Followim Example Bilong Jehovah for Patient
“Jehovah hem no slow saed long promis bilong hem, . . . bat hem patient.”—2 PETER 3:9.
1. Wanem nao datfala spesol present from Jehovah wea winim eni nara samting?
JEHOVAH givim iumi wanfala samting wea no eni narawan fit for givim. Hem samting wea iumi barava laekem tumas and hem spesol. Bat, iumi hard for peim and hem no samting wea iumi shud kasem from hard waka bilong iumi. Present wea Jehovah givim hem nao laef olowe, and staka long iumi bae kasem diswan insaed paradaes long earth. (John 3:16) Iumi bae barava hapi long datfala taem! Bae no eni samting stap for mekem iumi sorre, olsem wei for wari, raf fasin, wei for poor, criminal fasin, sik, and dae. Anda long loving rul bilong Kingdom bilong God, pipol bae garem perfect peace and wan mind. Tru nao, disfala Paradaes hem samting wea iumi barava laekem and weit for kasem!—Isaiah 9:6, 7; Revelation 21:4, 5.
2. Why nao Jehovah no finisim yet world bilong Satan?
2 Jehovah tu barava laekem and weitim datfala taem wea hem bae mekem disfala earth kamap Paradaes. Tru nao, hem man wea lovem raeteous fasin and justice. (Psalm 33:5) Hem nating hapi taem hem lukim pipol long world no interest or barava les long olketa raeteous principle bilong hem, and tu, wei wea pipol ting daonem and les long rul bilong hem and spoelem pipol bilong hem. Nomata olsem, hem garem olketa important reason why hem no finisim yet disfala wicked world bilong Satan. Olketa reason hia join witim olketa important kwestin abaotem wei wea rul bilong Jehovah hem stret or nomoa. Taem hem gohed for givim ansa for olketa kwestin hia, Jehovah showimaot wanfala fasin wea mekem iumi barava laek for fren witim hem, and wea plande pipol distaem no garem, hem nao, patient fasin.
3. (a) Wanem nao mining bilong Greek word and Hebrew word insaed Bible wea olketa transleitim olsem “patient fasin”? (b) Olketa wanem kwestin nao bae iumi story raonem?
3 Wanfala Greek word insaed New World Translation olketa transleitim thrifala taem olsem “patient fasin.” Plande taem olketa transleitim diswan olsem “long-safaring,” and wanfala taem olketa transleitim diswan olsem “gohed showimaot patient fasin.” Datfala word wea olketa transleitim olsem “patient fasin” long Greek and Hebrew languis, hem minim tu wei for no givap and for no kros kwiktaem. Wanem gud samting nao iumi savve kasem from patient fasin bilong Jehovah? Wanem nao iumi savve lanem from wei wea Jehovah and olketa faithful servant bilong hem garem patient fasin and fasin for no givap? Hao nao iumi savve patient fasin bilong Jehovah hem garem spialaen? Bae iumi story raonem evri samting hia.
Tingim Patient Fasin Bilong Jehovah
4. Wanem nao aposol Peter talem abaotem patient fasin bilong Jehovah?
4 Aposol Peter hem raet olsem abaotem patient fasin bilong Jehovah: “Olketa wea mi lovem, iufala mas luksavve long disfala samting, hao wanfala day long Jehovah hem olsem wan thousand year and wan thousand year hem olsem wanfala day. Jehovah hem no slow saed long promis bilong hem, olsem samfala pipol tingim wei for slow, bat hem patient witim iufala from hem no laekem eniwan for dae bat hem laekem evriwan for repent.” (2 Peter 3:8, 9) Plis tingim tufala point insaed disfala toktok wea bae helpem iumi for minim patient fasin bilong Jehovah.
5. Hao nao tingting bilong Jehovah abaotem taem hem affectim samting wea hem duim?
5 First samting, hem wei wea tingting bilong Jehovah abaotem taem hem difren from iumi. From Hem stap for olowe, wan thousand year hem olsem wanfala day nomoa long hem. Taem no savve kontrolem samting wea hem duim, nomata olsem, hem no delay for stretem problem. From Jehovah hem wise evribit, hem barava savve wanem nao best taem for duim samting for mekem evriwan kasem gud samting, and hem patient for weit go kasem datfala taem. Bat, iumi shud no tingse hem no kea abaotem wei wea olketa servant bilong hem gohed for safa from wei wea hem no duim samting yet. Jehovah nao love and hem God wea garem ‘fasin for barava kea.’ (Luke 1:78; 1 John 4:8) Hem fit for finisim evribit and for olowe, evri nogud samting wea kamap from disfala wei wea hem letem olketa man for safa for lelebet taem.—Psalm 37:10.
6. Wanem kaen tingting abaotem God nao iumi shud stap klia long hem, and why nao olsem?
6 Hem tru, hem no isi for weit for wanfala samting wea iu barava laek kasem. (Proverbs 13:12) Dastawe sapos pipol no kwiktaem duim samting wea olketa promis for duim, man maet tingse olketa bae no duim datwan nao. Hem barava no wise for tingse God hem olsem! Sapos iumi tingse patient fasin bilong God hem minim hem slow, bae gogo iumi isi for garem daot and wikdaon, and tu, iumi bae isi for sleep long spiritual wei. And samting wea moa worse, hem sapos iumi letem olketa man wea tok spoelem iumi and wea no garem faith for pullim iumi go difren. Peter warnim iumi abaotem pipol olsem wea savve sei: “Mifala nating lukim yet taem wea hem promis for hem stap moa. Start long taem wea olketa laen dadi bilong iumi dae kam kasem distaem, evri samting gohed semsem olsem from start bilong creation.”—2 Peter 3:4.
7. Wanem nao showimaot patient fasin bilong Jehovah hem join witim wei wea hem laekem pipol for repent?
7 Mek-tu point wea iumi lanem from toktok bilong Peter hem wei wea Jehovah hem patient bikos hem laekem evriwan for repent. Nomata Jehovah bae killim dae pipol wea nating willing for lusim olketa nogud wei bilong olketa, hem no hapi taem olketa wicked pipol dae. Bat, Jehovah hapi taem pipol repent, lusim olketa nogud wei bilong olketa, and kasem laef. (Ezekiel 33:11) Dastawe hem gohed for patient and hem sendem olketa servant bilong hem for talemaot disfala gud nius evriwea long earth for mekem pipol garem chance for kasem laef.
8. Wanem nao iumi lanem abaotem patient fasin bilong God from wei wea hem deal witim nation bilong Israel?
8 Iumi savve lane abaotem patient fasin bilong God tu taem iumi tingim wei wea hem deal witim nation bilong Israel bifor. For plande handred year Jehovah hem patient and no panisim olketa Israelite from wei wea olketa no obey. Thru long olketa profet hem plande taem talem disfala strong encouragement: “Lusim olketa nogud wei bilong iufala and obeyim olketa komandment bilong mi, olketa law bilong mi, followim evri law wea mi givim long olketa laen dadi bilong iufala and wea mi givim long iufala thru long olketa servant bilong mi, olketa profet.” Wanem nao kamap from datwan? Sorre nao, olketa pipol “no lisin.”—2 Kings 17:13, 14.
9. Hao nao patient fasin bilong Jesus hem showimaot patient fasin bilong Dadi bilong hem?
9 Gogo, Jehovah hem sendem kam Son bilong hem wea barava trae hard for mekem olketa Jew luksavve hao olketa shud fren bak witim God. Patient fasin bilong Jesus hem showimaot patient fasin bilong Dadi bilong hem long perfect wei. From Jesus savve olketa klosap for killim hem dae, hem sei: “Jerusalem, Jerusalem, wea killim dae olketa profet and sutim long ston olketa wea God sendem kam long hem, plande taem mi laek hipimap olketa pikinini bilong iu, olsem wanfala mami kokorako hem hipimap olketa baby bilong hem andanit long wing bilong hem! Bat iufala no laekem.” (Matthew 23:37) Disfala toktok barava showimaot hao Jesus hem no wanfala judge wea no kea and wea laek for panisim man, bat, hem wanfala fren wea garem love and hem patient witim pipol. Olsem Dadi bilong hem long heven, Jesus tu laekem pipol for repent and no kasem judgment for dae. Samfala pipol lisin and obeyim olketa warning wea Jesus talem and from datwan olketa stap sef taem Jerusalem hem distroe long 70 C.E.—Luke 21:20-22.
10. Wanem gud samting nao iumi kasem from wei wea God hem patient?
10 Tru nao, patient fasin bilong Jehovah hem nambawan samting! Start kam from bifor yet olketa man barava no obey. Nomata olsem, Jehovah givim each wan long iumi and plande million narawan chance for savve long hem and for acceptim datfala hope for kasem salvation. Peter hem sei olsem long olketa Christian brata bilong hem: “Tingim hao patient fasin bilong Lord bilong iumi hem minim salvation.” (2 Peter 3:15) Waswe, iu agree hao iumi fit for barava tinghae long wei wea patient fasin bilong Jehovah mekem iumi kasem chance for sev? Waswe, iu agree tu hao iumi shud prea long Jehovah for gohed for patient witim iumi taem iumi gohed servem hem each day?—Matthew 6:12.
11. Wei wea iumi minim patient fasin bilong Jehovah bae muvim iumi for duim wanem?
11 Taem iumi minim why Jehovah hem patient, diswan helpem iumi for patient and weitim taem wea bae hem sevem iumi. And tu, bae iumi no tingse Jehovah hem slow for fulfillim olketa promis bilong hem. (Lamentations 3:26) Taem iumi gohed for prea for Kingdom bilong God for kam, iumi trustim hao God savve long best taem for ansarem datfala prea. And tu, diswan bae muvim iumi for followim example bilong Jehovah for showimaot patient fasin taem iumi deal witim olketa brata and olketa wea iumi preach long olketa. Iumi tu no laekem eniwan long olketa for distroe bat iumi laekem evriwan for repent and join witim iumi for garem hope for laef olowe.—1 Timothy 2:3, 4.
Tingim Patient Fasin Bilong Olketa Profet
12, 13. For fitim James 5:10, hao nao profet Isaiah win for showimaot patient fasin?
12 Taem iumi ting raonem patient fasin bilong Jehovah, diswan helpem iumi for tinghae long datfala fasin and trae hard for garem datwan. Hem no isi for olketa man wea sin for mekem grow patient fasin, nomata olsem iumi fit for duim. Iumi lane from olketa servant bilong God bifor. Disaepol James hem sei olsem: “Olketa brata, tingim example bilong wei for safa from nogud samting and wei for showimaot patient fasin wea olketa profet wea toktok long nem bilong Jehovah showimaot.” (James 5:10) Iumi kasem comfort and encouragement taem iumi savve olketa narawan win for deal witim olketa semkaen problem wea iumi tu feisim.
13 Olsem example, profet Isaiah hem barava need for garem patient fasin taem hem duim assignment bilong hem. Jehovah showimaot hao hem needim datwan taem hem sei: “Go, and iu mas sei olsem long pipol hia, ‘Iufala pipol, gohed for herem, bat nating minim; and iufala gohed for lukim, bat nating savve.’ Mekem heart bilong pipol hia no lisin, and mekem ear bilong olketa no herem, and mekem eye bilong olketa pas tugeta, mekem olketa no lukluk witim eye and olketa no herem eni samting witim ear bilong olketa, and mekem heart bilong olketa no savve minim samting and mekem olketa no tan kam bak and kasem healing.” (Isaiah 6:9, 10) Nomata pipol nating lisin, Isaiah patient and gohed for talemaot warning bilong Jehovah for samting olsem 46 year! Patient fasin bae helpem iumi tu for no givap for preachim gud nius, nomata plande pipol bae no laek acceptim datwan.
14, 15. Wanem nao helpem Jeremiah for deal witim persecution and wei for feel wikdaon?
14 Taem olketa profet duim ministry bilong olketa, olketa mas deal witim wei wea pipol no acceptim message bilong olketa, and tu, olketa mas deal witim persecution. Olketa putim Jeremiah insaed long olketa stock, putim hem insaed “prison haos,” and torowem hem insaed long wanfala well. (Jeremiah 20:2; 37:15; 38:6) Pipol wea hem laek for helpem nao gohed for spoelem hem. Nomata olsem, Jeremiah nating kros and no pei bak long olketa. Hem patient nomoa and no givap for plande year.
15 Persecution and wei wea olketa tok spoelem Jeremiah hem no mekem hem givap, and olketa samting hia no mekem iumi givap tu. Hem tru, samfala taem iumi maet feel wikdaon lelebet. Jeremiah tu feel wikdaon. Hem sei olsem: “Olketa toktok bilong Jehovah kamap wanfala samting wea mekem mi kasem shame and pipol mekfani long mi for full day. And mi sei: ‘Mi bae no storyim hem, and mi bae no talem eni samting long nem bilong hem.’” Then wanem nao happen? Waswe, hem stop for preach nao? Hem sei moa: “And insaed heart bilong mi [toktok bilong God hem] olsem wanfala fire wea bone insaed olketa bon bilong mi; and mi taed for holem bak, and hem hard for mi duim datwan nao.” (Jeremiah 20:8, 9) Tingim diswan, taem Jeremiah hem tingim evritaem wei wea pipol mekfani long hem, hem nating hapi nao. Bat, taem hem ting raonem datfala nambawan message wea important tumas, hem hapi moa. And tu, Jehovah hem stap witim Jeremiah “olsem wanfala maeti wan,” and hem strongim hem for gohed for talemaot toktok bilong hem and no fraet.—Jeremiah 20:11.
16. Hao nao iumi savve gohed for hapi taem iumi duim waka bilong iumi for preachim gud nius?
16 Waswe, profet Jeremiah hapi taem hem duim waka bilong hem? Barava nao! Hem sei olsem long Jehovah: “Mi faendem olketa toktok bilong iu, and mi start for kaikaim; and toktok bilong iu mekem heart bilong mi singaot and hapi; from olketa kolem nem bilong iu long mi, O Jehovah God.” (Jeremiah 15:16) Jeremiah hapi long privilege bilong hem for stand for trufala God and preachim message bilong hem. Iumi tu savve hapi. And taem iumi lukim pipol evriwea long world olketa acceptim Kingdom message, repent, and followim road wea lead go long laef olowe, diswan mekem iumi hapi olsem wei wea hem mekem olketa angel hapi tu.—Luke 15:10.
“Wei wea Job No Givap”
17, 18. Long wanem wei nao Job hem no givap, and wanem nao kamap from datwan?
17 Bihaen James story abaotem olketa profet bifor, hem sei olsem: “Iufala herem finis wei wea Job no givap and iufala lukim samting wea Jehovah givim hem, and hao Jehovah hem garem loving feeling and mercy.” (James 5:11) Greek word wea olketa transleitim olsem “no givap” hem lelebet semsem witim word wea James iusim long firstfala verse taem hem sei “patient fasin.” Wanfala savveman hem sei olsem abaotem wei wea tufala word hia lelebet difren: “Greek word wea olketa iusim for patient hem minim for gohed patient nomata samwan hem spoelem iumi, bat datfala Greek word for no givap hem minim for gohed strong nomata iumi kasem olketa hard taem.
18 Job hem kasem barava bigfala hevi. Evri material samting bilong hem lus, olketa pikinini bilong hem dae, and hem kasem wanfala nogud sik wea mekem hem kasem bigfala pain. And tu, hem mas deal witim olketa laea story wea sei Jehovah nao panisim hem. Job hem no kwaet taem hem safa; hem sorre tumas abaotem samting wea kasem hem and samting hem talem hem olsem hem sei hem moa raeteous winim God. (Job 35:2) Nomata olsem, hem nating lusim faith bilong hem, or brekem faithful fasin bilong hem. Hem nating tok spoelem God wea hem nao samting wea Satan sei hem bae duim. (Job 1:11, 21) Wanem nao kamap from datwan? Jehovah “hem blessim Job long bihaen winim long firstaem.” (Job 42:12) Jehovah finisim sik bilong Job, mekem hem moa rich winim bifor, and givim hem wanfala barava hapi laef witim olketa wea hem lovem. Wei wea Job faithful for no givap mekem hem minim gud go moa evri fasin bilong Jehovah.
19. Wanem nao iumi lanem from wei wea Job patient and no givap?
19 Wanem nao iumi lanem from wei wea Job hem patient and no givap? Olsem Job, iumi tu savve kasem sik and olketa narakaen hard taem. Maet iumi no minim gud why Jehovah letem wanfala samting olsem for kasem iumi. Bat, iumi savve feel sure long diswan: Sapos iumi gohed for faithful, iumi bae kasem blessing. Jehovah bae no fail for givim reward long olketa wea barava lukaotem hem. (Hebrews 11:6) Jesus hem sei: “Man wea no givap and gohed strong kasem end nao bae sev.”—Matthew 10:22; 24:13.
“Day Bilong Jehovah Bae Kam”
20. Why nao iumi barava sure day bilong Jehovah bae kam?
20 Nomata Jehovah hem patient, hem raeteous tu and hem bae no letem wicked fasin gohed for olowe. Patient fasin bilong hem garem spialaen. Peter sei olsem: “[God] no hol bak for panisim wanfala world wea stap bifor.” Noah and famili bilong hem sev, bat datfala world wea no worshipim God hem distroe long wata. Jehovah distroem tu Sodom and Gomorrah, and finisim olketa evribit. Wei wea Jehovah distroem olketa hia hem showimaot “example bilong samting wea bae kasem pipol wea no followim God.” Dastawe iumi barava sure: “Day bilong Jehovah bae kam.”—2 Peter 2:5, 6; 3:10.
21. Hao nao iumi savve showimaot iumi garem patient fasin and fasin for no givap, and wanem nao bae iumi storyim long next article?
21 So iumi gohed for followim example bilong patient fasin bilong Jehovah thru long wei for helpem olketa narawan repent mekem olketa savve sev. And tu, iumi mas followim example bilong olketa profet thru long wei for talemaot gud nius witim patient fasin nomata samfala no acceptim samting wea iumi preach abaotem. And nara samting tu, sapos iumi no givap olsem Job taem iumi kasem olketa hard taem, iumi savve sure Jehovah bae blessim iumi sapos iumi gohed for faithful. Plande reason stap for iumi hapi taem iumi duim ministry from iumi lukim hao Jehovah barava blessim wei wea pipol bilong hem waka hard for preachim gud nius evriwea long earth. Bae iumi lanem moa samting abaotem diswan long next article.
Waswe, Iu Remember?
• Why nao Jehovah hem patient?
• Wanem nao iumi lanem from patient fasin bilong olketa profet?
• Hao nao Job showimaot hem no givap, and wanem nao kamap from datwan?
• Hao nao iumi savve patient fasin bilong Jehovah hem garem spialaen?
[Piksa long page 18]
Patient fasin bilong Jesus hem showimaot patient fasin bilong Dadi bilong hem long perfect wei
[Piksa long page 20]
Hao nao Jehovah rewardim Jeremiah from hem patient?
[Piksa long page 21]
Hao nao Jehovah rewardim Job from hem no givap?