Protectim Iuseleva From Olketa Rabis Spirit
JAMES hem big kam long wanfala vilij long Malaita, wanfala island long Solomon Islands. Start taem hem young, olketa lanem hem for tinghae long olketa spirit. Hem sei: “No enitaem mi ting for askem olketa spirit for spoelem eniwan, bat mi tingse, for mekem mi hapi mi mas iusim rarafono [kastom biliv for askem help bilong olketa spirit] for protectim mi from eni nogud samting.”
Olsem staka nara ples long world, pipol long Solomon Islands bilivim hao olketa spirit savve helpem or spoelem man. For tok stret, staka Melanesian pipol laekem olketa spirit, wea olketa tingse savve helpem olketa, and olketa no fraetem.
Olketa showimaot biliv bilong olketa abaotem olketa spirit long staka difren wei. Tingim hao taem James hem young, olketa woman long vilij bilong hem savve ranawe witim olketa pikinini insaed haos taem olketa herem korokoro bird hem krae. Why nao olsem? Olketa bilivim hao taem bird hia hem krae, hem minim nogud samting bae kasem eniwan.
Samfala long vilij savve putim wanfala spesol white ston antap door long haos bilong olketa. James duim datwan bikos hem tingse datfala ston bae protectim hem from olketa nogud spirit. And taem James kaikai long ples wea hem waka, hem savve pikimap leftova kaikai bilong hem mekem hemseleva nao torowem. Hem duim olsem nogud nao eni magic man faendem olketa leftova kaikai hia and iusim for askem olketa spirit for mekem hem sik.
Maet long ples bilong iu, iu no duim samting wea barava semsem olsem, bat olsem James, maet iu tingse iu mas iusim olketa kastom biliv for protectim iu from olketa rabis spirit. Bat maet iu bilivim hao, for iu stap gud, iu mas iusim kastom samting nao.
Sapos iu tinghae long Bible, iu bae laek for savve wanem Bible talem abaotem olketa kwestin hia: (1) Hao nao olketa rabis spirit savve spoelem mi? (2) Waswe, wei for followim olketa kastom biliv savve helpem olketa rabis spirit for spoelem mi? (3) Wea nao mi savve hapi and stap sef from olketa rabis spirit?
Wanem Olketa Rabis Spirit Duim for Spoelem Man
Bible showimaot hao olketa rabis spirit hem no spirit bilong olketa man wea dae. Bible hem sei: “Olketa wea laef savve olketa bae dae; bat olketa wea dae finis no savve long eni samting.” (Ecclesiastes 9:5) For tok stret, olketa rabis spirit hem olketa bighed angel wea joinim Satan for leadim pipol go rong.—Revelation 12:9.
Bible talem stret hao iumi mas keakea long olketa rabis spirit. Aposol Paul raet olsem long olketa Christian long Ephesus: “Iumi insaed wanfala faet, wea iumi no faetem man, bat iumi faetem . . . olketa rabis spirit wea stap long ples bilong olketa.” Aposol Peter storyim man wea rulim olketa rabis spirit Satan datfala Devil olsem “wanfala lion wea singaot bigfala, from hem lukaotem eniwan for hem kaikaim.”—Ephesians 6:12; 1 Peter 5:8.
Main wei wea Satan spoelem pipol nao hem wei wea hem leadim, trikim or traem pipol for duim samting wea God barava no hapi long hem. Bible talem hao Satan “gohed for changem hemseleva for kamap wanfala angel bilong laet.” (2 Corinthians 11:14) Plan bilong Satan hem rabis nomoa, bat hem laek mekem iumi tingse hem spirit wea bae protectim iumi. Satan mekem pipol for no luksavve long tru samting abaotem hem and tru samting abaotem God. (2 Corinthians 4:4) Why nao Satan laek for leadim pipol go rong?
Satan laekem pipol for worshipim hem nomata olketa savve olketa duim datwan or nomoa. Taem Son bilong God Jesus stap long earth, Satan laekem hem for “baodaon and worshipim” hem. Jesus sei long hem: “Iu go nao Satan! Olketa Holy Raeting talem finis, ‘Iu mas baodaon long God bilong iu Jehovah.’ ” (Matthew 4:9, 10) Jesus les for duim eni samting wea maet luk olsem hem worshipim Satan.
Jehovah hem spirit wea strong winim evri nara spirit, and hem bae no letem eni samting for spoelem for olowe olketa wea obeyim hem. (Psalm 83:18; Romans 16:20) Bat for iumi mekem Jehovah hapi olsem Jesus duim, iumi mas no duim eni samting wea luk olsem iumi worshipim Satan and olketa demon bilong hem. Fitim datwan, iumi mas luksavve long olketa kastom biliv wea mekem pipol worshipim olketa rabis spirit. Hao nao iumi savve duim datwan?
Luksavve Long Olketa Kastom wea God No Hapi Long Hem
Jehovah God warnim pipol bilong hem long Israel bifor for no followim olketa kastom biliv bilong olketa kantri wea stap klosap. Hem sei: ‘No eniwan shud stap midolwan long iufala wea talem wanem bae kamap bihaen, wea iusim magic, wea lukaotem saen, wea iusim green leaf long nara pipol.’ Bible talem olsem abaotem olketa wea followim olketa kastom biliv: “Jehovah barava heitim evriwan wea duim olketa samting hia.”—Deuteronomy 18:10-12.
So taem iu ting raonem olketa kastom long ples bilong iu, tingim olketa kwestin hia: Waswe, datfala kastom join witim wei for lukaotem saen? Waswe, datfala kastom savve mekem samfala samting for garem paoa for protectim man? Waswe, datfala kastom minim man mas iusim green leaf? Waswe, man mas obeyim wanfala spirit wea difren from Jehovah or datwan wea hem markem, Jesus?—Romans 14:11; Philippians 2:9, 10.
Iumi mas barava againstim eni kastom wea mekem pipol for duim olketa samting hia. Why nao olsem? Aposol Paul talem olsem: ‘Iufala no savve kaikai long tebol bilong Jehovah and tu long tebol bilong olketa demon.’ Hem talem hao olketa wea trae for mekem God and olketa nara spirit hapi bae “mekem Jehovah for jealous.” (1 Corinthians 10:20-22) Jehovah God laekem iumi for worshipim hem nomoa and hem barava fit for kasem datwan.—Exodus 20:4, 5.
Tingim diswan tu: Waswe, datfala kastom mekhae long wei wea man bae no panis for nogud samting wea hem duim? Tingim diswan, Bible barava againstim wei for durong and staka community les long diskaen wei tu. (1 Corinthians 6:9, 10) Bat long samfala ples long Pacific, diskaen wei hem maet olraet nomoa sapos wanfala gele sei samwan iusim “green leaf” long hem, wea datwan nao mekem hem for durong.
Bat Bible talem hao iumi evriwan bae panis for nogud samting wea iumi duim. (Romans 14:12; Galatians 6:7) Tingim hao Satan laea long firstfala woman Eve for mekem hem no obeyim God taem Eve sei: “Snek ia nao trikim mi mekem mi kaikaim.” Bat Jehovah panisim Eve for samting wea hem duim. (Genesis 3:13, 16, 19) God bae panisim iumi tu sapos iumi duim nogud samting.—Hebrews 4:13.
Wanem Nao Iu Mas Duim?
Sapos iumi laek for mekem God hapi and followim wanem Bible talem, iumi need for disaed strong for duim wanem hem stret. Pipol wea stap long Ephesus long first century showimaot nambawan wei for duim datwan. For showimaot olketa nating obeyim olketa rabis spirit, olketa hipimap olketa buk bilong olketa abaotem devildevil and “bonem front long evriwan.”—Acts 19:19.
Bifor olketa bonem olketa buk hia, olketa ‘kam and talemaot long evriwan evri samting wea olketa duim.’ (Acts 19:18) Taem olketa herem Paul preach abaotem Christ, datwan mekem olketa for no bonem olketa buk bilong olketa. Olketa changem tingting bilong olketa tu abaotem olketa kastom bilong olketa.
Hem tru, maet iumi faendem hard for no followim olketa kastom biliv. James wea iumi storyim firstaem, kasem hard taem long diswan. Hem enjoyim wanem hem lanem taem Olketa Jehovah Witness studyim Bible witim hem. Bat hem gohed nomoa for duim rarafono. Taem hem ting raonem why nao hem duim datwan, hem luksavve hao hem bilivim olketa promis bilong Jehovah, bat hem tingse hem mas gohed for trustim rarafono mekem hem no kasem nogud samting.
Wanem nao helpem James for stretem tingting bilong hem? Hem sei: “Mi prea long Jehovah for hem nao protectim mi and helpem mi for trustim hem. And long semtaem mi no followim nao olketa kastom bilong mifala.” Waswe, eni nogud samting spoelem hem? James hem sei: “Nomoa. Evri samting wea happen helpem mi for trustim Jehovah. Mi lukim hao Jehovah savve kamap wanfala gud fren.” And long lastfala seven year, James waka full-taem for lanem pipol abaotem Bible.
Waswe, iu savve duim wanem James duim? Ting raonem olketa kastom long ples bilong iu and ‘barava wei for worshipim God,’ mekem iu luksavve sapos “God hapi long” olketa kastom hia or nomoa. (Romans 12:1, 2) And then iu mas strong for no followim olketa kastom biliv. Sapos iu duim olsem, iu savve trustim hao Jehovah bae ‘acceptim iu’ and protectim iu. (2 Corinthians 6:16-18) Olsem James, disfala promis long Bible bae kamap tru for iu: “Nem bilong Jehovah hem wanfala sef ples. Olketa pipol wea duim stret samting savve go haed long hem.”—Proverbs 18:10.
[Piksa long page 13]
Courtesy of Dr. Bakshi Jehangir
[Piksa long page 13]
“Korokoro”
[Piksa long page 13]
Wanfala gele pikimap leftova kaikai mekem nogud spirit no iusim for spoelem eniwan