Jehu Strong for Sapotim Tru Worship
JEHU strong for sapotim tru worship. Hem showimaot olketa gudfala wei wea iumi savve followim. Taem hem savve long samting wea hem mas duim, hem duim datwan stretawe. Jehu no fraet, hem waka hard, and hem nating givap.
Long taem bilong Jehu, olketa Israelite kasem nogud samting. Bihaen Ahab dae, son bilong hem Jehoram kamap king. Nomata olsem, mami bilong hem Jezebel nao kontrolem evri samting. Jezebel laekem pipol for worshipim Baal winim wei for worshipim Jehovah. Hem killim dae olketa profet bilong God and mekem olketa Israelite for worshipim idol and for duim samting wea join witim devildevil. (2 Ki. 9:22; 1 Ki. 18:4, 13) Jehovah sei evriwan long famili bilong Ahab bae dae. Datwan minim Jehoram and Jezebel tu. Jehu nao main wan wea Jehovah markem for killim olketa dae.
Bible sei Jehu hem wanfala bigman bilong army bilong Israel and luk olsem hem nao komanda. Long wanfala day, hem story witim olketa nara bigman bilong army. Long datfala taem olketa Israelite faetem pipol long Syria long Ramoth-gilead. Profet Elisha sendem wanfala young profet for go long Jehu and anointim hem for kamap king. Datfala young profet talem Jehu for killim dae evri man long famili bilong Ahab from olketa apostate.—2 Ki. 8:28; 9:1-10.
Taem olketa bigman hia askem Jehu why datfala profet hem kam, Jehu no laek talem olketa. Bat olketa gohed for askem Jehu so hem talem olketa. Jehu and olketa bigman hia mekem plan for killim dae Jehoram. (2 Ki. 9:11-14) Luk olsem olketa bigman hia againstim Ahab and Jezebel. Nomata olketa bigman hia sapotim Jehu, Jehu barava ting raonem wanem nao best samting for hem duim.
Long datfala taem, King Jehoram stap long Jezreel bikos hem garekil taem hem faetem king bilong Syria. Jehu luksavve for mekem plan bilong hem gohed gud, no eniwan long Jezreel mas savve long datfala plan. Jehu sei long olketa bigman bilong army: “Iufala mas mek sure no eniwan go aot from hia for go talem nius long Jezreel.” (2 Ki. 9:14, 15) Long tingting bilong Jehu maet samfala laek sapotim Jehoram, so hem laek for mek sure no eniwan duim datwan.
HEM SPEED NARAWE!
From Jehu laek for mekem olketa long Jezreel seke, hem go insaed chariot and speed go long Jezreel wea stap 72 kilometer from Ramoth-gilead. Taem Jehu go long Jezreel, wanfala security wea stap long taoa lukim Jehu witim “plande soldia bilong hem” olketa kam. (2 Ki. 9:17) Waka wea Jehu duim hem no isi dastawe hem tekem staka soldia for helpem hem.
Datfala security luksavve Jehu nao draevem wanfala long olketa chariot wea kam. So hem singaot olsem: “Hem speed kam olsem wanfala krangge man!” (2 Ki. 9:20) Jehu hem man for draev fast bat long datfala day hem barava speed narawe nao.
King Jehoram sendem tufala man long Jehu bat Jehu les for talem eni nius long tufala. So King Jehoram witim King Ahaziah go long chariot bilong tufala seleva for meetim Jehu. Jehoram ask olsem: “Jehu, iu kam for mek peace?” Bat Jehu tok olsem: “Hao nao mifala savve mek peace? Mami bilong iu gohed for durong and duim staka samting wea join witim devildevil!” Jehoram seke long datwan and trae for ranawe. Bat Jehu kwiktaem tekem bow and sutim Jehoram. Arrow hia go thru long heart bilong Jehoram and Jehoram foldaon insaed chariot and dae. Nomata Ahaziah ranawe, Jehu faendem hem bihaen and killim hem dae tu.—2 Ki. 9:22-24, 27.
Bihaen datwan, Jehu go for killim dae rabis queen, Jezebel. Jehovah talem finis hem bae panisim Jezebel. Taem Jehu kasem Jezreel, hem lukim Jezebel lukluk kam daon from window long haos bilong hem. Semtaem nomoa Jehu talem olketa bigman bilong kot for torowem kam daon Jezebel. Then Jehu draevem chariot bilong hem go antap long hem. Bihaen datwan, Jehu killim dae tu olketa narawan long famili bilong Ahab.—2 Ki. 9:30-34; 10:1-14.
Wei for raf and killim man dae hem samting wea iumi no laekem. Bat iumi savve long bifor, Jehovah iusim olketa wea worshipim hem for panisim pipol wea againstim hem. Bible sei: “Jehovah mekem Ahaziah for kasem trabol. Taem Ahaziah stap witim Jehoram, tufala go aot for meetim Jehu. God chusim Jehu wea hem granson bilong Nimshi for finisim evriwan long famili bilong Ahab.” (2 Chron. 22:7) Jehu talem olketa for torowem body bilong Jehoram aot from chariot. Hem luksavve datwan mekem toktok bilong Jehovah kamap tru. Jehovah promisim hao bae hem panisim Ahab bikos hem killim dae Naboth. Bible sei tu God chusim Jehu for “changem bak nogud samting long Jezebel bikos hem killim dae olketa wakaman bilong [God].”—2 Ki. 9:7, 25, 26; 1 Ki. 21:17-19.
Olketa wea worshipim Jehovah distaem no killim pipol wea againstim Jehovah. God sei: “Mi nao bae changem bak nogud samting.” (Heb. 10:30) Nomata olsem, olketa elder long kongregeson mas followim example bilong Jehu and no fraet for aotem pipol wea duim nogud samting from kongregeson. (1 Cor. 5:9-13) And evriwan long kongregeson mas disaed strong for no kaban and no story witim olketa wea disfellowship.—2 John 9-11.
JEHU AGAINSTIM OLKETA WEA NO FAITHFUL LONG JEHOVAH
Samting wea Jehu talem long Jehonadab helpem iumi for luksavve why hem gohed strong for duim waka bilong hem. Hem sei: “Sapos iu kam witim mi, bae iu lukim mi strong for againstim olketa wea no faithful long Jehovah.” Jehonadab willing for go witim Jehu long chariot bilong hem and tufala go long Samaria. Taem tufala kasem long there, Jehu “trikim olketa wea worshipim Baal bikos hem plan for killim dae evriwan.”—2 Ki. 10:15-17, 19.
Jehu talem evriwan hao hem bae mekem “bigfala sakrifaes for Baal.” (2 Ki. 10:18, 19) Wanfala savveman sei Jehu hem kleva tumas. Hem sei Jehu iusim word “sakrifaes” wea savve minim tu for “killim dae” olketa apostate. From Jehu laekem evriwan for kam, hem mekem olketa hipap long haos bilong olketa for worshipim Baal and talem olketa for werem spesol kaleko tu. “Taem hem mekem sakrifaes hia finis,” Jehu talem 80-fala man bilong hem for killim dae evriwan wea worshipim Baal. Then hem brekem daon haos bilong olketa for worshipim Baal and hem mekem ples hia kamap ples for toilet.—2 Ki. 10:20-27.
Nomata Jehu killim dae staka man, Bible sei hem no fraet for mekem olketa Israelite kamap free from olketa nogud samting wea Jezebel and famili bilong hem duim. No eni leader long Israel savve duim datwan sapos hem no strong and no fraet. Wanfala Bible dictionary sei hem no isi for duim datfala waka bat leader wea duim datwan hem nating givap and hem duim evri samting wea hem mas duim. Sapos hem no strong for duim kaen samting olsem, bae hem hard for stopem pipol long Israel for no worshipim Baal.
Iumi luksavve for olketa Christian winim hard taem wea kasem olketa, olketa need for garem olketa wei olsem Jehu. Olsem example, sapos iumi kasem test for duim samting wea Jehovah no laekem, iumi shud disaed strong for duim stret samting and no fraet. Iumi mas no letem eni samting spoelem wei wea iumi worshipim Jehovah.
TRAEM BEST FOR FOLLOWIM LAW BILONG JEHOVAH
Disfala story garem wanfala warning for iumi tu. Jehu ‘no lusim wei for worshipim olketa buluka wea olketa wakem long gold wea stap long Bethel and Dan.’ (2 Ki. 10:29) Why nao man wea strong for sapotim tru worship acceptim wei for worshipim idol?
Luk olsem Jehu laekem ten tribe kingdom bilong Israel for difren from tufala tribe kingdom bilong Judah, dastawe hem letem olketa long ten tribe for worshipim buluka. Jehu duim tu sem samting wea olketa nara king bifor duim. Datwan showimaot hem no garem faith long Jehovah, wea markem hem for king.
Jehovah praisem Jehu bikos hem ‘duim wanem hem laekem.’ Nomata olsem, Jehu “no followim olketa law bilong Jehovah long full heart bilong hem.” (2 Ki. 10:30, 31) Taem iumi tingim olketa gud samting wea Jehu duim firstaem, maet iumi sorre long samting wea hem duim bihaen. Nomata olsem, iumi lanem wanfala important leson. Iumi mas no ting nating long wei wea iumi fren witim Jehovah. Evriday iumi mas faithful long God. Iumi need for studyim Bible, ting raonem, and prea long Dadi bilong iumi long heven. So iumi mas duim best bilong iumi for gohed followim law bilong Jehovah long full heart bilong iumi.—1 Cor. 10:12.
[Box long page 4]
Samting wea History Talem Abaotem Jehu
Olketa savveman kwestinim sapos samting wea Bible talem abaotem pipol bifor hem tru or nomoa. So waswe, eni samting long history pruvim Jehu hem really stap bifor?
Thrifala raeting long Assyria bifor storyim nem bilong datfala king bilong Israel. Wanfala long olketa hem garem piksa and pipol sei hem Jehu or maet wakaman bilong hem taem hem baodaon long King Shalmaneser III bilong Assyria and givim olketa present long hem. Raeting saed long piksa sei: “Present bilong Jehu (Ia-ú-a), son bilong Omri (Hu-um-ri). Hem givim mi silver, gold, wanfala gold saplu-dish, wanfala gold dish wea andanit hem sharp, olketa gold kap, baket, tin, wanfala stik wea king savve iusim, (and) olketa samting wea olketa wakem long timba.” Jehu hem no really “son bilong Omri.” Olketa long Assyria iusim datfala toktok for olketa king bilong Israel wea rul bihaen Omri. Staka pipol savve long Omri bikos hem buildim niu taon for kamap kapitol bilong Israel, wea hem nao Samaria.
Iumi no barava savve sapos samting wea datfala king bilong Assyria talem abaotem wanem Jehu givim hem tru or nomoa. Nomata olsem, hem storyim Jehu thrifala taem. Hem long datfala raeting wea iumi storyim, long wanfala statue bilong Shalmaneser, and long olketa record bilong olketa king bilong Assyria. Olketa raeting hia pruvim Jehu hem man wea stap bifor.