Chapter Foa
Datwan wea Evri Profet Witness Abaot
1. Olketa samting wea happen long laef bilong Jesus bifor hem kam long earth showim wanem abaotem wei wea hem fren witim Jehovah?
“FATHER hem lovem Son and showim hem evri samting wea hem duim.” (John 5:20) Son hem fren long barava klos wei witim Father bilong hem, Jehovah! Datfala wei for fren hem start taem hem creatim hem, planti million year bifor hem born olsem man. Hem nao only-born Son bilong God, datwan wea Jehovah seleva nao creatim. Evri nara samting long heven and long earth kamap thru long datfala firstborn Son wea hem lovem. (Colossians 1:15, 16) Hem garem waka tu olsem Word bilong God, or Man for Toktok, wea God iusim for talemaot will bilong hem long nara pipol. Disfala Son wea God barava lovem hem kamap datfala man, Jesus Christ.—Proverbs 8:22-30; John 1:14, 18; 12:49, 50.
2. Haomas Bible profesi nao story abaotem Jesus?
2 Bifor firstborn Son bilong God hem start long mirakol wei for grow olsem man, God muvim olketa man for raetem planti profesi abaotem hem. Aposol Peter witness olsem long Cornelius: “Long hem evri profet givim witness.” (Acts 10:43) Bible hem storyim waka bilong Jesus long barava bigfala wei dastawe wanfala angel sei olsem long aposol John: “Wei for witness long Jesus nao samting wea muvim man for talem profesi.” (Revelation 19:10) Olketa profesi hia showimaot wei wea hem nao Messiah. Olketa point go long olketa difren waka wea hem bae duim for fulfillim olketa purpose bilong God. Iumi shud interest long evri samting hia distaem.
Samting wea Olketa Profesi Showimaot
3. (a) Insaed profesi long Genesis 3:15, hu nao datfala snek, datfala “woman,” and ‘seed bilong snek’ piksarem? (b) Why nao wei for ‘killim snek long hed’ hem samting wea olketa servant bilong Jehovah interest tumas long hem?
3 First wan long olketa profesi olsem hem kamap bihaen wei for bighed kamap long Eden. Jehovah sei long datfala snek: “Mi bae putim fasin for heit midolwan long iu and long woman and midolwan long seed bilong iu and seed bilong hem. Hem bae killim iu long hed and iu bae killim hem long leg.” (Genesis 3:15) Datfala profesi hem for Satan, wea snek hem piksarem. Datfala “woman” hem loyal organization bilong Jehovah long heven, wea olsem wanfala faithful waef long hem. ‘Seed bilong snek’ hem evri angel and man wea showimaot spirit bilong Satan, wea againstim Jehovah and pipol bilong Hem. Wei for ‘killim snek long hed’ hem minim hao Satan, datwan wea tok againstim Jehovah and mekem olketa man kasem bigfala sorre, bae distroe evribit. Bat hu nao main part bilong datfala “seed” wea bae givim kill? For planti handred year, datwan hem olsem wanfala “holy secret.”—Romans 16:20, 25, 26.
4. Hao nao laen wea Jesus kam from hem help for showimaot wei wea hem datfala promis Seed?
4 Bihaen 2,000 year long history bilong olketa man, Jehovah givim moa information. Hem showimaot hao datfala Seed bae kam thru long famili laen bilong Abraham. (Genesis 22:15-18) Bat, laen wea lead go long Seed bae no depend long laen bilong man bat long man wea God chusim. Nomata Abraham lovem son bilong hem Ishmael, wea born long Hagar, Jehovah sei: “Mi bae startim covenant bilong mi witim Isaac, wea Sarah bae bornem from iu.” (Genesis 17:18-21) Bihaen, hem strongim moa datfala covenant, no long Esau, firstborn son bilong Isaac, bat long Jacob, wea 12-fala tribe bilong Israel kamaot from hem. (Genesis 28:10-14) Gogo, hem klia hao datfala Seed bae born long tribe bilong Judah, long laen bilong David.—Genesis 49:10; 1 Chronicles 17:3, 4, 11-14.
5. Taem Jesus startim ministry bilong hem long earth, wanem nao showimaot klia hao hem Messiah?
5 Wanem moa samfala nara samting wea showimaot hu nao datfala Seed? Winim 700 year bifor hem happen, Bible sei Bethlehem nao ples wea datfala promis Seed bae born olsem man. Hem sei tu hao datfala Seed hem laef start kam “from taem bifor kam,” from taem wea God creatim hem long heven. (Micah 5:2) Barava taem wea hem bae kam long earth olsem Messiah hem showaot thru long profet Daniel. (Daniel 9:24-26) And taem Jesus kasem anointing witim holy spirit, and kamap Anointed Wan bilong Jehovah, voice bilong God from heven talemaot klia hao hem Son bilong Hem. (Matthew 3:16, 17) Datfala Seed hem showaot klia nao! Dastawe Philip hem sure taem hem sei: “Mifala faendem finis datwan wea Moses, insaed long Law, and olketa Profet raet abaot, Jesus.”—John 1:45.
6. (a) Olsem Luke 24:27 hem talem, wanem nao olketa follower bilong Jesus luksavve long hem? (b) Hu nao main part bilong ‘seed bilong woman,’ and wei wea hem bae givim kill long hed bilong snek hem minim wanem?
6 Bihaen datfala taem, olketa follower bilong Jesus luksavve hao planti profesi wea point go long hem stap insaed olketa holy Scripture. (Luke 24:27) Hem kamap moa klia hao Jesus hem main part bilong ‘seed bilong woman,’ datwan wea bae givim kill long hed bilong snek for finisim Satan evribit. Thru long Jesus, evri promis bilong God for olketa man, evri samting wea iumi luk forward tumas long hem, bae fulfill.—2 Corinthians 1:20.
7. For join witim wei for luksavve long Datwan wea olketa profesi story abaotem, wanem moa hem gud for luksavve long hem?
7 Hao nao wei for savve long diswan shud affectim iumi? Bible story abaotem wanfala eunuch bilong Ethiopia wea readim samfala profesi hia abaotem Man for Baem Bak and Messiah. From hem konfius, hem askem Philip, man wea talemaot gud nius: “Hu nao disfala profet tok abaotem?” Bat datfala eunuch no sei hem inaf nao taem hem kasem ansa. Bihaen hem lisin gud long mining wea Philip talem, datfala man luksavve wei for tinghae long profesi hia minim hem mas duim samting. Hem luksavve hem need for baptaes. (Acts 8:32-38; Isaiah 53:3-9) Waswe, iumi duim sem samting tu?
8. (a) Wei wea Abraham trae for offerim Isaac hem piksarem wanem? (b) Why nao Jehovah talem hao evri nation bae blessim olketa seleva thru long Seed, and hao nao diswan fitim iumi distaem?
8 Tingim tu nambawan story abaotem taem wea Abraham trae for offerim Isaac, only son bilong hem wea Sarah bornem. (Genesis 22:1-18) Datwan hem piksarem wanem Jehovah bae duim—offerim only-born Son bilong hem: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Diswan mekem iumi biliv strong hao long sem wei wea Jehovah givim only-born Son bilong hem for fulfillim purpose bilong Hem, bae Hem “givim tu evri nara samting.” (Romans 8:32) Wanem nao iumi needim? Olsem Genesis 22:18 hem talem, Jehovah talem Abraham hao evri nation bae blessim olketa seleva thru long Seed, “bikos [Abraham] lisin long voice bilong [God].” Iumi tu need for lisin long Jehovah and Son bilong hem: “Man wea showimaot faith long Son hem garem laef olowe; man wea no obeyim Son bae no lukim laef, bat kros bilong God stap long hem.”—John 3:36.
9. From iumi tinghae long wei wea sakrifaes bilong Jesus hem openem wei for kasem laef olowe, wanem nao bae iumi duim?
9 From sakrifaes bilong Jesus hem openem wei for kasem laef olowe, iumi shud tinghae long hem and bae iumi want for duim olketa samting wea Jehovah talem long iumi thru long Jesus. Olketa hia join witim love bilong iumi for God and neiba bilong iumi. (Matthew 22:37-39) Jesus showimaot hao love bilong iumi for Jehovah bae muvim iumi for teachim nara pipol “for duim evri samting wea [Jesus] komandim long [iumi].” (Matthew 28:19, 20) And iumi want for sharem datfala love witim olketa nara servant bilong Jehovah taem iumi “hipap tugeta” evritaem witim olketa. (Hebrews 10:25; Galatians 6:10) And tu, taem iumi lisin long God and Son bilong hem, iumi shud no ting tufala sei iumi mas perfect. Hebrews 4:15 sei Jesus, olsem Hae Priest bilong iumi, savve “feel sorre long olketa wik point bilong iumi.” Datwan barava givim iumi comfort, especially taem iumi prea long God thru long Christ for winim olketa wik point bilong iumi!—Matthew 6:12.
Showimaot Faith Long Christ
10. Why nao no eni wei for kasem salvation stap bat only thru long Jesus Christ nomoa?
10 Bihaen hem talemaot long hae kot bilong olketa Jew long Jerusalem hao planti profesi long Bible fulfill long Jesus, aposol Peter talem strong olketa toktok hia: “Salvation no kam thru long eni narawan, from no eni nem moa stap anda long heven midol long olketa man wea mekem wei for iumi sev.” (Acts 4:12) From evri pikinini bilong Adam sin, dae bilong olketa no fit for provaedem ransom for eniwan. Bat Jesus hem perfect, and laef bilong hem, hem fit for olsem sakrifaes. (Psalm 49:6-9; Hebrews 2:9) Hem offerim long God wanfala ransom wea fitim evribit datfala perfect laef wea Adam lusim. (1 Timothy 2:5, 6) Diswan openem wei for iumi kasem laef olowe insaed niu world bilong God.
11. Explainim hao sakrifaes bilong Jesus savve barava helpem iumi.
11 Nomata long distaem, ransom hem openem wei for iumi kasem olketa nara gudfala samting tu. Olsem example, nomata iumi olketa sinner, sakrifaes bilong Jesus openem wei for iumi garem klinfala conscience bikos olketa sin bilong iumi kasem forgiveness. Diswan hem winim samting wea olketa Israelite kasem from sakrifaes bilong olketa animal wea Law bilong Moses askem. (Acts 13:38, 39; Hebrews 9:13, 14; 10:22) Nomata olsem, wei for kasem forgiveness hem depend long wei wea iumi luksavve haomas iumi barava needim sakrifaes bilong Christ: “Sapos iumi sei: ‘Iumi no garem sin,’ iumi laea long iumiseleva and truth hem no stap insaed long iumi. Sapos iumi talemaot olketa sin bilong iumi, [God] nao faithful and raeteous for forgivim olketa sin bilong iumi and klinim iumi from evri samting wea no raeteous.”—1 John 1:8, 9.
12. Why nao wei for baptaes long wata hem important saed long wei for kasem gudfala conscience front long God?
12 Hao nao olketa sinner savve showimaot faith long Christ and sakrifaes bilong hem? Taem pipol long first century kamap olketa wea biliv, olketa showimaot datwan long pablik. Long wanem wei? Olketa baptaes. Why? Bikos Jesus komandim evri disaepol bilong hem for baptaes. (Matthew 28:19, 20; Acts 8:12; 18:8) Man bae no hol bak taem loving present wea Jehovah givim thru long Jesus hem muvim heart bilong hem. Hem bae duim eni change wea hem mas duim insaed laef bilong hem, dedicatem hemseleva long God insaed long prea, and showimaot dedication bilong hem taem hem baptaes long wata. Taem hem showimaot faith olsem nao hem “askem God for wanfala klinfala conscience.”—1 Peter 3:21.
13. Sapos iumi luksavve iumi duim wanfala sin, wanem nao iumi mas duim abaotem, and why nao olsem?
13 Tru, nomata bihaen iumi duim diswan, iumi bae still garem olketa fasin bilong sin. Sapos olsem bae waswe? Aposol John sei: “Mi raetem evri samting hia long iufala mekem iufala no duim sin. Bat, sapos eniwan duim wanfala sin, iumi garem wanfala for helpem iumi witim Father, Jesus Christ, datwan wea raeteous. And hem wanfala sakrifaes wea kavarem sin bilong iumi.” (1 John 2:1, 2) Waswe, diswan minim nomata wanem samting iumi duim, sapos iumi prea long God for forgivim iumi, evri samting bae olraet? Maet nomoa. Key for kasem forgiveness hem trufala wei for repent. Maet iumi needim help tu from olketa insaed Christian kongregeson wea garem moa savve. Iumi mas luksavve hao samting wea iumi duim hem rong and feel sorre evribit abaotem nogud samting wea iumi duim hia and stap klia long wei for duim moa. (Acts 3:19; James 5:13-16) Sapos iumi duim diswan, iumi sure Jesus bae helpem iumi and iumi bae kasem bak wei wea Jehovah appruvim iumi.
14. (a) Explainim wanfala important wei wea sakrifaes bilong Jesus hem helpem iumi. (b) Sapos iumi really garem faith, wanem nao bae iumi duim?
14 Sakrifaes bilong Jesus openem wei for laef olowe long heven for “smol flock,” datfala mek-tu part bilong seed wea Genesis 3:15 hem storyim. (Luke 12:32; Galatians 3:26-29) Hem openem wei tu for laef olowe long wanfala paradaes earth for planti billion nara pipol. (Psalm 37:29; Revelation 20:11, 12; 21:3, 4) Laef olowe hem “present wea God givim . . . thru long Christ Jesus Lord bilong iumi.” (Romans 6:23; Ephesians 2:8-10) Sapos iumi garem faith long datfala present and tinghae long wei wea iumi kasem, bae iumi showimaot diswan. Wei for luksavve long nambawan wei wea Jehovah iusim Jesus for duim will bilong Hem and hao important nao for iumi evriwan mas followim gud step bilong Jesus, iumi bae mekem Christian ministry wanfala barava important waka long living bilong iumi. Faith bilong iumi bae showaot klia long wei wea iumi strong for talem nara pipol abaotem disfala nambawan present from God.—Acts 20:24.
15. Hao nao wei for garem faith long Jesus Christ hem mekem wan mind kamap?
15 Diskaen faith mekem nambawan wei for wan mind hem kamap! Thru long diswan, iumi kamap moa klos long Jehovah, Son bilong hem, and long olketa narawan insaed long Christian kongregeson. (1 John 3:23, 24) Iumi barava hapi from Jehovah kaen tumas for givim Son bilong hem datfala “nem wea winim evri narafala nem [bat no winim nem bilong God], so long nem bilong Jesus evri knee mas bend, olketa long heven and olketa long earth and olketa andanit long graon, and evri tongue mas talemaot Jesus Christ nao hem Lord for givim glory long God wea hem Father.”—Philippians 2:9-11.
Review
• Taem Messiah hem kam, why nao olketa wea barava biliv long Word bilong God luksavve long hem?
• Wanem nao samfala samting wea iumi shud duim for showimaot wei wea iumi tinghae long sakrifaes bilong Jesus?
• Wanem nao olketa wei wea sakrifaes bilong Jesus helpem iumi kam kasem distaem? Hao nao diswan helpem iumi taem iumi prea long Jehovah for forgivim olketa sin?
[Piksa long page 36]
Jesus talem olketa follower bilong hem for teachim nara pipol for obeyim olketa komandment bilong God