Fit Evribit Olsem Pipol wea Teachim Word Bilong God
“God . . . hem barava mekem iumi kamap fit for olsem olketa minister.”—2 CORINTHIANS 3:5, 6.
1, 2. Hao nao samfala pipol trae for duim preaching waka, and why nao olketa fail?
HAO nao sapos iu kasem wanfala waka wea iu no fit for duim? Tingim diswan: Evri samting wea iu needim hem stap front long iu, and olketa tul stap redy. Bat iu no garem eni idea hao for duim disfala waka. Worse moa, disfala waka mas finis kwiktaem. Pipol depend long iu. Hem samting wea mekem man barava feel nogud!
2 Kaen hardfala problem olsem hem no mekap nomoa. Tingim wanfala example. Samfala taem olketa church bilong Christendom trae for organizem and duim haos-tu-haos ministry. Klosap evritaem wea olketa traem, insaed tu-thri week or month olketa fail. Why nao olsem? Christendom no helpem olketa follower bilong hem for kamap fit for disfala waka. And tu, olketa bigman bilong church no kamap fit for datfala preaching waka, nomata bihaen planti year bilong education long olketa skul and Bible college. Why nao iumi sei olsem?
3. Wanem toktok nao kamap thrifala taem long 2 Corinthians 3:5, 6, and wanem nao hem minim?
3 Word bilong God explainim wanem nao mekem man kamap fit olsem trufala man for preachim gud nius. Spirit muvim aposol Paul for raet olsem: “Iumi no garem eni samting from iumiseleva for sei iumi nao kamap fit, bat wei wea iumi kamap fit hem kam from God, wea hem barava mekem iumi kamap fit for olsem olketa minister.” (2 Corinthians 3:5, 6) Lukim hao disfala toktok—“kamap fit” hem stap thrifala taem long hia. Wanem nao hem minim? Vine’s Expository Dictionary of Biblical Words hem sei: “Taem hem storyim olketa samting, [disfala Greek word] hem minim ‘inaf’ . . . ; taem hem storyim pipol, hem minim ‘fit,’ ‘fitim.’” Dastawe, man wea “kamap fit,” hem fitim and fit for duim waka wea samwan givim for hem duim. Yes, olketa tru minister bilong gud nius fit for duim disfala waka. Olketa fit or fitim for preach.
4. (a) Hao nao example bilong Paul showimaot hao wei for kasem mark for kamap minister hem no for wanfala spesol sekson nomoa? (b) Wanem nao thrifala samting Jehovah iusim for mekem iumi kamap fit for olsem minister?
4 Bat, hao nao olketa kamap fit? From savve bilong olketa seleva? From savve wea big tumas? From spesol education long olketa best skul? Luk olsem aposol Paul hem garem evri samting hia. (Acts 22:3; Philippians 3:4, 5) Nomata olsem, hem hambol for talemaot hao olketa mark wea hem kasem olsem minister hem kam, no from olketa spesol skul bilong bigfala savve, bat from Jehovah God. Waswe, olketa mark hia hem for wanfala spesol sekson nomoa? Paul raet go long kongregeson bilong Corinth abaotem “wei wea iumi kamap fit.” Datwan showimaot hao Jehovah mek sure evri faithful servant bilong hem savve fit for duim waka wea hem assignim olketa for duim. Hao nao Jehovah mekem olketa trufala Christian kamap fit distaem? Iumi bae storyim thrifala samting wea hem iusim: (1) Word bilong hem, (2) holy spirit bilong hem, and (3) organization bilong hem long earth.
Word Bilong Jehovah Mekem Iumi Kamap Fit
5, 6. Hao nao olketa Holy Scripture affectim olketa tru Christian?
5 First samting, hao nao Word bilong God mekem iumi kamap fit olsem olketa minister? Paul raet olsem: “Evri Scripture hem kam from God and hem gud for teach, for givim kaonsel, for stretem evri samting, for givim discipline long raeteous fasin, mekem man bilong God hem fit evribit, barava redy for duim evri gudfala waka.” (2 Timothy 3:16, 17) So olketa Holy Scripture helpem iumi for kamap “fit evribit, barava redy” for duim “gudfala waka” for teachim pipol abaotem Word bilong God. Bat, waswe long olketa wea followim olketa church bilong Christendom? Olketa tu savve readim Bible. Hao nao sem buk wea helpem samfala pipol for kamap minister wea fit, no helpem olketa narawan? Ansa hem stap long tingting bilong iumi abaotem Bible.
6 Sorre tumas, no staka wea go long church acceptim message bilong Bible “olsem trufala word bilong God.” (1 Thessalonians 2:13) Christendom garem barava nogud record saed long diswan. Waswe, bihaen olketa stap for samfala year long Bible college, olketa bigman bilong church fit evribit olsem pipol wea teachim word bilong God? No really. Taem samfala student start skulim Bible, olketa biliv long Bible, bat bihaen olketa skul finis, olketa daotem nao! Dastawe bihaen, winim wei for preachim word bilong God—wea planti long olketa no bilivim nao—olketa duim ministry wea followim difren samting, olsem wei for teksaed long politik, apim wei for helpem pipol kasem olketa material need, or mekhae long tingting bilong olketa man. (2 Timothy 4:3) Long wei wea difren, olketa tru Christian followim example bilong Jesus Christ.
7, 8. Hao nao tingting bilong Jesus abaotem Word bilong God hem difren from olketa bigman bilong religion long taem bilong hem?
7 Jesus no letem olketa bigman bilong religion long taem bilong hem affectim tingting bilong hem. Nomata hem teachim wanfala smol grup, olsem olketa aposol bilong hem or staka pipol, Jesus iusim gud olketa holy raeting. (Matthew 13:10-17; 15:1-11) Diswan mekem hem difren evribit from olketa bigman bilong religion long taem bilong hem. Olketa trae for stopem olketa man nating for studyim olketa deep samting bilong God. For tok stret, hem kastom bilong olketa teacher long datfala taem for biliv hao samfala part long Scripture hem deep tumas and fit for storyim witim wanfala klos student nomoa—bat witim smol voice and kavarem hed! Olketa bigman bilong religion hia fraet for storyim samfala part bilong Bible long sem wei wea olketa fraet for iusim nem bilong God!
8 Christ hem no olsem. Hem biliv hao, no just samfala, bat evri pipol need for savve long “evri toktok wea kamaot from mouth bilong Jehovah.” Jesus no interest for givim wei for savve long wanfala spesol grup bilong olketa Bible savveman nomoa. Hem talem olketa disaepol bilong hem: “Samting wea mi talem iufala long darkness, talemaot long laet; and samting wea mi talemhaed long iufala, preachim from antap long ruf bilong haos.” (Matthew 4:4, 10:27) Jesus strong for sharem savve bilong God witim evriwan wea hem fit for sharem witim.
9. Hao nao olketa tru Christian shud iusim Bible?
9 Word bilong God shud main samting insaed teaching bilong iumi. Olsem example, taem iumi givim tok long Kingdom Hall, planti taem hem no inaf for just readim olketa verse long Bible. Iumi need for explainim, iusim tokpiksa, and joinim scripture witim subject. Goal bilong iumi, hem for tekem message bilong Bible wea stap long pepa and putim insaed heart bilong olketa wea lisin. (Nehemiah 8:8, 12) Shud iusim tu Bible for givim kaonsel or discipline for stretem samwan taem hem needim. Nomata pipol bilong Jehovah iusim difren languis and kam from difren kaen living, iumi evriwan respectim buk wea winim evri buk—Bible.
10. Hao nao disfala message bilong Bible wea kam from God savve affectim iumi?
10 Taem man iusim witim respect olsem, Word bilong God garem paoa. (Hebrews 4:12) Hem savve muvim pipol for mekem olketa bigfala change long living bilong olketa, olsem wei for tanawe from olketa fasin wea no followim Bible olsem fornication, adultery, worshipim idol, drunk, and fasin for steal. Hem helpem staka for aotem oldfala fasin and werem niu wan. (Ephesians 4:20-24) Tru nao, sapos iumi respectim Bible winim eni tingting or kastom bilong man and iusim long faithful wei, then Bible savve mekem iumi kamap fit, yes fit evribit olsem pipol wea teachim word bilong God.
Spirit Bilong Jehovah Mekem Iumi Kamap Fit
11. Why nao hem fitim for holy spirit bilong Jehovah garem nem “datfala helper”?
11 Mek-tu samting, bae iumi storyim hao holy spirit, or paoa bilong Jehovah savve mekem iumi fit evribit. Iumi mas nating forget hao spirit bilong Jehovah hem strong winim evri nara paoa wea stap. Jehovah givim paoa long Son bilong hem wea hem lovem for iusim maeti paoa hia for helpem olketa tru Christian. So hem fitim for Jesus kolem disfala holy spirit “datfala helper.” (John 16:7) Hem talem olketa follower bilong hem for askem Jehovah for datfala spirit, and hem promisim olketa hao Jehovah bae no hol bak for givim.—Luke 11:10-13; James 1:17.
12, 13. (a) Why nao hem important for prea for holy spirit helpem iumi insaed ministry? (b) Hao nao olketa Pharisee showimaot holy spirit no waka long olketa?
12 Iumi need for prea for holy spirit evriday, especially for helpem iumi long ministry. Hao nao disfala holy spirit savve affectim iumi? Hem waka long mind and heart bilong iumi, and helpem iumi for change, for grow, for changem oldfala fasin witim niu wan. (Colossians 3:9, 10) Hem helpem iumi for mekem grow olketa fasin olsem Christ garem. Planti long iumi savve baeheartim Galatians 5:22, 23. Olketa verse hia listim olketa frut bilong spirit bilong God. First wan hem love. Datfala fasin hem important tumas long ministry bilong iumi. Why nao olsem?
13 Love savve barava muvim man. Love for Jehovah and neiba muvim olketa tru Christian for sharem gud nius. (Mark 12:28-31) Sapos iumi no garem diskaen love, iumi no savve kasem mark olsem pipol wea teachim word bilong God. Lukim wei wea Jesus and olketa Pharisee barava difren. Matthew 9:36 sei olsem abaotem Jesus: “Taem hem lukim olketa pipol hem feel sorre long olketa, from olketa garekil and stap olabaot olsem olketa sheep wea no garem eni shepherd.” Hao nao feeling bilong olketa Pharisee abaotem olketa pipol hia? Olketa sei olsem: “Bat disfala pipol wea no savve long Law olketa nao garem curse.” (John 7:49) Olketa Pharisee hia no garem love for pipol bat lukdaonem olketa. Hem klia, spirit bilong Jehovah no waka long olketa.
14. Hao nao example bilong Jesus for showimaot love insaed ministry hem muvim iumi?
14 Jesus savve feelim hao nara man hem feel. Hem feelim pain bilong olketa. Hem feelim taem olketa kasem planti nogud samting, garekil, stap olabaot olsem olketa sheep wea no garem shepherd. John 2:25 talem iumi hao Jesus “savve wanem nao insaed long man.” From hem Nambawan Wakman bilong Jehovah long taem bilong creation, Jesus garem finis bigfala savve abaotem wei bilong man. (Proverbs 8:30, 31) Datfala savve mekem love bilong hem moa deep. Letem kaen love olsem nao muvim iumi evritaem for duim disfala preaching waka! Sapos iumi feel olsem iumi savve kamap moabeta long diswan, iumi mas prea for holy spirit bilong Jehovah and then waka followim prea bilong iumi. Jehovah bae ansarem iumi. Hem bae sendem strongfala paoa bilong hem wea no eniwan savve stopem for helpem iumi for kamap olsem Christ, wea bin fit evribit for preachim disfala gud nius.
15. Hao nao toktok long Isaiah 61:1-3 hem fitim Jesus and long semtaem showimaot fasin bilong olketa scribe and Pharisee?
15 So from wea nao Jesus kasem mark? Hem sei: “Spirit bilong Jehovah hem stap long mi.” (Luke 4:17-21) Tru nao, Sovereign bilong universe seleva appointim Jesus witim holy spirit. Jesus no needim eni mark moa. Waswe, olketa bigman bilong religion long datfala taem kasem appointment thru long holy spirit? No moa nao. And tu, olketa no fit for fulfillim disfala profesi bilong Isaiah 61:1-3 wea Jesus readim big and showimaot hao hem fulfill long hem. Plis readim olketa verse hia, and bae iu lukim hao olketa scribe and Pharisee nating fit. Olketa no garem eni gud nius for sharem witim olketa wea poor. And hao nao olketa savve preach abaotem wei wea olketa prisoner bae kamap free and olketa wea blind bae lukluk moa? From long spiritual wei, olketa nao blind and slave long olketa kastom bilong man! Long wei wea difren from olketa man hia, iumi mas kamap fit for teachim pipol.
16. Why nao pipol bilong Jehovah distaem savve feel sure olketa kasem mark olsem minister?
16 Tru nao, iumi no study long olketa spesol skul bilong Christendom. No eni spesol Bible skul appointim iumi olsem olketa teacher. So waswe, iumi short long olketa mark? Nomoa nao! Jehovah God nao appointim iumi olsem Witness bilong hem. (Isaiah 43:10-12) Sapos iumi prea for spirit bilong hem and waka followim datwan, iumi kasem mark wea winim evri mark. Hem tru, iumi no perfect and no evritaem kasem example bilong Nambawan Teacher Jesus Christ. Nomata olsem, iumi hapi from Jehovah iusim spirit bilong hem for mekem iumi kasem mark and kamap fit olsem pipol wea teachim word bilong hem.
Organization Bilong Jehovah Mekem Iumi Kamap Fit
17-19. Hao nao faevfala meeting evri week wea organization bilong Jehovah provaedem savve helpem iumi for kamap fit for olsem olketa minister?
17 Distaem iumi storyim mek-thri samting Jehovah iusim for mekem iumi fit evribit olsem pipol wea teachim Word bilong Hem—kongregeson, or organization bilong hem long earth wea trainim iumi for olsem minister. Long wanem wei? Tingim program bilong instruction wea iumi enjoyim! Insaed wanfala week iumi attendim faevfala Christian meeting. (Hebrews 10:24, 25) Iumi hipap long olketa smol grup for Kongregeson Buk Study for enjoyim wanfala gud study long Bible witim wanfala study buk wea organization bilong Jehovah nao provaedem. Long wei for lisin and givim ansa, iumi lane and encouragem each other. And tu iumi kasem help wanwan from buk study conductor. Long Pablik Tok and Wastaoa Study, iumi kasem planti gudfala spiritual kaikai.
18 Theocratic Ministry Skul hem for givim instruction long hao for teach. Taem iumi preparem tok, iumi lane hao for iusim word bilong God for teachim planti difren samting. (1 Peter 3:15) Waswe, enitaem iu mas givim wanfala tok abaotem subject wea iu savve lelebet finis, bat taem iu preparem iu lanem niu samting? Diswan happen planti taem. Wei for teachim wanfala subject long narawan mekem savve bilong iumi abaotem datfala subject kamap moabeta. Nomata taem iumi no garem assignment iumi still savve lane hao for kamap teacher wea moabeta. Iumi savve lukim hao evri student garem samfala gud fasin, and iumi savve ting raonem hao for followim olketa fasin hia.
19 Service Meeting tu hem for helpem iumi olsem pipol wea teachim Word bilong God. Evri week iumi enjoyim olketa gudfala tok, and demonstration wea helpem ministry bilong iumi. Wanem offer nao bae iumi iusim? Hao nao iumi savve deal witim olketa spesol problem long territory? Wanem difren kaen wei for duim preaching nao stap wea maet fitim iumi for lane moa abaotem? Wanem nao bae mekem iumi kamap moabeta long wei for teach long olketa return visit and Bible study? (1 Corinthians 9:19-22) Iumi storyim and kasem ansa for kaen kwestin olsem long Service Meeting. Planti part long meeting hem kam from Kingdom Ministry Bilong Iumi, narafala tul wea organization bilong Jehovah provaedem for mekem iumi fit for duim disfala important waka.
20. Hao nao iumi savve barava kasem gud samting from olketa meeting and assembly?
20 Taem iumi prepare and attendim olketa meeting and then duim samting wea iumi lanem, iumi kasem staka training for mekem iumi fit. Bat samfala wei moa stap. Iumi garem olketa big meeting tu—olketa assembly and convention—wea bae mekem iumi moa fit olsem olketa wea teachim Word bilong God. Iumi barava luk forward for lisin gud and followim evri kaonsel olsem!—Luke 8:18.
21. Wanem pruv nao stap wea showimaot iumi kasem gud training, and hu nao mekem diswan kamap?
21 Waswe, gudfala samting kamaot finis from training wea Jehovah provaedem? Letem samting wea happen talem ansa. Evri year, planti handred thousand pipol kasem help for lanem olketa Bible teaching and for followim insaed laef samting wea God askem olketa for duim. Namba bilong iumi hem go ahed for grow, bat no eniwan long iumi savve kasem praise for duim diswan. Iumi mas garem stretfala tingting olsem Jesus garem. Hem sei olsem: “No eni man savve kam long mi sapos Father, wea sendem mi, no pullim hem.” Olsem olketa aposol bilong bifor, planti long iumi olketa man wea no go long eni spesol skul. (John 6:44; Acts 4:13) Wei wea iumi win hem depend long Jehovah, wea pullim pipol wea garem honest heart long truth. Paul talem olsem: “Mi plantim, Apollos watarem, bat God go ahed for mekem hem grow.”—1 Corinthians 3:6.
22. Why nao iumi shud no wikdaon for join evribit insaed Christian ministry?
22 Tru nao, Jehovah God hem busy for waka witim iumi olsem pipol wea teachim Word bilong hem. Maet samfala taem iumi feel iumi no fit olsem wanfala teacher. Bat remember, Jehovah seleva nao pullim kam pipol long hem and Son bilong hem. Jehovah nao mekem iumi kamap fit olsem minister thru long Word, holy spirit, and organization bilong hem long earth. Iumi mas acceptim training bilong Jehovah taem iumi followim olketa gudfala samting wea hem provaedem distaem for mekem iumi fit evribit olsem pipol wea teachim Word bilong God!
Hao Nao Bae Iu Ansa?
• Hao nao Bible savve mekem iumi fit for duim preaching waka?
• Hao nao holy spirit helpem iumi for kamap fit olsem olketa minister?
• Wanem nao samfala wei wea organization bilong Jehovah long earth helpem iu for kamap fit olsem man for preachim gud nius?
• Why nao iumi fit for feel sure taem iumi duim ministry?
[Piksa long page 25]
Olsem wanfala teacher long Word bilong God, Jesus showimaot love for pipol