Wanem Nao Tingting Bilong God Abaotem Wei for Smoke?

Naoko, wea iumi storyim long firstfala article storyim samting wea helpem hem for lusim smoke. Hem sei: “Mi savve changem laef bilong mi from mi lane abaotem olketa wei bilong God and wanem hem laekem pipol for duim.” Olketa samting wea hem lanem kam from Bible. Nomata Bible no storyim wei for smoke, Bible helpem iumi for savve long tingting bilong God abaotem datwan.a Staka pipol sei wanem olketa lanem long Bible nao helpem olketa for no start for smoke or for lusim smoke. (2 Timothy 3:16, 17) Iumi bae storyim thrifala wei wea smoke savve spoelem man and wanem Bible talem abaotem datwan.

MAN SAVVE ADDICT LONG CIGARETTE

Tobacco garem nicotine insaed. Nicotine hem wanfala drug wea isi for mekem man addict long cigarette. Disfala drug savve mekem man no savve sleep and mekem heart pampam, bat hem savve mekem man feel relax tu. Wei for smoke mekem nicotine kwiktaem for go long brain. Sapos man smokem wanfala packet cigarette evriday, samting olsem 200 taem nao nicotine go long brain bilong hem. Diswan hem mekem man addict long cigarette. Man hia bae start for needim disfala nicotine and mekem hem laekem tumas for smoke. Taem hem no smoke hem savve kros, wik, and barava feel nogud.

Bible helpem iumi for ting raonem sapos hem stret for letem samting olsem bossim iumi. Hem sei: “Sapos evritaem iufala obeyim wanfala man, iufala slave bilong hem nao.” (Rome 6:16) Sapos main samting wea man tingim nao hem for smoke, hem olsem man hia kamap slave bilong datfala nogud samting. Bat God, wea nem bilong hem Jehovah, no laekem iumi for slave bilong samting olsem. Hem no laekem iumi for duim eni samting for spoelem body or tingting bilong iumi. (Psalm 83:18; 2 Corinth 7:1) So taem man start for savve gud long Jehovah and lovem hem, hem bae luksavve hem shud duim wanem Jehovah laekem, bat hem no savve duim datwan sapos hem slave bilong samting wea bae killim hem dae. Taem hem luksavve long olketa samting hia, datwan bae helpem hem for no laek smoke.

Olaf, wea stap long Germany hem stop for smoke. Taem hem 12 year hem tingse hem olraet nomoa for start smoke, bat gogo hem addict long cigarette for 16-fala year. Hem sei: “Wantaem mi no garem eni cigarette. From mi laekem tumas for smoke, mi tekem evri cigarette wea olketa smokem finis long ashtray. Mi aotem olketa samting insaed and rolim long niuspepa. Taem mi ting go bak long datwan, mi barava shame.” Hao nao gogo hem stop for smoke? Hem sei: “Main reason mi lusim smoke hem from mi laek for mekem Jehovah hapi. Samting wea helpem mi for strong for no gohed smoke hem from mi luksavve Jehovah lovem iumi olketa man and mi laek for stap long Paradaes long future.”

WEI FOR SMOKE SPOELEM BODY BILONG MAN

Wanfala buk, The Tobacco Atlas, hem sei: “Olketa scientist luksavve wei for smokem cigarette . . . hem spoelem klosap evri organ long body and hem mekem hem isi for man kasem sik and killim dae staka pipol.” Staka pipol savve sapos man hem smoke hem savve kasem olketa sik olsem cancer, heart problem, and sik long lung. World Health Organization (WHO) sei tu, staka pipol wea smoke savve dae taem olketa kasem TB and olketa nara sik wea hem isi for pipol pasim long narawan.

Long Bible, Jehovah God teachim iumi for tinghae long laef and body bilong iumi, and for iusim gudfala tingting. Son bilong hem Jesus, mekhae long diswan taem hem sei: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” (Matthew 22:37) Diswan showimaot God laekem iumi for garem gudfala laef and for lukaftarem gud body bilong iumi. Taem iumi lane abaotem Jehovah and olketa promis bilong hem, iumi start for lovem hem and tinghae long evri samting wea hem duim for iumi. Diswan bae helpem iumi for stap klia long eni samting wea savve spoelem body bilong iumi.

Jayavanth, wanfala doctor long India, hem smoke for 38 year. Hem sei: “Mi readim long olketa medical buk man bae kasem nogud samting from hem smoke. Mi talem olketa patient bilong mi for no smoke bikos mi savve hem nogud. Bat miseleva no savve stop for smoke, nomata mi trae for duim datwan faev or sixfala taem finis.” So wanem nao helpem hem for lusim smoke? Hem sei: “From mi studyim Bible, datwan nao helpem mi for stop. Mi laekem tumas for mekem Jehovah hapi so datwan helpem mi for stretawe lusim smoke.”

WEI FOR SMOKE SAVVE SPOELEM OLKETA NARAWAN

Smoke wea kamaot from mouth bilong man wea smoke and from cigarette bilong hem garem poison insaed. Olketa wea brithim disfala smoke savve kasem cancer and olketa nara sik. Evri year 600,000 pipol wea no smoke, wea staka long olketa hem olketa woman and pikinini, dae from datwan. Wanfala report bilong WHO sei: “Nomata man brithim lelebet smoke nomoa wea kam from samwan wea smoke, datwan savve mekem hem sik.”

Jesus sei iumi mas lovem God. Bat mek-tu samting hem sei for iumi duim, hem for lovem olketa famili member, fren, and olketa narawan. Hem sei olsem: “Iu mas lovem narawan long sem wei wea iu lovem iuseleva.” (Matthew 22:39) Sapos iumi duim samting wea bae spoelem famili and olketa fren bilong iumi, datwan showimaot iumi no lovem olketa. Bat sapos iumi lovem narawan, iumi bae followim wanem disfala scripture talem: “Man mas no tingim hemseleva nomoa, bat hem mas tingim nara pipol tu.”—1 Corinth 10:24.

Armen, wea stap long Armenia, hem sei: “Staka taem famili bilong mi talem mi for no smoke bikos hem affectim olketa. Bat mi no laek for tingim hao datwan savve spoelem olketa.” Hem storyim wanem nao changem tingting bilong hem. Hem sei: “Wanem mi lanem long Bible and love wea mi garem for Jehovah helpem mi for stop smoke and for luksavve wei for smoke spoelem mi and olketa narawan wea stap witim mi.”

TAEM WEA NO ENIWAN BAE SMOKE!

Samting wea Olaf, Jayavanth, and Armen lanem from Bible helpem olketa for lusim smoke and no gohed spoelem olketa seleva and olketa narawan. Olketa savve wei for smoke savve spoelem olketa bat olketa lusim smoke bikos olketa lovem Jehovah and laek for duim samting wea mekem hem hapi. Long 1 John 5:3 hem storyim wanem iumi mas duim for showimaot iumi lovem God. Hem sei: “Samting wea showimaot iumi lovem God, hem taem iumi obeyim olketa law bilong hem, and olketa law bilong hem no hard tumas for obeyim.” Maet samfala taem hem no isi for followim Bible principle, bat taem man barava lovem God, hem bae no hard tumas for obeyim hem.

Jehovah God iusim preaching waka for helpem staka million pipol lanem Bible and datwan helpem olketa for lusim smoke and for no smoke moa. (1 Timothy 2:3, 4) Klosap nao Jehovah bae iusim Kingdom bilong Hem for finisim olketa bisnis wea greedy and gohed for wakem and salem olketa cigarette nomata datwan mekem staka million pipol for addict. Long datfala taem, no eniwan bae smoke and Jehovah bae mekem evriwan wea obeyim hem for garem perfect body and mind.—Isaiah 33:24; Revelation 19:11, 15.

Sapos iu stragol yet for lusim smoke, no givap. Taem iu gohed lane abaotem Jehovah and luksavve long tingting bilong hem abaotem wei for smoke, datwan bae helpem iu for stop smoke. Olketa Jehovah’s Witness bae hapi for helpem iu for lanem and followim olketa Bible principle. Sapos iu laekem Jehovah for helpem iu for lusim smoke, iu savve trustim hem for givim iu paoa wea bae strongim iu for duim datwan.—Philippi 4:13.