Taem God Forgivim Man, Waswe, Hem No Tingim Moa Sin Bilong Hem?

ANSA hem ia. Jehovah promisim olketa wea worshipim hem: “Bae mi forgivim olketa long nogud samting wea olketa duim and bae mi no tingim moa sin bilong olketa.” (Jeremiah 31:34) So taem Jehovah forgivim sin bilong olketa wea repent, hem no tingim moa datfala sin. Bat waswe, datwan minim Creator wea wakem universe no savve rememberim nao olketa sin bilong iumi? Toktok bilong Ezekiel helpem iumi for minim hao God savve forgive and no tingim moa sin bilong iumi.—Readim Ezekiel 18:19-22.

Jehovah iusim profet Ezekiel for talemaot judgment message againstim nation bilong Judah wea no faithful. Nation no gohed worshipim Jehovah and olketa raf tumas. Jehovah sei hem bae iusim olketa long Babylon for finisim Jerusalem, kapitol taon bilong Judah. Bat nomata hem talem datfala message, hem givim hope tu long olketa. Man wanwan savve chus for duim gud or nogud samting and each wan bae ansa long God for wanem hem duim.—Verse 19, 20.

Waswe sapos man lusim nogud wei bilong hem and start for duim gud samting? Jehovah sei: “Sapos man wea duim nogud samting hem changem wei bilong hem and repent from olketa sin bilong hem and obeyim evri law bilong mi and duim samting wea stret and raeteous, bae hem gohed laef. Bae hem no dae.” (Verse 21) Tru tumas, Jehovah ‘willing for forgivim’ man wea changem wei bilong hem and repent.—Psalm 86:5.

Waswe long olketa sin bilong hem? Jehovah sei: “Bae mi no tingim moa olketa sin bilong hem.” (Verse 22) Wanem nao datwan minim? Why nao datwan hem spesol samting?

Long Bible, Hebrew word wea iumi transleitim “tingim” no minim nomoa for tingim samting wea happen bifor. Wanfala buk sei: “Plande taem [datfala word] hem minim for duim samting.” So taem Jehovah sei hem “bae no tingim moa” sin bilong olketa wea repent, datwan minim hem bae no duim samting for accusim or panisim olketa for sin wea hem forgivim finis.a

Ezekiel 18:21, 22 barava encouragem iumi hao God savve forgivim iumi. Taem Jehovah forgivim sin bilong iumi, no enitaem moa long future hem bae panisim iumi for datwan. Bat hem torowem olketa sin bilong pipol wea repent bihaen long hem. (Isaiah 38:17) Hem olsem hem rabemaot sin hia.—Acts 3:19.

From iumi evriwan no perfect and sin staka taem, iumi needim God for showimaot mercy long iumi. (Rome 3:23) Jehovah laekem iumi for savve sapos iumi repent from olketa sin bilong iumi, hem willing for forgivim iumi. And taem hem forgivim iumi, hem no tingim moa. No enitaem moa God bae accusim or panisim iumi for sin wea hem forgivim finis. Datwan barava comfortim iumi! From God showimaot mercy olsem, waswe, iu laek for fren gud witim hem?

[Footnote]