From ‘Distaem Iumi Savve Long God,’ Wanem Moa Iumi Mas Duim?
“Distaem iufala savve long God.”—GAL. 4:9.
1. Why nao pilot iusim wanfala list taem hem chekim aeroplane?
EVRITAEM wanfala pilot redi for flaem aeroplane, hem mas chekim gud datfala aeroplane. Hem garem wanfala list for mek sure hem no misstim eni samting. Sapos hem no chekim aeroplane, maet hem no lukim wanfala problem wea savve mekem datfala plane foldaon. Nomata olketa pilot wea flaem aeroplane for staka year finis, olketa tu mas chekim evri samting long datfala list.
2. Wanem nao iumi olketa Christian mas chekim?
2 Olsem datfala pilot, iu tu savve chekim samfala samting for mek sure faith bilong iu bae gohed strong nomata long olketa hard taem. Nomata iumi just baptaes nomoa, or iumi insaed long truth for staka year finis, iumi mas gohed for chekim faith bilong iumi. Sapos iumi tingse faith bilong iumi hem strong nomoa, and iumi no chekim, maet taem iumi kasem hard samting long laef bilong iumi, datwan mekem iumi no gohed fren witim Jehovah nao. Bible warnim iumi olsem: “Man wea tingse hem standap strong mas keakea nogud hem foldaon.”—1 Cor. 10:12.
3. Wanem nao olketa Christian long Galatia need for duim?
3 Sakrifaes bilong Jesus openem wei for olketa Christian savve long God long wanfala spesol wei. Olketa man savve kamap olketa son bilong God! Bat olketa Christian long Galatia mas gohed for chekim faith bilong olketa. (Gal. 4:9) Samfala long datfala kongregeson sei man wea followim Law bilong Moses nomoa savve raeteous. Bat Law bilong Moses hem finis nao, and olketa wea no Jew nating stap anda long datfala Law! Olketa wea Jew and olketa wea no Jew long datfala kongregeson need for grow long spiritual wei and luksavve Law bilong Moses hem finis.
OLKETA FIRST SAMTING IUMI DUIM FOR SAVVE LONG GOD
4, 5. Wanem nao Paul sei long leta wea hem raetem for olketa long Galatia, and why nao datfala leta hem important for iumi tu?
4 Leta wea Jehovah iusim aposol Paul for raetem for olketa long Galatia hem encouragem evri Christian for no lusim olketa tru teaching wea olketa lanem from Bible. Iumi mas no go bak long olketa samting wea iumi lusim finis. Datfala leta for olketa long Galatia savve helpem iumi evriwan for gohed faithful.
5 Hem gud for iumi evriwan ting go bak long taem wea iumi disaed for worshipim Jehovah. Ting raonem tufala kwestin hia: Waswe, iu rememberim olketa samting wea iu duim mekem iu fit for baptaes? Waswe, iu tingim yet taem wea iu start for savve long God, and feeling bilong iu taem God hem start for savve long iu?
6. Wanem list nao bae iumi story abaotem?
6 Taem iumi kam insaed long truth, iumi duim naenfala samting. (Lukim box “Samting Iumi Duim for Savve Long God Helpem Iumi for Gohed Grow Long Spiritual Wei Tu.”) Iumi savve iusim disfala list for chekim sapos faith bilong iumi hem strong and for mek sure iumi no go bak long olketa samting bilong disfala world. Olsem pilot wea evritaem chekim list bilong hem bifor hem flaem aeroplane, iumi mas evritaem chekim list bilong iumi.
OLKETA WEA GOD SAVVE LONG OLKETA GOHED GROW LONG SPIRITUAL WEI
7. Wanem nao datfala “pattern” wea iumi mas followim, and why nao iumi mas followim?
7 Olsem pilot wea evritaem chekim list bilong hem bifor hem flaem aeroplane, iumi tu savve evritaem chekim sapos iumi gohed grow long spiritual wei. Paul sei long Timothy: “Gohed followim pattern bilong olketa gudfala toktok wea mi talem long iu taem iu showimaot faith and love wea iu garem from iu wan mind witim Christ Jesus.” (2 Tim. 1:13) “Pattern bilong olketa gudfala toktok” hia wea Paul story abaotem, hem olketa teaching wea stap insaed long Bible. (1 Tim. 6:3) Sapos man drawim piksa bilong wanfala samting wea hem lukim, datwan savve givim iumi lelebet idea abaotem datwan. Olsem tu, “pattern bilong olketa gudfala toktok” savve helpem iumi for savve long olketa samting wea Jehovah laekem iumi for duim. Distaem bae iumi storyim olketa samting wea iumi duim bifor iumi baptaes, and bae iumi chekim sapos iumi gohed followim datfala pattern bilong olketa gudfala toktok.
8, 9. (a) Why nao iumi shud gohed lane and strongim faith bilong iumi? (b) Why nao hem important for iumi grow long spiritual wei, and hao nao datwan hem olsem wanfala tree?
8 First samting wea iumi duim, iumi lane, wea diswan mekem iumi garem faith. Bat iumi mas gohed lane and gohed strongim faith bilong iumi. (2 Thess. 1:3) Bihaen iumi baptaes, iumi mas gohed strongim wei wea iumi fren witim God.
9 Iumi savve comparem diswan witim wanfala tree. Tree savve grow barava big sapos rut bilong hem strong. Olsem example, samfala cedar tree long Lebanon savve tol olsem 12 storey building and waed bilong samfala savve kasem 12 meter. (Song of Sol. 5:15) Taem tree start for grow hem savve grow kwiktaem. Taem rut hem go daon deep long graon, tree savve grow waed and tol. Bihaen tree hem big finis, hem still gohed for grow, bat grow bilong hem no showaot klia olsem long firstaem. Wei wea olketa Christian grow long spiritual wei hem semsem tu. Taem iumi start for studyim Bible maet iumi changem staka samting long laef bilong iumi. Then iumi baptaes. Olketa narawan long kongregeson lukim hao iumi gohed grow long spiritual wei. Maet iumi start for pioneer or kasem olketa nara privilege long kongregeson. Gogo, bihaen samfala year moa, wei wea iumi gohed grow, hem no showaot klia tumas. Nomata olsem, iumi evriwan mas gohed lane and strongim faith bilong iumi, “go kasem taem iumi kamap mature.” (Eph. 4:13) So taem iumi grow long spiritual wei, iumi olsem wanfala smol plant wea grow and kamap strongfala tree.
10. Why nao olketa mature Christian tu mas gohed grow long spiritual wei?
10 Bat iumi shud no stop for grow. Savve wea iumi kasem from Bible and faith bilong iumi olsem rut bilong tree wea mekem iumi strong. Iumi mas gohed strongim olketa rut hia. (Prov. 12:3) Staka brata and sista gohed grow olsem. Wanfala brata wea elder for winim 30 year finis sei hem still gohed grow long spiritual wei. Hem sei hem tinghae long Bible distaem winim enitaem bifor. Hem gohed lanem olketa niu wei wea Bible savve helpem man for disaedem samting, and hem barava tinghae go moa long ministry.
STRONGIM WEI WEA IU FREN WITIM GOD
11. Wanem nao iumi savve duim for strongim wei wea iumi fren witim Jehovah?
11 Sapos iumi laek gohed grow long spiritual wei, iumi mas strongim wei wea iumi fren witim Jehovah. Hem laekem iumi for feel sef and feel savve hem lovem iumi, olsem feeling wea pikinini garem taem hem stap witim parents wea lovem hem, or feeling iumi garem taem iumi stap witim best fren bilong iumi. For iumi fren gud witim Jehovah olsem, hem bae tek taem, and bae iumi mas waka hard tu. So mek sure iu readim Bible evriday. And readim evri niu magasin, buk, and brochure wea Jehovah givim iumi. Diswan bae helpem iu for savve gud long hem and strongim wei wea iu fren witim hem.
12. Wanem nao iumi mas duim sapos iumi laek gohed fren gud witim God?
12 Prea bilong iumi and wei for hipap tugeta witim olketa nara Christian savve strongim wei wea iumi fren witim God tu. (Readim Malachi 3:16.) Taem olketa wea fren witim God prea long hem, hem herem olketa. (1 Pet. 3:12) Jehovah herem iumi taem iumi askem hem for helpem iumi, so iumi shud “gohed for prea and no givap.” (Rome 12:12) Iumi no savve gohed fren witim God sapos hem no helpem iumi. Sapos iumi no prea, hard for iumi kasem strong wea iumi needim. Maet disfala nogud world mekem iumi wikdaon, or switim iumi for duim nogud samting. Bat God hem willing for helpem iumi sapos iumi askem hem for datwan. Waswe, taem iu prea long Jehovah, iu story long hem olsem iu story long wanfala gud fren bilong iu? Waswe, iu savve tingim samfala wei moa for iu mekem prea bilong iu gudfala?—Jer. 16:19.
13. For iumi gohed fren gud witim Jehovah, why nao iumi mas go long olketa meeting evritaem?
13 Iumi mas no misstim wei for worship witim kongregeson, mekem iumi evritaem stap witim olketa narawan wea fren witim Jehovah. Hem lovem olketa bikos ‘olketa kam long hem for protectim olketa.’ (Nah. 1:7) From disfala world hem nogud tumas, iumi mas spendem taem witim olketa brata and sista bilong iumi. Iumi savve helpem narawan for gohed strong. Olketa bae encouragem iumi for “showimaot love and duim olketa gudfala samting.” (Heb. 10:24, 25) Hard for iumi followim disfala kaonsel bilong Paul sapos iumi no spendem taem witim olketa long kongregeson. So iu mas go long olketa meeting evritaem and join insaed long meeting long wei for givim koment.
14. Why nao iumi mas evritaem willing for repent and gohed changem samfala samting long laef bilong iumi?
14 Taem iumi kam insaed long truth, iumi mas repent and changem wei bilong iumi. Bat from iumi no perfect and garem olketa wik point, hem isi nomoa for iumi duim sin, so iumi mas willing for repent and gohed changem samfala samting long laef bilong iumi. Sin hem olsem wanfala snek wea laek for baetem iumi sapos chance hem stap. (Rome 3:9, 10; 6:12-14) So iumi mas luksavve long olketa wik point bilong iumi. Jehovah hem patient witim iumi taem iumi waka hard for winim olketa wik point hia. (Phil. 2:12; 2 Pet. 3:9) Iusim taem and strong bilong iu for worshipim Jehovah and no long samting wea iuseleva laekem. Wanfala sista wea growap long truth tingse hem mas barava fraetem Jehovah, and hard tumas for hem mekem Jehovah hapi. Hem no savve fren gud witim Jehovah and hem duim samfala mistek. Hem sei: “Mi lovem Jehovah, bat mi no savve gud long hem.” So hem askem God for helpem hem, and hem changem samfala samting long laef bilong hem. Hem sei: “Jehovah leadim mi olsem smol pikinini, hem isisi helpem mi for winim olketa hard samting, and hem showim mi wanem mi need for duim.”
15. Jesus and Jehovah luksavve and tinghae long wanem samting?
15 Angel bilong God talem Peter and olketa nara aposol for gohed “storyim” gud nius. (Acts 5:19-21) For keepim faith bilong iumi strong iumi mas mek sure iumi duim ministry evri week. Jesus and Jehovah luksavve hao strong nao faith bilong iumi and tinghae long wanem iumi duim long ministry. (Rev. 2:19) Ministry mas barava important samting long laef bilong iumi.
16. Why nao hem gud for iumi ting raonem dedication bilong iumi long Jehovah?
16 Tingim dedication bilong iu long Jehovah. Wei wea iumi fren witim Jehovah hem important winim eni nara samting. Hem savve long iumi evriwan wea “bilong hem.” (Readim Isaiah 44:5.) Mek sure iu fren gud witim Jehovah, and prea for hem helpem iu gohed fren gud witim hem. Tingim tu baptism bilong iu, and no forgetim datfala important date wea iu baptaes. Baptism bilong iu showimaot long olketa narawan iu dedicate long Jehovah. No eni nara disison wea iu mekem hem important winim datwan.
FOR GOHED FREN GUD WITIM JEHOVAH IUMI MAS NO GIVAP
17. Sapos iumi laek gohed fren gud witim Jehovah, why nao iumi mas no givap?
17 Paul talem olketa long Galatia for mas no givap. (Gal. 6:9) Iumi bae kasem olketa problem, so iumi tu mas no givap. Bat Jehovah bae helpem iumi. Gohed askem God for holy spirit bilong hem, and hem bae helpem iu for gohed hapi and garem peace, nomata sapos olketa problem wea iu kasem hem no finis. (Matt. 7:7-11) Tingim hao Jehovah lukaftarem olketa bird. Bat hem lovem iu winim olketa bird. Hem laek for lukaftarem iu bikos iu lovem hem and iu dedicatem iuseleva long hem. (Matt. 10:29-31) Nomata iu garem olketa problem wea big tumas, iu mas no givap. No lusim truth and go bak long olketa samting long world wea iu lusim finis. Iumi garem staka blessing bikos Jehovah hem savve long iumi.
18. From distaem iu savve long God, wanem moa iu mas duim?
18 Nomata iu just baptaes nomoa, or iu baptaes for staka year finis, wanem moa iu mas duim? Gohed lane abaotem Jehovah, and gohed grow long spiritual wei. Iu mas no tingse iu savve gud long God finis, and tingse iu no need for duim samting for strongim wei wea iu fren witim hem. Hem gud sapos samfala taem iu readim moa olketa point long disfala study mekem iu gohed fren gud witim Jehovah, wea hem Dadi, Fren, and God bilong iumi wea barava lovem iumi.—Readim 2 Corinth 13:5, 6.