Hapi wea Iumi Kasem Taem Iumi Wakabaot Followim Faithful Fasin
“Blessing bilong Jehovah—hem nao mekem man rich, and hem no addim eni pain witim datwan.”—PROVERBS 10:22.
1, 2. Why nao iumi mas no ova tumas for tingting abaotem future?
WANFALA savveman long America hem sei: “Wei for tingting tumas abaotem future . . . hem mekem man no enjoyim samting wea happen distaem.” Diswan savve happen long samfala pikinini. Olketa savve tingting tumas abaotem samting wea olketa bae duim taem olketa big, gogo, olketa nating enjoyim evri samting wea olketa fit for duim taem olketa pikinini.
2 Samfala taem, pipol wea worshipim Jehovah tu savve garem semkaen tingting. Tingim disfala example. Iumi Olketa Jehovah’s Witness laekem promis bilong God for mekem earth kamap paradaes. Iumi laekem tumas datwan for happen. Iumi barava weit for kasem wanfala laef wea man bae no olo, free from sik, pain, and wei for safa. Hem gud for tingim olketa samting hia. Bat sapos iumi tingting tumas abaotem olketa physical blessing olsem, maet iumi nating luksavve hao iumi distaem garem plande spiritual blessing. Sapos iumi ting olsem bae iumi sorre bihaen! Kaen tingting olsem savve isi for mekem iumi wikdaon and ‘mekem heart bilong iumi sik bikos iumi tingse samting wea iumi expectim hem delay for longfala taem.’ (Proverbs 13:12) Olketa problem and hard taem long laef maet mekem iumi sorre tumas or mekem iumi tingim iumiseleva nomoa. Winim wei for deal witim olketa nogud samting wea happen, maet iumi start for garem fasin for komplen. Iumi savve missim olketa kaen fasin olsem sapos iumi tingting strong long olketa blessing wea iumi kasem distaem.
3. Wanem nao bae iumi story raonem long disfala article?
3 Proverbs 10:22 hem sei: “Blessing bilong Jehovah—hem nao mekem man rich, and hem no addim eni pain witim datwan.” Tru nao, wei wea olketa servant bilong Jehovah rich long spiritual wei hem blessing wea mekem iumi barava hapi, iaman? Distaem bae iumi story raonem samfala spiritual blessing wea iumi garem and lukim hao olketa samting hia affectim iumi wanwan. Jehovah givim staka blessing for ‘olketa raeteous man wea wakabaot followim faithful fasin.’ Wei for ting raonem olketa blessing hia bae strongim iumi for gohed for hapi taem iumi servem Dadi bilong iumi wea stap long heven.—Proverbs 20:7.
‘Olketa Blessing wea Mekem Iumi Rich’ Distaem
4, 5. Wanem Bible teaching nao iuseleva barava tinghae long hem, and why nao olsem?
4 Iumi garem stretfala savve abaotem olketa teaching insaed Bible. Olketa religion wea tingse olketa Christian sei olketa bilivim Bible. Bat, olketa nating agree long samting wea Bible teachim. Nomata samfala garem sem religion nomoa, olketa garem difren tingting abaotem samting wea Bible really teachim. Diswan barava difren from olketa servant bilong Jehovah! Nomata iumi from olketa difren kantri, garem difren kastom, or kam from difren tribe, iumi evriwan worshipim datfala tru God wea iumi savve long nem bilong hem. Hem no wanfala trinity god wea iumi hard for minim. (Deuteronomy 6:4; Psalm 83:18; Mark 12:29) Iumi luksavve tu hao God klosap for stretem datfala main important kwestin, wea hem nao wei wea God nomoa fit for rulim universe. And iumi savve hao faithful fasin bilong iumi each wan hem join witim datwan. Iumi savve long truth abaotem olketa wea dae and iumi no fraet long God olsem nara pipol wea tingse God hem putim man long hellfire or long purgatory.—Ecclesiastes 9:5, 10.
5 Iumi hapi tumas tu from iumi savve iumi no samting wea seknomoa kamap from evolution! Bat, iumi savve God nao creatim iumi, and hem wakem iumi long image bilong hem. (Genesis 1:26; Malachi 2:10) Man for raetem psalm hem sei olsem: “Mi bae praisem iu from iu wakem mi long nambawan wei. Olketa waka bilong iu barava nambawan, and soul bilong mi luksavve tu.”—Psalm 139:14.
6, 7. Wanem nao samfala change wea iu duim long laef bilong iu or wea narawan duim, wea kamap olsem wanfala blessing?
6 Iumi kamap free from olketa fasin wea spoelem man. Radio, niuspepa, and olketa magasin, talem plande warning abaotem danger wea kamap from wei for smoke, ova tumas for drink, and dirty fasin. Plande pipol nating followim olketa warning hia. Bat, wanem nao happen taem samwan wea garem honest heart hem lanem hao tru God hem heitim olketa nogud fasin olsem, and hao God savve feel sorre sapos man duim olketa samting hia? Tru nao, man hia bae lusim olketa nogud fasin olsem! (Isaiah 63:10; 1 Corinthians 6:9, 10; 2 Corinthians 7:1; Ephesians 4:30) Nomata main reason hem duim diswan for mekem Jehovah God hapi, hem kasem tu olketa gud samting from datwan, olsem gud health and peace long mind.
7 Hem no isi for man lusim olketa nogud fasin. Nomata olsem, each year plande thousand pipol duim datwan. Olketa dedicatem olketa seleva long Jehovah and willing for baptaes long wata. Taem olketa duim diswan hem showimaot long pablik hao olketa lusim evri nogud samting wea mekem God no hapi. Diswan barava encouragem iumi evriwan! Hem strongim wei wea iumi disaed strong finis for no kamap slave bilong sin and no duim olketa nogud fasin wea spoelem iumi.
8. Wanem kaonsel from Bible nao savve helpem famili for hapi?
8 Iumi garem hapi famili. Long plande kantri olketa famili brekdaon. Staka wea marit olketa divorce, and diswan plande taem mekem olketa pikinini garem bigfala problem saed long feeling. Long samfala kantri long Europe, samting olsem 20 percent long olketa famili garem dadi or mami nomoa wea lukaftarem famili. Hao nao Jehovah helpem iumi for garem faithful fasin insaed long famili? Plis readim Ephesians 5:22–6:4, and lukim nambawan kaonsel wea Bible talem for olketa hasband, waef, and pikinini. Taem man followim samting wea disfala scripture hem talem and olketa nara scripture tu, hem strongim marit, helpem parents for teachim gud olketa pikinini, and mekem famili hapi. Datwan hem wanfala nambawan blessing wea mekem iumi hapi, iaman?
9, 10. Long wanem wei nao tingting bilong iumi abaotem future hem difren from olketa long world?
9 Iumi kasem promis abaotem wei wea evri problem long world bae klosap for finis. Nomata samfala pipol garem bigfala savve saed long science and technology, and tu, samfala leader barava trae hard for stretem olketa problem, olketa bigfala problem hem stap yet. No longtaem go nomoa, Klaus Schwab, wea hem nao startim datfala World Economic Forum, hem storyim hao “list bilong olketa problem wea world feisim hem kamap moa big and taem for stretem diswan hem kakamap short.” Hem storyim “olketa danger wea affectim evri nation, olsem terrorism, wei for spoelem environment and wei wea pipol hard for kasem selen.” Schwab hem sei olsem: “Distaem world feisim olketa problem winim eni narataem. Olketa man need for waka tugeta and disaed kwiktaem mekem olketa fit for stretem olketa problem hia.” Insaed long disfala mek-21 century, luk olsem olketa man barava no garem eni gud future.
10 Iumi barava hapi from iumi savve Jehovah hem mekem finis wanfala arrangement wea bae stretem evri problem bilong olketa man, hem nao datfala Kingdom bilong God wea Messiah hem rulim! Thru long datwan, tru God bae ‘finisim olketa war’ and mekem ‘bigfala peace’ kamap. (Psalm 46:9; 72:7) Anointed King, Jesus Christ, ‘bae sevem man wea poor, man wea safa, and sevem man nating from hevi and from raf fasin.’ (Psalm 72:12-14) Taem Kingdom hem rul bae no eniwan hangre. (Psalm 72:16) Jehovah “bae aotem krae from eye bilong [iumi], and dae bae nomoa, sorre and singaot and pain bae nomoa tu. Evri samting bifor hem finis nao.” (Revelation 21:4) Kingdom hem stap finis long heven and klosap nao bae hem duim samting for stretem evri problem long earth.—Daniel 2:44; Revelation 11:15.
11, 12. (a) Waswe, wei for enjoy savve mekem iumi hapi for olowe? Minim datwan. (b) Wanem nao bae mekem man kasem trufala hapi?
11 Iumi savve wanem nao mekem man kasem trufala hapi. Wanem nao mekem iumi kasem trufala hapi? Wanfala doctor wea studyim mind hem sei hapi hem garem thrifala part—wei for enjoy, wei for duim samting (insaed diswan hem waka and famili), and wei for garem goal (wei for duim samting for helpem olketa narawan). Man hia sei wei for enjoy hem nao lalas samting long thrifala hia and hem sei: “Diswan hem interesting bikos main samting wea plande pipol barava tingse hem important, hem nao wei for enjoyim laef.” Wanem nao Bible teachim abaotem diswan?
12 King Solomon long Israel bifor hem sei: “Mi sei olsem insaed heart bilong mi: ‘Kam, traem hapi firstaem. And tu, enjoyim gudfala samting.’ And, lukim! datwan tu hem iusles nomoa. Mi sei long wei for laflaf: ‘Krangge samting!’ and long hapi mi sei: ‘Diswan for wanem?’” (Ecclesiastes 2:1, 2) Bible sei wei for enjoy hem mekem iumi hapi for lelebet taem nomoa. Waswe saed long wei for duim waka? Iumi garem best waka for duim. Hem nao for preach abaotem Kingdom and mekem pipol kamap disaepol. (Matthew 24:14; 28:19, 20) Taem iumi talemaot message bilong salvation wea stap insaed Bible, iumi duim waka wea savve sevem iumi and olketa wea lisin long iumi. (1 Timothy 4:16) From iumi “waka witim God,” iumi savve hao “moa hapi kamaot from wei for givim samting winim wei for kasem samting.” (1 Corinthians 3:9; Acts 20:35) Disfala waka hem mekem iumi satisfae and hem mekem Creator fit for ansarem toktok bilong Satan, man wea tok againstim hem. (Proverbs 27:11) Tru nao, Jehovah hem showimaot long iumi hao wei for lovem God hem mekem man kasem tru hapi wea bae gohed for olowe.—1 Timothy 4:8.
13. (a) Hao nao Theocratic Ministry Skul hem wanfala blessing wea mekem iumi hapi? (b) Hao nao Theocratic Ministry Skul hem helpem iu?
13 Iumi garem wanfala important training program wea barava helpem iumi. Gerhard hem elder long wanfala kongregeson bilong Olketa Jehovah’s Witness. Hem ting bak long taem wea hem young and hem sei: “Taem mi young, mi barava no savve toktok gud. Taem mi feel fraet, mi no savve toktok klia nao and toktok bilong mi bae paspas. Mi feel iusles and datwan mekem mi sorre. Parents bilong mi arrange for mi go for skulim wei for toktok, bat datwan hem no helpem mi. Problem wea mi feisim hem no long physical saed. Wei wea mi fraet tumas nao mekem mi no savve toktok gud. Nomata olsem, Jehovah hem givim wanfala nambawan samting. Datwan nao Theocratic Ministry Skul. Taem mi joinim disfala skul hem help for strongim mi for no fraet. Mi traem best for followim samting wea mi lanem. And hem barava waka! Toktok bilong mi hem no paspas tumas, and mi no feel sorre tumas nao. Gogo mi start for no fraet for duim ministry. Distaem mi savve givim olketa pablik tok tu. Mi barava thankiu long Jehovah, from disfala skul hem mekem laef bilong mi kamap moabeta.” Waswe, training wea Jehovah givim for helpem iumi duim disfala waka hem no samting for iumi hapi long hem?
14, 15. Long taem bilong trabol, wanem kaen help nao iumi savve kasem? Talem example.
14 Iumi wanwan garem wei for fren witim Jehovah and kasem sapot from olketa brata and sista evriwea long world wea garem wan mind. Katrin, wea stap long Germany, barava wari tumas taem hem herem nius abaotem wanfala earthquake wea mekem tsunami kamap long southeast Asia. Dota bilong hem stap long Thailand taem datfala disaster hem happen. Katrin hem mas weit for 32 hour for herem nius sapos dota bilong hem laef or hem dae, olsem plande narawan long datfala taem. Katrin hem barava hapi tumas taem hem herem nius hao dota bilong hem stap sef nomoa!
15 Wanem nao helpem Katrin taem hem wari and weit for plande hour hia? Hem sei: “Klosap full taem hia mi prea long Jehovah. Mi barava feelim hao datwan hem strongim mi and mekem mi no wari tumas. And tu, olketa spiritual brata bilong iumi kam visitim mi and sapotim mi.” (Philippians 4:6, 7) Tru nao, bae hem moa hard for hem sapos hem no prea long Jehovah and sapos hem no kasem comfort from olketa spiritual brata and sista wea lovem hem! Wei wea iumi garem barava klos wei for fren witim Jehovah and Son bilong hem, and tu, olketa Christian brata bilong iumi, hem wanfala barava spesol blessing. Tru nao, iumi no fit for tingse diswan hem samting nating.
16. Storyim wanfala experience wea showimaot wei wea resurrection hope hem wanfala blessing.
16 Iumi garem hope for lukim bak olketa wea iumi lovem wea dae finis. (John 5:28, 29) Wanfala young man wea nem bilong hem Matthias garem dadi and mami wea Jehovah’s Witness. Bat from hem no luksavve long olketa blessing wea hem garem, gogo hem lusim Christian kongregeson taem hem teenager. Distaem hem sei olsem: “Mi nating savve story abaotem olketa serious samting witim dadi bilong mi. Mitufala argue plande taem. Nomata olsem, dadi bilong mi evritaem trae for helpem mi. Hem lovem mi tumas, bat mi nating luksavve long datwan long datfala taem. Long 1996, mi sidaon saed bed bilong hem and holem hand bilong hem. Mi krae and talem hem hao mi sorre tumas from evri samting wea mi duim. Mi talem hem hao mi lovem hem tumas. Bat hem no fit for herem mi bikos hem haf-dead. No longtaem bihaen hem sik hem dae nao. Sapos mi laef kasem taem mi lukim dadi bilong mi moa long resurrection, mitufala bae story gud abaotem evri samting. And mi savve bae hem hapi tumas for herem hao mi kamap wanfala elder and hao mi and waef bilong mi, mifala pioneer.” Tru nao, resurrection hope hem wanfala nambawan blessing for iumi!
“Hem No Addim Eni Pain Witim Datwan”
17. Taem iumi ting raonem olketa blessing wea Jehovah givim, hao nao diswan helpem iumi?
17 Jesus Christ tok olsem abaotem Dadi bilong hem wea stap long heven: “Hem mekem sun bilong hem shaen long wicked pipol and long gudfala pipol, and hem mekem rain foldaon long pipol wea raeteous and wea no raeteous.” (Matthew 5:45) Sapos Jehovah God savve givim blessing long olketa man wea no raeteous and wicked, tingim haomas blessing nao bae hem givim for olketa wea wakabaot followim faithful wei! Psalm 84:11 hem sei: “Jehovah seleva bae no holem bak gudfala samting from olketa wea wakabaot long stretfala fasin.” Taem iumi ting raonem spesol wei wea hem kea for olketa wea lovem hem and wei wea hem tingim olketa, diswan mekem heart bilong iumi fulap witim thankiu and hapi!
18. (a) Why nao iumi fit for sei Jehovah no addim eni pain witim blessing bilong hem? (b) Why nao plande long olketa loyal wan bilong God safa?
18 “Blessing bilong Jehovah,” hem nao mekem pipol bilong hem rich long spiritual wei. And hem promis hao hem bae “no addim eni pain witim datwan.” (Proverbs 10:22) Sapos olsem, why nao God letem plande long olketa loyal pipol bilong hem for kasem olketa test and hard taem wea savve mekem olketa safa and kasem pain? Olketa hard taem and problem kasem iumi bikos long thrifala main reason. (1) Iumi man wea sin. (Genesis 6:5; 8:21; James 1:14, 15) (2) Satan and olketa demon bilong hem. (Ephesians 6:11, 12) (3) World hem nogud tumas. (John 15:19) Jehovah hem no mekem olketa nogud samting kamap, bat hem letem olketa for happen. For tok stret, “evri gudfala present and evri perfect present hem from antap, from hem kam from Dadi bilong olketa laet long heven.” (James 1:17) Tru nao, olketa blessing bilong Jehovah no savve mekem man kasem pain.
19. Long future, wanem nao bae olketa wea wakabaot followim faithful fasin kasem?
19 Taem iumi kamap rich long spiritual wei hem minim iumi mas barava fren gud witim God. Taem iumi gohed for strongim wei for fren gud witim hem, iumi mekem wanfala ‘gud faondeson for future wea sef, wea bae mekem iumi hol strong long datfala really laef,’ hem nao laef olowe. (1 Timothy 6:12, 17-19) Long future insaed niu world bilong God, olketa spiritual riches bilong iumi bae join witim olketa physical blessing tu. Evriwan wea “gohed for lisin long voice bilong Jehovah God,” bae kasem datfala really laef. (Deuteronomy 28:2) So witim wei for disaed strong, iumi mas gohed for hapi for wakabaot followim faithful fasin.
Wanem Nao Iu Lanem?
• Why nao hem nogud for tingting tumas abaotem future?
• Wanem nao olketa blessing wea iumi kasem distaem?
• Why nao olketa faithful servant bilong God safa?