Hapi for Olowe Long Heven Or Long Earth?

WASWE, hapi bilong iu hem depend long ples iu stap? Planti pipol bae agree hao hapi living hem depend long olketa samting olsem gudfala health, purpose long laef, and wei for fren witim nara pipol. Wanfala wise toktok bilong Bible hem sei: “Hem moabeta for kaikaim wanfala dish vegetable wea love hem stap winim wanfala buluka wea fasin for heit hem stap.”—Proverbs 15:17.

Bat, sorre tumas, hom bilong iumi long earth garem longfala history bilong heit, raf fasin, and olketa wicked fasin. Bat waswe long heven, or spirit world, wea planti pipol want for go long hem bihaen olketa dae? Waswe, evritaem hem ples bilong peace and free from problem, wea no garem enikaen trabol, olsem planti pipol tingim?

Bible hem teachim iumi hao God stap long heven witim planti million spirit creature wea olketa kolem angel. (Matthew 18:10; Revelation 5:11) Olketa kolem olketa hia olketa spirit “son bilong God.” (Job 38:4, 7) Olsem olketa man, olketa angel tu free for chus; olketa no olsem machine wea luk olsem man. So, from diswan, olketa tu savve chus for duim stretfala samting or duim rong samting. Waswe, olketa angel savve chus for duim rong samting? Hem maet mekem samfala pipol sapraes for savve hao planti thousand year bifor, planti angel sin againstim God—olketa go againstim hem!—Jude 6.

Bighed Fasin Long Heven

Sin kamap insaed spirit world bikos long bighed fasin bilong wanfala angel, wea kasem nem Satan (Man for Againstim Man) and Devil (Man for Tokspoelem Man). Disfala angel wea obey bifor chus for duim rong samting followim tingting bilong hemseleva. Bihaen datwan hem affectim long nogud wei samfala nara spirit creature, so kasem taem bilong Noah, bifor Flood, bigfala sekson bilong olketa joinim Satan for go againstim God.—Genesis 6:2, footnote; 2 Peter 2:4.

God no aotem olketa nogud angel hia from heven long semtaem. Nomoa, bat hem letem olketa for stap—maet samfala samting nao hem no letem long olketa—for planti thousand year.a Nomata olsem, taem wei wea God letem olketa for stap hem finis, hem “torowem” olketa aot from heven, redy for finisim olketa evribit. Then wanfala voice long heven sei: “Dastawe iufala hapi, iufala heven and iufala wea stap long there!” (Revelation 12:7-12) Luk olsem, olketa faithful angel hapi tumas from, bihaen longfala taem, heven hem free nao from olketa man for mek trabol!

Taem iumi ting raonem olketa information hia wea no planti pipol savve, luk olsem bae no eni tru peace stap taem olketa kleva creature hia les long olketa law and principle bilong God. (Isaiah 57:20, 21; Jeremiah 14:19, 20) Long narasaed, taem evriwan obeyim olketa law bilong God, peace bae win. (Psalm 119:165; Isaiah 48:17, 18) So sapos evri man lovem and obeyim God and lovem nara pipol, waswe, earth bae no kamap wanfala trufala hapi ples for stap? Bible hem ansa yes!

Bat waswe long olketa wea selfish and les for changem nogud wei bilong olketa? Bae olketa spoelem olowe peace bilong olketa wea want for duim will bilong God? Nomoa, God deal finis witim olketa wicked angel long heven, and hem bae deal witim olketa wicked pipol hia long earth tu.

Wanfala Earth wea Kamap Klin

“Heven nao throne bilong mi, and earth nao hem stul for leg bilong mi,” God hem sei. (Isaiah 66:1) From hem barava holy, God bae no letem rabis fasin for spoelem “stul for leg” bilong hem olowe. (Isaiah 6:1-3; Revelation 4:8) Olsem hem klinim heven finis from olketa wicked spirit, hem bae klinim earth tu from olketa wicked pipol, olsem olketa Bible scripture long daon showimaot:

“Olketa wea duim nogud samting bae finis, bat olketa wea hope long Jehovah bae kasem earth.”—Psalm 37:9.

“Olketa wea raeteous bae stap long earth, and olketa wea no garem blame bae stap long hem. Bat olketa wicked pipol, olketa bae finis evribit from earth; and olketa wea giaman, olketa bae aot from earth.”—Proverbs 2:21, 22.

“Hem stret long saed bilong God for peim bak trabol long olketa wea mekem trabol for iufala, bat, for iufala wea kasem trabol, hem givim help witim mifala long taem wea Lord Jesus hem showaot from heven witim olketa strongfala angel bilong hem insaed wanfala bigfala fire, taem hem pei bak long olketa wea no savve long God and olketa wea no obeyim gud nius abaotem Lord bilong iumi Jesus. Olketa hia bae kasem panis for finis evribit from front long Lord and from glory bilong strong bilong hem.”—2 Thessalonians 1:6-9.

“World hem redy for finis and evri samting wea hem wantem tu, bat man wea duim will bilong God bae stap olowe.”—1 John 2:17.

Waswe, Earth Bae Stap Long Peace Olowe?

Nomata olketa scripture showimaot klia hao wei wea God letem nogud fasin for go ahed garem spialaen, hao nao iumi savve sure nogud fasin, bihaen olketa finisim, bae no kamap moa? No forget hao bihaen Flood long taem bilong Noah, kwiktaem nomoa nogud fasin kamap moa gogo God mas duim samting for blokem olketa nogud plan bilong olketa man taem hem konfiusim languis bilong olketa.—Genesis 11:1-8.

Main reason for trustim hao nogud fasin bae no kamap moa hem wei wea olketa man bae no rulim disfala earth moa olsem bihaen long Flood. Bat, Kingdom bilong God nao bae rulim. Disfala Kingdom bae rul kam from heven, and bae kamap only gavman long earth. (Daniel 2:44; 7:13, 14) Hem bae kwiktaem duim samting againstim eniwan wea trae for duim nogud fasin moa. (Isaiah 65:20) Tru nao, gogo hem bae finisim evribit man wea startim wicked fasin—Satan datfala Devil—witim olketa demon, hem nao olketa wicked angel wea followim hem.—Romans 16:20.

And tu, olketa man bae no wari moa abaotem kaikai, kaleko, haos, and waka—olketa samting wea mekem samfala distaem for kamap criminal taem olketa no garem. Tru nao, full earth bae change for kamap wanfala paradaes wea garem staka samting for evriwan.—Isaiah 65:21-23; Luke 23:43.

Moa important, disfala Kingdom bae teachim pipol wea stap anda long hem long wanfala peaceful wei bilong laef and long semtaem helpem olketa for kamap perfect evribit. (John 17:3; Romans 8:21) Bihaen datwan, olketa man bae no stragol moa witim olketa wik point and sin bilong olketa, and olketa bae fit and hapi for obeyim God long perfect wei, long sem wei olsem datfala perfect man Jesus. (Isaiah 11:3) Tru, Jesus stap loyal long God nomata hem feisim bigfala test and pain—olketa samting wea bae no stap insaed Paradaes.—Hebrews 7:26.

Why Samfala Go Long Heven

Planti wea readim Bible luksavve long disfala toktok bilong Jesus: “Insaed long haos bilong Father bilong mi planti ples stap. . . . Mi go for redyim wanfala ples for iufala.” (John 14:2, 3) Waswe, diswan no againstim idea bilong laef olowe long wanfala paradaes earth?

Olketa teaching hia no againstim each other. Tru samting, tufala saportim each other. Firstaem, Bible sei wanfala smol namba bilong olketa faithful Christian—hem nao, 144,000—olketa laef bak olsem spirit for stap long heven. Why nao olketa kasem disfala nambawan reward? Bikos olketa kamap part long datfala grup wea John lukim long wanfala vision wea olketa “laef moa and rul olsem king witim Christ for wan thousand year.” (Revelation 14:1, 3; 20:4-6) Taem iumi markem witim planti billion pipol long earth, datfala 144,000 hem really wanfala “smol flock.” (Luke 12:32) Winim datwan, from olketa experiencem finis problem bilong olketa man, olsem Jesus, olketa bae fit for “feel sorre long olketa wik point bilong iumi” taem olketa helpem olketa man and mekem earth kamap gud moa.—Hebrews 4:15.

Earth—Hom Bilong Olketa Man for Olowe

From God provaedem ransom sakrifaes bilong Jesus Christ, hem start for hipimap 144,000 klosap 2,000 year bifor, and evri samting showimaot hao disfala grup kasem full namba bilong hem finis. (Acts 2:1-4; Galatians 4:4-7) Bat, sakrifaes bilong Jesus hem no for olketa sin bilong 144,000 nomoa, “bat for full world tu.” (1 John 2:2) Dastawe, evriwan wea showimaot faith long Jesus garem chance for kasem laef olowe. (John 3:16) Olketa wea sleep long grev bat wea God rememberim bae kasem resurrection, no for go long heven, bat for laef long earth wea kamap klin. (Ecclesiastes 9:5; John 11:11-13, 25; Acts 24:15) Wanem nao bae olketa kasem long there?

Revelation 21:1-4 hem ansa, taem hem sei: “Lukim! Tent bilong God hem stap witim olketa man . . . And hem bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem finis nao.” Tingim—olketa kamap free from dae, and pain and krae wea diswan kosim bae finis for olowe! Hem nao, firstfala purpose bilong God for earth and olketa man bae fulfill long nambawan wei.—Genesis 1:27, 28.

Iumi Nao Chus—Laef or Dae

Adam and Eve no kasem hope for go long heven. Samting wea tufala savve chusim nao hem for obeyim God and stap olowe long wanfala paradaes or no obeyim hem and dae. Sorre tumas, tufala chus for no obey and there nao tufala go bak long “dust” bilong graon. (Genesis 2:16, 17; 3:2-5, 19) Hem no purpose bilong God for famili bilong olketa man for dae and go stap long heven. God hem wakem staka million angel for stap long heven; olketa spirit creature hia hem no olketa man wea dae finis and resurrect for laef long heven.—Psalm 104:1, 4; Daniel 7:10.

Wanem nao iumi mas duim for kasem blessing for stap olowe insaed Paradaes long earth? First step hem for studyim Word bilong God, Holy Bible. Jesus sei long prea: “Diswan nao minim laef olowe, for olketa kasem savve long iu, only trufala God, and abaotem datwan wea iu sendem kam, Jesus Christ.”—John 17:3.

For duim samting followim datfala savve hem narafala step for kasem hapi olowe insaed Paradaes. (James 1:22-24) Olketa wea live followim Word bilong God garem nambawan chance for lukim witim eye bilong olketa taem olketa hapi profesi fulfill olsem datwan wea olketa raetem long Isaiah 11:9, wea hem sei: “Olketa [man] bae no spoelem eniwan or spoelem eni samting long holy maunten bilong mi; from earth bae fulap witim savve bilong Jehovah olsem wata hem kavarem sea.”

[Footnote]

[Piksa long page 7]

“Olketa raeteous wan seleva bae kasem earth, and olketa bae stap olowe long hem.”—Psalm 37:29