Kwestin From Reader
Taem aposol John raet hao “perfect love torowem fraet aotsaed,” wanem nao “perfect love” hem minim and wanem “fraet” nao love torowem aotsaed?
Aposol John hem raet olsem: “Love hem no mekem man fraet, bat perfect love torowem fraet aotsaed, bikos fraet hem mekem man hol bak. Tru nao, man wea fraet hem no kamap perfect long love.”—1 John 4:18.
Olketa verse wea stap raonem showimaot hao John storyim wei wea man free for toktok. Main samting nao, wei for lovem God and for feel free for story long Hem. Iumi lukim diswan long verse 17: “Hem nao hao love hem kamap perfect long iumi, mekem iumi free for toktok long day bilong judgment.” Wei wea wanfala Christian feelim love wea God garem for hem and love wea hem garem for God, affectim wei wea hem free for toktok taem hem story witim God long prea.
Disfala toktok “perfect love” garem bigfala mining. Wei wea Bible iusim datfala word “perfect” hem no evritaem minim perfect evribit, bat staka taem datfala word hem for showimaot wei wea samting hem full and fitim. Olsem example, long Sermon bilong hem long Maunten, Jesus sei: “Iufala mas perfect, olsem Dadi bilong iufala long heven hem perfect.” Jesus talem olketa follower bilong hem hao sapos olketa lovem nomoa olketa wea lovem olketa, love bilong olketa hem no full wan. Love bilong olketa mas kamap full long wei for lovem tu olketa enemy. Olsem tu, taem John raet abaotem “perfect love,” hem story abaotem wei for lovem God witim full heart and wea showaot long evri part long laef.—Matthew 5:46-48; 19:20, 21.
Taem wanfala Christian prea long God, hem savve hem garem sin and hem no perfect. Bat, sapos wei wea hem lovem God and wei wea hem feelim love bilong God hem full wan, bae hem no letem kaen wei for fraetem judgment bilong God or wei for maet God rejectim hem for holem hem bak. Bat, hem bae enjoyim free wei for story from heart and ask for forgiveness long faondeson bilong ransom sakrifaes wea God provaedem long loving wei thru long Jesus Christ. Hem barava feel sure hao God herem olketa prea bilong hem.
Hao nao man “savve kamap perfect long love” and ‘torowem aotsaed’ wei for fraet nogud God judgem and rejectim hem? Aposol John sei: “Eniwan wea obeyim word [bilong God], love for God hem barava kamap perfect long hem.” (1 John 2:5) Tingim: Sapos God lovem iumi taem iumi sinner yet, bae hem barava lovem iumi sapos iumi really repent and waka hard “for obeyim word bilong hem.” (Romans 5:8; 1 John 4:10) Tru nao, sapos iumi go ahed for faithful, iumi bae garem sem trust wea aposol Paul garem taem hem sei olsem abaotem God: “From hem no holem bak Son bilong hemseleva bat hem givim hem for iumi evriwan, bae hem givim witim datwan tu evri nara samting long iumi.”—Romans 8:32.