Waswe, Olketa Bigman Bilong Religion Shud Insaed Politik?
“WEI for insaed politik savve helpem poor pipol, wanfala archbishop long Canada talem pipol long religion bilong hem . . . Nomata sapos wei bilong politik no luk stret fitim will bilong God, ‘iumi need for insaed politik mekem iumi givim justice long poor pipol.’ ”—Catholic News.
Olketa kaen report olsem wea olketa bigman bilong religion saedem wei for insaed politik hem no niu samting; and hem no niu samting tu for olketa bigman bilong religion for insaed politik. Samfala trae for stretem politik. Pipol tinghae long olketa narawan from olketa faet strong againstim wei for daonem man bilong difren ples and wei for slave.
Nomata olsem, staka church member garem daot taem olketa bigman bilong olketa teksaed long politik. Wanfala article long buk Christian Century wea storyim politik hem sei: “Olketa bilong protestant church nao samfala taem kwestinim wei wea olketa bigman bilong olketa insaed politik.” Long tingting bilong staka pipol bilong religion, from church hem holy tumas hem no fitim for hem insaed politik.
Diswan mekem samfala interesting kwestin kamap wea pipol wea laekem world wea moabeta interest long hem. Waswe, olketa wea preachim Christian Wei savve stretem politik?a Waswe, wei for mekhae long politik nao hem wei wea God bae mekem gavman and world kamap moabeta? Waswe, reason why Christian Wei hem start hem for mekem niu wei for duim politik?
Hao Politik Long Nem Bilong Christ Hem Start
Insaed buk The Early Church, man for raetem history Henry Chadwick sei firstfala Christian kongregeson “nating interest long wei for garem paoa long disfala world.” Hem “wanfala sekson bilong pipol wea no joinim politik, no disturbim eniwan, and peaceful.” A History of Christianity sei: “Wanfala biliv wea staka Christian garem nao hem wei wea no eniwan long olketa shud insaed politik . . . Nomata kasem mek-thri century, Hippolytus sei olketa Christian bifor mas resign from politik bifor olketa savve joinim Church.” Bat isisi olketa man wea kavetem big paoa start for leadim samfala kongregeson and givim olketa seleva olketa hae title. (Acts 20:29, 30) Samfala laek for kamap leader saed long religion and politik. Wanfala change wea seknomoa kamap long gavman bilong Rome givim olketa bigman hia chance olketa laekem.
Long year 312 C.E., datfala heathen Roman Emperor Constantine favorim kaen wei for Christian long nem nomoa. Sapraesing samting nao hem wei wea olketa church bishop willing for agree witim disfala heathen ruler mekem olketa kasem gud samting from hem. Henry Chadwick hem raet: “Wei wea Church insaed olketa important disison bilong politik kamap moa big. Hao nao wei wea Church insaed politik hem affectim olketa bigman bilong church?
Hao Politik Affectim Olketa wea Preach
Augustine, wanfala Catholic savveman bilong mek-faev century, barava sapotim idea hao God bae iusim olketa bigman bilong church long politik. Hem laekem church for rul ovarem olketa nation and bringim peace long olketa man. Bat man for raetem history H. G. Wells hem raet: “History bilong Europe midolwan mek-faev and mek-fiftin century showimaot disfala idea for wanfala world gavman bilong God hem fail.” Christendom nating savve bringim peace long Europe so hard tumas for duim long full world. Pipol lus hope nao long datfala Christian Wei. Why nao olsem?
Staka wea sei olketa teachim Christian Wei interest long politik witim gud goal, bat gogo olketa insaed olketa nogud samting wea pipol duim. Wanfala wea staka savve long hem saed long wei for laek changem Catholic Church hem datfala man for preach and transleitim Bible, Martin Luther. Bat, pipol wea favorim wei for againstim church bikos long politik laekem wei wea Luther no fraet for againstim olketa teaching bilong church. Luther tu lusim respect bilong staka pipol taem hem start for tok aot long olketa samting saed long politik. Firstaem, hem saedem olketa poor farmer wea againstim rich pipol wea putim hevi long olketa. Then, taem diswan kamap raf, hem encouragem rich pipol for faetem olketa poor wan hia, and olketa killim dae staka thousand poor farmer. Iumi no sapraes long wei wea olketa poor farmer hia ting long hem olsem man for laea. Luther encouragem tu olketa rich pipol for againstim Catholic rul. Tru nao, olketa Protestant, nem bilong olketa follower bilong Luther, mekem wanfala muvment saed long politik taem olketa just start. Hao nao paoa affectim Luther? Hem spoelem hem. Olsem example, nomata hem no agree witim wei for iusim raf fasin for changem biliv bilong pipol saed long religion, gogo hem encouragem olketa fren bilong hem saed long politik for bonem pipol wea againstim wei for baptaesim olketa baby.
John Calvin hem wanfala bigman bilong religion long Geneva wea staka savve long hem, bat gogo hem kasem bigfala paoa long politik tu. Taem Michael Servetus explainim hao Trinity no garem eni pruv from Bible, Calvin iusim bigfala paoa bilong hem saed long politik for sapotim disison for bonem Servetus long post. Barava opposite from teaching bilong Jesus!
Maet olketa man hia forget hao Bible hem sei long 1 John 5:19: “Full world hem stap long paoa bilong wicked wan.” Waswe, olketa really laek for stretem politik, or olketa hope for kasem paoa and olketa rich fren? Nomata wanem, olketa shud rememberim toktok bilong James, disaepol bilong Jesus: “Waswe, iufala no savve hao wei for fren witim world hem wei for enemy witim God? So, eniwan wea laek for kamap fren bilong world hem mekem hemseleva kamap enemy bilong God.” (James 4:4) James savve Jesus sei olsem abaotem olketa follower bilong hem: “Olketa no part bilong world, olsem mi tu no part bilong world.”—John 17:14.
Bat, nomata samfala luksavve hao olketa Christian shud no part bilong rabis wei bilong world, staka rejectim wei for no teksaed long politik, for “no part bilong world” evribit. Olketa sei kaen wei for no teksaed olsem hem stopem olketa Christian for showimaot love long pipol. Olketa sei olketa bigman shud tok aot and duim samting for faetem raverave fasin and wei for no followim justice. Bat waswe, wei for no teksaed wea Jesus teachim hem wei for no kea long pipol? Waswe, wanfala Christian savve stap separate from olketa problem saed long politik wea divaedem pipol and semtaem really helpem pipol? Next article bae storyim moa olketa kwestin hia.
[Footnote]
a Disfala word politik minim olketa waka wea join witim wei for ranem wanfala kantri or area, especially wei for debate or raoa midolwan pipol or organization wea garem or hope for garem paoa.—The New Oxford Dictionary of English.
[Piksa long page 4]
Olketa bigman bilong church obeyim olketa ruler olsem Emperor Constantine mekem olketa kasem paoa saed long politik
[Credit Line]
Musée du Louvre, Paris
[Olketa Piksa long page 5]
Why nao olketa bigman bilong religion wea staka savve long olketa interest long politik?
Augustine
Luther
Calvin
[Olketa Credit Line]
Augustine: ICCD Photo; Calvin: Portrait by Holbein, from the book The History of Protestantism (Vol. II)