Kingdom Hem Rul for 100 Year Finis​—Long Wanem Wei Nao Datwan Affectim Iu?

1, 2. Wanem nao Kingdom bilong God bae duim, and hao nao iumi savve Kingdom bae kam?

LONG year 31 C.E., long wanfala maunten klosap long Capernaum, Jesus Christ teachim olketa disaepol bilong hem for prea. Hem talem olketa for askem God for Kingdom bilong hem mas kam. (Matt. 6:10) Distaem plande pipol no savve sapos Kingdom bae kam or nomoa. Bat iumi sure Jehovah bae ansarem prea bilong iumi for Kingdom bilong hem mas kam.

² Jehovah bae iusim Kingdom for mekem famili bilong hem long heven and earth for wan mind. Plan bilong Jehovah bae kamap tru. (Isa. 55:10, 11) Olketa spesol samting wea happen insaed 100 year wea go pas showimaot Jehovah hem King finis, and hem duim olketa nambawan samting for pipol bilong hem, wea distaem namba bilong olketa hem winim seven million. (Zech. 14:9; Rev. 15:3) Jesus talem iumi for prea for Kingdom bilong God hem kam. Datwan hem difren from wei wea Jehovah hem kamap King. Hao nao wei wea Jehovah kamap King hem difren from taem wea Kingdom bilong God bae kam, and hao nao tufala samting hia affectim iumi?

KING WEA JEHOVAH MARKEM HEM DUIM SAMTING

3. (a) Jesus kamap King bilong wanem, and long wanem taem nao datwan happen? (b) Hao nao iu savve pruvim Jesus hem start for rul long 1914? (Lukim footnote.)

³ Long samting olsem 1880, pipol bilong Jehovah start for minim wanfala profesi wea Daniel raetem winim 2,500 year bifor. Datfala profesi hem sei: “Long taem bilong olketa king hia, God long heven bae startim wanfala kingdom wea bae nating savve finis.” (Dan. 2:44) Winim 20 year bifor 1914, olketa Bible Student talemaot long pipol datfala year 1914 hem barava important year. Long datfala taem, staka pipol tingse future bae gud tumas. Wanfala man for raet hem sei: “Long 1914, pipol tingse future bae gud tumas.” Bat long datfala sem year nomoa, World War I hem start and olketa profesi long Bible kamap tru. Olketa profesi abaotem olketa bigfala hangre, earthquake, sik, and olketa nara profesi long Bible wea kamap tru pruvim Jesus Christ hem kamap King long Kingdom bilong God long heven long 1914.a Taem Jehovah mekem Son bilong hem kamap King long Kingdom bilong hem, Jehovah tu hem kamap King long wanfala niu wei.

4. Wanem nao first samting wea Jesus duim taem God mekem hem for King, and wanem nao hem duim bihaen datwan?

⁴ Taem God mekem Jesus for King, first samting Jesus duim nao hem faet againstim Satan, wea hem main enemy bilong Dadi bilong hem. Jesus and olketa angel bilong hem torowem Devil and olketa demon bilong hem aot from heven. Olketa long heven barava hapi bat pipol long earth safa winim enitaem bifor. (Readim Revelation 12:7-9, 12.) Bihaen datwan, Jesus wea King hem start for klinim, teachim, and organizem olketa disaepol bilong hem long earth for duim wanem God laekem. Wei wea olketa obeyim Jesus showimaot gudfala example for iumi distaem.

KING KLINIM OLKETA DISAEPOL BILONG HEM

5. Wanem nao happen midolwan long 1914 and start bilong 1919?

⁵ Bihaen Jesus aotem Satan and olketa demon bilong hem from heven, Jehovah iusim Jesus for lukluk long olketa disaepol bilong hem long earth and klinim olketa. Profet Malachi sei datwan hem for klinim olketa long spiritual wei. (Mal. 3:1-3) Diswan happen midolwan 1914 and start bilong 1919.b Sapos iumi laek for insaed famili bilong Jehovah, iumi mas klin, wea minim iumi mas holy. (1 Pet. 1:15, 16) Iumi mas no letem false religion or politik for mekem worship bilong iumi no klin.

6. Hao nao iumi kasem spiritual kaikai, and why nao iumi barava needim datwan?

⁶ Then from Jesus hem King, hem markem datfala “wakaman wea faithful and wise.” Disfala wakaman bae evritaem givim gudfala spiritual kaikai long evriwan wea insaed “wanfala sekson” wea Jesus lukaftarem olketa. (Matt. 24:45-47; John 10:16) Start long 1919 datfala wakaman hem faithful for duim important waka for givim spiritual kaikai long “olketa nara wakaman.” Datfala wakaman wea faithful and wise givim staka spiritual kaikai wea helpem iumi for garem strongfala faith. Datwan strongim iumi for mek sure worship, samting iumi duim, tingting, and body bilong iumi, hem klin followim standard bilong God. Jesus iusim spiritual kaikai hia for teachim iumi and trainim iumi tu for waka hard for preachim gud nius, wea hem nao important winim eni nara waka long earth. Waswe, iu evritaem kaikaim datfala spiritual kaikai?

KING TEACHIM OLKETA DISAEPOL FOR PREACH EVRIWEA LONG WORLD

7. Wanem important waka nao Jesus startim taem hem stap long earth, and disfala waka bae gohed kasem wanem taem?

⁷ Taem Jesus startim ministry bilong hem long earth, hem sei: “Mi mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.” (Luke 4:43) For thri and haf year, preaching waka nao hem main important samting wea Jesus duim. Hem talem olketa disaepol bilong hem: “Taem iufala go, iufala preach and sei: ‘Kingdom bilong God hem kam klosap nao.’” (Matt. 10:7) Bihaen Jesus laef bak, hem sei olketa disaepol bilong hem bae talemaot disfala message “long evri farawe ples long earth.” (Acts 1:8) Hem promis for sapotim olketa long disfala important waka go kasem taem wea world hem finis.—Matt. 28:19, 20.

8. Hao nao King encouragem olketa disaepol bilong hem long earth for duim preaching waka?

⁸ Start long 1919, nara samting moa hem insaed datfala “gud nius abaotem Kingdom.” (Matt. 24:14) King hem start for rul finis long heven, and hem hipimap wanfala smol grup bilong olketa disaepol bilong hem long earth wea hem klinim olketa finis. Olketa hia obeyim komand bilong Jesus for talemaot gud nius long pipol evriwea long earth hao Kingdom bilong God hem rul long heven! (Acts 10:42) Olsem example, long September 1922, klosap 20,000 pipol wea sapotim Kingdom hipap for wanfala international convention long Cedar Point, Ohio, U.S.A. Masbi olketa hapi tumas taem Brata Rutherford givim tok wea garem title “The Kingdom” and hem sei: “Lukim, King hem rul finis! Iufala nao mas talem pipol abaotem hem. So talemaot, talemaot, talemaot nius abaotem King and kingdom bilong hem.” Long next day, samting olsem tu thousand long olketa hia duim preaching waka, and samfala duim territory wea hem 72 kilometer from ples wea convention kamap. Wanfala brata sei: “Bae mi no savve forgetim datfala announcement for talemaot nius abaotem Kingdom, and wei wea evriwan wea hipap willing tumas for duim datwan!” Staka narawan tu garem sem tingting.

9, 10. (a) Olketa wanem skul nao trainim iumi for duim ministry? (b) Wanem gud samting nao iuseleva kasem from disfala training?

⁹ Long 1922, winim 17,000 pablisa duim preaching waka long 58 kantri evriwea long world. Bat olketa hia needim training. Long first century, Jesus talem kliafala instruction long olketa disaepol bilong hem long wanem olketa mas preach abaotem, hao for duim datwan, and wea for duim datwan. (Matt. 10:5-7; Luke 9:1-6; 10:1-11) Distaem tu, Jesus mek sure evriwan wea preach kasem instruction and wanem olketa needim mekem olketa fit for teach gud. (2 Tim. 3:17) Jesus hem iusim Christian kongregeson for trainim olketa disaepol bilong hem for duim ministry. Hem iusim Theocratic Ministry Skul for trainim olketa long winim 111,000 kongregeson evriwea long world. Long disfala skul winim seven million pablisa lane for preach and teach long gudfala wei mekem olketa savve helpem “evri didifren kaen man.”—Readim 1 Corinth 9:20-23.

¹⁰ Olketa nara Bible skul tu stap for trainim olketa elder long kongregeson, olketa pioneer, singol brata, hasband and waef, olketa Branch Komiti member and waef, traveling overseer and waef, and olketa missionary.c Olketa student long wanfala class bilong Bible Skul for Olketa Hasband and Waef sei: “Spesol training wea mifala kasem hem strongim love bilong mifala for Jehovah and mekem mifala fit for helpem nara pipol.”

11. Hao nao olketa disaepol bilong Jesus gohed for preach nomata Satan againstim olketa?

¹¹ Enemy bilong iumi, Satan, lukim bigfala waka wea iumi duim for preachim and teachim datfala gud nius long pipol. Hem iusim enikaen samting for stopem pipol for no herem message abaotem Kingdom and for spoelem olketa wea preachim gud nius. Bat Satan bae no win. Jehovah putim Son bilong hem “hae winim evri gavman and paoa and rul.” (Eph. 1:20-22) From Jesus hem King, hem iusim paoa bilong hem for leadim and protectim olketa disaepol bilong hem mekem samting wea Dadi bilong hem laekem mas kamap.d Pipol bilong Jehovah gohed for preachim gud nius, and plande million pipol wea honest lane for worshipim Jehovah. Hem bigfala privilege for iumi duim disfala nambawan waka!

KING ORGANIZEM OLKETA DISAEPOL BILONG HEM FOR DUIM BIGFALA WAKA

12. Start long 1914 kam kasem distaem, hao nao pipol bilong God organize?

¹² Start kam long taem Jesus start for rul long 1914, hem gohed stretem wei wea pipol bilong God organize for duim wanem Dadi bilong hem laekem. (Readim Isaiah 60:17.) Long 1919, evri kongregeson garem service director wea lead long preaching waka. Long 1927, olketa kongregeson start for preach evri Sunday. Long 1931, pipol bilong Jehovah kasem datfala nem Olketa Jehovah’s Witness, and datwan mekem olketa laek duim moa samting for Kingdom. (Isa. 43:10-12) Start long 1938, olketa no vote nao for olketa brata wea lead long kongregeson, bat olketa kasem appointment for duim datfala waka. Start long 1972, body of elders nao lukaftarem kongregeson and no wanfala brata nomoa. Olketa elder and ministerial servant kasem encouragement tu for olketa mas willing for lukaftarem olketa sheepsheep long kongregeson. (1 Pet. 5:2) Long 1976, olketa long Governing Body waka insaed sixfala komiti wea lukaftarem Kingdom waka evriwea long world. Kam kasem distaem, Jesus gohed organizem olketa disaepol for duim evri samting followim wanem God laekem.

13. Hao nao samting wea King long Kingdom bilong God duim insaed 100 year wea hem rul affectim laef bilong iu?

¹³ Tingim bigfala waka wea King long Kingdom bilong God hem duim insaed 100 year wea hem rul. Hem klinim pipol bilong God for garem nem bilong Dadi bilong hem, Jehovah. Hem leadim waka for preachim gud nius long 239 kantri and hem teachim plande million pipol for worshipim Jehovah. Hem mekem winim seven million disaepol wea willing for duim wanem Dadi bilong hem laekem, for olketa garem wan mind. (Ps. 110:3) Jehovah iusim datfala Kingdom for duim olketa sapraesing samting. Bat olketa nara nambawan samting tu bae happen long future!

OLKETA BLESSING FROM KINGDOM BILONG GOD LONG FUTURE

14. (a) Taem iumi prea for Kingdom bilong God hem kam, wanem nao iumi askem God for duim? (b) Wanem nao yeartext bilong iumi for 2014, and why nao hem barava fitim?

¹⁴ Nomata Jehovah mekem Son bilong hem Jesus Christ kamap King long 1914, hem no datwan nomoa wea ansarem prea bilong iumi for Kingdom bilong God mas kam. Samfala samting moa mas happen tu. (Matt. 6:10) Bible sei Jesus bae “rul midolwan long olketa enemy bilong [hem].” (Ps. 110:2) Olketa gavman bilong man wea Satan kontrolem gohed for againstim Kingdom. So taem iumi prea for Kingdom bilong God hem kam, iumi askem God for Jesus, wea hem King, witim nara 144,000 king long heven, for finisim rul bilong olketa man and pipol long earth wea againstim Kingdom. Taem datwan happen, profesi long Daniel 2:44 bae kamap tru nao. Datfala scripture sei Kingdom bilong God “bae smasem and finisim evri gavman hia,” wea againstim Kingdom bilong God. (Rev. 6:1, 2; 13:1-18; 19:11-21) From diswan hem klosap for happen, hem barava fitim for yeartext bilong iumi for 2014 hem kam from Matthew 6:10, wea hem sei: “Mifala laekem Kingdom bilong iu for kam.” Distaem hem 100 year finis from taem wea Jesus start for rul long heven!

15, 16. (a) Olketa wanem nambawan samting nao bae happen insaed wan thousand year wea Christ hem rul? (b) Wanem nao bae Jesus duim bihaen hem rul for wan thousand year, and wanem nao bae kamaot from datwan?

¹⁵ Bihaen Jesus finisim olketa enemy bilong God, hem bae torowem Satan and olketa demon bilong hem insaed wanfala hol wea deep tumas wea olketa bae stap for wan thousand year. (Rev. 20:1-3) From Satan and olketa demon no stap, Kingdom bae fit for helpem olketa man for kasem gud samting from sakrifaes bilong Jesus, and bae hem finisim evri nogud samting wea kamaot from sin bilong Adam. King bae mekem staka million pipol for laef bak, and bae hem organizem wanfala program evriwea long world for teachim olketa abaotem Jehovah. (Rev. 20:12, 13) Full earth bae kamap paradaes olsem garden bilong Eden, and evriwan wea faithful bae kamap perfect.

¹⁶ Bihaen wan thousand year wea Christ hem rul, plan bilong Jehovah for earth bae kamap tru. Then Jesus bae givim datfala Kingdom go bak long Dadi bilong hem. (Readim 1 Corinth 15:24-28.) Long datfala taem, olketa pikinini bilong Jehovah long earth bae no needim eniwan for stretem olketa samting midolwan long olketa and God. Evri son bilong God long heven and olketa pikinini bilong hem long earth bae wan mind witim hem insaed famili bilong hem.

17. Wanem nao iu laek duim for sapotim Kingdom?

¹⁷ Olketa nambawan samting wea happen finis insaed 100 year wea Kingdom hem rul showimaot Jehovah kontrolem evri samting and plan bilong hem for disfala earth bae kamap tru. Iumi laek for gohed faithful long Jehovah and talemaot nius abaotem King and Kingdom bilong hem. Iumi sure klosap nao Jehovah bae ansarem prea bilong iumi for Kingdom bilong hem mas kam!