Hao for “Garem Gudfala Laef”

“GAREM gudfala laef” hem wanfala toktok wea staka laekem tumas for herem! Staka garem chance for kasem big waka and kamap rich and garem bignem. Olketa narawan laek for kasem gud samting long laef bat no kasem datwan.

For garem gudfala laef hem depend long wanem nao main samting wea iu duim. Nara tufala important samting hem hao iu iusim taem and strong bilong iu and sapos iu showimaot iu interest for duim wanfala samting.

Staka Christian luksavve wei for duim samfala samting moa long ministry mekem olketa for hapi. Wei for duim full-taem service helpem plande young wan and olo for kasem gud samting. Nomata olsem, maet samfala tingse wei for duim ministry hem boring and datwan mekem olketa for markem olketa difren goal wea kamap main samting long laef bilong olketa. Why nao maet datwan happen? Wanem nao iu savve duim mekem iu gohed for tingim olketa important samting? And wanem nao iu savve duim mekem iu “garem gudfala laef”?​—Josh. 1:8.

Olketa Nara Samting wea Kamap Bihaen Skul and Wanem Iu Interest Long Hem

Olketa young wan need for garem stretfala tingting abaotem wei for worshipim tru God and for duim olketa nara samting. Olketa wea duim datwan bae kasem gud samting long laef and fitim for iumi praisem olketa.

Bat samfala young wan busy tumas long olketa nara samting wea kamap bihaen skul and busy for duim wanem olketa seleva interest long hem. Maet hem no rong for duim olketa samting olsem. Bat olketa young Christian shud tingim olketa kwestin hia: ‘Haomas taem nao mi iusim for duim olketa nara samting long skul or wea mi laekem? Taem mi duim olketa samting hia witim nara pipol, wanem kaen fasin nao olketa showimaot? Wanem nao maet kamap main samting long laef bilong mi?’ Maet iu luksavve wei for busy long olketa kaen samting olsem savve mekem man for no garem staka taem or strong for duim olketa samting wea bae helpem hem for fren gud witim God. Dastawe iu luksavve hem gud for duim olketa samting wea important.​—Eph. 5:15-17.

Tingim samting wea kasem Wiktor.a Hem sei: “Taem mi 12 year, mi joinim wanfala volleyball club. Gogo, mi winim staka prize. Mi garem chance for garem bignem.” Bat Wiktor start for wari abaotem wei wea datwan affectim spiritual saed bilong hem. Wantaem hem trae for readim Bible bat hem sleep taem hem duim datwan. Wiktor luksavve hem no hapi taem hem duim ministry tu. Hem sei: “Wei for plei sports mekem mi for taed tumas and gogo mi luksavve hem spoelem tu strong wea mi garem for duim olketa spiritual samting. Mi luksavve mi no duim nao olketa samting wea mi fit for duim.”

College and University

Bible talem olketa Christian garem waka for lukaftarem famili and provaedem wanem famili needim long material wei. (1 Tim. 5:8) Bat for duim datwan, waswe, hem minim young wan mas skul long college or long university?

Hem gud for ting raonem diswan. Waswe, wei for go long college or long university bae helpem mi for gohed fren gud witim Jehovah? Tingim disfala example long Bible.

Baruch hem secretary bilong profet Jeremiah. Long wanfala taem, Baruch tingting abaotem nara samting wea hem laek garem winim wei for tingim privilege wea hem garem for worshipim Jehovah. Jehovah luksavve long datwan and hem talem Jeremiah for warnim Baruch. Hem sei: “Iu gohed for lukaotem olketa bigfala samting for iuseleva. No gohed for lukaotem datwan.”​—Jer. 45:5.

Wanem nao “olketa bigfala samting” wea Baruch gohed for lukaotem? Maet hem laek kamap bigman bilong Jew religion. Or maet hem laek for garem staka material samting. Samting wea Baruch laekem showimaot hem no tingim olketa important samting wea helpem hem for fren gud witim Jehovah. (Phil. 1:10) Nomata olsem, Baruch lisin long warning wea Jehovah talem thru long Jeremiah and datwan mekem hem kasem gud samting.​—Jer. 43:6.

Wanem nao iumi lanem? Kaonsel wea Baruch kasem showimaot hem no garem stretfala tingting. Hem lukaotem olketa bigfala samting for hemseleva. Sapos iu fit for lukaftarem iuseleva, maet iu no need for iusim taem, selen, and strong bilong iu for skul moa. Maet iu ting for skul moa bikos iu tingse datwan bae mekem iu hapi or bikos dadi and mami and olketa relative laekem iu for duim.

Tingim Grzegorz wea waka bilong hem nao for raetem olketa program for computer. Hem go skul moa for kasem extra training bikos olketa wea hem waka witim laekem hem for duim datwan. Gogo hem no garem taem for duim olketa spiritual samting. Grzegorz sei: “Evritaem mi wari. Konsens bilong mi pokem mi bikos mi no kasem nao olketa spiritual goal wea mi markem.”

Busy Long Waka for Selen

Bible encouragem olketa Christian for waka hard and for duim gud waka bilong olketa. Aposol Paul sei: “Eni samting wea iufala duim, duim witim full heart and strong bilong iufala. Duim datwan olsem iufala waka for Jehovah and no for olketa man.” (Col. 3:22, 23) Nomata olketa Christian fit for kasem praise for wei wea olketa waka hard, important samting nao hem for olketa fren gud witim God. (Eccl. 12:13) Sapos wanfala Christian busy tumas long waka for selen, datwan savve kamap main samting long laef winim wei for duim olketa spiritual samting.

Wei for busy tumas long waka savve mekem wanfala Christian taed tumas. Datwan savve mekem hem for no gohed strong long spiritual wei and helpem famili. King Solomon luksavve “wei for barava waka hard” hem olsem “man aftarem nomoa wind.” Sapos wanfala Christian busy tumas long waka for selen, datwan bae mekem hem wari and taed tumas. Sapos datwan hem happen, waswe, bae hem “hapi . . . and kasem gud samting from hard waka bilong hem”? (Eccl. 3:12, 13; 4:6) Waswe, bae hem strong for duim waka bilong hem for lukaftarem famili and for duim olketa spiritual samting?

Janusz, wea stap long east Europe, barava busy long gardening bisnis. Hem sei: “Olketa pipol long world barava tinghae long mi bikos mi savve hao for duim samting and savve finisim gud waka wea mi duim. Bat from mi busy tumas long waka, datwan spoelem wei wea mi fren witim Jehovah and mi stop for duim preaching waka. Gogo mi no savve go long olketa meeting. Mi praod tumas and no acceptim kaonsel from olketa elder and gogo mi lusim kongregeson nao.”

Iu Savve Garem Gudfala Laef

Iumi storyim finis thrifala samting wea wanfala Christian maet duim wea savve mekem hem for no gohed fren gud witim Jehovah. Waswe, iu busy long eniwan long olketa samting hia? Sapos olsem, olketa kwestin, scripture, and koment wea narawan talem bae helpem iu for luksavve sapos samting wea iu duim mekem iu for kasem gud samting long laef or nomoa.

Olketa nara samting wea kamap bihaen skul and wanem iu interest long hem: Waswe, iu barava busy long olketa samting hia? Waswe, olketa samting hia mekem iu for no garem taem for duim olketa spiritual samting? Waswe, datwan mekem iu for no interest for kaban witim olketa brata and sista? Sapos olsem, hem gud for followim example bilong King David wea barava askem Jehovah for helpem hem. Hem sei: “Plis iu showim mi wei wea mi mas followim.”​—Ps. 143:8.

Wanfala traveling overseer helpem Wiktor, wea iumi storyim finis. Hem sei long Wiktor: “Story bilong iu showimaot iu barava laek for plei volleyball.” Wiktor sei: “Datwan mekem mi seke fogud. Mi luksavve volleyball kamap main samting long laef bilong mi. Gogo mi stop for kaban witim olketa fren wea mifala savve plei tugeta and mi lukaotem olketa fren long kongregeson.” Distaem Wiktor gohed strong for worshipim Jehovah and helpem olketa long kongregeson. Hem encouragem evriwan olsem: “Askem olketa fren bilong iu, dadi and mami, or olketa elder long kongregeson sapos olketa luksavve olketa samting wea iu duim bihaen skul helpem iu for fren gud witim Jehovah or nomoa.”

Hem gud for talem olketa elder long kongregeson hao iu laek for kasem samfala privilege moa. Waswe, iu fit for helpem olketa olo long kongregeson for duim samfala waka long haos or for go long market? Nomata wanem age iu kasem, maet iu fit for duim full-taem ministry and storyim gud nius long pipol.

College and University: Jesus warnim iumi againstim wei for ‘laek mekhae long iumiseleva.’ (John 7:18) Nomata haomas education nao iu disaed for kasem, waswe, iu “luksavve long olketa samting wea barava important”?​—Phil. 1:9, 10.

Grzegorz, wea waka bilong hem nao for raetem olketa program for computer, changem tu samfala samting long laef bilong hem. Hem sei: “Mi followim advaes wea olketa elder talem, and mekem laef bilong mi simpol. Mi luksavve mi no need for go skul moa. Datwan bae mekem mi for weistim taem and strong bilong mi.” Grzegorz duim staka waka long kongregeson. Gogo hem graduate long Ministerial Training Skul wea distaem hem Bible Skul for Olketa Singol Brata. Tru tumas, Grzegorz “iusim gud taem” bilong hem for lanem staka samting abaotem Jehovah.​—Eph. 5:16.

Waka for selen: Waswe, iu busy tumas long waka wea iu duim, gogo datwan mekem iu for no duim olketa spiritual samting? Waswe, iu garem taem for story gud witim famili bilong iu? And taem iu garem eni part long kongregeson meeting, waswe, iu traem best bilong iu for duim gud datwan? Waswe, iu encouragem olketa narawan taem iu story witim olketa? “Fraet long trufala God and obeyim olketa law bilong hem,” and Jehovah bae blessim iu and iu bae ‘enjoyim gud samting from hard waka bilong iu.’​—Eccl. 2:24; 12:13.

Janusz, wea iumi storyim finis no kasem eni gud samting from gardening bisnis bilong hem. Bisnis bilong hem no gohed. From hem no garem eni selen and garem bigfala kaon, hem prea long Jehovah. Hem duim samting for mekem laef bilong hem kamap gud moa and distaem hem regular pioneer and elder long kongregeson. Hem sei: “Mi satisfae long wanem mi garem and mi iusim strong bilong mi for duim olketa spiritual samting. Datwan mekem mi for garem peace and no wari.”​—Phil. 4:6, 7.

Hem gud for ting raonem wanem nao mekem iu for laek duim wanfala samting and wanem nao main samting long laef bilong iu. Wei for worshipim Jehovah bae mekem iu for kasem gud samting for olowe. Hem gud for mekem datwan kamap main samting long laef bilong iu.

Maet iu need for changem or stop for duim samfala samting mekem iu savve duim samting wea God laekem, “wea hem gudfala and stret and wea hem hapi long hem.” (Rom. 12:2) Bat iu savve “garem gudfala laef” sapos iu gohed for worshipim God witim full soul bilong iu.

[Footnote]

[Box/​Piksa long page 31]

Wanem Nao Iu Savve Duim for Garem Gudfala Laef?

From plande samting savve mekem iu for busy tumas, wanem nao iu savve duim mekem iu tingim evritaem olketa important samting? Hem gud for ting raonem wanem nao mekem iu for duim samting and wanem nao main samting long laef bilong iu. Ting raonem olketa kwestin hia:

OLKETA NARA SAMTING WEA KAMAP BIHAEN SKUL AND WANEM IU INTEREST LONG HEM

▪ Taem iu duim olketa samting hia, hem mekem iu for garem wanem kaen wei?

▪ Haomas taem nao iu iusim for duim olketa samting hia?

▪ Waswe, hem main samting long laef bilong iu?

▪ Waswe, hem mekem iu for no garem taem for duim olketa spiritual samting?

▪ Wanem kaen pipol nao iu kaban witim?

▪ Waswe, iu interest long pipol hia winim olketa brata and sista long kongregeson?

COLLEGE AND UNIVERSITY

▪ Sapos iu fit for lukaftarem iuseleva, waswe, iu need for iusim taem, selen, and strong bilong iu for skul moa?

▪ Waswe, iu mas go long college or university mekem iu garem waka for lukaftarem iuseleva?

▪ Waswe, bae datwan affectim wei wea iu go long olketa meeting?

▪ Waswe, iu luksavve long “olketa samting wea barava important”?

▪ Waswe, iu barava trustim Jehovah bae provaedem wanem iu needim?

WAKA FOR SELEN

▪ Waswe, waka bilong iu mekem iu for ‘hapi and kasem gud samting’?

▪ Waswe, waka bilong iu mekem iu taed tumas gogo iu no strong for duim waka bilong iu long famili and olketa spiritual samting?

▪ Waswe, iu markem taem for story gud witim famili?

▪ Waswe, iu busy tumas long waka gogo iu no garem taem for duim olketa spiritual samting?

▪ Waswe, waka bilong iu mekem iu for no duim gud olketa tok wea iu garem long meeting?

[Piksa long page 30]

Jehovah warnim Baruch for no lukaotem olketa bigfala samting for hemseleva