Keakea Long Samting wea Heart Hem Laekem

Bible talem disfala warning for iumi: “Olketa nogud tingting wea spoelem man nao kam from heart bilong hem, wea mekem hem durong, steal, killim man dae, duim adultery, greedy, duim olketa barava nogud samting, [and] trikim man.” (Mark 7:21, 22) Tokpiksa heart bilong iumi savve laea long iumi, gogo iumi mek excuse for duim samting wea God no laekem. And maet bihaen iumi duim datwan nomoa iumi just luksavve samting wea iumi duim hem no wise. So wanem nao savve helpem iumi for luksavve long samting wea heart hem laekem bifor iumi duim samting wea no stret?

LUKSAVVE LONG WANEM HEART LAEKEM

Readim Bible evriday and ting raonem.

Aposol Paul sei: “Toktok bilong God hem laef and hem garem paoa and hem sharp winim sword wea sharp long tufala saed. From hem savve kat go deep insaed long man, hem savve showim wanem hem insaed long man and showim aotsaed bilong hem tu.” Toktok bilong God long Bible hem “luksavve tu long tingting bilong [man], and samting wea heart hem laekem.” (Heb. 4:12) Tru nao, wei for readim Bible savve helpem iumi for luksavve wanem nao heart bilong iumi laekem. Hem barava important for readim Bible evriday and ting raonem, mekem iumi savve long tingting bilong Jehovah!

Taem iumi letem Bible for stretem iumi and followim olketa Bible principle datwan bae trainim konsens bilong iumi. (Rome 9:1) Konsens bilong iumi savve helpem iumi for no mek excuse for duim rong samting. And tu, Bible garem olketa example wea savve “warnim iumi.” (1 Cor. 10:11) Sapos iumi lane from olketa example hia, datwan savve stopem iumi for no duim rong samting. Wanem nao iumi wanwan shud duim?

Prea long God for helpem iu luksavve long samting wea heart bilong iu laekem.

Jehovah hem “lukluk gud long heart” bilong olketa man. (1 Chron. 29:17) Hem “savve gud long iumi winim iumiseleva and hem savve long evri samting.” (1 John 3:20) Iumi no savve haedem eni samting from God. Sapos iumi storyim olketa wari bilong iumi, feeling bilong iumi, and samting wea iumi laekem taem iumi prea long Jehovah, hem savve helpem iumi for luksavve long samting wea heart bilong iumi laekem. Iumi savve askem God for ‘mekem heart bilong iumi klin’ tu. (Ps. 51:10) So prea savve helpem iumi for luksavve wanem nao long heart bilong iumi.

Lisin gud long olketa Christian meeting.

Taem iumi lisin gud long olketa Christian meeting, datwan savve helpem iumi for luksavve wanem nao long heart bilong iumi. Maet iumi no herem niu samting evritaem long olketa meeting. Nomata olsem, olketa meeting helpem iumi for minim gud olketa Bible principle, and iumi herem olketa reminder wea helpem iumi for luksavve long wanem nao heart bilong iumi laekem. Olketa koment bilong olketa brata and sista tu savve helpem iumi long diswan. (Prov. 27:17) Sapos iumi no hipap witim olketa brata and sista bilong iumi, datwan savve spoelem iumi. Bible sei: “Man wea stap seleva bae tingim nomoa samting wea hemseleva laekem.” (Prov. 18:1) So hem gud for iumi wanwan ting raonem disfala kwestin: ‘Waswe, hem wei bilong mi for go long evri meeting mekem mi kasem gud samting?’—Heb. 10:24, 25.

HEART BILONG IUMI BAE LEADIM IUMI GO LONG WEA?

Heart bilong iumi savve leadim iumi go rong. Distaem bae iumi storyim fofala samting wea iumi mas keakea long hem: wei for aftarem olketa material samting, wei for drinkim alcohol, olketa wea iumi fren witim, and hapitaem wea iumi chusim.

Wei for aftarem olketa material samting.

Hem stret for iumi laek kasem samting wea iumi needim. Bat Jesus storyim wanfala example wea warnim iumi for no tinghae tumas long olketa material samting. Long wanfala tokpiksa, Jesus story abaotem wanfala rich man wea olketa stoahaos bilong hem fulap long kaikai. So hem no garem eni ples moa for keepim kaikai wea hem harvestim. Datfala man hem ting for aotem olketa stoahaos bilong hem and wakem olketa big wan. Hem sei: “‘Bae mi tekem evri kaikai witim evri nara samting bilong mi and putim insaed olketa haos hia.’ Then hem sei moa: ‘Mi hipimap plande samting wea fitim staka year. So bae mi rest, kaikai, drink, and hapi nomoa.’” Bat datfala rich man no tingim disfala tru samting: Maet hem dae long datfala naet.—Luke 12:16-20.

From selen hem hard, maet iumi tingim tumas selen gogo iumi start for mek excuse for waka long taem bilong meeting, or maet iumi no duim nao olketa nara samting saed long worship. Iumi mas keakea for no olsem. Or maet iumi young and luksavve best samting for duim long laef nao hem full-taem service. Nomata olsem, waswe, iumi ting for waka for kasem selen firstaem then bae iumi pioneer bihaen? Iumi shud traem best bilong iumi distaem for putim worship bilong God olsem first samting long laef bilong iumi. Iumi no savve sapos iumi bae laef tumoro or nomoa.

Wei for drinkim alcohol.

Proverbs 23:20 sei: “No kamap man for drinkim tumas wine.” Man wea laekem tumas alcohol maet mek excuse for drink evritaem. Maet hem sei hem drink for relax nomoa, no for drunk. Sapos iumi tingse iumi needim alcohol for mekem iumi relax, maet datwan minim iumi need for lukluk gud long samting wea heart bilong iumi laekem.

Olketa wea iumi fren witim.

Hem tru, iumi mas spendem samfala taem witim pipol wea no Witness long skul, long waka, and long ministry. Bat iumi shud no hapitaem witim olketa or fren gud witim olketa. Waswe, iumi fren witim pipol olsem and mek excuse for datwan long wei for sei olketa gud pipol nomoa? Bible sei: “No letem eniwan laea long iufala. Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.” (1 Cor. 15:33) Lelebet dirty nomoa savve spoelem wata wea klin. Olsem tu, wei for fren witim pipol bilong world savve spoelem iumi long spiritual wei, and mekem iumi copyim tingting, kaleko, toktok, and wei bilong olketa.

Hapitaem wea iumi chusim.

Olketa niu technology mekem hem isi tumas for iumi duim enikaen hapitaem wea iumi laekem. Bat staka hapitaem hia hem no fitim olketa Christian. Paul sei nomata for ‘storyim evri difren kaen wei for no klin’ bat iumi mas no duim tu. (Eph. 5:3) Waswe sapos heart bilong iumi laekem tumas for lukluk or herehere long samting wea no klin? Maet iumi mek excuse and sei evriwan need for relax and duim hapitaem, and wanem man duim hem bisnis bilong hemseleva. Bat iumi mas tingim kaonsel bilong Paul and no lukluk or herehere long eni samting wea no klin.

IUMI SAVVE CHANGE

Sapos iumi luksavve heart bilong iumi laea long iumi and hem kamap wei bilong iumi for mek excuse for duim rong samting, iumi savve change. (Eph. 4:22-24) Tingim tufala example.

Miguela luksavve hem mas changem tingting bilong hem abaotem olketa material samting. Miguel and waef and son bilong hem kam from wanfala kantri wea pipol ting hem barava important for garem gud laef and garem olketa niu technology. Long bifor, hem waka hard for kasem staka material samting and hem tingse hem savve duim olsem and long semtaem no foldaon long trap for laekem tumas olketa material samting. Gogo hem luksavve wei for aftarem olketa material samting no savve mekem hem hapi and hem evritaem laekem moa samting. So hem story long Jehovah abaotem tingting bilong hem and olketa samting wea heart bilong hem laekem. Hem sei: “Mi talem Jehovah famili bilong mifala laek for duim moa samting long waka bilong hem. Mifala disaed for mekem laef bilong mifala simpol, and for muv go long ples wea needim help. No longtaem bihaen, mifala start for pioneer. Distaem mifala luksavve mifala no needim staka material samting for hapi and satisfae long laef.”

Tingim tu experience bilong Lee. Hem lukluk gud long hemseleva and datwan helpem hem for no fren witim pipol wea no worshipim God. Long bifor, hem evritaem go long olketa bisnis meeting. Nomata hem savve olketa wea go long olketa meeting hia bae drinkim staka alcohol, bat hem interest tumas for go long olketa bisnis meeting. Staka taem Lee hem klosap drunk long olketa meeting hia, then bihaen, hem feel guilty. Hem luksavve hem mas lukluk gud long heart bilong hemseleva. Hem sei: “Kaonsel wea mi kasem from Bible and olketa elder helpem mi for luksavve heart bilong mi laekem tumas for fren witim pipol wea no lovem Jehovah. Distaem mi iusim telephone for duim staka waka bilong mi and mi no go tumas long olketa bisnis meeting.”

Iumi mas no laea long iumiseleva, bat iumi mas luksavve long samting wea heart bilong iumi laekem. Taem iumi duim datwan, iumi mas prea long Jehovah for helpem iumi and no forget “hem luksavve long olketa secret bilong heart.” (Ps. 44:21) God givim Bible long iumi tu, wea hem olsem wanfala mirror for iumi lukluk insaed. (Jas. 1:22-25) Olketa reminder and kaonsel wea iumi kasem from olketa buk and meeting bilong iumi savve helpem iumi tu! Olketa samting hia savve protectim heart bilong iumi and helpem iumi for gohed duim wanem God laekem.