“Hem Fulimap Emti Spes Insaed Heart Bilong Mi”
“FROM full heart bilong mi, mi laek thankiu for naesfala present Draw Close to Jehovah. Hem fulimap emti spes insaed heart bilong mi—datfala need for savve Jehovah hem lovem and tinghae long mi. Distaem mi feel barava moa klos long Jehovah and long Son bilong hem. Mi laek for talem evriwan abaotem disfala buk and for givim wanfala copy long evriwan wea mi lovem.” Diswan hem feeling bilong wanfala Jehovah’s Witness abaotem datfala niu 320-page buk wea release long “Pipol wea Strong For Talemaot Kingdom” Distrik Convention wea kamap insaed 2002/03. Bae iumi lukim samfala samting abaotem disfala niu buk and why nao olketa pablisim.
Samfala Samting Abaotem Datfala Niu Buk
Wanem nao insaed disfala niu buk? Evri information wea stap insaed tufala study article bilong disfala magasin—and staka moa samting! Buk hia garem 31 chapter, wea long bilong each chapter hem klosap olsem wanfala Wastaoa study article. Bihaen introduction and long first thrifala chapter, buk hem divaed insaed fofala sekson, wanfala for each main fasin bilong Jehovah. Each sekson hem start witim review bilong datfala fasin. Olketa next tu-thri chapter storyim hao Jehovah hem showimaot datfala fasin. Each sekson garem wanfala chapter wea story abaotem Jesus. Why? Well, Jesus hem sei: “Man wea lukim mi hem lukim Father tu.” (John 14:9) From hem showimaot fasin bilong Jehovah long perfect wei, Jesus givim iumi kliafala example bilong olketa fasin bilong Jehovah. Each sekson end witim wanfala chapter wea teachim iumi hao for followim fasin bilong Jehovah wea datfala sekson story abaotem. Taem hem storyim olketa fasin bilong Jehovah, disfala niu buk point go tu long evri buk bilong Bible.
Disfala buk Draw Close to Jehovah hem garem tu samfala spesol samting. Start from chapter 2, each chapter garem box wea garem title “Olketa Kwestin for Ting Raonem.” Olketa scripture and kwestin insaed hem no for olsem review bilong datfala chapter. Bat, olketa stap for helpem iu iusim Bible for ting strong raonem datfala subject. Mifala encouragem iu for readim gud each Scripture wea olketa markem. Then ting raonem kwestin and trae for lukim hao hem savve helpem iu. Kaen wei for ting raonem wanem iu readim savve muvim heart, wea helpem iu for kam moa klos long Jehovah.—Psalm 19:14.
Olketa research and redyim gud olketa piksa insaed Draw Close to Jehovah buk mekem hem teachim and muvim man. Seventin-fala chapter garem olketa naesfala full-page piksa bilong olketa samting wea happen long taem bilong Bible.
Why Nao Olketa Pablisim?
Why nao olketa pablisim disfala buk Draw Close to Jehovah? Main purpose bilong disfala niu pablikeson hem for helpem iumi savve gud moa long Jehovah mekem iumi savve strongim wei wea iumi fren witim God bilong iumi.
Waswe, iu savve tingim samwan wea disfala buk Draw Close to Jehovah bae helpem hem, maet wanfala Bible student or inactive Christian brata or sista? Waswe long iu—iu readim disfala niu buk? Sapos nomoa yet, hem bae gud sapos iu no delay for markem taem for diswan! Givim moa taem for ting raonem samting iu readim. Bae disfala pablikeson helpem iu for kam moa klos long Jehovah God, mekem iu moa hapi and moa strong for talemaot gud nius bilong Kingdom bilong Hem!