Long Full World Staka Pipol Smoke

Samfala sei sapos namba bilong pipol wea smoke no savve katdaon go kasem year 2030, namba bilong pipol wea dae evri year from olketa smoke bae winim 8,000,000. And olketa sei go kasem year 2100, 1 billion pipol bae dae from olketa smoke.

Hem no olketa wea smoke nomoa wea safa. Famili bilong man wea dae from hem smoke savve sorre tumas and maet hem nao waka for selen for sapotim olketa. And tu, 600,000 pipol dae evri year from olketa stap witim olketa wea smoke and brithim smoke hia. Iumi evriwan safa from gavman needim moa selen for lukaftarem olketa wea sik from olketa smoke.

Sapos man hem smoke, diswan hem no wanfala sik wea olketa doctor mas faendem medicine for finisim. For no kasem eni problem from smoke, olketa shud stop nomoa for smoke. Margaret Chan, wea hem doctor and hem big woman long World Health Organization, hem sei: “Gavman and pipol long community savve stopem olketa problem wea man kasem from hem smoke sapos olketa laek for duim datwan.”

Long staka kantri, pipol trae for duim samting for stopem olketa problem wea man kasem from hem smoke. Start long August 2012, samting olsem 175 kantri agree for trae duim samting for stopem pipol for no smoke.a Bat tufala samting mekem pipol laek for gohed smoke. Evri year, olketa company wea wakem cigarette spendem staka billion dollar long advertisement for mekem pipol laek for smoke. Olketa advertisement hia mekem olketa wea no smoke bifor for laek smoke, especially olketa woman and young wan long olketa poor kantri. Staka long 1 billion pipol wea smoke distaem bae dae bikos olketa addict long cigarette. Sapos olketa wea smoke distaem no stop for smoke, insaed 40 year, namba bilong olketa wea dae bae go ap.

Maet samfala laek for lusim smoke bat hem hard bikos long olketa advertisement and pipol savve addict long cigarette. Hem nao samting wea happen long wanfala woman wea nem bilong hem Naoko. Hem start for smoke taem hem teenager. Hem laek for followim lukluk bilong pipol long olketa advertisement bikos hem tingse olketa luk naes tumas taem olketa smoke. Dadi and mami bilong hem dae from lung cancer, bat hem gohed for smoke nomata long taem hem garem tufala gele. Hem sei: “Mi wari nogud mi kasem lung cancer and mi wari abaotem health bilong tufala pikinini bilong mi bat mi no savve stop smoke. Mi tingse bae hem hard nao.”

Bat gogo Naoko hem stop for smoke. Hem kasem help for duim datwan from wanfala buk wea helpem staka million pipol for lusim smoke. Wanem nao datfala buk? Nextfala article bae storyim datwan.