Stap Insaed Valley Bilong Jehovah wea Protectim Man

1, 2. Wanem war nao hem klosap for happen, and waswe, bae iumi faet insaed long disfala war?

LONG October 30, 1938, plande million pipol long America herem wanfala program long radio. Long datfala program, olketa man wea act olsem man for reportim nius sei samfala creature from planet Mars olketa kam long Earth and gohed distroem. Plande pipol no savve diswan hem mekap story nomoa. Olketa tingse wanfala really war nao hem start and olketa fraet fogud. Samfala duim olketa difren samting tu for protectim olketa seleva from olketa creature wea olketa tingse bae attakim olketa.

² Distaem wanfala really war hem klosap for happen. Bat staka pipol no redi for datfala war. Datfala war hem Armageddon, wea hem nao war bilong God for finisim disfala nogud world. Diswan hem no story nomoa. Iumi savve disfala war bae happen bikos God talem iumi abaotem diswan insaed long Bible. (Rev. 16:14-16) Bae iumi no faet long disfala war. Jehovah nao bae iusim paoa bilong hem long nambawan wei for sevem iumi.

3. Wanem profesi nao bae iumi storyim, and why nao disfala profesi hem important for iumi distaem?

³ Profesi long Zechariah chapter 14 storyim staka samting abaotem Armageddon. Nomata Zechariah raetem datfala profesi samting olsem 2,500 year go finis, hem barava important for iumi distaem. (Rome 15:4) Hem storyim olketa samting wea happen long pipol bilong God start kam long 1914, long taem wea Christ hem start for rul long heven. Hem storyim tu olketa nambawan samting wea klosap for happen. Datfala profesi hem story abaotem “wanfala valley wea barava big” and “wata wea savve mekem man laef.” (Zech. 14:4, 8) Long disfala study, bae iumi lanem wanem nao datfala valley hem piksarem, and wanem nao pipol bilong Jehovah savve duim mekem olketa savve kasem protection long datfala valley. Bae iumi lanem tu wanem nao datfala wata hem piksarem, and hao iumi savve kasem gudfala samting from wata hia. Diswan bae helpem iumi for luksavve iumi mas drinkim disfala wata, and tu, bae iumi laekem tumas for drinkim datwan. So bae iumi kasem gud samting sapos iumi tingting strong long disfala profesi.—2 Pet. 1:19, 20.

“DAY BILONG JEHOVAH” HEM START

4. (a) Wanem taem nao “day bilong Jehovah” hem start? (b) For plande year bifor 1914, wanem nao olketa anointed Christian preach abaotem, and wanem nao tingting bilong olketa bigman bilong politik and religion abaotem datwan?

⁴ Long start bilong Zechariah chapter 14 hem storyim “day bilong Jehovah.” (Readim Zechariah 14:1, 2.) Wanem nao datfala day? Datfala day hem “day bilong Lord” wea hem start long 1914, taem Jesus kamap King long Kingdom bilong God long heven. (Rev. 1:10; 11:15) For plande year bifor datwan, olketa anointed Christian preach and talem pipol “taem wea olketa kantri rul” bae hem finis long 1914. Olketa talem pipol tu start long datfala taem, olketa trabol wea kamap long world bae worse winim eni narataem. (Luke 21:24) Waswe, “olketa kantri” duim samting for followim datfala warning? Nomoa. Olketa bigman bilong politik and religion mekfani long olketa Christian hia and spoelem olketa. Bat taem olketa duim datwan, really olketa mekfani long Olmaeti God, bikos olketa anointed Christian stand for Kingdom bilong God.—Heb. 12:22, 28.

5, 6. (a) Wanem nao olketa enemy bilong pipol bilong God duim? (b) Hu nao “olketa narawan” long profesi bilong Zechariah?

⁵ Zechariah storyim samting wea olketa enemy bilong pipol bilong God bae duim. Hem sei: “Bae olketa tekovarem datfala taon.” “Datfala taon,” Jerusalem, hem piksarem Kingdom bilong God. Olketa anointed Christian wea stap yet long earth, olketa bilong datfala Kingdom. (Phil. 3:20) Long World War I, “olketa [enemy] tekovarem datfala taon” taem olketa arrestim olketa brata wea garem bigfala responsibility insaed organization bilong Jehovah and putim olketa long prison long Atlanta, Georgia, long America. Olketa enemy hia raf and spoelem olketa anointed Christian, tambuim olketa buk bilong olketa, and trae for stopem preaching waka. Hem olsem olketa enemy “go insaed olketa haos” long datfala taon and “tekem evri samting.”

⁶ Nomata olketa strongfala enemy persecutim pipol bilong God and talem laea story abaotem olketa, olketa no savve finisim tru worship. Staka anointed Christian gohed faithful. Long profesi bilong Zechariah, olketa hia nao “olketa narawan” wea no letem eniwan ‘aotem olketa from datfala taon.’

7. Wanem example nao olketa anointed Christian showimaot for iumi?

⁷ Waswe, olketa enemy stop for persecutim pipol bilong God taem World War I hem finis? Nomoa, datfala persecution hem gohed olsem profesi long Zechariah hem talem. (Rev. 12:17) Olsem example, olketa brata bilong iumi kasem bigfala persecution long World War II. Wei wea olketa anointed Christian faithful long datfala taem hem encouragem iumi distaem for no givap long eni hard taem wea iumi kasem. Maet samfala long famili, long ples iumi waka, or long skul olketa againstim or mekfani long iumi bikos long faith bilong iumi. (1 Pet. 1:6, 7) Nomata wea iumi stap, bae iumi gohed faithful and no fraet long eniwan wea againstim iumi. (Phil. 1:27, 28) Bat hao nao bae iumi stap sef insaed long disfala world wea pipol heitim iumi?—John 15:17-19.

JEHOVAH WAKEM “WANFALA VALLEY WEA BARAVA BIG”

8. (a) Long Bible, samfala taem olketa maunten savve piksarem wanem? (b) Wanem nao “Maunt Olive Tree” hem piksarem?

⁸ Iumi storyim finis “datfala taon” Jerusalem, hem piksarem Kingdom bilong God. So wanem nao datfala “Maunt Olive Tree, wea stap front long Jerusalem” hem piksarem? Wanem nao bae mekem datfala maunten “divaed long midol” and kamap tufala maunten? And why nao Jehovah kolem tufala maunten hia “olketa maunten bilong mi”? (Readim Zechariah 14:3-5.) Long Bible, samfala taem olketa maunten savve piksarem olketa kingdom or gavman. And tu, plande taem Bible sei olketa man savve kasem blessing and protection from maunten bilong God. (Ps. 72:3; Isa. 25:6, 7) So Maunt Olive Tree piksarem rul bilong Jehovah ovarem evri samting wea hem wakem.

9. Taem profesi sei Maunt Olive Tree hem divaed “long midol,” wanem nao datwan minim?

⁹ Datfala profesi sei Maunt Olive Tree hem divaed “long midol” and kamap tufala maunten. Wanem nao diswan hem minim? Hem minim Jehovah wakem narafala gavman for rul wea bae duim wanfala spesol waka. Disfala gavman hem bilong God, and Jesus Christ nao King bilong hem. From disfala gavman hem bilong Jehovah tu, hem kolem tufala maunten hia “olketa maunten bilong mi.”—Zech. 14:4.

10. Wanem nao datfala “valley wea barava big” wea stap midolwan long tufala maunten, hem piksarem?

¹⁰ Taem datfala Maunt Olive Tree hem divaed long midol, and haf hem muv go long north, and nara haf long south, Jehovah hem gohed standap antap long tufala maunten hia. Wanfala leg bilong hem long wanfala maunten and nara leg long nara maunten, and long midol hem “wanfala valley wea barava big.” Wanem nao disfala valley hem piksarem? Hem piksarem wei wea God protectim pipol bilong hem. Olsem pipol savve stap sef insaed wanfala valley midolwan long tufala maunten, pipol bilong Jehovah stap sef anda long rul bilong hem and rul bilong Son bilong hem. Jehovah bae no letem eniwan for finisim tru worship. Wanem taem nao datfala Maunt Olive Tree hem divaed long tufala haf? Datwan hem happen long 1914, taem Jesus start for rul long heven. Datfala profesi sei tu pipol bilong Jehovah bae ranawe go long datfala “valley wea barava big.” Wanem taem nao datwan hem start for happen?

PIPOL BILONG GOD RANAWE GO LONG DATFALA VALLEY!

11, 12. (a) Wanem taem nao pipol bilong God start for ranawe go long datfala valley? (b) Wanem nao showimaot Jehovah protectim pipol bilong hem?

¹¹ Jesus warnim olketa disaepol bilong hem and sei: “Long evri kantri bae olketa heitim iufala bikos iufala olketa disaepol bilong mi.” (Matt. 24:9) Diswan hem start for kamap worse long olketa last day wea start long 1914. Long World War I, olketa enemy barava persecutim olketa anointed Christian, bat olketa no savve finisim tru worship. Long 1919, pipol bilong God kamap free from false religion, wea hem nao Bigfala Babylon. (Rev. 11:11, 12)a Long datfala year nao pipol bilong God start for ranawe go long datfala valley.

¹² Start kam long 1919, Jehovah hem gohed for protectim pipol bilong hem evriwea long world. Staka gavman trae for stopem Olketa Jehovah’s Witness for no preach, and tambuim olketa buk bilong olketa. Long samfala kantri, olketa gohed duim datwan distaem. Bat Jehovah no letem olketa gavman hia for finisim tru worship. Nomata wanem olketa gavman duim, Jehovah bae gohed for iusim bigfala paoa bilong hem for protectim pipol bilong hem.—Deut. 11:2.

13. Wanem nao iumi mas duim mekem iumi stap insaed datfala valley bilong Jehovah wea protectim man, and why nao datwan barava important distaem?

¹³ Sapos iumi gohed faithful long Jehovah, iumi stap insaed valley bilong Jehovah wea protectim man. Hem and Son bilong hem bae no letem eniwan or eni samting stopem iumi for kasem datfala protection. (John 10:28, 29) Jehovah hem laekem tumas for helpem iumi stap anda long rul bilong hem and bilong Son bilong hem. Iumi bae barava needim help bilong hem long bigfala trabol wea klosap for kam. So distaem nao hem important winim enitaem bifor for iumi stap insaed datfala valley bilong Jehovah wea protectim man.

“DAY WEA HEM FAET” HEM START NAO

14, 15. Long datfala day wea Jehovah faetem olketa enemy bilong hem, wanem nao bae happen long olketa wea God no protectim?

¹⁴ Taem disfala nogud world hem gogo for finis, Satan bae gohed attakim pipol bilong God long bigfala wei. Bat klosap nao hem bae last taem wea Satan hem attakim iumi. Long datfala day, Jehovah bae faetem evri enemy bilong pipol bilong hem and finisim olketa. Datwan nao hem “day wea hem faet” wea Zechariah hem story abaotem. Winim eni nara faet bilong hem, datfala faet nao bae showimaot Jehovah hem nambawan man for faet.—Zech. 14:3.

¹⁵ Long datfala day wea Jehovah faetem olketa enemy bilong hem, wanem nao bae happen long olketa wea Jehovah no protectim? Datfala profesi sei olketa bae no kasem “nambawan laet.” Diswan minim God hem no hapi long olketa. Datfala profesi hem sei tu “horse, donkey, camel, and man donkey, and evrikaen animal wea no wild” bae “kamap olsem ice.” Diswan minim olketa weapon and olketa nara samting wea pipol iusim for faet bae kamap iusles nao. Zechariah sei Jehovah bae panisim olketa enemy bilong hem long wei for mekem olketa kasem wanfala “nogud sik.” Eye and tongue bilong olketa bae “kamap rotten.” Iumi no savve sapos diswan hem wanfala really sik, bat iumi savve olketa bae no savve spoelem iumi or tok spoelem God. (Zech. 14:6, 7, 12, 15) “Olketa king long earth and army bilong olketa” bae saed witim Satan. Bat nomata wea olketa stap long earth, bae olketa finis. (Rev. 19:19-21) “Long datfala day, body bilong olketa wea Jehovah killim dae bae stap long evri ples long earth.”—Jer. 25:32, 33.

16. Iumi shud ting raonem olketa wanem kwestin, and wanem nao iumi mas duim long taem bilong datfala big trabol?

¹⁶ Long taem bilong war, staka pipol safa. Nomata olketa wea winim datfala war, olketa safa tu. Maet iumi tu safa long taem bilong datfala big trabol. Maet kaikai hem short. Maet iumi lusim staka samting wea iumi ownim, or maet iumi no garem olketa raet wea iumi garem distaem. So wanem nao bae iumi duim sapos kaen samting olsem kasem iumi? Waswe, bae iumi fraet and seksek? Waswe, bae iumi wikdaon and lus hope nao? Waswe, bae iumi stop for worshipim Jehovah? Long datfala big trabol, iumi mas stap insaed datfala valley wea protectim man. Iumi savve duim olsem taem iumi gohed faithful long Jehovah and trustim hem for protectim iumi.—Readim Habakkuk 3:17, 18.

“WATA WEA SAVVE MEKEM MAN LAEF” BAE RAN KAMAOT

17, 18. (a) Wanem nao datfala “wata wea savve mekem man laef”? (b) Wanem nao “datfala sea long east” and datfala “sea long west” piksarem? (c) Wanem nao iumi disaed strong for duim?

¹⁷ Bihaen Armageddon, “wata wea savve mekem man laef” bae ran kamaot from Kingdom bilong Christ. Wata hia “wea savve mekem man laef” hem piksarem evri samting wea God givim long olketa man mekem olketa savve kasem laef olowe. Long profesi bilong Zechariah datfala “sea long east” hem Dead Sea and hem piksarem pipol wea dae and stap long grev. Datfala “sea long west” hem Mediterranean Sea, wea fulap long fish, and hem piksarem datfala “big crowd” wea no dae long Armageddon. (Readim Zechariah 14:8, 9; Rev. 7:9-15) Tufala sekson hia bae drinkim wata from datfala “river wea wata bilong hem savve mekem man laef.” Datwan bae mekem evriwan long olketa perfect and kasem laef olowe.—Rev. 22:1, 2.

¹⁸ Taem Jehovah finisim disfala nogud world, hem bae protectim iumi and leadim iumi go insaed long raeteous niu world bilong hem. Nomata pipol long evri kantri long world heitim iumi, iumi disaed strong for gohed faithful long Kingdom bilong God and stap insaed datfala valley bilong Jehovah wea protectim man.