“Kam Long Mi, . . . and Mi Bae Strongim Iufala”
Young Pipol wea Olsem Fresh Wata Bilong Naet
JESUS CHRIST hem storyim tu olketa young follower bilong hem taem hem sei: “Kam long mi, . . . and mi bae strongim iufala.” (Matthew 11:28) Taem pipol start for tekem kam olketa pikinini long hem, olketa disaepol trae for stopem olketa. Bat Jesus hem sei: “Letem olketa smol pikinini kam long mi; no trae for stopem olketa.” Jesus “holem olketa pikinini hia insaed arm bilong hem and start for blessim olketa.” (Mark 10:14-16) Olketa young wan spesol long eye bilong Jesus.
Bible story abaotem olketa faithful young man and woman, and tu olketa young wan and smol pikinini, wea showimaot nambawan example for servem God. Buk bilong Psalms nao story abaotem “olketa youngfala man” wea fresh olsem wata bilong naet. Hem storyim tu olketa “young man” and “young girl” wea praisem nem bilong Jehovah.—Psalm 110:3; 148:12, 13.
Ples for Olketa Young Wan Go Ahed Gud
Wei for markem wata bilong naet witim olketa young wan hem fitim, bikos wata bilong naet hem join witim wei for garem planti samting and blessing. (Genesis 27:28) Wata bilong naet hem soft, and givim strong. Long disfala taem wea Christ hem stap moa, staka young Christian willing for offerim olketa seleva. Olsem wata bilong naet, planti young man and woman servem God witim hapi and helpem olketa nara worshiper.—Psalm 71:17.
Olketa young Christian no givim strong long nara pipol nomoa; bat olketa seleva kasem strong long service bilong olketa. Insaed organization bilong God olketa savve go ahed gud. From olketa keepim olketa hae standard saed long fasin, olketa young man and woman garem klos wei for fren witim God. (Psalm 119:9) Insaed kongregeson, olketa duim tu olketa gudfala waka and faendem gudfala fren—olketa samting wea mekem olketa satisfae and mekem laef garem mining.
‘Healing and Strong’
Waswe, olketa young Christian feel olketa olsem “wata bilong naet”? Tania hem young girl insaed kongregeson wea hapi for iusim winim 70 hour evri month long ministry. Hao nao hem feel? “Diswan buildimap mi and mi feel strong” hem sei. “Wei wea Jehovah and organization bilong hem long earth part long laef bilong mi hem olsem ‘healing and hem strongim’ mi.”—Proverbs 3:8.
Ariel, nara full-taem minister, tinghae long spiritual strong wea hem kasem insaed kongregeson. “Taem mi go long olketa Christian meeting, convention, and assembly wea mi savve kaikai long spiritual tebol bilong Jehovah, diswan barava strongim mi long spiritual wei,” hem sei. “And taem mi savve hao evriwea long world, mi garem olketa wea waka witim mi, hem buildimap mi.” Taem hem storyim main samting wea givim hem strong, hem sei: “Wei for garem Jehovah olsem fren, especially taem mi herem or lukim olketa nogud samting wea disfala world duim long pipol, diswan hem strongim mi.”—James 2:23.
Abishai wea hem 20 year serve full-taem for talemaot gud nius and hem ministerial servant insaed kongregeson. Hem storyim experience bilong hem olsem: “Mi feel strong bikos mi savve hao for deal witim planti problem wea olketa young wan feisim distaem. Truth from Bible hem helpem mi for tingim nomoa wanem mi need for duim for servem Jehovah witim full soul.”
Wanfala young wan wea no kasem 15 year, Antoine hem savve kros kwiktaem. Wantaem hem hitim nara student witim wanfala chair, and hem iusim wanfala pencil for busarem narawan. Wei bilong Antoine hem no strongim eniwan! Bat instruction from Bible changem fasin bilong hem. Distaem hem 19 year and serve olsem wanfala ministerial servant and full-taem minister insaed kongregeson, and hem sei: “Mi thankiu long Jehovah for letem mi kasem savve abaotem hem and for helpem mi for luksavve mi need for garem fasin for kontrolem seleva and changem gogo bilong mi. From diswan, mi missim planti problem.”
Nara pipol tu lukim gudfala fasin bilong olketa young Christian. Matteo hem wanfala young Witness long Italy. Teacher bilong hem disaed for panisim eniwan insaed long class wea tok swear long wei for peim smol fine. Lelebet taem bihaen, olketa pikinini ask for hem aotem datfala rul bikos olketa sei, “hem hard tumas for no tok swear.” “Bat,” Matteo sei, “datfala teacher no ting olsem, and hem iusim mi, wanfala Witness bilong Jehovah, olsem example, and hem praisem mi front long full class for wei wea mi iusim klin toktok.”
Long wanfala class long Thailand wea olketa pikinini no savve obey, teacher hem kolem Racha wea 11 year front long class and praisem hem for fasin bilong hem taem hem sei: “Hem gud tumas sapos iufala followim example bilong hem. Hem study hard and garem gudfala fasin.” Then teacher hia sei long olketa student: “Bat luk olsem iufala mas kamap Jehovah’s Witness, olsem Racha, for fasin bilong iufala kamap moabeta.”
Hem gud tumas for lukim planti thousand young Christian go ahed for savve gud moa long Jehovah and duim will bilong hem. Olketa young pipol olsem garem wisdom wea winim olketa narawan wea sem age. God savve helpem olketa for win long living bilong olketa and hem givim olketa tu nambawan future long niu world wea bae kam. (1 Timothy 4:8) Long drae spiritual ples bilong disfala world, wea fulap witim olketa young wan wea no satisfae and feel nogud, olketa hia showimaot olketa olsem fresh samting wea difren evribit!