Waswe, Word “Christian” Gogo for Lusim Mining Bilong Hem?
WANEM nao hem minim for olsem Christian? Hao nao bae iu ansa? Olketa askem disfala kwestin long samfala difren pipol wea olketa chusim long samfala kantri, and ansa bilong samfala long olketa hem olsem:
“For followim Jesus and copyim hem.”
“For kamap gud man and share witim pipol.”
“For acceptim Christ olsem Lord and Savior.”
“For go long Mass, talem Rosary, and kasem Holy Communion.”
“Mi no biliv iu mas go long church for kamap wanfala Christian.”
Olketa dictionary tu garem olketa difren mining. Wanfala dictionary garem tenfala mining for word “Christian,” wea wanfala hem “wei for biliv long or insaed wanfala religion bilong Jesus Christ” and narawan hem “wanfala gud man.” Iumi no sapraes staka faendem hard for minim wanem nao wanfala Christian.
Wei for Kamap Moa Waed Long Tingting
Distaem, midolwan long olketa wea sei olketa Christian—nomata olketa insaed sem religion—iumi savve faendem staka tingting long olketa subject olsem wei wea Bible kam from God, evolution, wei wea church joinim politik, and wei for sharem faith witim pipol. Pipol barava garem strongfala idea and raoa witim narawan abaotem olketa samting saed long fasin olsem wei for killim dae baby insaed bele, homosexual fasin, and wei wea man and woman stap tugeta and no marit. Hem klia hao pipol kamap moa waed long tingting.
Olsem example, disfala buk Christian Century sei wanfala komiti bilong Protestant church no longtaem go nomoa agree for wanfala church bilong olketa savve appointim “wanfala homosexual elder for kamap part bilong governing board bilong hem.” Samfala bigman talem idea hao faith long Jesus hem no important for salvation. Olketa biliv olketa Jew, Muslim, and nara pipol “maet savve go long heven [olsem olketa Christian],” wanfala report insaed The New York Times hem talem.
Tingim, sapos wanfala communist savve apim wei for followim capitalism or wanfala bilong democracy wea saportim wei for garem rul from wanfala man nomoa or wanfala man wea wari abaotem environment hem saportim bigfala bisnis for logging. “Datfala man hem no really wanfala communist or wanfala bilong democracy or wanfala man wea wari long environment,” iu sei—and iu stret. Nomata olsem, taem iu tingim olketa barava difren idea wea pipol wea sei olketa Christian distaem olketa garem, iu lukim olketa idea wea barava difren and staka taem againstim wanem man wea startim Christian Wei, Jesus Christ, hem teachim. Wanem nao diswan sei abaotem Christian Wei bilong olketa?—1 Corinthians 1:10.
Feeling for laek changem Christian teaching for fitim tingting bilong pipol hem samting from bifor kam, olsem bae iumi lukim. Hao nao God and Jesus Christ feel abaotem kaen change olsem? Waswe, hem fitim for olketa church wea saportim olketa teaching wea no start from Christ for kolem olketa seleva Christian? Iumi bae storyim olketa kwestin hia long nextfala article.