Wei for Jealous Savve Spoelem Tingting Bilong Iumi

Tingim Napoleon Bonaparte, Julius Caesar, and Alexander the Great. Nomata olketa garem paoa and bignem, thrifala hia jealous long narawan. Wei for jealous hem olsem poison wea savve spoelem tingting bilong iumi.

Bertrand Russell wanfala savveman sei: “Napoleon jealous long Caesar, Caesar jealous long Alexander, and luk olsem Alexander jealous long Hercules wea hem wanfala man long kastom story nomoa.” Eniwan savve jealous nomata hem rich, savve tumas hao for duim samting, or garem gudfala laef.

Wei for jealous savve mekem man feel nogud long narawan bikos long wanem narawan garem, wei wea narawan stap gud, wei wea narawan kasem gud samting, or maet hem jealous long olketa nara samting. Man wea jealous laek for garem sem samting wea narawan garem and hem no laekem narawan for garem gud samting.

Hem gud for luksavve long wanem nao savve mekem iumi for jealous and long nogud samting wea savve kamaot from datwan. Hem important for tingim wanem iumi savve duim mekem iumi no jealous.

SAMTING WEA SAVVE MEKEM MAN JEALOUS

Tru tumas, from iumi no perfect iumi savve “jealous.” Bat samfala samting savve mekem datfala feeling kamap strong and mekem man jealous long narawan. (Jas. 4:5) Aposol Paul storyim wanfala samting wea savve mekem man jealous. Hem sei: “Iumi mas no praod, no trae for winim narawan, and no jealous long narawan.” (Gal. 5:26) Wei for laek winim narawan savve mekem man jealous. Cristina wanfala Christian sista, and José wanfala brata, luksavve datwan hem tru.a

Cristina wea regular pioneer sei: “Mi savve jealous long narawan. Mi comparem wanem narawan garem witim wanem mi no garem.” Wanfala taem, Cristina kaikai witim wanfala hasband and waef wea duim circuit waka. Cristina luksavve hem and hasband bilong hem Eric, tufala sem age witim circuit overseer and waef, and bifor olketa evriwan garem assignment wea klosap semsem. Cristina sei: “Hasband bilong mi tu hem elder! So why nao iutufala duim circuit waka bat mitufala nomoa?” Wei for laek winim narawan mekem Cristina jealous and for no luksavve long gudfala waka wea hem and hasband duim. Datwan mekem hem for no hapi.

José laek kamap ministerial servant long kongregeson. Taem olketa narawan kamap ministerial servant bat hem nomoa, datwan mekem hem jealous and feel nogud long chairman bilong olketa elder. José sei: “Wei for jealous mekem mi for heitim datfala brata and tingse hem duim samting wea no stret. Taem man jealous datwan mekem hem for tingim hemseleva nomoa and no tingting stret.”

LANE FROM OLKETA EXAMPLE LONG BIBLE

Staka example long Bible hem olsem warning for iumi. (1 Cor. 10:11) Samfala long olketa example hia helpem iumi luksavve long samting wea savve mekem man jealous and hao datwan olsem poison wea savve spoelem tingting bilong man.

Tingim, Cain wea hem firstborn son bilong Adam and Eve, kros taem Jehovah acceptim sakrifaes bilong Abel and no sakrifaes bilong hem. Cain fit for duim stret samting, bat from hem jealous tumas hem killim dae brata bilong hem. (Gen. 4:4-8) Bible sei Cain “hem followim wei bilong Devil.”—1 John 3:12.

Tenfala brata bilong Joseph jealous long hem bikos hem fren gud witim dadi bilong olketa. Taem Joseph storyim dream bilong hem long olketa brata bilong hem datwan mekem olketa heitim hem moa. Olketa laek for killim hem dae tu. Gogo, olketa salem Joseph for slave long Egypt and laea long dadi bilong olketa for mekem hem tingse Joseph dae nao. (Gen. 37:4-11, 23-28, 31-33) Staka year bihaen, olketa sei: “Nogud samting nao iumi duim long brata bilong iumi Joseph. Nomata hem feel nogud and hem askem iumi for kaen long hem, iumi no lisin.”—Gen. 42:21; 50:15-19.

Tingim, Korah, Dathan, and Abiram. Olketa jealous taem olketa comparem privilege wea olketa garem witim privilege wea Moses and Aaron garem. Olketa accusim Moses and sei hem trae for ‘bossim olketa’ Israelite. (Num. 16:13) Datwan hem no tru. (Num. 11:14, 15) Jehovah nao chusim Moses for leadim olketa Israelite. Bat Korah, Dathan, and Abiram, jealous bikos long waka wea Moses duim. From olketa jealous, Jehovah killim olketa dae.—Ps. 106:16, 17.

King Solomon lukim nogud samting wea kamaot from wei for jealous. Wanfala woman wea baby bilong hem dae trae for trikim nara woman for mekem hem tingse baby bilong hem nao dae. Taem tufala go long King Solomon for stretem datfala problem, woman wea baby bilong hem dae laekem for olketa mas killim dae baby wea laef. Bat Solomon mek sure olketa givim datfala baby wea laef long really mami bilong hem.—1 Ki. 3:16-27.

Nogud samting savve kamaot from wei for jealous. Olketa example hia showimaot wei for jealous savve mekem man for heitim narawan, duim samting wea no stret, and killim man dae. Iumi lanem hao olketa wea no duim eni rong samting nao kasem nogud samting. So wanem nao savve helpem iumi for no jealous?

SAMTING WEA BAE HELPEM IUMI FOR NO JEALOUS

Lovem olketa brata and sista. Aposol Peter talem olketa Christian: “From iufala obeyim olketa tru teaching, iufala mekem laef bilong iufala hem klin, wea bikos long datwan iufala showimaot love for olketa brata wea datfala love hem tru wan. So iufala mas barava lovem iufala evriwan from heart.” (1 Pet. 1:22) Wanem nao hem minim for showimaot love? Aposol Paul sei: “Man wea garem love hem patient and kaen. Hem no savve jealous, or tok praod, and hem no savve tinghae tumas long hemseleva. Hem evritaem showimaot respect, no tingim hemseleva nomoa.” (1 Cor. 13:4, 5) Taem iumi showimaot love, datwan helpem iumi for no jealous. (1 Pet. 2:1) Jonathan no jealous long David bat hem ‘lovem David olsem hem lovem hemseleva.’—1 Sam. 18:1.

Kaban witim pipol wea worshipim Jehovah. Man wea raetem Psalm 73 jealous long pipol wea duim nogud samting bat gohed for garem gudfala living. Nomata olsem, taem hem go long “nambawan holy ples bilong God” datwan helpem hem for no jealous. (Ps. 73:3-5, 17) Wei for kaban witim pipol wea worshipim Jehovah helpem man wea raetem psalm for luksavve long olketa blessing wea hem kasem from hem “fren gud witim God.” (Ps. 73:28) Long sem wei, taem iumi kaban evritaem witim olketa brata and sista long olketa meeting, datwan helpem iumi for luksavve long olketa blessing wea iumi kasem from iumi fren gud witim God.

Traem best for duim gudfala samting. Taem God luksavve long wei wea Cain jealous and heitim Abel, hem talem Cain: “Iu change [and] duim gudfala samting.” (Gen. 4:7) Wanem nao hem minim for wanfala Christian “duim gudfala samting”? Jesus sei: ‘Iumi mas lovem God bilong iumi Jehovah long full heart bilong iumi, long full soul bilong iumi, and long full mind bilong iumi. Iumi mas lovem narawan long sem wei wea iumi lovem iumiseleva.’ (Matt. 22:37-39) Taem iumi worshipim Jehovah and helpem narawan, datwan mekem iumi hapi and helpem iumi for no jealous. Wei for duim gud preaching waka and teachim narawan, hem nambawan wei for worshipim God and helpem narawan. Iumi bae kasem “blessing wea kam from Jehovah” sapos iumi duim datwan.—Prov. 10:22.

“Taem pipol hapi, iufala mas hapi witim olketa.” (Rom. 12:15) Jesus hapi witim olketa disaepol taem olketa duim gud samting long preaching waka. Hem talem tu hao olketa bae duim staka gud samting long preaching waka winim wanem hem duim. (Luke 10:17, 21; John 14:12) From iumi wan mind for worshipim Jehovah, taem wanfala brata or sista kasem gud samting datwan mekem iumi evriwan hapi. (1 Cor. 12:25, 26) Iumi shud hapi and no jealous taem narawan kasem eni privilege long organization bilong Jehovah.

MAS TRAEM BEST FOR NO JEALOUS

Sapos hem wei bilong iumi for jealous, iumi need for traem best for no jealous. Cristina sei: “Hem isi tumas for mi jealous long narawan. Nomata mi no laek for jealous long narawan datfala feeling hem stap, and mi mas traem best for againstim datwan.” José tu mas traem best for no jealous. Hem sei: “Jehovah helpem mi for luksavve long olketa gudfala wei wea chairman bilong olketa elder garem. Wei for fren gud witim God helpem mi tu for no jealous.”

Wei for jealous hem wanfala long “olketa nogud samting wea man laek for duim.” And evri Christian shud traem best for againstim datwan. (Gal. 5:19-21) Bae iumi hapi and mekem Jehovah hapi tu sapos iumi traem best for no jealous.

[Footnote]

[Blurb long page 17]

“Taem pipol hapi, iufala mas hapi witim olketa”