Gohed Strong for Duim Preaching Waka
“Talemaot toktok bilong God. Strong for duim olsem.”—2 TIM. 4:2.
WASWE, IU SAVVE MINIM KAM?
Why nao olketa Christian long first century strong for duim preaching waka?
Wanem nao savve helpem iumi gohed strong for duim preaching waka?
Why nao iumi mas gohed strong for duim preaching waka distaem?
1, 2. Olketa wanem kwestin nao bae iumi storyim?
PIPOL wea garem waka for sevem laef bilong narawan iusim full strong bilong olketa for duim datfala waka. Olsem example, olketa wea garem waka for killim dae fire wea bonem building mas kwiktaem duim datwan bikos laef bilong pipol stap long danger.
2 Iumi wea worshipim Jehovah laek for helpem pipol for stap laef. Dastawe iumi laek for duim gud disfala waka for preachim gud nius abaotem Kingdom. Wanem nao aposol Paul minim taem hem sei: “Talemaot toktok bilong God. Strong for duim olsem”? (2 Tim. 4:2) Wanem nao iumi savve duim for showimaot iumi strong for preach? Why nao iumi mas gohed strong for duim datfala waka?
WHY IUMI MAS GOHED STRONG FOR PREACH
3. Wanem nao bae happen long pipol wea acceptim gud nius? Waswe olketa wea no acceptim?
3 Iumi strong for talemaot gud nius bikos iumi luksavve datwan savve sevem laef bilong pipol. (Rom. 10:13, 14) Bible sei: “Taem mi sei long nogud man: ‘Iu bae dae,’ and hem repent from sin bilong hem and duim stretfala samting, . . . hem bae gohed for stap laef. Hem bae no dae. Mi bae no tingim moa olketa sin wea hem duim bifor.” (Ezek. 33:14-16) Bible sei tu long olketa wea teachim narawan abaotem Kingdom: “Wei for duim olsem bae mekem iu and olketa wea lisin long iu for kasem laef.”—1 Tim. 4:16; Ezek. 3:17-21.
4. Why nao Paul talem Timothy for gohed strong for preach?
4 Paul talem Timothy for gohed strong for preach. Tingim samfala samting wea Paul talem wea savve helpem iumi minim why hem talem datwan. Paul sei: “Talemaot toktok bilong God. Strong for duim olsem nomata taem datwan hem isi or taem hem hard. Stretem olketa brata, warnim olketa, and encouragem olketa. Taem iu duim diswan, iu mas barava patient and teach long gudfala wei. Taem bae kam wea olketa bae no lisin long olketa trufala teaching, bat olketa bae followim tingting bilong olketa seleva, and lukaotem olketa teacher wea talem nomoa samting wea olketa laekem tumas for herem. Olketa bae les for lisin long olketa tru teaching.” (2 Tim. 4:2-4) Jesus talem profesi hao wei for apostate bae kamap. (Matt. 13:24, 25, 38) Timothy mas gohed strong for “talemaot toktok bilong God” and for talemaot insaed long kongregeson tu. Datwan savve helpem olketa Christian for luksavve long olketa laea teaching bilong olketa apostate wea bae kamap long future. Wei wea Timothy strong for duim datwan bae protectim laef bilong olketa Christian. Waswe long taem bilong iumi?
5, 6. Wanem nao samfala teaching wea pipol laekem tumas for herem?
5 Wei for apostate hem big tumas distaem. (2 Thess. 2:3, 8) Wanem nao samfala teaching wea pipol laekem tumas for herem? Plande pipol biliv strong long teaching bilong evolution and traem best for mekem narawan bilivim datfala teaching. Datwan affectim hao olketa ting long God and narawan. Nara teaching wea staka pipol bilivim hem wei wea God no interest long iumi, so iumi no need for duim eni samting for fren witim hem. Why nao staka pipol laekem tumas olketa teaching hia? Bikos olketa teaching hia mekem pipol tingse olketa savve duim nomoa eni samting wea olketa laekem bikos no eniwan stap for judgem olketa. Staka pipol laekem tumas for herem datwan.—Readim Psalm 10:4.
6 Olketa nara teaching stap tu wea pipol laekem tumas for herem. Samfala wea go long church laekem taem olketa bigman long church sei, ‘Nomata iu duim eni samting, God hem lovem iu.’ Pipol hapi taem olketa herem olketa priest and pastor sei olketa ceremony, Mass, olketa celebration bilong religion, and olketa image, savve mekem man kasem blessing from God. Bat olketa pipol hia no luksavve laef bilong olketa stap long danger. (Ps. 115:4-8) Nomata olsem, sapos iumi helpem olketa lanem tru samting long Bible and wekap long spiritual wei, olketa savve kasem gud samting from Kingdom bilong God.
HAO NAO IUMI SAVVE SHOWIMAOT IUMI STRONG FOR PREACH?
7. Wanem nao showimaot iumi gohed strong for duim preaching waka?
7 Taem wanfala gud doctor duim operation bae tingim laef bilong man wea hem operatim and traem best bilong hem for duim gud datfala waka. Iumi showimaot iumi gohed strong for duim preaching waka taem iumi traem best for duim gud datwan long wei for tingim wanem pipol wari abaotem, tingim, and maet interest long hem. From iumi luksavve preaching waka hem important, maet iumi changem schedule bilong iumi mekem iumi savve visitim pipol long taem wea fitim olketa.—Rom. 1:15, 16; 1 Tim. 4:16.
8. From iumi savve world klosap for finis, wanem nao bae iumi duim?
8 Wei for savve hao world klosap for finis bae helpem iumi for markem wanem nao important samting long laef bilong iumi. (Readim Genesis 19:15.) Tingim diswan. Sapos iu go lukim doctor and iu kasem bak test result bilong iu and doctor sei: “Samting wea kasem iu hem serious. Sapos iu no duim eni samting bihaen wan month, sik hia bae spoelem iu.” Wanem nao bae iu duim? Iu bae laekem doctor for talem iu samfala advaes. Then taem iu go bak long haos bae iu ting raonem wanem nao important samting long laef mekem iu duim samting followim wanem doctor talem.
9. Wanem nao showimaot Paul strong for preach taem hem stap long Ephesus?
9 Samting wea Paul talem long olketa elder long Ephesus abaotem preaching waka wea hem duim long Asia showimaot hem strong for preachim gud nius. (Readim Acts 20:18-21.) Long first day wea Paul kasem Asia, hem stretawe preach from haos tu haos. Nara samting, for tufala year “evriday [Paul] preach long skul bilong Tyrannus.” (Acts 19:1, 8-10) Wei wea Paul strong for preach affectim evri samting wea hem duim. Toktok wea Paul talem for mas ‘gohed strong for duim preaching waka’ shud no olsem wanfala hevi for iumi. Nomata olsem, preaching waka shud barava important samting long laef bilong iumi.
10. Wanem gud samting nao iumi kasem from wei wea olketa Bible Student strong for preach?
10 Bifor 1914, wanfala smol grup bilong olketa Bible Student start for preachim gud nius. Olketa showimaot nambawan example long wei for gohed strong for duim datfala waka. Olketa laek preachim gud nius evriwea long world. Nomata tu-thri thousand Bible Student nomoa stap long datfala taem, olketa luksavve hem barava important for gohed strong for duim preaching waka. Olketa pablisim staka sermon long olketa niuspepa and wakem wanfala movie wea garem olketa kala piksa wea olketa kolem long “Photo-Drama of Creation.” Datwan mekem plande million pipol for herem gud nius. From olketa Bible Student gohed strong for preach, datwan mekem staka long iumi for herem gud nius abaotem Kingdom.—Readim Psalm 119:60.
NO LETEM ENI SAMTING SPOELEM WEI WEA IU GOHED STRONG
11. Why nao samfala no gohed strong for preach?
11 Sapos iumi busy long olketa nara samting datwan savve mekem iumi no tinghae long preaching waka. Satan iusim olketa samting long world for mekem iumi busy for aftarem wanem iumiseleva laekem, and no strong for duim wanem Jehovah laekem. (1 Pet. 5:8; 1 John 2:15-17) Samfala wea gohed strong for duim wanem Jehovah laekem bifor, stop for duim datwan. Tingim Demas. Hem waka witim aposol Paul bat gogo hem no tinghae for duim waka bilong Jehovah. Taem Paul kasem hard taem, Demas no encouragem hem bat lusim hem.—Philem. 23, 24; 2 Tim. 4:10.
12. Wanem nao iumi savve duim distaem and long future?
12 Sapos iumi laek for gohed strong for duim preaching waka, iumi mas no busy for duim wanem iumiseleva laekem. Iumi shud traem best for “hol strong long datfala tru laef.” (1 Tim. 6:18, 19) Long future, iumi savve duim staka samting wea iumi laekem taem iumi laef olowe long earth anda long Kingdom bilong God. Bat waka wea iumi garem for helpem narawan sev long Armageddon, hem samting wea iumi bae no duim moa long future.
13. Wanem nao savve helpem iumi for gohed strong long spiritual wei?
13 Staka pipol no savve long Jehovah. So wanem nao savve helpem iumi for gohed strong long spiritual wei? Hem gud for iumi tingim hao taem iumi no savve long Jehovah iumi no garem hope for future. Bat iumi lanem tru samting abaotem Jehovah and Jesus, and datwan mekem iumi garem privilege for teachim tru samting long narawan. (Readim Ephesians 5:14.) Paul sei: “Lukluk gud long samting wea iufala duim, mekem iufala wise and no olsem pipol wea no wise. Iusim gud taem bilong iufala, bikos iumi stap long barava nogud taem.” (Eph. 5:15, 16) From iumi stap long rabis world, hem important for iumi iusim gud taem wea iumi garem for duim olketa samting wea bae helpem iumi fren gud witim Jehovah.
IUMI STAP LONG TAEM WEA BARAVA DIFREN
14-16. Why nao hem important tumas for iumi gohed strong for preach abaotem Kingdom?
14 Hem barava important for gohed strong for duim ministry. Staka samting wea happen start long 1914, mekem olketa Bible profesi kamap tru. (Matt. 24:3-51) Plande samting wea happen mekem laef bilong olketa man stap long danger. Olketa gavman wea garem bigfala paoa long world mekem olketa peace agreement. Nomata olsem, olketa garem samting olsem 2,000 nuclear missile wea maet olketa savve sutim eniwea long world. Samfala bigman sei staka samting for wakem nuclear bomb hem lus. Waswe, samfala terrorist nao tekem olketa samting hia? Samfala pipol sei hem isi nomoa for olketa terrorist startim war wea savve killim dae evriwan long world. Bat samfala nara samting tu mekem laef bilong pipol stap long danger.
15 Wanfala report long 2009 long The Lancet magasin hem sei: “Climate change hem main samting wea savve spoelem health bilong pipol evriwea long world distaem.” Hem sei tu, samting wea kamaot from climate change bae affectim health bilong klosap evri pipol long world and hem mekem olketa stap long danger. Staka ples bae nogud bikos no eni rain, sea hem hae winim bifor, olketa flood, staka sik, cyclone, and olketa war bae kamap bikos pipol short long wanem olketa needim. Tru tumas, olketa war and natural disaster hem mekem evriwan long earth stap long danger.
16 Samfala pipol tingse wei wea nuclear war maet happen bae lead go long olketa samting wea bae mekem profesi wea Jesus talem abaotem olketa last day kamap tru. Bat staka pipol no minim datfala profesi. For staka year finis, iumi lukim saen wea showimaot Christ hem stap and world hem gogo for finis. (Matt. 24:3) Winim enitaem bifor iumi lukim staka samting wea Jesus talem long datfala profesi hem kamap tru. Hem important tumas for pipol luksavve olketa need for fren gud witim God distaem. Preaching waka wea iumi duim nao savve helpem olketa.
17, 18. (a) From lelebet taem nomoa stap, wanem nao iumi mas duim? (b) Wanem nao savve mekem pipol interest for herem message abaotem Kingdom?
17 Lelebet taem nomoa stap for iumi showimaot iumi lovem Jehovah, and for faithful for duim preaching waka wea hem talem iumi for duim distaem. Wanem Paul talem for olketa Christian long Rome barava important for iumi distaem tu. Hem sei: “Iufala savve long disfala taem wea iumi stap long hem. Hem taem for iufala mas wekap, bikos taem wea God bae sevem iumi hem klosap tumas winim taem wea iumi start for biliv.”—Rom. 13:11.
18 Olketa nogud samting wea happen distaem savve mekem samfala pipol for luksavve olketa need for fren gud witim God. Samfala narawan interest for herem message abaotem Kingdom taem olketa luksavve gavman bilong man no savve helpem pipol. Olketa gavman no savve finisim olketa problem saed long selen, wei wea nuclear war savve happen, raf fasin, and wei wea pipol spoelem earth. Olketa narawan interest for herem message abaotem Kingdom bikos olketa kasem problem long famili, olsem sik, divorce, or samwan wea olketa lovem hem dae. So taem iumi duim ministry, iumi savve helpem pipol olsem.
GOHED STRONG FOR PREACH
19, 20. Wanem nao plande Christian duim mekem olketa savve duim moa samting long ministry?
19 Plande Christian changem samfala samting long laef bilong olketa mekem olketa savve duim moa samting long ministry. Tingim wanfala hasband and waef wea stap long Ecuador. Tufala disaed for mekem laef bilong tufala simpol bihaen tufala attendim spesol assembly day long 2006 wea garem theme: “Keepim Eye Bilong Iu Simpol.” Tufala raetem wanfala list long olketa samting wea tufala no needim. Thrifala month bihaen, tufala muv from big haos wea tufala stap long hem and go stap long smol haos nomoa. Tufala salem samfala samting and finisim kaon bilong tufala. No longtaem bihaen, tufala start for auxiliary pioneer and acceptim advaes wea circuit overseer talem for go helpem kongregeson wea garem need.
20 Wanfala brata long America sei: “Taem mi and waef attendim assembly long 2006, mitufala baptaes for 30 year finis. Taem mitufala draev go bak bihaen assembly, mitufala story abaotem hao for followim kaonsel wea mitufala herem for mekem laef simpol.” (Matt. 6:19-22) Tufala garem thrifala haos, olketa naes car, wanfala boat, and wanfala trak wea olsem haos. Tufala luksavve tufala weistim staka taem and strong for kasem staka material samting, so tufala markem goal for duim full-taem ministry. Long 2008, tufala start for regular pioneer witim dota bilong tufala wea regular pioneer finis. Datfala brata sei: “Mitufala hapi tumas for waka witim olketa brata and sista! Mitufala savve helpem kongregeson wea garem need. Wei wea mitufala busy for duim waka bilong Jehovah mekem mitufala fren gud witim hem. Hem wanfala blessing for lukim wei wea pipol hapi taem olketa herem and lanem tru samting long Bible.”
21. Why nao iumi gohed strong for preach?
21 Iumi savve hao klosap nao “God bae judgem and finisim pipol wea no obeyim hem.” (2 Pet. 3:7) From iumi savve long wanem Bible talem, datwan mekem iumi gohed strong for preach abaotem bigfala trabol wea klosap for kam and niu world. Iumi luksavve hem important tumas for gohed talem pipol abaotem hope wea Bible storyim for future. Taem iumi gohed strong for duim preaching waka, iumi showimaot iumi lovem God and narawan.