Waswe, Iu Tingim Yet?

Waswe, iu lanem gud samting from olketa Wastaoa magasin wea iu readim no longtaem go nomoa? Trae for ansarem olketa kwestin hia:

• Wanem nao iumi savve lanem from wei wea Jesus helpem Peter taem hem sink daon long sea (Matt. 14:​28-​31)

Sapos iumi luksavve faith bilong brata or sista hem no mas strong, iumi savve helpem hem olsem Jesus hem helpem Peter.​—⁠9/15, page 8.

• Wanem nao Jehovah mas duim for sevem iumi?

Nomata Jehovah feel nogud taem hem lukim pipol duim nogud samting long Son bilong hem and tok spoelem hem, hem letem datwan for happen. From Abraham willing for sakrifaesim son bilong hem, datwan piksarem wei wea Jehovah willing for letem pipol killim dae Son bilong hem olsem criminal.​—⁠9/15, page 28-29.

• Wanem nao iumi lanem long Proverbs 24:27 abaotem wei for ‘strongim famili’?

Man wea laek for marit mas redi firstaem and luksavve long waka wea hem mas duim sapos hem marit. Hem mas waka hard for provaedem wanem famili needim and kamap hed long famili for helpem famili worshipim Jehovah.​—⁠10/15, page 12.

• Long wanem wei nao Jehovah and Jesus showimaot gudfala wei for iumi followim?

Nomata Jehovah nao wakem evri samting, hem tingim olketa man and respectim olketa. Taem hem story long Abraham and Moses, hem iusim wanfala Hebrew word wea taem iumi transleitim samfala taem hem minim “plis.” (Gen. 13:14; Ex. 4:⁠6) God herehere tu long wanem olketa man talem. (Gen. 18:​23-​32) Jesus hem olsem tu. Hem laekem tumas for helpem olketa narawan and staka taem hem talem nem bilong olketa.​—⁠11/15, page 25.