Waswe, Eni Hope Stap for Olketa Grani Bilong Mi wea Dae Finis?

WANFALA niuspepa, The Chosun Ilbo (Daily News) long Korea, garem interesting article wea sei: “Waswe, ‘Datfala Gud Gele Shim Cheong’ wea No Savve Abaotem Jesus, Hem Go Long Hell?”

Pipol interest for readim disfala article bikos olketa garem wanfala kastom story abaotem disfala gele Shim Cheong. Olketa long Korea tinghae tumas long hem bikos hem willing for duim eni samting for helpem dadi bilong hem wea blind. And olketa ting long hem olsem gudfala example for evri dota long famili.

Staka pipol tingse hem no stret for wanfala gud gele olsem for bone long hellfire from hem no baptaes olsem wanfala Christian, and datwan mekem olketa feel nogud tumas. Olketa sei tu datfala gele hem stap laef staka year bifor olketa long vilij bilong hem herem message abaotem Christ.

Datfala article storyim tu tingting bilong wanfala bigman bilong church. Olketa askem hem abaotem olketa wea no garem chance for lane abaotem Jesus bat wea dae finis, sapos olketa bae bone long hellfire. Hem sei: “Mifala no savve. Bat mifala tingse masbi God bae duim samting for helpem [olketa].”

WASWE, MAN MAS BAPTAES FOR HEM SEV?

The New Catholic Encyclopedia sei: “Man mas baptaes for hem sev. Olsem Christ hem talem, sapos man no born long wata and Holy Spirit hem no savve go insaed Kingdom bilong God (Jn 3.5).” So samfala bilivim taem olketa wea no baptaes dae, olketa bae bone long hellfire or kasem nara panis.

Staka narawan tingse datfala idea hem no stret. Staka million pipol dae finis bat olketa no savve long Bible. Waswe, hem stret for olketa kasem panis for olowe? Wanem nao Bible talem abaotem diswan?

HOPE WEA BIBLE STORYIM

Bible showimaot klia God no ting nating long pipol wea no savve long wanem nao hem laekem pipol for duim. Acts 17:30 showimaot ‘God no judgem pipol from olketa no savve’ long hem. Waswe, Bible storyim eni hope for pipol wea dae finis bat no garem chance for lane abaotem God?

Samting wea Jesus talem long criminal wea hange long saed bilong hem bae helpem iumi for savve long ansa bilong kwestin hia. Datfala criminal sei long Jesus: “Plis, iu tingim mi taem iu King.” Wanem nao Jesus talem hem? Hem sei: “Mi talem iu tru samting, Iu bae stap witim mi long Paradaes.”—Luke 23:39-43.

Waswe, Jesus promisim datfala man hem bae stap long heven? Nomoa. Olketa wea bae go long Kingdom long heven mas “born moa” long wata and holy spirit, bat datfala criminal no kasem datwan. (John 3:3-6) Jesus promisim datfala criminal hem bae stap long Paradaes taem hem laef bak. From hem wanfala Jew, masbi hem savve abaotem Paradaes, datfala garden long Eden wea first buk long Bible storyim. (Genesis 2:8) Datfala man hem sure hem bae laef bak long Paradaes long earth bikos long wanem Jesus promisim hem.

Bible talem disfala promis tu: “God bae mekem pipol wea raeteous and pipol wea no raeteous for laef bak.” (Acts 24:15) “Pipol wea no raeteous” hem olketa wea no duim samting wea God sei hem stret bikos olketa no savve long wanem God laekem. Jesus bae resurrectim datfala criminal wea no raeteous, and hem bae resurrectim tu staka million narawan wea no savve long wanem God laekem. Then long Paradaes, olketa bae lanem wanem God laekem olketa for duim and olketa savve showimaot olketa lovem God taem olketa followim wanem hem talem.

TAEM PIPOL WEA NO RAETEOUS LAEF BAK

Taem olketa wea no raeteous laef bak, waswe, bae God judgem olketa followim samting wea olketa duim bifor? Nomoa. Rome 6:7 sei: “Man wea dae, hem no guilty nao long olketa sin bilong hem.” Taem olketa wea no raeteous dae, datwan mekem olketa free from sin bilong olketa. So God bae judgem olketa followim wanem olketa duim bihaen olketa laef bak, and no followim wanem olketa duim bifor. Wanem gud samting nao bae olketa kasem?

Bihaen pipol wea no raeteous laef bak, olketa bae garem chance for lane abaotem olketa law bilong God. Olketa law hia stap long olketa tokpiksa scroll wea God bae openem. Then sapos olketa obeyim olketa law bilong God or nomoa, God bae judgem olketa followim samting wea “fitim wanem olketa duim.” (Revelation 20:12, 13) Diswan bae hem firstfala chance for staka pipol wea no raeteous for lane abaotem and followim wanem God laekem mekem olketa kasem laef olowe.

Taem samfala pipol savve long disfala Bible teaching, hem helpem olketa for biliv long God moa. Olsem example, Yeong Sug hem wanfala strong Catholic taem hem young. Samfala long famili bilong hem olketa priest. Hem laek for kamap wanfala nun, so hem go stap long ples bilong olketa nun. Gogo, hem lusim datfala ples bikos hem no laek lukim wanem hem gohed long there. And tu, hem no agree long teaching bilong olketa abaotem hellfire bikos hem tingse hem no stret and no showimaot love for panisim pipol long fire.

Then wanfala Jehovah’s Witness showim long Yeong Sug disfala scripture: “Olketa wea laef savve olketa bae dae, bat olketa wea dae finis nating savve long eni samting, and olketa no savve kasem olketa gud samting.” (Ecclesiastes 9:5) Datfala Witness helpem hem for luksavve olketa grani bilong hem no bone long hellfire. Bat hem olsem olketa sleep nomoa and weitim taem wea olketa bae laef bak.

From Yeong Sug luksavve staka pipol no herem olketa tru samting wea stap long Bible, hem followim wanem Jesus talem long Matthew 24:14 wea sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” Distaem hem preach abaotem gud nius and hem storyim hope wea hem garem for lukim moa olketa grani bilong hem.

“GOD HEM NO FAVORIM ENIWAN”

Bible sei: “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Iumi hapi long wei wea God tingim evriwan nomata olketa wea dae finis, and datwan hem barava fitim bikos God hem “lovem olketa gud and stret samting.”—Psalm 33:5.