Hem Storyim Biliv Bilong Hem Long Olketa Classmate

WASWE, iu laek for helpem olketa classmate bilong iu minim gud biliv bilong iu wea kam from Bible? Magdalena, wea 18 year, hem wanfala student long hae skul long Poland. Hem wanfala Jehovah’s Witness wea staka taem story abaotem biliv bilong hem long olketa classmate. From hem duim datwan, staka taem olketa askem hem samfala kwestin olsem, ‘For kamap wanfala Jehovah’s Witness, hao nao datwan bae affectim full laef bilong man?’ and ‘Waswe, iu biliv long Jesus Christ?’ Hao nao bae hem helpem olketa classmate bilong hem? Magdalena prea long Jehovah for help and duim samting followim prea bilong hem.—James 1:5.

Wanday, Magdalena askem wanfala teacher wea respectim biliv bilong hem sapos hem savve showim long class datfala video Jehovah’s Witnesses—The Organization Behind the Name.a Datfala teacher sei hem olraet. Magdalena talem olketa classmate bilong hem: “Mi askem wanfala fren for givim wanfala 90-minute program for class. Insaed program hem for showim video and story abaotem Olketa Jehovah’s Witness. Waswe, iu laek for kam?” Evriwan sei ia. Wojciech wea savve gud saed long wei for talemaot gud nius start for preparem datfala project witim Magdalena.

Plan hem for startim program witim 20-minute tok wea kam from brochure Jehovah’s Witnesses—Who Are They? What Do They Believe?b and bihaen hem taem for askem and ansarem kwestin. Then tufala bae showim video insaed library bilong skul. Each student long class bae kasem wanfala present—wanfala big envelope wea garem tu-thri brochure, datfala buk Questions Young People Ask—Answers That Work,c and samfala tract and magasin.

Long day for datfala program, olketa wea attend nao hem 14-fala classmate, datfala teacher, and 4-fala nara student wea stap long library. Firstaem Wojciech explainim hao samfala man for raetem poem and samfala man for raet from Poland iusim holy nem, Jehovah, insaed raeting bilong olketa. Hem talem tu nem bilong samfala old Catholic textbuk wea garem datfala holy nem. Taem hem explainim waka bilong Olketa Jehovah’s Witness distaem, hem showim olketa brochure bilong olketa difren branch office and olketa piksa bilong samfala Assembly Hall.

Evriwan tekpart for story. Magdalena and Wojciech iusim Bible for ansarem olketa kwestin. Olketa tinghae long diswan and no daotem hao Olketa Jehovah’s Witness no preachim samting wea olketa seleva tingim. Wanem nao samfala kwestin wea olketa student askem, and hao nao tufala ansarem?

Kwestin: Bible hem fulap witim olketa toktok wea no klia and olketa tokpiksa wea man savve minim long staka difren wei wea hem laekem. Hao nao man savve duim samting wea Bible talem?

Ansa: Samfala sei Bible hem olsem wanfala guitar wea iu savve iusim for pleim eni song wea iu laekem. Bat tingting gud firstaem: Sapos iu laek for savve wanem nao wanfala man for raet minim long toktok wea hem raetem, waswe, hem fitim for askem hem? Datwan wea givim Bible, Jehovah God, hem laef. Hem no olsem olketa wea dae finis bat raeting bilong olketa stap. (Romans 1:20; 1 Corinthians 8:5, 6) Olketa verse wea stap raonem wanfala scripture savve showimaot stretfala wei for minim datwan. And tu, Bible planti taem storyim datfala sem subject long olketa nara scripture, so wei for ting raonem olketa scripture hia savve help. So iumi savve letem God leadim tingting bilong iumi, wea hem olsem hemseleva nao explainim scripture long iumi. Taem iumi duim datwan, iumi bae savve long will bilong hem and followim wanem hem laekem iumi for duim wea Bible showimaot, iaman?

Kwestin: Hao nao Olketa Jehovah’s Witness difren from olketa Christian?

Ansa: Mifala olketa Christian! Mifala no just sei mifala Christian, bat Olketa Jehovah’s Witness duim best for followim wanem olketa bilivim and wanem God teachim wea mekem olketa kasem gud samting. (Isaiah 48:17, 18) From evri teaching bilong olketa kam from Bible, olketa savve wanem olketa bilivim hem tru.—Matthew 7:13, 14, 21-23.

Kwestin: Why nao iufala go long olketa stranger and trae hard for story long olketa? Waswe, diswan no showimaot iufala forcem biliv bilong iufala long nara pipol?

Ansa: Waswe, iu ting hem rong taem samwan long street tok kaen long iu and askem tingting bilong iu abaotem samting? (Jeremiah 5:1; Zephaniah 2:2, 3) (Then Wojciech and Magdalena duim demonstration long hao olketa askem pipol sapos God tingim pipol wea safa long flood wea kamap no longtaem go nomoa long Poland.) Bihaen mifala herem tingting bilong datfala man, mifala showim hem scripture from Bible. Sapos man hia no willing for story, mifala sei thankiu and lusim hem. (Matthew 10:11-14) Waswe, diswan hem wei for forcem nara pipol for story? Or pipol shud no story nao?

Kwestin: Why nao iufala no celebratem olketa holiday?

Ansa: Mifala celebratem nomoa samting wea Bible komandim iumi for rememberim—Memorial bilong dae bilong Jesus Christ. (1 Corinthians 11:23-26) Saed long olketa holiday, iu savve faendaot hao olketa start taem iu luk insaed olketa encyclopedia and olketa nara buk. Sapos iu duim olsem, iu bae luksavve why mifala no celebratem olketa holiday.—2 Corinthians 6:14-18.

Tufala ansarem staka narafala kwestin wea olketa askem. Olketa story tugeta for longfala taem tumas so olketa markem narataem for lukim video.

Hao nao diswan affectim olketa student? Magdalena bae talem iumi: “Mi sapraes hao samfala student wea duim enikaen samting and mekfani long olketa narawan askem olketa important kwestin. Nomata olketa sei olketa no biliv long God, long taem olketa story olketa showimaot faith long God!” Evriwan wea attend hapi for acceptim olketa present—hem 35 buk, 63 brochure, and 34 magasin.

Hem nao nambawan samting wea kamaot from datfala skul project! Diswan no helpem nomoa olketa classmate bilong Magdalena for savve and minim gud Olketa Jehovah’s Witness, bat hem encouragem tu staka young wan hia for ting abaotem purpose bilong laef. Waswe sapos iu duim best for helpem olketa classmate lanem moa samting abaotem wanem iu bilivim?

[Olketa Footnote]

[Piksa long page 31]

Magdalena and Wojciech redyim olketa samting for story witim olketa student