Samfala Bae Rul, Staka Bae Kasem Gud Samting
START kam long taem bilong olketa aposol, God chusim samfala faithful Christian from earth for kamap olketa son bilong hem. Olketa barava change taem God adoptim olketa, dastawe Bible sei olketa born moa long niu laef. Olketa wakaman bilong God hia, olketa born moa long niu laef mekem olketa redi for kamap olketa king long heven. (2 Timothy 2:12) Olketa bae laef bak from dae for kamap olketa king long heven. (Romans 6:3-5) “Olketa bae rul olsem olketa king ovarem earth” witim Christ long heven.—Revelation 5:10; 11:15.
Bat Bible talem hao samfala narawan tu bae kasem laef olowe. Bible (long Hebrew Scripture and Greek Scripture), talem hao plan bilong God hem for sevem wanfala smol sekson for rul witim Christ long heven and wanfala big sekson for laef long earth anda long datfala Kingdom. Tingim wanem aposol John raetem long olketa nara Christian wea olsem hem, wea born moa long niu laef. Hem talem olsem abaotem Jesus: “Hem wanfala sakrifaes wea kavarem sin bilong iumi, no for iumi [smol sekson] nomoa bat for full world tu [bigfala sekson].”—1 John 2:2.
Aposol Paul talem olsem tu: “Creation [big sekson] barava luk forward and weitim taem wea olketa son bilong God [smol sekson] bae showaot.” (Romans 8:19-21) Wanem nao mining bilong toktok bilong aposol John and Paul? Hem minim olketa wea born moa bae rul long wanfala gavman long heven. For wanem? Mekem staka million pipol savve kasem laef and gudfala living for olowe long disfala earth wea gavman bilong God bae rulim. Dastawe Jesus talem olketa disaepol for prea olsem: “Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.”—Matthew 6:10.
Hebrew Scripture tu storyim disfala tru teaching hao tufala sekson bae sev. Tingim wanem Jehovah talem long grani bilong Jesus, Abraham: ‘From seed [smol sekson] bilong iu evri kantri long earth [big sekson] bae barava blessim olketa seleva.’ (Genesis 22:18) Tru tumas, evri kantri long earth kasem blessing from datfala “seed” bilong Abraham.
Hu nao datfala “seed”? Hem nao Jesus Christ and olketa wea born moa long niu laef wea God adoptim. Aposol Paul talem hao “sapos iufala bilong Christ, iufala nao barava seed bilong Abraham.” (Galatians 3:16, 29) And wanem nao olketa blessing wea pipol from evri kantri kasem from datfala “seed”? God savve hapi moa long olketa and olketa savve kasem laef olowe long paradaes earth. David talem disfala profesi: “Olketa gudfala pipol nomoa bae stap long earth, and olketa bae stap long hem for olowe.”—Psalm 37:29; Isaiah 45:18; Revelation 21:1-5.
Tru tumas, samfala nomoa bae rul long heven, bat staka pipol nao bae kasem laef olowe long earth and staka blessing from datfala gavman long heven. Hem bae gud tumas sapos iu and famili bilong iu nao samfala wea kasem olketa blessing wea Kingdom bilong God bae mekem kamap for olowe.
[Piksa long page 12]
Staka million pipol bae kasem laef olowe long earth. Waswe, bae iu wanfala long olketa?