Duim Waka Bilong Jehovah Bifor Taem Bilong Trabol Hem Kam

1, 2. (a) Wanem advaes nao Solomon talem for young pipol? (b) Why nao olketa Christian wea 50 year or winim datwan shud interest tu long advaes bilong Solomon?

JEHOVAH iusim King Solomon for sei olsem long young pipol: “Taem iu young yet, tingim Nambawan God wea wakem iu, bifor taem bilong trabol hem kam.” Wanem nao datfala “taem bilong trabol” hem minim? Disfala toktok story abaotem taem wea man hem olo. Solomon iusim samfala interesting toktok for piksarem samting wea kasem olketa olo olsem wei wea hand bilong olketa hem seksek, leg hem wik, teeth hem foldaon, eye hem dark, olketa savve earpas, garem white hair, and baksaed bilong olketa hem bend. Dastawe Solomon talem iumi for tingim Nambawan God bilong iumi taem iumi young yet!—Readim Ecclesiastes 12:1-5.

² Plande Christian wea 50 year or winim datwan, olketa strong yet. Maet olketa garem lelebet white hair, bat olketa no garem evri health problem wea Solomon story abaotem. Nomata olketa young wan nao Solomon talem for ‘tingim Nambawan God wea wakem olketa,’ waswe, olketa mature Christian hia tu savve followim datfala advaes? Wanem nao datfala advaes hem minim?

3. Wanem nao iumi savve duim for showimaot iumi tingim Nambawan God bilong iumi?

³ Nomata iu worshipim Jehovah for staka year finis, samfala taem hem gud for ting raonem wei wea Jehovah hem nambawan. Laef hem wanfala spesol present. Wei wea Jehovah designim olketa samting hem barava spesol and hard tumas for olketa man minim. Olketa difren kaen nambawan samting wea Jehovah wakem hem mekem iumi fit for enjoyim staka samting long laef. Taem iumi ting raonem olketa samting wea Jehovah wakem, datwan helpem iumi for tinghae long love, wisdom, and bigfala paoa bilong hem. (Ps. 143:5) For tingim Nambawan God bilong iumi, hem minim iumi tingim tu wanem hem laekem iumi for duim. Taem iumi ting raonem evri samting hia, datwan mekem iumi laek for showimaot iumi tinghae long Jehovah long wei for duim moa samting long waka bilong hem taem iumi laef yet.—Eccl. 12:13.

SPESOL CHANCE IUMI GAREM TAEM IUMI MATURE

4. Wanem nao hem gud for olketa mature Christian ting raonem, and why nao olsem?

⁴ Sapos iu gogo for olo bat iu strong yet, hem gud for ting raonem wanem moa iu savve duim long waka bilong Jehovah. From iu wanfala mature Christian, iu garem chance for duim olketa samting wea olketa narawan no savve duim. Olsem example, iu savve teachim olketa young wan samting wea Jehovah teachim long iu. Iu savve storyim olketa naesfala experience wea iu kasem taem iu duim waka bilong God. King David askem Jehovah for helpem hem duim datwan. Hem sei: “God bilong mi, iu nao teachim mi from taem mi young yet, . . . nomata taem mi olo and hair bilong mi hem white, plis God iu no lusim mi, mekem mi savve story abaotem paoa and strong bilong iu long olketa wea bae born bihaen long mi.”—Ps. 71:17, 18.

5. Wanem nao olketa mature Christian savve duim for helpem olketa young wan?

⁵ From iu savve long plande samting, hao nao iu savve iusim datwan for helpem olketa narawan? Waswe, iu savve invaetem olketa young wan for kam long haos for story and encouragem olketa? Waswe, iu savve waka witim olketa long ministry mekem olketa lukim iu hapi taem iu duim waka bilong Jehovah? Elihu sei: “Olketa olo nao shud story, and olketa nao shud teachim olketa wise samting long olketa narawan.” (Job 32:7) Aposol Paul talem olketa mature Christian woman for encouragem olketa narawan long samting wea olketa talem, and long example bilong olketa. Hem sei: “Olketa woman wea olo . . . mas teachim gud samting.”—Titus 2:3.

WANEM IU SAVVE DUIM FOR HELPEM NARAWAN

6. Wanem nao olketa mature Christian savve duim for helpem olketa narawan?

⁶ Sapos iu wanfala mature Christian, iu savve duim staka samting for helpem olketa narawan. Ting raonem olketa samting wea iu savve long hem distaem wea 30 or 40 year bifor iu nating savve nomoa. Iu savve hao for iusim olketa Bible principle long staka samting wea happen long laef. Iu savve hao for storyim olketa tru teaching long wei for kasem heart bilong narawan. Sapos iu wanfala elder, iu savve hao for helpem olketa brata wea duim samting wea no wise. (Gal. 6:1) Maet iu savve hao for lukaftarem olketa waka long kongregeson, olketa difren department long assembly, or Kingdom Hall construction. Maet iu savve hao for story witim olketa doctor abaotem hao for operate long samwan and no iusim blood. Nomata sapos iu no baptaes for longfala taem, iu lanem finis staka samting long laef bilong iu. Olsem example, sapos iu garem olketa pikinini wea big finis, iu lanem staka samting wea iu savve iusim for helpem narawan. Olketa mature Christian savve barava encouragem pipol bilong Jehovah long wei for teachim, strongim, and givim gudfala advaes long olketa brata and sista.—Readim Job 12:12.

7. Wanem nao olketa mature Christian savve duim for trainim olketa young wan?

⁷ Wanem nao olketa nara samting wea iu savve duim for helpem olketa narawan? Maet iu savve showim olketa young wan hao for startim and conductim olketa Bible study. Sapos iu wanfala sista, waswe, iu savve helpem olketa mami wea garem olketa smol pikinini for balancem olketa spiritual samting witim wei for lukaftarem olketa pikinini? Sapos iu wanfala brata, waswe, iu savve teachim olketa young brata for givim gudfala tok and kamap gud long wei for preachim gud nius? Waswe, olketa savve go witim iu taem iu visitim olketa olo brata and sista for showim olketa hao for encouragem olketa olo? Nomata sapos iu no strong olsem bifor, iu garem staka nambawan chance for trainim olketa young wan. Bible sei: “Samting wea mekem olketa young man luk naes hem strong wea olketa garem, and samting wea mekem olketa olo man luk naes hem white hair bilong olketa.”—Prov. 20:29.

HELP LONG PLES WEA NEEDIM SAMFALA PABLISA MOA

8. Wanem nao aposol Paul duim taem hem start for olo?

⁸ Aposol Paul barava gohed busy long waka bilong Jehovah nomata hem gogo for olo. Hem waka hard for staka year. Hem kasem plande hard samting long missionary waka bilong hem and hem stap long prison tu. Taem hem aot from prison long 61 C.E., hem savve chus for garem isi laef and preach long Rome nomoa, bat hem no duim datwan. (2 Cor. 11:23-27) Olketa brata long Rome bae hapi tumas sapos Paul stap long there and helpem olketa. Bat Paul luksavve olketa nara kantri nao needim help. Hem tekem Timothy and Titus and go long Ephesus, then long Crete, and maet hem kasem Macedonia tu. (1 Tim. 1:3; Titus 1:5) Bible no storyim sapos hem go long Spain, bat hem plan for go long there.—Rome 15:24, 28.

9. Wanem taem nao Peter go long nara ples for preachim gud nius? (Lukim piksa long start bilong study.)

⁹ Maet aposol Peter hem winim 50 year taem hem go long nara ples for preachim gud nius. Hao nao iumi savve? Sapos hem sem age witim Jesus or winim datwan, bae hem samting olsem 50 year taem hem hipap witim olketa nara aposol long Jerusalem long 49 C.E. (Acts 15:7) Bihaen datwan, Peter go stap long Babylon. Luk olsem hem duim datwan for preach long staka Jew wea stap long there. (Gal. 2:9) Hem stap long there taem hem raetem firstfala leta bilong hem long samting olsem 62 C.E. (1 Pet. 5:13) Hem no isi for go stap long nara ples for preachim gud nius, bat Peter no letem wei wea hem gogo for olo stopem hem for duim moa samting long waka bilong Jehovah.

10, 11. Wanem nao Robert and waef bilong hem duim taem tufala samting olsem 55 year?

¹⁰ Distaem plande Christian wea 50 year or winim datwan no garem famili responsibility so olketa savve duim moa samting long waka bilong Jehovah. Samfala muv go long ples wea needim samfala pablisa moa. Hem nao samting wea Robert and waef bilong hem duim. Taem tufala samting olsem 55 year, tufala luksavve tufala garem chance for duim moa samting long waka bilong Jehovah. Son bilong tufala no stap witim tufala nao, and olketa kasem lelebet selen bihaen parents bilong tufala dae. Olketa luksavve sapos olketa salem haos bilong tufala, tufala savve changem bak loan bilong tufala. Bihaen datwan, tufala bae still garem inaf selen for kasem need bilong tufala go kasem taem wea Robert hem tekem retirement pei bilong hem. Olketa herem staka pipol long Bolivia hapi for studyim Bible, and hem no expensive for stap long there. So tufala disaed for go long Bolivia. Robert sei: “Hem no isi for stap long there. Evri samting hem barava difren from laef bilong mifala long North America. Nomata olsem, mifala kasem staka blessing.”

¹¹ Robert sei tu: “Distaem mifala busy nomoa for waka witim kongregeson. Samfala Bible study bilong mifala baptaes. Mifala study witim wanfala famili wea poor and olketa stap long vilij wea farawe lelebet from taon. Nomata hem no isi, evri week datfala famili kam long taon for olketa meeting. Mifala hapi tumas for lukim datfala famili gohed gud long spiritual wei and firstborn son bilong olketa hem pioneer distaem.”

HELPEM KONGREGESON WEA IUSIM DIFREN LANGUIS

12, 13. Bihaen Brian retire, wanem nao hem and waef bilong hem duim?

¹² Olketa kongregeson and grup wea iusim difren languis savve kasem gud samting from example bilong olketa mature brata and sista. And tu, hem naes tumas for preach long pipol wea iusim difren languis. Olsem example, Brian from Britain sei taem hem 65 year and hem retire, hem and waef bilong hem no busy long staka samting. Hem sei: “Olketa pikinini bilong mitufala no stap witim mifala nao and mitufala no faendem staka pipol wea interest for studyim Bible. Then mi meetim wanfala young Chinese man wea waka long university long territory bilong mifala. Hem kam long meeting, and mi start for studyim Bible witim hem. Bihaen tu-thri week, hem tekem kam long meeting nara Chinese man wea waka witim hem. Tufala week bihaen datwan, hem tekem kam mek-thri man, then bihaen, mek-foa man moa.

¹³ “Taem mek-faev Chinese man wea waka long datfala university ask for studyim Bible, mi start for tingse nomata mi 65 year, datwan no minim mi shud retire from waka bilong Jehovah. So mi askem waef bilong mi wea 63 year sapos hem willing for lanem Chinese languis. Mifala iusim kaset for duim Chinese languis course. Distaem tenfala year hem go finis from taem wea mifala duim datwan. Wei for preach long pipol wea iusim difren languis hem mekem mifala feel young moa. Kam kasem distaem mifala studyim Bible witim 112 Chinese pipol! Staka long olketa kam long samfala meeting. Distaem wanfala hem pioneer.”

HAPI LONG WANEM IU FIT FOR DUIM

14. Wanem nao olketa mature Christian mas no forgetim, and hao nao example bilong Paul savve encouragem olketa?

¹⁴ No evri Christian wea 50 year or winim datwan savve duim moa samting long waka bilong Jehovah. Samfala sik, and olketa narawan lukaftarem olketa pikinini or dadi and mami wea olo. Bat no forget, Jehovah tinghae long eni samting wea iu duim long waka bilong hem. So nomata samfala taem iu feel nogud bikos iu no fit for duim samfala samting, iu savve hapi long wanem iu fit for duim. Tingim example bilong aposol Paul. For samfala year hem stap olsem prisoner and hem no savve go long olketa nara ples for preachim gud nius. Bat taem eniwan kam lukim hem, hem story abaotem olketa Holy Raeting and helpem olketa for gohed faithful long God.—Acts 28:16, 30, 31.

15. Why nao iumi barava tinghae long olketa olo brata and sista?

¹⁵ Jehovah tinghae tu long samting wea olketa olo savve duim long waka bilong hem. Solomon sei taem man olo and health hem no mas gud, laef bae hem no isi. Bat Bible showimaot Jehovah tinghae long wanem olketa olo Christian duim for praisem hem. (Luke 21:2-4) Olketa long kongregeson barava tinghae long nambawan example bilong olketa olo brata and sista wea gohed faithful and no givap.

16. Luk olsem Anna no garem chance for duim olketa wanem samting, bat wanem nao hem savve duim for worshipim God?

¹⁶ Bible story abaotem Anna, wanfala olo woman wea faithful long God. Taem Jesus hem born, Anna hem 84 year and hem wanfala widow woman. From hem olo, luk olsem bae hem dae bifor hem garem chance for kamap disaepol bilong Jesus, kasem holy spirit, or for preachim gud nius. Bat hem hapi for duim olketa nara samting for worshipim Jehovah. Olsem example, evri morning and evening hem savve go long temple for prea for haf hour taem priest bonem incense for Jehovah. Bible sei: “Hem savve go for worship long temple evri day and evri naet.” (Luke 2:36, 37) Long wanfala taem hia wea hem go long temple hem lukim Jesus wea hem baby. Hem storyim long evriwan datfala pikinini nao bae kamap Messiah and mekem pipol long Jerusalem kamap free.—Luke 2:38.

17. Wanem nao kongregeson savve duim for helpem olketa Christian wea olo or sik?

¹⁷ Distaem iumi shud lukaotem chance for helpem olketa brata and sista wea olo or sik. Staka olo laekem tumas for hipap witim iumi long olketa meeting and assembly bat olketa no fit for kam. Wanem nao kongregeson savve duim for helpem olketa? Long samfala ples, maet olketa savve lisin long olketa meeting long telephone. Nomata sapos olketa olo no fit for go long olketa meeting, olketa savve duim samfala samting for sapotim tru worship. Olsem example, olketa savve prea for Jehovah blessim kongregeson.—Readim Psalm 92:13, 14.

18, 19. (a) Hao nao example bilong olketa olo brata and sista savve encouragem olketa narawan? (b) Datfala kaonsel for “tingim Nambawan God wea wakem iu” hem fitim hu nao?

¹⁸ Maet olketa olo brata and sista no luksavve hao example bilong olketa savve encouragem olketa narawan. Olsem example, for staka year nao Anna hem faithful for go long temple. Luk olsem hem no savve Bible bae storyim example bilong hem and love wea hem garem for Jehovah, wea datwan encouragem iumi distaem tu. Olsem tu, olketa spiritual brata and sista bilong iu bae nating forgetim love wea iu showimaot for Jehovah. Dastawe Bible hem sei: “White hair hem olsem crown wea luk naes tumas long man wea raeteous”!—Prov. 16:31.

¹⁹ No eniwan long iumi fit for duim evri samting long waka bilong Jehovah. So taem iu strong yet, disaed strong for “tingim Nambawan God wea wakem iu, bifor taem bilong trabol hem kam.”—Eccl. 12:1.