Waswe, Wei for No Teksaed Stopem Christian Love?

FOR kamap wanfala Christian no minim nomoa wei for readim Bible, prea, and singim olketa lotu singsing long Sunday. Insaed diswan hem wei for duim olketa samting for God and for pipol. Bible hem sei: “Iumi mas showimaot love, no thru long toktok or mouth nomoa, bat thru long samting iumi duim and truth.” (1 John 3:18) Jesus really interest long pipol, and olketa Christian laek for olsem hem. Aposol Paul encouragem olketa brata for evritaem “garem staka samting for duim long waka bilong Lord.” (1 Corinthians 15:58) Bat wanem nao waka bilong Lord? Waswe, hem minim wei for trae changem olketa samting insaed gavman for helpem poor pipol or pipol wea kasem hard living? Waswe, Jesus duim diswan?

Nomata pipol encouragem Jesus for duim olsem, hem les for joinim politik or for teksaed. Hem rejectim wei for garem paoa ovarem evri kingdom bilong world taem Satan laek for givim hem, hem les for raoa abaotem wei for peim tax, and hem ranawe taem wanfala sekson trae for mekem hem king. (Matthew 4:8-10; 22:17-21; John 6:15) Bat wei wea hem no teksaed no stopem hem from wei for duim samting for helpem pipol.

Jesus interest long samting wea bae helpem pipol for olowe. Hem tru, wei wea hem feedim faev thousand pipol and healim sik pipol hem comfortim samfala, bat teaching bilong hem fit for givim blessing for olowe long evri man. Pipol savve long Jesus olsem “Teacher,” no man for organizem olketa relief campaign. (Matthew 26:18; Mark 5:35; John 11:28) Hem sei: “For diswan nao mi born kam, and for diswan nao mi kam insaed long world, for mi mas witness abaotem truth.”—John 18:37.

Preach Abaotem Samting wea Moabeta Winim Politik

Truth wea Jesus teachim hem no saed long politik. Bat, hem abaotem Kingdom wea hemseleva bae King long hem. (Luke 4:43) Disfala Kingdom hem wanfala gavman long heven, and hem bae aotem evri rul bilong man and bringim peace for olowe for olketa man. (Isaiah 9:6, 7; 11:9; Daniel 2:44) So, hem nomoa only trufala hope for olketa man. Hem moa loving for talemaot kaen hope for future hia wea sure for happen winim wei for encouragem pipol for trustim olketa man for provaedem sef future! Bible hem sei: “No putim trust bilong iufala long olketa bigman, or son bilong man long earth, wea no savve givim salvation. Spirit bilong hem go aot, hem go bak long graon; long datfala day tingting bilong hem finis evribit. Hapi nao man wea garem God bilong Jacob for helpem hem, wea hope bilong hem stap long Jehovah God bilong hem.” (Psalm 146:3-5) So winim wei for sendem olketa disaepol bilong hem for preachim wei for organizem gavman wea moabeta, Jesus teachim olketa for preachim “gud nius bilong kingdom.”—Matthew 10:6, 7; 24:14.

So, diswan nao “waka bilong Lord” wea olketa Christian wea preach kasem komand for duim. From pipol wea bae stap anda long Kingdom bilong God mas lovem each other, datfala Kingdom bae win for aotem poor living thru long wei for divaedem gud olketa riches long evri man. (Psalm 72:8, 12, 13) Diswan nao really gud nius and barava fitim for man preachim.

Distaem, Olketa Jehovah’s Witness organize for duim disfala “waka bilong Lord” long 235 kantri. Followim datfala komand bilong Jesus, olketa showimaot respect long evri gavman. (Matthew 22:21) Bat olketa obeyim tu toktok hia bilong Jesus for olketa follower bilong hem: “Iufala no part bilong world, bat mi chusim iufala aot from world.”—John 15:19.

Samfala wea sapotim politik bifor change bihaen olketa studyim gud Bible. Wanfala man bilong Italy wea insaed politik and wea member bifor bilong Catholic Action, wanfala organization wea church kontrolem, hem sei: “Mi joinim politik witim biliv hao man shud duim samting for help saed long politik and community.” Bihaen hem finis from waka olsem mayor bilong taon mekem hem preach abaotem Kingdom bilong God olsem wanfala Jehovah’s Witness, hem explainim why hard waka bilong honest pipol long politik hem fail. “World hem olsem, no from pipol wea garem stret fasin les for trae mekem living kamap moabeta, bat from wicked fasin bilong staka hem winim honest waka bilong tu-thri.”

Wei wea olketa tru Christian no joinim politik for mekem olketa savve preach abaotem only tru hope for olketa man no stopem olketa for helpem pipol. Pipol wea olketa helpem for stap anda long Kingdom bilong God lane for changem wicked wei bilong olketa, for respectim olketa wea garem paoa, for mekem famili laef kamap moabeta, and for garem balance tingting saed long material samting. Samting wea moa important, Olketa Jehovah’s Witness helpem pipol for garem klos wei for fren witim God.

Olketa wea preach abaotem Kingdom bilong God helpem pipol long ples olketa stap long hem. Bat winim datwan, olketa helpem pipol for putim trust long wanfala gavman wea real and wea bae bringim peace for olowe long evriwan wea lovem God. From olketa no teksaed, olketa Christian free for provaedem help wea winim evri narakaen help bilong distaem.

[Box/Piksa long page 7]

Lusim Politik for Preachim Kingdom Bilong God

TAEM hem smol boy, Átila lanem liberation theology from olketa priest long Belém, Brazil. Hem interest tumas long wei wea olketa man bae gogo kamap free from hardfala rul and hem joinim wanfala grup wea faet for diswan, and lanem wei for organizem olketa march for tok aot long gavman and for disobey long law bilong kantri.

Bat Átila interest tu for teachim pikinini bilong olketa insaed datfala grup, and hem iusim wanfala buk samwan givim hem, Listening to the Great Teacher.a Disfala buk storyim gudfala fasin and wei for obeyim olketa wea garem paoa. Diswan mekem Átila for laek savve why nao olketa wea sapotim liberation theology no followim hae standard bilong Jesus saed long fasin and why samfala forgetim pipol wea safa taem olketa kasem paoa. Hem lusim datfala grup. Bihaen, Olketa Jehovah’s Witness kam long haos bilong hem and storyim Kingdom bilong God long hem. Gogo hem studyim Bible and lanem trufala ansa for wei wea pipol safa.

Klosap long datfala taem, Átila attendim wanfala Catholic course saed long faith and politik. “Tufala hia semsem nomoa,” olketa wea teach sei olsem. Hem attendim tu wanfala meeting long Kingdom Hall. Datwan barava difren! No eniwan smoke, drink, or talem dirty toktok. Hem disaed for joinim olketa long preaching waka bilong olketa, and gogo hem baptaes. Distaem, hem luksavve why liberation theology no ansa for olketa problem bilong poor pipol.

[Footnote]

[Olketa Piksa long page 6]

Wei wea olketa Christian no teksaed no stopem olketa for helpem pipol