Kwestin From Reader

Waswe, hem fitim for iumi savve haomas profesi abaotem Messiah nao stap long Hebrew Scripture?

Taem iumi studyim gud Hebrew Scripture, datwan helpem iumi for luksavve long staka profesi wea kamap tru long Jesus Christ. Olketa profesi hia storyim famili wea Messiah bae kam from, taem wea hem bae kamap Messiah, wanem hem bae duim, wanem pipol bae duim long hem, and wanem Jehovah God laekem hem for duim. Evri profesi hia helpem iumi for luksavve Jesus nao Messiah. Bat iumi need for careful sapos iumi laek for barava savve haomas profesi abaotem Messiah nao stap long Hebrew Scripture.

Samfala pipol sei samfala scripture profesi abaotem Messiah, bat olketa narawan no agree long datwan. Long buk The Life and Times of Jesus the Messiah, wea Alfred Edersheim raetem, hem sei raeting bilong olketa Jew bifor sei 456 scripture long Hebrew Scripture hem abaotem Messiah, nomata staka scripture hia no storyim Messiah. Staka pipol kwestinim 456 scripture hia bikos olketa tingse samfala no profesi abaotem Jesus Christ. Olsem example, Alfred Edersheim sei long tingting bilong olketa Jew, Genesis 8:11 hem abaotem Messiah. Olketa Jew sei “leaf bilong olive tree wea kurukuru tekem hem from Maunten bilong Messiah.” Alfred Edersheim storyim tu Exodus 12:42. Olketa Jew minim rong datfala scripture. Olketa tingse “olsem Moses kamaot from desert, Messiah bae kamaot from Rome.” Staka savveman and olketa narawan hard for bilivim wei wea pipol explainim tufala scripture hia hem abaotem Jesus Christ.

Sapos iumi ting raonem olketa profesi wea kamap tru long Jesus Christ, bae hard for iumi savve long barava namba bilong evri profesi. Tingim Isaiah chapter 53, wea storyim staka samting abaotem Messiah. Isaiah 53:2-7 sei: “Hem no luk spesol . . . Olketa man heitim hem and les long hem . . . Hem finisim olketa sik bilong iumi . . . Olketa spiarim hem for sin bilong iumi . . . Olketa tekem hem go for busarem hem olsem wanfala sheepsheep.” So waswe, iumi shud ting long evri toktok long Isaiah chapter 53 olsem wanfala profesi nomoa or staka profesi?

Tingim tu Isaiah 11:1 wea sei: “Wanfala niu branch bae grow from rut bilong Jesse, and from rut bilong hem wanfala sut bae garem staka frut.” Verse 10 talem sem samting. So waswe, iumi savve sei tufala scripture hia hem tufala profesi or wanfala profesi nomoa wea olketa talem tufala taem? Samting wea Isaiah chapter 53 and Isaiah chapter 11 storyim showimaot hem no isi for savve long barava namba bilong olketa profesi abaotem Messiah.

So hem no important for iumi savve haomas profesi abaotem Messiah nao stap long Hebrew Scripture. Staka buk bilong iumi garem olketa list wea storyim olketa profesi abaotem Jesus and hao olketa profesi kamap tru.a Iumi savve iusim information long olketa list hia taem iumi duim study seleva, famili study, and preaching waka. Disfala information savve strongim faith bilong iumi hao Jesus nao Messiah.

[Footnote]