Strong Bilong Jehovah Helpem Samson Win!
PIPOL wea laek pei bak kasholem hem and aotem eye bilong hem and mekem hem waka olsem slave. Then olketa tekem hem aot from prison and go insaed long wanfala heathen temple mekem pipol laflaf long hem. Olketa forcem hem for wakabaot front long staka thousand pipol and mekfani long hem. Disfala man hem no wanfala criminal and hem no komanda bilong enemy tu. Hem man wea worshipim Jehovah and duim waka olsem judge long Israel for 20 year.
Hao nao Samson—man wea strong winim eni nara man long earth—kasem disfala samting wea mekem hem kasem shame? Waswe, bigfala strong wea hem garem bae fit for sevem hem? Wanem nao mekem Samson strong tumas olsem? Wanem nao iumi savve lanem from story abaotem laef bilong hem?
Hem Bae “Lead for Sevem Israel”
Olketa Israelite lusim tru worship staka taem. So taem olketa “duim moa wanem Jehovah heitim, . . . Jehovah letem olketa Philistine bossim olketa for foti year.”—Judges 13:1.
Story abaotem Samson hem start taem angel bilong Jehovah kam long waef bilong wanfala Israelite man, Manoah, wea no garem pikinini, and talem hem bae hem bornem wanfala baby boy. Angel hia sei olsem long datfala woman: “No eniwan shud katem hair bilong hem, bikos start long taem datfala pikinini hem born; hem bae kamap Nazirite bilong God, and hem nao man wea bae lead for sevem Israel from rul bilong olketa Philistine.” (Judges 13:2-5) Bifor mami bilong Samson kare, Jehovah markem Samson for duim wanfala spesol waka. Start from taem hem born, hem bae wanfala Nazirite—man wea God chusim for duim wanfala spesol holy waka.
Hem “Barava Fitim Mind Bilong Mi”
Taem Samson hem grow big, “Jehovah gohed for blessim hem.” (Judges 13:24) Wanday Samson sei olsem long dadi and mami bilong hem: “Mi lukim wanfala woman long Timnah, wanfala dota bilong olketa Philistine, go tekem hem kam for mi maritim hem.” (Judges 14:2) Tufala masbi seke for herem datwan. Winim wei for son bilong tufala mekem Israel kamap free from raf pipol wea rulim olketa, hem laek for maritim wanfala long olketa. Law bilong God hem putim tambu for maritim woman wea worshipim olketa heathen god. (Exodus 34:11-16) Dastawe mami and dadi bilong hem no agree and sei olsem long hem: “Waswe, no eni gele midolwan olketa brata bilong iu and midolwan pipol bilong mi, dastawe iu bae tekem wanfala waef from olketa Philistine hia wea no circumcise?” Nomata olsem, Samson sei long dadi bilong hem: “Go tekem hem kam for mi, bikos hem nao barava fitim mind bilong mi.”—Judges 14:3.
Long wanem wei nao disfala Philistine woman hem “barava fitim” Samson? McClintock and Strong’s Cyclopedia sei datwan no minim woman hia “naesbola or garem naes wei, bat datfala woman hem barava fitim plan bilong hem.” Wanem plan nao Samson garem? Judges 14:4 sei Samson “hem luk aotem wanfala chance for killim dae olketa Philistine.” So datwan nao goal bilong Samson taem hem laekem datfala woman. Taem Samson gohed for kamap full-grown, “spirit bilong Jehovah start for muvim hem” for duim samting. (Judges 13:25) So spirit bilong Jehovah nao bihaenem wei wea Samson ask for wanfala waef, and tu, evri samting wea hem duim olsem judge long Israel. Waswe, Samson kasem chance wea hem luk aotem? Fastaem bae iumi storyim wei wea Jehovah promis for sapotim Samson.
Samson hem gogo nao for Timnah, taon wea woman wea bae hem maritim hem stap. Bible sei: “Taem hem kasem olketa grape plantation long Timnah, seknomoa wanfala young lion attakim hem. Then spirit bilong Jehovah mekem hem fit for brekem datfala lion long tufala haf.” No eniwan stap witim hem taem hem kasem disfala barava bigfala strong. Waswe, diswan hem wei wea Jehovah laek for mekem Samson sure hao olsem wanfala Nazirite hem bae fit for duim waka wea God givim hem for duim? Bible no talem, bat masbi Samson hem luksavve hao disfala barava bigfala paoa hem no bilong hemseleva bat hem from God. Hem savve depend long Jehovah for helpem hem long waka wea hem mas duim. From disfala samting wea happen hem strongim Samson, hem “go daon and story long datfala woman; and woman hia barava fitim yet mind bilong [hem].”—Judges 14:5-7.
Bihaen, taem Samson go for tekem datfala woman long haos bilong hem, “hem go for lukim dead body bilong datfala lion, and staka honeybee stap long dead body hia, and honey tu.” Samson tingim datwan taem hem talem disfala ridol long 30-fala Philistine man wea gogo witim hem taem hem marit: “From samting wea kaikaim nara samting, wanfala samting kamaot for kaikaim, and from samting wea strong, samting wea swit hem kamaot.” Sapos olketa talem stretfala mining bilong datfala ridol, Samson bae givim olketa 30-fala kabilato and kaleko for werem antap. Sapos olketa no talem, olketa nao bae givim evri samting hia long Samson. For thrifala day olketa Philistine hia trae for faendem ansa bilong datfala ridol. Long mek-foa day, olketa trae for mekem waef bilong Samson fraet. Olketa sei olsem long hem: “Go trikim hasband bilong iu mekem hem savve talem mining bilong datfala ridol long mifala. Sapos nomoa bae mifala bonem iu and haos bilong dadi bilong iu long fire.” Olketa raf fogud! Sapos olketa Philistine deal witim pipol bilong olketa seleva long wei olsem, olketa bae barava raf taem olketa deal witim olketa Israelite wea stap anda long olketa!—Judges 14:8-15.
Woman hia wea fraet tumas hem gohed for askem Samson olowe for talem ansa bilong datfala ridol long hem. Taem Samson talem, woman hia showimaot wei wea hem no lovem and no loyal long Samson taem hem kwiktaem go talem ansa long olketa man hia. Olketa talem ansa bilong ridol long Samson and hem savve hao nao olketa kasem datfala ansa. So hem sei long olketa: “Sapos iufala no houm graon witim young buluka bilong mi, bae iufala no savve long ansa bilong ridol bilong mi.” Chance kamap nao for Samson duim samting followim plan bilong hem. “Spirit bilong Jehovah muvim and strongim hem, dastawe hem go daon long Ashkelon and killim dae thirtifala man long there and aotem kaleko bilong olketa and givim long pipol wea talemaot ansa bilong datfala ridol.”—Judges 14:18, 19.
Waswe, samting wea Samson duim long Ashkelon hem from hem laek for pei bak? Nomoa. Datwan hem samting wea God nao duim thru long man wea hem chusim for sevem olketa Israelite. Thru long Samson, Jehovah startim faet againstim olketa raf ruler bilong pipol bilong hem. Disfala faet bae gohed. Next chance hem kamap taem Samson visitim waef bilong hem.
Samson Seleva Nao Faet
Taem hem go bak long Timnah, Samson faendaot hao dadi-in-law bilong hem givim waef bilong hem for maritim nara man, from hem tingse Samson heitim datfala woman. Samson showimaot kros bilong hem. Hem kasholem 300 fox and taemap tu-tu each, and then hem laetem fire long tail bilong olketa. Taem hem letem olketa go, olketa spredim fire hia long olketa wheat, grape and olive tree plantation wea diswan spoelem harvest bilong thrifala main kaikai bilong olketa Philistine insaed long datfala year. From olketa Philistine kros fogud, olketa duim raf samting. Olketa blamem waef bilong Samson and dadi bilong hem for diswan, so olketa bonem tufala. Barava raf pei bak hia hem fitim plan bilong Samson. From datwan, hem attakim and killim dae staka long olketa.—Judges 15:1-8.
Waswe, olketa Israelite luksavve wei wea Jehovah God blessim Samson and join witim hem for finisim wei wea olketa Philistine rul ovarem olketa? Nomoa nao. From olketa no laek kasem trabol, olketa man bilong Judah sendem 3,000 man for arrestim disfala leader wea God chusim and givim hem go long olketa enemy. Nomata olsem, disfala samting wea olketa Israelite duim wea showimaot olketa no loyal hem mekem Samson garem nara chance moa for spoelem olketa enemy bilong hem. Taem olketa redi for givim hem go long olketa Philistine, “spirit bilong Jehovah stap long hem, and olketa rope wea olketa taemap long hand bilong hem kamap olsem cotton wea fire bonem, and olketa foldaon from hand bilong hem.” Then hem tekem wanfala bon bilong mouth bilong donkey and killim dae staka thousand witim datwan.—Judges 15:10-15.
Samson askem Jehovah olsem: “Iu nao mekem servant bilong iu for duim disfala bigfala samting for sevem pipol bilong iu, so waswe, bae mi dae from mi thirsty and bae pipol wea no circumcise nao killim mi dae?” Jehovah herem prea bilong Samson and ansarem. “God openem wanfala hol long ston . . . , and wata start for kamaot from datwan, and hem drink, then hem feel strong moa.”—Judges 15:18, 19.
Samson no letem eni samting stopem hem for aftarem plan bilong hem, hem nao for faet againstim olketa Philistine. Taem hem stap long haos bilong wanfala jury woman long Gaza, goal bilong hem for faet againstim olketa enemy bilong God. Samson needim ples for sleep long naet insaed taon bilong olketa enemy, and hem faendem ples long haos bilong wanfala jury woman. Samson no garem goal for duim dirty fasin. Hem lusim haos bilong datfala woman long midolnaet, aotem gate bilong taon and tufala post bilong gate, and karem go antap long wanfala maunten klosap long Hebron, wea stap farawe olsem 60 kilometer. God appruvim and givim hem strong for duim datwan.—Judges 16:1-3.
From spesol need wea kamap long datfala taem, holy spirit bilong Jehovah mekem Samson for duim samting wea narawe. Olketa faithful servant bilong God distaem tu savve depend long sem spirit for strongim olketa. Jesus promisim olketa follower bilong hem hao Jehovah bae “givim holy spirit long olketa wea askem hem.”—Luke 11:13.
Why Nao Jehovah ‘Lusim Samson’?
Gogo Samson hem laekem tumas wanfala woman wea nem bilong hem Delilah. Faevfala ruler bilong olketa Philistine barava laek for killim dae Samson, so olketa iusim Delilah for helpem olketa. Olketa sei olsem long Delilah: “Iu trikim hem for savve wea nao hem kasem bigfala strong bilong hem and wanem nao mifala savve duim for winim hem.” Faevfala ruler hia switim hem witim selen taem olketa sei each wan bae givim hem “wan thousand wan handred pis silver.”—Judges 16:4, 5.
Sapos olketa pis silver hia olketa shekel, olketa switim hem witim bigfala selen bikos datwan bae kasem 5,500 shekel. Abraham peim 400 shekel for beregraon bilong waef bilong hem, and man savve salem wanfala slave for 30 shekel nomoa. (Genesis 23:14-20; Exodus 21:32) From faevfala ruler bilong faevfala taon bilong olketa Philistine hia mekius long greedy fasin bilong Delilah, and no askem hem for duim datwan olsem wei for hem showimaot hem loyal long nation bilong hem, datwan showimaot maet hem wanfala Israelite woman. Bat, main samting nao, Delilah sei bae hem duim wanem olketa askem.
Thrifala taem Samson no ansarem stret Delilah taem hem askem hem, and thrifala taem Delilah duim samting for mekem olketa enemy kasholem hem. Bat, “from hem askem hem olowe olowe, soul bilong hem les nao and hem laek dae nomoa.” Gogo Samson talem hem stret—no enitaem hem katem hair bilong hem. Sapos hem katem hair bilong hem, bae hem kamap wik and bae olsem evri nara man.—Judges 16:6-17.
Datwan nao spoelem Samson. Delilah mekem Samson sleep wea givim chance for man kam and katem hair bilong Samson. Bat, strong wea Samson garem hem no really stap long hair bilong hem. Hair bilong hem piksarem spesol wei wea hem fren witim God olsem wanfala Nazirite. Taem Samson letem olketa samting happen wea lead go for olketa katem hair bilong hem, wea datwan affectim Nazirite promis bilong hem, ‘Jehovah lusim hem.’ From olketa katem hair bilong hem, olketa Philistine fit for holem hem, aotem eye bilong hem and putim hem long prison.—Judges 16:18-21.
Iumi lanem barava important samting from diswan! Iumi shud ting long wei wea iumi fren witim Jehovah olsem samting wea spesol tumas. Sapos iumi duim samting wea savve spoelem wei wea iumi dedicate long God, iumi shud no tingse God bae gohed for blessim iumi.
“Mi Laek Dae Witim Olketa Philistine”
Olketa Philistine sei thankiu long god bilong olketa Dagon from olketa kasholem Samson. For celebratem diswan, olketa leadim Samson go long temple bilong Dagon. Bat Samson savve long really reason why olketa kasholem hem. Samson savve why Jehovah lusim hem, and hem repent from mistek bilong hem. Taem hem long prison, hair bilong hem start for grow big moa. From hem standap front long staka thousand Philistine, wanem nao bae hem duim?
Samson prea olsem: “Sovereign Lord Jehovah, plis iu rememberim mi, and plis iu strongim mi, disfala taem nomoa, O iu datfala tru God, and letem mi pei bak long olketa Philistine for wanfala eye bilong mi.” Then hem holem tufala main post bilong datfala building, and hem “iusim full strong bilong hem.” Wanem nao happen? “Datfala haos hem foldaon antap long evri ruler and evri pipol wea stap insaed, and namba bilong olketa wea hem killim dae taem hem dae, hem staka winim olketa wea hem killim dae taem hem laef.”—Judges 16:22-30.
Saed long strong long body, Samson hem strong winim eni nara man. Olketa maeti samting wea hem duim barava narawe stret. Bat samting wea barava important, Word bilong Jehovah listim Samson witim olketa narawan long Bible wea garem strongfala faith.—Hebrews 11:32-34.
[Piksa long page 26]
Wanem nao mekem Samson strong?