No Lusim Olketa Brata and Sista Bilong Iu

JAROSŁAW and waef bilong hem Beataa sei: “For tenfala year, mitufala barava busy long olketa samting saed long bisnis and garem staka material samting. Nomata mitufala growap insaed truth, mitufala isisi lusim Jehovah and feel olsem hem hard nao for fren bak moa witim Jehovah.”

Nara brata wea nem bilong hem Marek sei: “From living and gavman hem change long Poland, mi feel nogud tumas bikos mi no savve faendem waka. Mi fraet for startim wanfala bisnis bikos mi no savve gud hao for ranem. Bat then gogo mi startim wanfala bisnis bikos mi tingse hem bae helpem mi for provaedem wanem famili needim and no spoelem wei wea mi fren witim Jehovah. Bat bihaen mi luksavve tingting bilong mi no stret.”

From price bilong olketa samting distaem hem hae tumas and staka no garem waka, datwan mekem samfala for disaedem samting wea no wise. Samfala brata disaed for waka ovataem, duim tufala waka, or startim bisnis bilong olketa seleva nomata olketa no savve gud hao for ranem. Olketa tingse wei for kasem extra selen bae helpem famili and no spoelem wei wea olketa fren witim Jehovah. Bat nomata man plan gud and tingse wei for duim extra waka bae no spoelem hem, selen long kantri savve kamap moa hard and samting wea iumi no tingim savve seknomoa happen. From datwan, samfala greedy and mekem material samting nao main samting long laef winim wei for worshipim Jehovah.​—Eccl. 9:​11, 12.

Samfala brata and sista busy tumas for kasem olketa samting long world gogo olketa no garem taem for duim study seleva, go long olketa meeting, or duim preaching waka. Diswan spoelem worship bilong olketa and wei wea olketa fren witim Jehovah. Olketa lusim tu nara important samting, hem nao wei for gohed fren witim “olketa wea garem sem biliv.” (Gal. 6:​10) Samfala isisi lusim olketa brata and sista. Tingim wei wea diswan hem serious samting.

Samting wea Iumi Mas Duim for Olketa Brata and Sista

Iumi olketa brata and sista garem staka chance for showimaot iumi lovem each other. (Rom. 13:8) Maet iu lukim samfala long kongregeson ‘krae from olketa needim help.’ (Job 29:12) Maet samfala no garem kaikai or ples for stap. Aposol John storyim samting wea iumi savve duim for helpem olketa. Hem sei: “Sapos man wea garem plande samting hem lukim brata bilong hem needim samting bat hem no laek kaen long hem, datfala man hem nating lovem God.”​—1 John 3:​17.

Maet iu duim samting finis for olketa wea needim help. Nomata olsem, iumi no tingim nomoa for helpem olketa brata long material samting. Samfala maet needim help bikos olketa lonely or wikdaon. Maet olketa tingse olketa no fit for worshipim Jehovah, olketa garem big sik, or samwan wea olketa lovem hem dae. Wanfala samting wea iumi savve duim for encouragem olketa hem for lisin and story witim olketa. Datwan bae helpem olketa saed long feeling and for gohed fren witim Jehovah. (1 Thess. 5:​14) Wei for duim olsem savve strongim love wea iumi garem for olketa brata and sista.

Olketa elder long kongregeson nao main wan wea savve lisin long olketa brata and sista, minim feeling bilong olketa, and iusim Bible for helpem olketa. (Acts 20:28) Taem olketa elder duim datwan, olketa followim example bilong aposol Paul wea ‘lovem tumas’ olketa brata and sista.​—1 Thess. 2:​7, 8.

Bat sapos wanfala Christian lusim kongregeson, bae hem no fit for helpem olketa brata and sista. Tingim, olketa elder tu savve foldaon long wei for laek kasem staka material samting. Wanem nao bae happen long wanfala Christian sapos hem busy tumas for kasem staka material samting?

Wari Tumas Abaotem Living

Olsem iumi storyim finis, wei for waka hard for provaedem wanem famili needim savve mekem iumi wari tumas and spoelem iumi long spiritual wei. (Matt. 13:22) Marek wea iumi storyim finis sei: “Taem bisnis bilong mi brekdaon, mi disaed for go long nara kantri for lukaotem waka wea bae mi kasem gud pei. Firstaem mi go for thrifala month nomoa, then bihaen mi go for nara thrifala month. Evritaem mi savve kam bak long hom for lelebet taem nomoa then mi go bak moa. Datwan spoelem feeling bilong waef bilong mi wea no biliv.”

Samting wea Marek duim no spoelem famili bilong hem nomoa. Hem sei: “Mi waka for staka hour long ples wea hot tumas. Mi waka witim olketa wea savve tok nogud, laek spoelem narawan, and wea raf tumas. Mi barava wikdaon and feel olsem olketa kontrolem mi. From mi no garem taem for lukaftarem miseleva, mi start for tingse hem hard nao for mi helpem narawan.”

Olketa nogud samting wea kasem Marek from hem no disaedem wise samting shud mekem iumi for tingting gud. Nomata sapos iumi tingse wei for muv long nara kantri bae helpem iumi for kasem selen, datwan savve kosim nara problem for kamap. Olsem example, hao nao datwan bae affectim wei wea famili fren witim Jehovah and feeling bilong olketa? Sapos hasband muv long nara ples, waswe, bae datwan spoelem wei wea hem and famili kaban witim olketa long kongregeson? Waswe, bae datwan mekem olketa no fit for helpem olketa brata and sista?​—1 Tim. 3:​2-5.

Bat iumi evriwan savve barava busy long waka nomata iumi go long nara kantri or stap long hom. Tingim Jarosław and Beata. Jarosław sei: “Bihaen mitufala marit, mitufala startim wanfala smol stoa for sellim hot dog wea stap long ples wea staka pipol savve kam for peim. From mitufala kasem big selen, mitufala disaed for mekem datfala bisnis big moa. Mitufala busy tumas, gogo mitufala no savve go long olketa meeting. No longtaem bihaen, mi no pioneer and no ministerial servant nao. From bisnis hem barava gohed gud, mifala openem nara big stoa and joinim bisnis bilong mitufala witim bisnis bilong nara man wea no worshipim Jehovah. Gogo mi start for go ovasea for saenem olketa kontrak wea bae mekem mifala tekem staka million dollar. Staka taem mi no savve stap long haos and mi start for no fren gud witim waef and dota bilong mi. Mifala barava busy long bisnis and datwan mekem mifala no gohed worshipim Jehovah. From mifala no kaban witim olketa long kongregeson, mifala no tingim nao olketa brata and sista.”

Wanem nao iumi lanem from datwan? Wei for laek garem gud living savve kamap trap for wanfala Christian and mekem hem for tingim hemseleva. Maet hem lusim tu “kaleko bilong hem,” wea datwan hem mark bilong tru Christian. (Rev. 16:15) Datwan savve mekem iumi no helpem olketa brata and sista, wea bifor iumi fit for helpem olketa.

Lukluk Gud Long Iuseleva

Maet iumi ting olsem: ‘Hard for kaen samting olsem kasem mi.’ Nomata olsem, hem important for iumi ting raonem haomas samting nao iumi really needim. Aposol Paul sei: “Taem iumi born kam long disfala world iumi no tekem kam eni samting, and taem iumi dae iumi no tekem go eni samting witim iumi tu. So sapos iumi garem kaikai, kaleko, and ples for stap, iumi mas satisfae nomoa witim olketa samting hia.” (1 Tim. 6:​7, 8) Hem tru, maet living long wanfala kantri hem difren from nara kantri. Maet samting wea samwan long rich kantri hem needim, hem samting wea expensive long nara kantri.

Nomata wanem living iumi garem, tingim wanem Paul talem. Hem sei: “Olketa wea laekem tumas for rich bae foldaon long eni samting wea switim olketa and olketa trap. Olketa bae laekem samting wea spoelem man and duim olketa krangge samting. Olketa samting hia bae spoelem olketa and gogo olketa hia bae finis nao.” (1 Tim. 6:9) Man wea putim trap bae haedem datwan mekem animal no lukim and seknomoa hem insaed trap nao. Wanem nao iumi savve duim for no foldaon long trap for “duim olketa krangge samting”?

Wei for luksavve long wanem hem important bae mekem iumi for markem taem for worshipim Jehovah, wea wanfala samting nao hem for duim study seleva. Wei for prea and duim study seleva savve helpem iumi for “barava fit and redi” for helpem narawan.​—2 Tim. 2:​15; 3:​17.

For tu-thri year, olketa elder waka hard for strongim and encouragem Jarosław. Datwan mekem hem for barava changem wanem hem duim. Hem sei: “Wanfala taem wea mi story witim olketa elder, olketa storyim example from Bible abaotem wanfala young man wea rich wea laek for laef olowe bat hem no willing for lusim olketa material samting. Then long kaenfala wei olketa askem mi sapos mi tu olsem datfala rich man. Datwan barava helpem mi for luksavve wanem mi need for changem!”​—Prov. 11:28; Mark 10:17-​22.

Jarosław ting raonem living bilong hem and disaed for lusim datfala big bisnis. Insaed tufala year, hem and famili bilong hem duim samting for fren gud moa witim Jehovah. Distaem hem elder long kongregeson. Jarosław sei: “Taem mi lukim olketa brata busy tumas long bisnis and datwan spoelem wei wea olketa fren witim Jehovah, mi savve storyim experience bilong mi long olketa. Mi duim diswan mekem olketa luksavve hem no wise for join witim olketa wea no biliv. Hem no isi for sei no long olketa chance for kasem moa selen and for honest.”​—2 Cor. 6:​14.

Marek tu lane from nogud samting wea kasem hem. Nomata waka wea hem duim long nara kantri helpem famili saed long selen, datwan spoelem wei wea hem fren witim God and olketa brata and sista long kongregeson. Gogo hem changem tingting bilong hem abaotem wanem hem important. Hem sei: “Long olketa year wea go pas, mi olsem Baruch long bifor wea ‘gohed for lukaotem olketa bigfala samting for hemseleva.’ Gogo mi talem Jehovah evri samting wea stap long heart bilong mi, and evri samting wea mi wari abaotem. Mi feel olsem mi fren gud moa witim Jehovah.” (Jer. 45:​1-5) Distaem Marek garem goal for duim “gud samting,” wea hem nao for kamap elder long kongregeson.​—1 Tim. 3:1.

Marek warnim eniwan wea tingting for go waka long nara kantri olsem: “Taem iu stap long nara kantri, hem isi for foldaon long olketa trap bilong disfala nogud world. From iu no savve long languis bilong datfala ples, datwan savve stopem iu for no story gud witim narawan. Maet iu garem selen taem iu kam bak long hom, bat from iu wikdaon long spiritual saed, maet hem tek longtaem for iu kamap gud moa.”

Taem iumi balancem waka for selen witim waka wea iumi garem for helpem olketa brata and sista, datwan bae mekem Jehovah hapi. And iumi savve showimaot gud example for olketa narawan tu disaedem wise samting. Iumi need for sapotim, lovem, and showimaot gud example long olketa wea wikdaon. Olketa elder long kongregeson and olketa mature Christian savve helpem olketa brata and sista for garem balance tingting and no letem olketa wari long living for spoelem olketa.​—Heb. 13:7.

Iumi mas no enitaem lusim olketa brata and sista bilong iumi bikos iumi busy tumas long waka. (Phil. 1:​10) Bat iumi laek for “tingim God” and mekem Kingdom nao first samting long laef bilong iumi.​—Luke 12:21.

[Footnotes]

[Piksa long page 21]

Waswe, waka bilong iu mekem iu for no attendim olketa meeting?

[Piksa long page 23]

Waswe, iu tinghae long chance wea iu garem for helpem olketa brata and sista?