Stretfala Fasin Gogo Daon
DATKAEN samting no savve happen bifor,” hem nao koment bilong Helmut Schmidt, chancellor bilong Germany bifor. Hem barava feel nogud long fasin for no honest bilong samfala bigman bilong gavman wea kamap long front-page niuspepa. Hem sei “stretfala fasin hem lus finis thru long greedy fasin.”
Planti pipol bae agree witim hem. Pipol go ahed for ting daonem stretfala fasin wea garem faondeson long Word bilong God, Bible, and wea planti acceptim for longfala taem olsem wanfala gaed for wanem hem stret and wanem hem rong. Hem olsem tu long olketa kantri wea sei olketa garem Christian Wei.
Waswe, Stretfala Fasin Insaed Bible Hem Important?
Insaed stretfala fasin wea garem faondeson long Bible hem honest and faithful fasin. Nomata olsem, conman, corruption, and raverave fasin hem big tumas. The Times bilong London reportim hao samfala policeman “kasem for olketa seleva samting olsem £100,000 [$750, 000, S.I.] each taem for sellim moa olketa drug or lusim pruv againstim samfala main man bilong criminal fasin.” Long Austria wei for
raverave saed long insurance hem samting wea happen evritaem. And long Germany, scientific community seke tumas taem olketa man for duim research faendemaot “wanfala worse example bilong raverave long German science.” Olketa accusim wanfala professor, wanfala “main man midolwan olketa geneticist long German,” for iusim information wea no tru or mek-ap.
Insaed stretfala fasin wea garem faondeson from Bible hem wei for faithful long marit, wei for fren wea shud for olowe. Bat namba bilong hasband and waef wea kasem divorce kot kamap moa big. Catholic niuspepa Christ in der Gegenwart (Christian wea Stap Distaem) reportim hao, long Switzerland, “nomata midolwan pipol wea ‘hol strong,’ moa and moa marit go ahed for brekdaon.” Long Netherlands, 33 percent long evri marit kasem divorce. Wanfala woman wea lukim change wea kamap long Germany insaed samfala year wea go pas raet abaotem wari bilong hem: “Pipol ting long marit olsem wei bilong bifor and no fitim taem bilong iumi. Pipol no maritim wanfala partner for stap witim for olowe.”
Long narasaed, planti million pipol ting long olketa mark bilong stretfala fasin wea Bible teachim olsem samting for trustim and important for laef long world bilong iumi distaem. Hasband and waef wea stap long Swiss-German border faendemaot hao wei for lane for live followim olketa fasin bilong Bible mekem tufala moa hapi. Long tufala, “wanfala gaedlaen nomoa stap for evri samting long laef. Gaedlaen hia hem Bible.”
Wanem nao tingting bilong iu? Waswe, Bible savve waka olsem wanfala important gaedlaen? Waswe, stretfala fasin wea garem faondeson from Bible hem gudfala samting distaem?