Staka Nogud Samting Hem Happen!

Smita,a hem wanfala young waef long Dhaka, Bangladesh, wea hem 35 year. Hem woman wea hapi and waka hard. Hem lovem and tingim pipol and hem laek for helpem pipol for lane abaotem God. Seknomoa Smita kasem wanfala sik and bihaen tu-thri day nomoa hem dae! Datwan mekem famili and olketa fren bilong hem sorre tumas.

James and waef bilong hem, wea tufala samting olsem 30 year, tufala naes pipol olsem Smita. Wanfala taem tufala lusim New York for go visitim olketa fren bilong tufala long West Coast long United States. Long datfala taem tufala dae long wanfala car accident. Famili bilong tufala and olketa wakfren seke long datwan and sorre tumas.

Staka pipol distaem kasem olketa nogud samting, olsem olketa soldia and olketa wea no joinim army tu dae long taem bilong war. Olketa wea duim olketa criminal samting and wea raf tumas spoelem gudfala pipol. Nomata man young or olo, rich or poor, olketa savve kasem nogud accident or bigfala sik. Plande pipol dae bikos long natural disaster. Pipol savve feel nogud from olketa narawan ting daonem olketa or duim samting wea no stret long olketa. Maet eni samting olsem kasem iu tu.

Olketa samting hia mekem iumi laek for savve:

• Why nao nogud samting happen long gudfala pipol?

• Waswe, iumi shud blamem God for olketa samting hia?

• Waswe, olketa nogud samting hia just happen nomoa, or olketa man nao duim datwan?

• Pipol sei Karma, wea minim olketa samting wea man duim taem hem laef bifor nao mekem hem for safa distaem. Waswe datwan hem tru?

• Sapos wanfala olmaeti God hem stap, why nao hem no protectim gudfala pipol from olketa nogud samting?

• Waswe, enitaem olketa nogud samting and wei for safa bae finis?

For savve long ansa bilong olketa kwestin hia, iumi shud tingim diswan firstaem: Why nao olketa nogud samting happen, and wanem nao God bae duim abaotem datwan?