ANSA FOR OLKETA BIBLE KWESTIN
Waswe, enitaem bae wanfala gavman nomoa rulim full world?
Hao Nao Wanfala Gavman For Full World Savve Mekem Pipol From Evri Kantri For Wam Mind? Isaiah 32:1, 17; 54:13
Tingim olketa gudfala samting wea pipol bae kasem sapos wanfala gavman nomoa hem rulim full world. Distaem staka pipol safa bikos olketa poor tumas and olketa narawan barava rich. Bat wanfala gavman for full world bae mek sure evriwan garem wanem olketa needim. Waswe, iu tingse enitaem olketa man bae mekem kamap wanfala gavman olsem?—Readim Jeremiah 10:23.
Start kam long bifor, olketa gavman nating lukaftarem gud pipol wea olketa rulim, especially nao olketa wea poor. Samfala gavman olketa raf tumas. (Ecclesiastes 4:1; 8:9) Bat Olmaeti God promisim gavman bilong hem bae changem evri gavman long earth. Ruler bilong datfala gavman bae barava lukaftarem pipol.—Readim Isaiah 11:4; Daniel 2:44.
Wanem nao Kingdom bilong God bae duim?
Jehovah God hem chusim best wan for Ruler bilong full world. Hem nao Son bilong hem Jesus. (Luke 1:31-33) Taem Jesus hem stap long earth, hem laekem tumas for helpem pipol. Long taem wea hem rulim earth, hem bae finisim wei for safa, and mekem pipol long evri kantri for wan mind.—Readim Psalm 72:8, 12-14.
Waswe, evriwan bae laekem Jesus for Ruler bilong olketa? Nomoa. Nomata olsem, Jehovah hem patient. (2 Peter 3:9) Hem givim chance long pipol for acceptim Jesus olsem Ruler bilong olketa. Klosap nao Jesus bae finisim nogud pipol and evriwea long world pipol bae garem peace and stap gud.—Readim Micah 4:3, 4.