Hasband Mekem Famili Bilong Iu Hapi

WANEM nao hasband mas provaedem for waef bilong hem? Staka pipol growap witim tingting wea sei main samting wea hasband mas provaedem for famili hem selen. Bat samfala waef wea garem staka material samting no hapi, and maet olketa barava fraet tu. Olsem example, wanfala woman from Spain wea nem bilong hem Rosa hem sei olsem abaotem hasband bilong hem: “Hem kaen long nara pipol, bat hem no kaen long mi.” Joy, wea kam from Nigeria hem sei: “Taem mi no agree long wanem hasband bilong mi talem, hem sei long mi, ‘Iu mas duim evri samting wea mi talem bikos mi nao hasband bilong iu.’”

Wanem nao savve helpem wanfala hasband for kaen and showimaot love? Wanem nao hasband mas duim for mekem waef bilong hem hapi and stap gud?—Ruth 1:9.

WANEM NAO BIBLE TALEM ABAOTEM PAOA BILONG HASBAND?

Long tingting bilong God, hasband and waef tufala semsem nomoa. Nomata olsem, Bible sei waka wea tufala duim insaed famili hem no semsem. Rome 7:2 sei woman wea marit hem stap anda long “law bilong hasband bilong hem.” Olsem staka organization markem samwan for mek sure evri samting gohed gud, God markem hasband tu for hed bilong waef bilong hem. (1 Corinth 11:3) Hasband nao mas lead insaed famili.

Hao nao iufala hasband shud iusim paoa wea iufala kasem from God? Bible sei: “Gohed for lovem waef bilong iufala, olsem Christ tu hem lovem kongregeson.” (Ephesus 5:25) Nomata Jesus Christ no marit, example bilong hem savve helpem iu for kamap gudfala hasband. Bae iumi storyim hao nao olsem.

JESUS HEM NAMBAWAN EXAMPLE FOR OLKETA HASBAND

Jesus lukaotem chance for comfortim and helpem narawan. Jesus talem disfala promis for evriwan wea narawan spoelem olketa and wea kasem bigfala hevi: “Kam long mi, . . . mekem mi savve strongim iufala.” (Matthew 11:28, 29) Plande taem hem healim pipol and helpem olketa for fren gud witim Jehovah. Dastawe plande pipol lukaotem Jesus bikos olketa savve hem bae helpem olketa!

Wanem nao olketa hasband savve duim for followim example bilong Jesus? Luksavve long olketa samting wea iu savve duim for helpem waef bilong iu. Samfala waef feel olsem Rosa wea sei: “Mi ia, mi haosgele nomoa for hasband bilong mi.” Bat wanfala hasband, wea nem bilong hem Kweku, wea garem hapi marit hem sei: “Plande taem, mi savve askem waef bilong mi wanem nao mi savve duim for helpem hem. From mi lovem hem, plande taem mi luksavve long waka wea stap, and mi duim nomoa.”

Jesus hem kaen and tingim feeling bilong narawan. Wanfala woman hem garem barava nogud sik for 12-fala year. Taem hem herem Jesus garem paoa for duim mirakol “hem gohed for sei long hemseleva: ‘Sapos mi tasim nomoa kaleko bilong hem bae mi gud bak nao.’” Wanem hem tingim hem tru nao. Hem kam bihaen long Jesus, tasim kaleko bilong hem, and semtaem nomoa datfala nogud sik hem finis from hem. Taem samfala lukim diswan maet olketa tingse disfala woman shud no duim olsem, bat Jesus luksavve hem barava needim help.a Jesus tok kaen long hem and sei: “Dota bilong mi, . . . iu go and no wari moa, bikos sik hia hem finis nao.” Jesus no mek shame long hem or tok long hem bat hem showimaot hem luksavve long sik bilong hem. Samting wea Jesus duim showimaot hem man wea tingim feeling bilong narawan.—Mark 5:25-34.

Wanem nao olketa hasband savve duim for followim example bilong Jesus? Taem waef bilong iu no mas feel gud, tingim feeling bilong hem and patient witim hem. Trae for minim tingting bilong hem and wanem hem duim. Olsem example, Ricardo hem sei: “Taem mi luksavve waef bilong mi hem kwiktaem for feel nogud, mi traem best bilong mi for no talem samting wea bae mekem hem feel worse go moa.”

Jesus hem story gud witim olketa disaepol bilong hem. Jesus hem story gud witim olketa fren bilong hem. Hem sei: “Mi talem iufala evri samting wea mi herem from Dadi bilong mi.” (John 15:15) Hem tru, samfala taem Jesus laek for stap seleva for ting raonem samfala samting and for prea. Bat plande taem hem storyim feeling bilong hem long olketa disaepol bilong hem. Long naet bifor olketa soldia killim hem dae from olketa sei hem wanfala criminal, hem no hol bak for talem olketa disaepol hem “barava wari tumas.” (Matthew 26:38) Nomata taem olketa fren bilong Jesus duim samting wea hem feel nogud long hem, hem gohed story witim olketa.—Matthew 26:40, 41.

Wanem nao olketa hasband savve duim for followim example bilong Jesus? Storyim tingting and feeling bilong iu long waef bilong iu. Maet wanfala waef komplen and sei hasband bilong hem savve story tumas witim nara pipol bat hem nating story witim hem long haos. Bat tingim feeling bilong Ana taem hasband bilong hem storyim tingting and feeling bilong hem. Ana hem sei: “Mi feel olsem hem barava lovem mi and mitufala fren gud tugeta.”

No panisim waef bilong iu long wei for no story long hem. Wanfala waef hem sei: “Taem hasband bilong mi feel nogud long mi, hem no laek story witim mi for staka day. Hem mekem mi feel guilty and mi feel olsem hem les long mi.” Bat wanfala hasband wea nem bilong hem Edwin hem trae for followim example bilong Jesus. Hem sei: “Taem mi kros tumas mi no kwiktaem for talem samting, bat mi weit for gudfala taem wea hem fitim for mitufala story tugeta and stretem datwan.”

Joy, wea iumi storyim finis, sei hem lukim hasband changem wei bilong hem taem hem start for studyim Bible witim Olketa Jehovah’s Witness. Joy sei: “Hasband bilong mi hem gud winim bifor and hem traem best for showimaot love olsem Jesus.” Plande million hasband and waef kasem gud samting tu from olketa studyim Bible. Waswe, iu laek for olsem olketa? Askem eni Jehovah’s Witness for wanfala free Bible study.