Iumi Datkaen wea Garem Faith
Talemaot Gud Nius Long Olketa Rice Garden Bilong Taiwan
TAIWAN savve garem planti rain, wea helpem pipol long there for harvestim rice tufala taem insaed long wan year. Bat samfala taem, rain no savve kam long taem bilong hem, and from diswan olketa seed savve dae. Taem diswan happen, waswe, bae farmer hem givap? Nomoa. Hem savve hem need for no givap. Hem bae plantim olketa niu seed and plantim moa long garden. Then, sapos evriting go ahed gud, bae farmer harvestim gudfala rice. Samfala taem wei for plant and harvest long spiritual wei hem klosap semsem.
No Givap Long Spiritual Harvest
Insaed olketa year wea go pas olketa Jehovah’s Witness long Taiwan waka hard for plantim and harvestim olketa seed bilong Bible truth long samfala area wea luk olsem hem hard. Wanfala example nao Province bilong Miao-li. No planti pipol lisin long witnessing waka wea kamap long datfala area. So long 1973 wanfala hasband and waef wea spesol pioneer kasem assignment for waka long there olsem pipol wea full-taem for talemaot Kingdom. Firstaem, samfala showimaot interest long gud nius. Bat gogo, datfala interest hem nomoa nao. So olketa spesol pioneer kasem niu assignment long difren ples.
Long 1991 tufala nara spesol pioneer go moa long there. Bat tufala lukim tu hao hem no barava gud taem yet for datfala ples for grow long spiritual wei. Bihaen tu-thri year, olketa spesol pioneer lusim there and go long ples wea olketa hope seed bae grow. From diswan, land hem stap nating for lelebet taem.
Waka Moa Kasem Gud Samting
Long September 1998 olketa disaed for go moa and faendem olketa ples long Taiwan wea no eni pioneer stap long hem. Hao nao olketa duim diswan? Samting olsem 40 spesol pioneer kasem assignment for lelebet taem for waka long olketa area wea garem staka pipol.
Insaed olketa territory wea olketa chusim for disfala campaign hem tufala taon wea join tugeta long Province bilong Miao-li. Fofala singol sista nao bae waka long there for thrifala month for lukluk long disfala territory. No longtaem bihaen olketa arrive, olketa raetem olketa gudfala report wea showimaot namba bilong pipol wea interest wea olketa faendem. Kasem taem wea olketa finisim thri month for pioneer long datfala area, olketa garem planti Bible study. Olketa startim tu wanfala buk study grup wea wanfala elder from kongregeson wea stap klosap nao helpem olketa.
Thrifala long olketa sista hia talem hao bae olketa laek for stap and lukaftarem “olketa seed” wea go ahed for grow gud. So, tufala long olketa kamap spesol pioneer wea bae stap long there for longtaem, and narawan go ahed for waka long there olsem wanfala regular pioneer. Wanfala elder from wanfala kongregeson klosap long ples hia muv go for helpem olketa. Winim 60 pipol attendim first pablik tok wea kasem datfala area. Distaem disfala kongregeson wea stap klosap hem go ahed for helpem disfala niu grup for garem olketa meeting evri Sunday witim samfala buk study. Klosap maet wanfala niu kongregeson kamap long disfala area.
Wei for No Givap Givim Olketa Blessing Long Samfala Nara Part Long Taiwan
Samfala nara ples kamap semsem olsem. Long northeast part bilong disfala island, long Province bilong I-lan, wanfala niu Kongregeson Buk Study hem kamap long area wea olketa spesol pioneer wea go for short taem waka long hem.
Wanfala evening, taem olketa duim haos-tu-haos waka, wanfala spesol pioneer meetim wanfala young man and showim hem wanfala pepa wea showim taem wea garem list bilong olketa kongregeson meeting. Man hia kwiktaem ask: “Mi savve attendim meeting long tumoro naet? Sapos olsem, wanem nao bae mi werem?” Disfala pioneer garem eitfala Bible study evri week witim olketa wea interest. No longtaem bihaen samfala long olketa Bible student hia mekem plan for kamap pablisa bilong gud nius, witim goal for baptaes.
Wanfala woman long disfala sem taon gogo long church for planti year bat hem no savve faendem eniwan for teachim hem samting from Bible. Taem hem herem arrangement for Bible study, hem mekius long disfala chance. Hem hapi for preparem firstaem olketa leson bilong hem. Taem spesol pioneer arrive for conductim study, hem lukim hao woman hia duim “homwaka” bilong hem finis, from woman hia baem wanfala notebuk and hem raetem olketa kwestin from study buk bilong hem. Then hem raetem ansa long evri kwestin. Woman hia copyim tu insaed notebuk bilong hem evri scripture wea stap insaed long leson. Taem sista kam for conductim firstfala study, woman hia preparem first thrifala leson finis!
Olketa samting wea klosap semsem olsem hem kamap long taon bilong Dongshih long midol part bilong Taiwan. Olketa spesol pioneer wea go for lelebet taem offerim winim 2,000 brochure insaed thri month wea olketa waka long there. Kam kasem mek-thri month, olketa conductim 16 hom Bible study. Disfala taon barava distroe nogud from wanfala earthquake wea kasem midol part bilong Taiwan long September 21, 1999, bat samfala wea interest go ahed for grow long spiritual wei, nomata olketa mas travel kasem wan hour for attendim olketa meeting long Kingdom Hall wea stap klosap. Tru nao, iumi need for go ahed strong for harvestim gudfala garden, nomata sapos hem saed long material wei or long spiritual wei.
[Map long page 8]
CHINA
Taiwan Strait
TAIWAN
[Credit Line]
Mountain High Maps® Copyright © 1997 Digital Wisdom, Inc.