iumi savve sure hem bae givim wat iumi needim for no givap and for gohed faithful lo hem. Jehovah laekem iumi for trustim hem. (Heb. 11:6) Samfala taem, iumi maet feel olsem olketa problem blo iumi hem barava hard for iumi deal witim. Maet iumi even tingse Jehovah bae no helpem iumi. Bat Bible assurem iumi hao paoa blo God savve helpem iumi for “klae ovam wanfala wall.” (Ps. 18:29) So instead for daot, iumi shud garem faith and trustim Jehovah bae ansarem olketa prea blo iumi.—Jas. 1:​6, 7. w23.11 22 ¶8-9

Datwan hem naes toktok abaotem tru love! Olketa toktok hia teachim olketa marit couple disfala important truth: Iu savve garem trufala love for each other. For wanfala couple garem tru love for full laef blo tufala, hem bae depend lo tufala. For example, for fire gohed bone olowe, iumi mas gohed putim firewood lo hem. If iumi no duim datwan, gogo bae fire hem dae. Olsem tu, love wea hasband and waef garem for each other savve gohed strong for olowe, only if tufala strongim frenship blo tufala. Samfala taem love blo wanfala couple savve cold daon, especially taem olketa deal witim hard taem saed lo selen, health problem, or stress for lukaftarem olketa pikinini. So for wanfala marit couple gohed keepim “faea blong [Jehovah]” gohed laet big, tufala need for strongim wei wea tufala fren witim Jehovah. w23.05 20-21 ¶1-3

Hao nao iumi savve lane for brave and no fraet? Parents blo iumi savve encouragem iumi for no fraet from olketa garem disfala wei, bat hard for iumi inheritim datwan from olketa. For brave hem olsem wei for lanem wanfala niu skill. Wanfala wei for garem datfala skill hem for watchim hao instructor duim samting, then iu followim hao hem duim datwan. Lo sem wei, iumi savve lane for no fraet taem iumi lukluk gud lo hao olketa narawan brave for duim samting, and then followim example blo olketa. Olsem Daniel, iumi need for savve gud lo Bible. Iumi savve fren gud witim Jehovah taem iumi feel free for story lo hem evritaem and talem feeling blo iumi lo hem. And iumi need for trustim Jehovah and sure hem bae helpem iumi. Then taem iumi kasem test, iumi bae no fraet. Staka taem pipol respectim olketa wea brave. And tu, datwan savve mekem pipol wea garem gud heart for laek lane abaotem Jehovah. So iumi garem olketa gud reason for lane for brave. w23.08 2 ¶2; 4 ¶8-9

Datfala Greek word wea iumi transleitim “chekim evri samting for mek sure” hem join witim wei for testim olketa metal olsem gold and silver. So iumi need for chekim wanem iumi herem and readim if hem tru. Diswan hem barava important for iumi especially taem bigfala trabol hem kakam klosap. Winim wei for bilivim evri samting wea olketa narawan talem, iumi shud iusim gudfala tingting and comparem wanem iumi readim and herem witim wanem Bible and organization blo Jehovah talem. Taem iumi duim olsem, iumi bae no bilivim eni information wea kam from olketa demon. (Prov. 14:15; 1 Tim. 4:1) Iumi savve pipol blo God bae sev lo datfala big trabol. Bat iumi each wan no savve wat nao bae happen lo iumi tumoro. (Jas. 4:14) Nomata olsem, if iumi laef thru lo bigfala trabol or dae bifor datwan, iumi bae kasem laef olowe if iumi gohed faithful. Iumi evriwan laek for tingim evritaem datfala nambawan hope and gohed redi for day blo Jehovah! w23.06 13 ¶15-16

Iumi no savve hao nao samfala profesi bae fulfill. (Dan. 12:​8, 9) Nomata iumi no barava understandim hao wanfala profesi bae fulfill, datwan no minim bae hem no kamap tru. Iumi sure hao Jehovah bae helpem iumi for understandim wat iumi need for savve lo hem lo raet taem, olsem hem duim lo bifor. Wanfala announcement bae kamap wea sei iumi garem “peace and stap gud nao.” (1 Thess. 5:3) Then, olketa politikol paoa lo world bae attakim false religion and distroem. (Rev. 17:​16, 17) Afta datwan, bae olketa attakim pipol blo God. (Ezek. 38:​18, 19) Olketa event hia bae lead go lo datfala last war, wea hem nao Armageddon. (Rev. 16:​14, 16) Iumi no daotem hao klosap nao olketa event hia bae happen. Until datfala taem, iumi gohed showim iumi appreciatim loving Dadi blo iumi lo heven taem iumi gohed studyim olketa Bible profesi and helpem olketa narawan for duim sem samting. w23.08 13 ¶19-20

Taem aposol Paul discussim faith, hope, and love, hem sei: “Long thrifala samting hia, love nao hem nambawan.” (1 Cor. 13:13) Why nao Paul sei olsem? Lo future, iumi bae no needim faith lo olketa promis blo God abaotem niu world or hope for olketa promis hia bikos olketa bae fulfill finis. Bat iumi bae need for lovem Jehovah and lovem pipol evritaem. Tru nao, iumi bae gohed strongim love blo iumi for olketa for olowe. And tu, taem iumi showimaot love for olketa brata and sista, datwan pruvim iumi olketa tru Christian. Jesus talem olketa aposol: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) And tu, taem iumi lovem each other hem mekem iumi wan mind. Paul sei love hem “barava mekem pipol for wan mind.” (Col. 3:14) Aposol John sei lo olketa nara Christian: “Man wea lovem God mas lovem brata bilong hem tu.” (1 John 4:21) Taem iumi showimaot love for each other, datwan pruvim iumi lovem God. w23.11 8 ¶1, 3

Bible hem comparem laef blo iumi olketa Christian witim wanfala reis. Olketa wea ran and kasem end blo reis and krosim finising laen bae kasem reward for laef olowe. (2 Tim. 4:​7, 8) Iumi need for duim best for gohed ran, especially bikos iumi klosap tumas for kasem finising laen. Aposol Paul storyim wat bae helpem iumi for win lo datfala resis. Hem sei for “iumi mas no givap for ran long resis wea iumi insaed. Iumi mas aotem evri hevi samting . . . wea savve isi for spoelem wei wea iumi ran gud.” Hao, Paul minim olketa Christian bae no karem eni load nao? Nomoa, bat hem minim iumi need for aotem evri unnecessary load. Olketa load olsem savve mekem iumi for slow daon and for givap. For iumi no givap, iumi mas kwiktaem for luksavve and torowem eni unnecessary load wea savve mekem iumi for slow daon. Bat iumi no laek for torowem olketa load wea iumi shud karem, nogud iumi disqualifyim iumiseleva from datfala reis.—2 Tim. 2:5. w23.08 26 ¶1-2

Taem iumi no ova tumas, datwan bae helpem iumi for respectim tingting blo olketa narawan. For example, samfala sista laek for mekap, bat samfala nomoa. Samfala Christian enjoy for drinkim alcohol lo balance wei, bat samfala disaed for no drinkim eni alcohol. Evri Christian laek for garem gud health, bat each wan savve chusim olketa difren medical treatment. If iumi tingse wanem iumi chusim nao hem best and promotim datwan lo olketa brata and sista, datwan maet mekem olketa stambol and savve divaedem kongregeson. (1 Cor. 8:9; 10:​23, 24) For example, instead for Jehovah putim olketa strict rul lo wat for werem, hem givim olketa Bible principle for iumi followim. Dressap blo iumi mas fitim wanfala servant blo God, iumi balance, showimaot respect, and garem “gudfala tingting.” (1 Tim. 2:​9, 10) Dastawe iumi no dressap lo wei wea bae mekem pipol lukluk tumas lo iumi. And tu, olketa Bible principle bae helpem olketa elder for avoidim wei for mekem olketa rul abaotem kaleko and hairstyle. w23.07 23-24 ¶13-14

Jehovah showim hao for iumi garem hapi future. Hem swit lo olketa wea acceptim invitation blo datfala “stupid woman” taem olketa duim haed olketa nogud samting. Result blo datwan, olketa bae go daon insaed grev. (Prov. 9:​13, 17, 18) Future blo olketa wea acceptim invitation blo datfala wise woman hem barava difren! (Prov. 9:1) Iumi lane for lovem wat Jehovah lovem and heitim wat hem heitim. (Ps. 97:10) And iumi hapi bikos iumi invaetem olketa narawan for lane from datfala tru wisdom. Hem olsem iumi “stanap long hae ples long taon an kolaot go long evriwan olsem, ‘!Yufala hu i no garem save, yufala kam!’” Iumi and olketa wea lisin lo iumi bae kasem gud samting distaem and for olowe. Iumi bae kasem “laef” olowe taem iumi gohed followim road blo understanding.—Provebs 9:​3, 4, 6, SIPB. w23.06 24 ¶17-18

Hao nao iu feel taem wanfala workmate or skulmate kwestinim biliv blo iu? Hao, iu fraet lelebet? Staka lo iumi feel olsem. Bat, kwestin wea samwan askem savve helpem iumi for understandim tingting blo hem or wat hem bilivim, and datwan givim iumi chance for sharem gud nius lo olketa. Samfala taem, samwan askem kwestin bikos hem disagree or laek for argue nomoa. Staka taem diswan happen bikos olketa herem samfala samting wea no tru abaotem wat iumi bilivim. (Acts 28:22) Nara samting, iumi stap lo “olketa last day,” taem wea staka pipol “no willing for agree” and “raf” tumas. (2 Tim. 3:​1, 3) Maet iu ting, ‘Hao nao mi savve kaen taem samwan kwestinim biliv blo mi?’ Wat nao bae helpem iu? Wei for hambol bae helpem iu for no feel nogud kwiktaem, bat bae helpem iu for kontrolem seleva taem samwan tok spoelem iu or taem iu no savve hao for ansarem hem. w23.09 14 ¶1-2

Samfala taem, iumi kasem kaonsel from organization wea protectim iumi. For example, iumi kasem warning abaotem wei for lovem selen and olketa samting wea savve putim iumi lo danger for brekem law blo God. Iumi kasem gud samting tu taem iumi followim olketa warning hia. (Isa. 48:​17, 18; 1 Tim. 6:​9, 10) Iumi sure Jehovah bae continue for iusim olketa man for givim direction lo iumi during lo bigfala trabol and insaed lo Wan Thousand Year Rul blo Jesus. Waswe, bae iumi gohed followim direction? Hem bae isi for iumi duim olsem if iumi followim direction blo Jehovah distaem. So iumi laek for evritaem followim direction blo Jehovah, wea insaed diswan hem direction wea iumi kasem from olketa man wea hem iusim for leadim iumi. (Isa. 32:​1, 2; Heb. 13:17) And taem iumi duim olsem, iumi savve trustim Jehovah, wea hem Leader blo iumi, bikos hem leadim iumi from olketa spiritual danger and for iumi kasem destination blo iumi, wea hem nao for laef olowe lo niu world. w24.02 25 ¶17-18

Aposol Paul hapi and satisfae taem hem duim waka blo Jehovah, bat hem feisim tu staka challenge. Staka taem Paul travel lo olketa farawe ples, and lo datfala taem datwan no isi. Lo olketa trip hia, samfala taem hem “stap long danger from olketa big river” and “olketa man for steal.” Samfala taem olketa enemy whipim hem nogud tu. (2 Cor. 11:​23-27) And staka taem olketa brata and sista no appreciatim tu wat Paul duim for helpem olketa. (2 Cor. 10:10; Phil. 4:15) Wat nao helpem Paul for gohed duim waka blo Jehovah? Paul lanem staka samting abaotem olketa wei blo Jehovah from olketa Holy Raeting and from olketa own experience blo hemseleva. Paul barava sure Jehovah God lovem hem. (Rome 8:​38, 39; Eph. 2:​4, 5) And datwan mekem hem barava lovem Jehovah go moa. Paul showimaot datwan taem hem “helpem olketa holy wan and gohed for duim datwan.”—Heb. 6:10. w23.07 9 ¶5-6

Bible sei “olketa wea rul [or garem authority]” stand for olketa gavman. Staka pipol agree hao hem gud for iumi garem olketa gavman, and olketa savve obeyim samfala law wea gavman putim. Bat olketa pipol hia maet no obeyim law wea olketa tingse hem ova tumas or no fair. Bible storyim dat olketa gavman blo man kosim wei for safa, Satan nao kontrolem olketa, and klosap nao bae olketa distroe. (Ps. 110:​5, 6; Eccl. 8:9; Luke 4:​5, 6) Bible sei tu “man wea againstim olketa wea rul hem againstim samting wea God duim” or arrangement blo God. Jehovah expectim iumi for obeyim olketa gavman bikos hem letem olketa for rul distaem mekem olketa samting followim order. So iumi “mas givim samting wea olketa . . . fit for kasem.” Insaed diswan hem for peim tax, respectim, and obeyim olketa. (Rome 13:​1-7) Maet samfala taem iumi tingse wanfala law hem no fitim, no fair, or hem savve kostim staka selen for obeyim. Iumi obeyim olketa gavman bikos Jehovah nao talem iumi for duim datwan. Bat iumi bae no obey if wat olketa askem hem bae brekem law blo God.—Acts 5:29. w23.10 8 ¶9-10

Taem Samson hem born, olketa Philistine rul ovarem nation blo Israel and barava spoelem olketa. (Judg. 13:1) Olketa Israelite safa tumas bikos olketa lo Philistine barava treatim olketa nogud. Jehovah chusim Samson for “sevem olketa blo Israel from hand blo olketa Philistine.” (Judg. 13:5) For Samson duim disfala challenging assignment, hem need for depend lo Jehovah. Wantaem army blo Philistine kam for holem Samson lo Lehi, wea luk olsem datwan hem lo Judah. Olketa man lo Judah fraet, so olketa disaed for tekem Samson and givim lo enemy. Own pipol blo Samson taengem Samson lo tufala niu rope and givim hem lo olketa Philistine. (Judg. 15:​9-13) Bat “spirit blo Jehovah mekem [Samson] strong,” and hem brekem datfala rope. “Then hem lukim jawbone blo wanfala man donkey,” and iusim datwan for killim dae 1,000 Philistine man!—Judg. 15:​14-16. w23.09 2 ¶3-4

Jehovah isisi showim iumi lo Bible “plan bilong hem wea bae gohed for olowe.” Jehovah savve iusim eni samting or chusim eni wei for mekem plan blo hem kamap tru, bikos hem savve “iusim evri samting mekem will blo hem kamap tru.” (Prov. 16:4) And result lo olketa samting wea Jehovah duim bae stap for olowe. Wat nao plan blo Jehovah, and wat nao samfala adjustment wea hem bin mekem for plan blo hem kamap tru? God talem plan blo hem for Adam and Eve. Hem sei for tufala “garem pikinini, kamap staka and fulimap disfala earth, and lukaftarem . . . evri animal wea laef lo earth.” (Gen. 1:28) From tufala disobeyim God, datwan mekem iumi evriwan for sin. Bat diswan no savve stopem Jehovah for mekem plan blo hem kamap tru, bikos hem bae adjustim hao for fulfillim datfala plan. For example, stretawe bihaen datwan, Jehovah disaed for setimap wanfala Kingdom lo heven, and datwan bae mekem original plan blo hem for iumi and earth kamap tru.—Matt. 25:34. w23.10 20 ¶6-7

Jehovah savve helpem iumi for no givap nomata iumi deal witim samfala wik point. Bat maet hem no isi, especially if iumi deal witim datfala wik point for lelebet longtaem finis. Samfala taem, maet olketa wik point wea iumi deal witim hem lelebet big winim olketa wik point blo aposol Peter. Bat Jehovah savve strongim iumi for no givap. (Ps. 94:​18, 19) For example, bifor wanfala brata lanem truth hem wanfala homosexual and hem duim datwan for staka year. Then hem barava changem laef blo hem and followim wat Bible talem. Nomata olsem, samfala taem hem still stragol for deal witim datfala feeling. Wat nao helpem hem for no givap? Hem sei: “Jehovah nao strongim mi, and mi luksavve witim help blo holy spirit blo Jehovah . . . , mi savve gohed for followim wat Jehovah laekem mi for duim . . . Nomata mi garem olketa wik point, Jehovah gohed for iusim mi, and strongim mi.” w23.09 23 ¶12

Olketa young brata, for kamap wanfala mature Christian hem samting wea no happen automatic. Iu need for chusim olketa gud example for followim, garem wei for tingting gud raonem samting, mas kamap samwan wea olketa narawan trustim, waka hard for lanem olketa practical skill, and redi for duim olketa future responsibility. Taem iu ting abaotem evri responsibility wea iu need for duim, maet iu feel olsem hem hard tumas. Bat iu savve duim gud. Tingim hao Jehovah barava laek for helpem iu. (Isa. 41:​10, 13) And olketa brata and sista lo kongregeson bae helpem iu tu. Taem iu kasem datfala aim for kamap wanfala mature Christian brata, bae iu hapi and satisfae. Mifala lovem iufala olketa young brata! Jehovah bae barava blessim iu distaem, taem iu waka hard for kamap wanfala mature Christian brata. w23.12 29 ¶19-20

Imaginim iu lo wanfala gathering witim olketa brata and sista. Iu barava enjoyim taem witim olketa and iu tekem wanfala grup photo. Iu tekem nara tufala photo moa incase first wan hem no luk gud. So iu garem thrifala photo. Bat lo wanfala, iu lukim wanfala brata no smile. So iu deletem, bikos iu garem tufala photo wea evriwan and datfala brata tu smile. Iumi savve garem olketa gud memory lo olketa taem wea iumi spendem witim olketa brata and sista. Bat maet lo wanfala taem, wanfala brata or sista talem or duim samting wea mekem iumi feel nogud. Hao, bae iu gohed tingim datwan, or bae iu deletem olsem datfala photo? (Eph. 4:32) Iumi savve deletem datfala memory bikos iumi garem staka gud memory abaotem taem wea iumi spendem witim hem. Olketa memory olsem hem barava spesol and iumi laek for keepim. w23.11 12-13 ¶16-17

Greek word wea Paul iusim showim hao wanfala woman shud evritaem werem kaleko wea showimaot respect, and tingim tu hao olketa narawan bae ting lo hem. Iumi barava tinghae lo olketa mature sista wea followim disfala advaes for werem kaleko wea showimaot respect! Wei for luksavve hem nara important fasin wea evri mature Christian sista need for garem. Wat nao wei for luksavve hem minim? Hem minim ability wea samwan garem for understandim wat hem stret and wat hem rong and then hem chus for duim stret samting. Tingim example blo Abigail. Hasband blo hem mekem wanfala bad disison wea bae kosim big problem for evriwan lo haos blo hem. Abigail kwiktaem duim samting bikos hem garem wei for luksavve. (1 Sam. 25:​14-23, 32-35) Wei for luksavve hem helpem iumi for savve lo taem for toktok and taem for kwaet. And tu, taem iumi story olketa narawan, hem bae helpem iumi for no ask abaotem eniting wea iumi no garem raet for savve or wea bae mekem olketa feel nogud.—1 Thess. 4:11. w23.12 20 ¶8-9

Aposol Paul raetem olketa toktok hia for olketa Christian lo Rome. Olketa brata and sista lo there lane abaotem Jehovah and Jesus, showimaot faith, and olketa kamap Christian. Lo “tingting bilong God, faith bilong [olketa] nao hem mekem [olketa] raeteous” and hem anointim olketa witim holy spirit. (Rome 5:1) Olketa luk forward for datfala nambawan reward and barava sure bae olketa kasem. Then bihaen, Paul raet lo olketa anointed Christian lo Ephesus abaotem hope wea God givim lo olketa. Diswan includim tu datfala “reward [for] olketa holy wan.” (Eph. 1:18) And Paul story tu lo olketa Christian lo Colossae abaotem reward wea olketa bae kasem. Hem sei: “Iufala garem hope for kasem samting wea God markem for iufala long heven.” (Col. 1:​4, 5) Olketa anointed Christian garem hope for resurrect and kasem laef olowe lo heven and rul witim Christ.—1 Thess. 4:​13-17; Rev. 20:6. w23.12 9 ¶4-5

Greek word for “gaedem,” hem wanfala toktok wea olketa iusim for storyim olketa soldia wea gaedem wanfala city mekem olketa enemy no attakim. Pipol wea stap lo city wea olketa gaedem, feel sef and garem peace bikos olketa savve olketa soldia protectim olketa. Lo sem wei tu, taem peace blo God gaedem heart and tingting blo iumi, iumi garem peace bikos iumi feel sef. (Ps. 4:8) Olsem Hannah, nomata situation blo iumi hem no change stretawe, iumi still savve garem peace. (1 Sam. 1:​16-18) And taem iumi garem peace, staka taem datwan savve helpem iumi for tingting gud and for mekem olketa wise disison. Wat nao iumi savve duim? Olsem pipol insaed city savve askem soldia for protectim olketa taem olketa insaed trabol, iumi tu savve askem Jehovah for help. Hao nao iumi savve duim datwan? Gohed prea lo Jehovah go kasem taem iu feelim peace blo God. (Luke 11:9; 1 Thess. 5:17) If iu feisim wanfala hard taem, gohed for prea, and bae iu feelim peace blo Jehovah hem gaedem heart and tingting blo iu.—Rome 12:12. w24.01 21 ¶5; 22 ¶6

For mekem nem blo Dadi blo hem holy, Jesus no givap nomata olketa killim hem, tok spoelem hem, and accusim hem lo olketa samting wea no tru. Hem savve hem obeyim Dadi blo hem lo evri samting, so no eni samting for hem shame lo hem. (Heb. 12:2) Jesus luksavve tu hao lo datfala barava hard taem, hem kasem direct attak from Satan. (Luke 22:​2-4; 23:​33, 34) Satan hope for spoelem faithful fasin blo Jesus, bat hem barava fail! Jesus pruvim wat Satan talem hem no tru and Jehovah garem olketa loyal servant, wea gohed for faithful nomata olketa kasem barava hard taem! Hao, iu laek for mekem King blo iumi Jesus for hapi? Gohed praisem nem blo Jehovah and helpem olketa narawan for savve lo olketa nambawan wei blo hem. Taem iu duim datwan, iu followim gudfala example blo Jesus. (1 Pet. 2:21) Olsem Jesus, iu mekem Jehovah hapi and pruvim Satan wea againstim Hem, hem man for laea! w24.02 11-12 ¶11-13

During faev years wea go pas, winim wan million pipol baptaes and kamap Olketa Jehovah’s Witness. Taem iu dedicatem iuseleva lo Jehovah, iu chus for kamap disaepol blo Jesus Christ and important samting lo laef blo iu, hem for duim will blo God. Wat nao dedication hem minim? Jesus sei: “Sapos eniwan laek followim mi, hem mas givim laef bilong hem for God.” (Matt. 16:24) Greek toktok wea olketa transleitim lo “givim laef bilong hem for God,” hem savve minim tu for man “no duim samting wea hemseleva laekem.” From iu dedicate lo Jehovah, bae iu need for rejectim eniting wea bae mekem Jehovah no hapi. (2 Cor. 5:​14, 15) Datwan minim for iu rejectim olketa “nogud samting wea man laek for duim,” olsem for durong. (Gal. 5:​19-21; 1 Cor. 6:18) Hao, for obeyim olketa komand olsem bae mekem laef blo iu hard tumas? Nomoa, hem no hard if iu lovem Jehovah and luksavve hao olketa law hia savve helpem iu.—Ps. 119:97; Isa. 48:​17, 18. w24.03 2 ¶1; 3 ¶4

Jehovah givim holy spirit lo olketa wea hem appruvim. (Matt. 12:18) Tingim disfala kwestin, ‘Hao, mi showimaot samfala frut blo holy spirit blo God lo laef blo mi?’ Waswe, iu lukim dat iu impruv lo wei for patient witim olketa narawan winim bifor iu lane abaotem Jehovah? Taem iu garem olketa naesfala fasin wea holy spirit blo God mekem iu for showimaot, diswan bae mekem iu for barava sure Jehovah appruvim iu! Jehovah iusim ransom for forgivim sin blo olketa wea hem appruvim. (1 Tim. 2:​5, 6) Bat hao if heart blo iumi still no acceptim dat Jehovah appruvim iumi nomata iumi garem faith lo ransom and baptaes finis? Remember, staka taem iumi no fit for trustim feeling blo iumi bat iumi savve trustim Jehovah. Jehovah ting lo olketa wea garem faith lo ransom olsem olketa raeteous and hem promis for blessim olketa.—Ps. 5:12; Rome 3:26. w24.03 30 ¶15; 31 ¶17