Hao for Helpem Brata or Sista wea Divorce

Maet iu savve long samfala wea divorce. Distaem staka pipol nao divorce. Olsem example, olketa wea duim research long Poland sei olketa wea 30 year and wea marit finis for thri go kasem sixfala year olketa nao main wan wea savve divorce. Hem no olketa hia nomoa wea divorce.

Datfala Institute for Family Policy long Spain hem sei: “Research wea olketa duim showimaot 50 percent long olketa wea marit [long Europe] bae divorce.” Diswan hem semsem tu long olketa nara rich kantri.

GAREM ENIKAEN DIFREN FEELING

Why nao staka pipol divorce olsem? Wanfala woman long Eastern Europe wea givim advaes long pipol wea marit hem sei taem hasband and waef divorce, datwan mekem tufala kasem barava bigfala sorre and pain saed long feeling. Hem sei tu bihaen tufala divorce, tufala garem enikaen difren feeling olsem wei for kros, feel nogud, no garem hope, and feel shame tu. Samfala taem olketa feeling hia mekem man wea divorce laek for suisaed. Taem kot givim disison for tufala divorce, tufala savve feel olsem laef bilong tufala hem emti and tufala no garem eniwan. Olketa feeling hia mekem datfala man wea divorce garem kaen tingting olsem: “From mi divorce, bae mi hao ia? Wanem nomoa mi laef for hem?”

Eva talemaot feeling bilong hem olsem: “Bihaen mi divorce, mi barava feel shame taem olketa neiba and pipol wea mi waka witim savve kolem mi ‘woman wea divorce.’ Mi kros fogud bikos mi mas lukaftarem tufala smol pikinini so mi mas olsem mami and dadi bilong tufala.”a Adam wea hem wanfala elder for 12-fala year, hem sei olsem bihaen hem divorce: “Staka taem mi savve ting daonem miseleva and datwan mekem mi kros and mi no laek for associate witim eniwan.”

HEM NO ISI FOR DEAL WITIM SAMTING WEA HAPPEN

From samfala evritaem wari tumas abaotem future bilong olketa, datwan mekem hem hard for olketa hapi and deal witim samting wea happen, nomata bihaen olketa divorce for staka year finis. Maet olketa tingse olketa narawan no laekem olketa. Wanfala woman wea raet abaotem diswan sei tu olketa mas “changem samfala samting wea olketa savve duim bifor, and olketa seleva lane for deal witim eni problem wea kamap.”

Stanisław sei: “Taem mitufala divorce, ex-waef bilong mi stopem mi for no go lukim tufala smol gele bilong mi. Datwan mekem mi feel olsem no eniwan lovem mi and masbi Jehovah tu lusim mi. Mi laek dae nomoa. Gogo mi luksavve datkaen tingting hem no stret.” Wanfala sista wea divorce wea nem bilong hem Wanda wari abaotem future tu and hem sei: “Mi barava sure bae gogo pipol, and olketa long kongregeson tu, no interest long mi and olketa pikinini bilong mi. Bat distaem nao mi luksavve olketa brata long kongregeson barava sapotim mifala long datfala taem, and olketa helpem mi taem mi traem best for helpem olketa pikinini bilong mi for worshipim Jehovah.”

Toktok bilong olketa hia showimaot olketa nogud feeling savve kamap big tumas long samfala bihaen olketa divorce. Maet olketa ting daonem olketa seleva, tingse olketa iusles nomoa and olketa no fit for eniwan lovem olketa. And tu, maet olketa start for tok daonem olketa narawan. Then maet olketa start for tingse olketa brata and sista long kongregeson no tingim olketa nomoa. Bat samting wea Stanisław and Wanda talem showimaot gogo samfala wea divorce luksavve olketa brata and sista barava tingim olketa. Staka Christian duim plande samting for helpem olketa wea divorce, nomata long firstaem olketa hia no tinghae long datfala help.

TAEM OLKETA SAVVE FEEL LONELY AND TINGSE NO ENIWAN LOVEM OLKETA

Hem gud for luksavve nomata iumi traem best for helpem olketa brata or sista wea divorce, maet samfala taem bae olketa barava feel lonely. Staka sista wea divorce nao savve tingse olketa narawan no tingim olketa. Alicja sei: “Mi divorce for eitfala year finis. Nomata olsem, samfala taem mi savve ting daonem miseleva. Long olketa taem olsem, mi savve laek for stap seleva and krae and feel sorre long miseleva.”

Nomata hem normal samting for man or woman wea divorce for garem olketa kaen feeling olsem, Bible sei hem nogud for man stap seleva. Sapos man hem no followim datfala kaonsel long Bible, gogo maet hem ‘duim samting wea no wise.’ (Prov. 18:1) Bat, hem no wise for sista wea divorce wea feel lonely for evritaem askem advaes or kasem comfort from wanfala brata, or for wanfala brata duim sem samting long wanfala sista. Sapos hem duim datwan, maet tufala start for garem feeling for laekem tufala wea no stret.

Olketa brata and sista bilong iumi wea divorce maet garem staka difren kaen feeling wea hem no isi for olketa deal witim. Maet olketa garem olketa feeling olsem wei for wari abaotem future, feel lonely, and feel olsem no eniwan lovem olketa. From iumi luksavve staka brata and sista wea divorce garem olketa kaen feeling hia wea no isi for olketa deal witim, iumi shud followim example bilong Jehovah for sapotim olketa. (Ps. 55:22; 1 Pet. 5:6, 7) Iumi sure olketa bae tinghae long eni samting wea iumi duim for helpem olketa. Sapos iumi duim olsem, iumi showimaot iumi wanfala tru fren!—Prov. 17:17; 18:24.