Kwestin From Reader
Wanem nao mining bilong disfala toktok long Hebrews 12:4: “Iufala nating faet go kasem blood yet”?
Disfala toktok “faet go kasem blood” hem minim wei for go ahed for faet nomata go kasem dae, wea barava minim man kapsaetem blood bilong hem wea givim laef.
Aposol Paul savve hao from faith bilong olketa, samfala Hebrew Christian bin ‘stand strong long bigfala competition witim wei for safa.’ (Hebrews 10:32, 33) Taem hem showimaot diswan, luk olsem Paul hem iusim tokpiksa bilong wei for stragol long wanfala sports competition bilong Greece, wea insaed diswan hem wei for resis, wrestling, boxing, and wei for torowem discus and javelin. Dastawe, long Hebrews 12:1, hem encouragem olketa nara Christian: “Iumi tu mas aotem evri hevi and sin wea isi for kasholem iumi, and iumi mas ran witim fasin for go ahed strong long datfala resis wea stap front long iumi.”
Thrifala verse bihaen, long Hebrews 12:4, maet Paul hem change from wei for storyim wanfala resis go long wanfala boxing competition. (Tufala samting hia kamap long 1 Corinthians 9:26.) Olketa man for boxing bifor taemapem raon hand bilong olketa witim olketa pis leather. Olketa pis leather maet garem “lead, iron, or olketa pis metal long hem, wea savve mekem olketa man wea boxing garekil.” Kaen raf game olsem savve mekem blood kamaot , and samfala taem man savve dae long hem tu.
Olketa Hebrew Christian garem planti example bilong olketa faithful servant bilong God wea pipol persecutim and spoelem olketa long nogud wei nomata go kasem dae, “go kasem blood.” Lukim wei wea Paul story abaotem samting wea olketa faithful wan bifor kasem:
“Pipol sutim olketa long ston, tekem olketa long kot, katem olketa long saw, killim olketa dae long sword, olketa werem skin bilong sheep, skin bilong goat, olketa short long samting, kasem trabol, pipol spoelem olketa.” Bihaen datwan, Paul mekhae long Man wea Mekem Perfect faith bilong iumi, Jesus: “Hem stand strong long torture stake, no wari long shame, and hem sidaon long raet saed long throne bilong God.”—Hebrews 11:37; 12:2.
Tru nao, planti “faet go kasem blood,” hem nao, go kasem dae. Faet bilong olketa hem moa samting winim wei for faet againstim sin bilong wei for short long faith. Olketa loyal nomata olketa kasem bigfala pain long body, and keepim faithful fasin bilong olketa go kasem dae.
Olketa niu wan long Jerusalem kongregeson, wea maet kamap Christian bihaen disfala nogud persecution hem katdaon, nating feisim olketa bigfala test olsem. (Acts 7:54-60; 12:1, 2; Hebrews 13:7) Nomata olsem, olketa test wea no big tumas mekem samfala feel wikdaon from wei for go ahed long faet; ‘olketa kamap taed and wikdaon long soul bilong olketa.’ (Hebrews 12:3) Olketa need for muv ahed for kamap mature. Datwan bae helpem olketa for kamap fit for winim eni samting wea maet kamap, nomata diswan minim wei for spoelem olketa long physical wei go kasem dae.—Hebrews 6:1; 12:7-11.
Planti Christian long taem bilong iumi “faet go kasem blood,” pipol killim dae olketa bikos olketa no willing for lusim Christian Wei. Winim wei for letem toktok bilong Paul long Hebrews 12:4 mekem iumi fraet tumas, iumi savve tingim olsem hem showim iumi samting wea iumi savve disaed for duim, for stap loyal long God. Bihaen, long datfala sem leta for olketa Hebrew, Paul raet: “Letem iumi go ahed for garem kaeness wea man no fit for kasem, wea thru long diswan iumi savve givim holy service wea God acceptim witim fasin for fraet long hem and respect.”—Hebrews 12:28.