“Sapos Kingsley Savve Duim, Mi Tu Savve Duim!”

WANFALA brata tasim shoulder bilong Kingsley, then hem start read nao. Datwan hem firstfala assignment bilong hem long Theocratic Ministry Skul. Taem hem read hem talem klia evri word, bat hem nating lukluk long Bible bilong hem. Why nao olsem?

Kingsley, wea stap long Sri Lanka, hem blind. Hem earpas lelebet, and hem iusim wheelchair tu. Hao nao gogo Kingsley lane abaotem Jehovah and fit for joinim Theocratic Ministry Skul? Bae mi storyim kam.

Long firstaem wea mi meetim Kingsley mi tinghae long wei wea hem interest tumas long Bible. Samfala Witness bin study witim hem bifor. Hem studyim datfala buk Savvy wea Lead Go Long Laef Olawea wea stap long Braille (diswan hem raeting bilong pipol wea blind). Buk hia luk olo bikos Kingsley savve readim olowe. Hem willing for study moa bat tufala samting nao mekem datwan no isi.

First samting, Kingsley stap witim olketa narawan long wanfala haos for olketa olo and olketa wea disable. Kingsley no savve herehere gud and staka noise gohed long datfala haos, so mi mas tok big taem mitufala study. Bikos long datwan, evriwan long datfala haos savve herem mitufala taem mitufala study!

Mek-tu samting, mitufala savve storyim lelebet information nomoa long taem bilong study bikos Kingsley hem no fit for readim and minim staka samting wantaem. Kingsley evritaem prepare gud for study, mekem hem kasem gud samting from datwan. Hem savve readim wanem mitufala bae studyim staka taem, faendem olketa verse long Braille Bible bilong hem, and ting raonem ansa for olketa kwestin. Bikos long diswan, study bilong hem gohed gud. Long taem bilong study, hem savve sidaon long wanfala mat. Hem hapi tumas long wanem hem lanem and hem savve story big taem hem givim ansa bilong hem. Gogo, mitufala savve study tufala taem evri week, and each taem wea mitufala study hem for tufala hour!

ATTENDIM AND TEKPART LONG MEETING

Kingsley laekem tumas for go long olketa meeting long Kingdom Hall, bat datwan no isi. From Kingsley iusim wheelchair hem needim olketa narawan for helpem hem for go kasem Kingdom Hall. Staka long kongregeson nao helpem hem, and olketa ting long datwan olsem wanfala privilege. Long taem bilong meeting, Kingsley sidaon klosap long wanfala speaker, hem lisin gud, and savve givim olketa ansa tu!

Gogo Kingsley laek for joinim Theocratic Ministry Skul. Tufala week bifor hem duim firstfala Bible reading bilong hem, mi askem hem sapos hem practicem datwan. Kingsley sei: “Yes brata bilong mi, mi practicem reading bilong mi 30 taem finis.” Mi praisem hem for hard waka bilong hem, and askem hem for readim kam long mi. Hem openem Bible bilong hem, and putim olketa finger bilong hem long start bilong datfala reading, and then hem start for read nao. Bat mi lukim olketa finger bilong hem no muv followim datfala page, bikos hem baeheartim nao datfala full Bible reading!

Taem mi lukim datwan mi barava sapraes and mi start for krae nao. Mi askem Kingsley hao nao hem fit for baeheartim datfala Bible reading bihaen hem practicem for 30-fala taem nomoa. Hem sei: “Nomoa, 30-fala taem evriday nao mi practicem reading bilong mi.” For winim wanfala month, Kingsley sidaon long mat bilong hem, and hem readim and practicem Bible reading bilong hem gogo hem baeheartim nao.

Then kasem nao day wea hem bae duim Bible reading bilong hem long Kingdom Hall. Taem Kingsley finisim reading bilong hem, full kongregeson klap big, and staka krae tu from olketa lukim Kingsley hem traem best bilong hem. Wanfala pablisa wea joinim skul bifor bat hem stop bikos hem fraet, hem ask for joinim skul moa. Why nao olsem? Hem sei: “Sapos Kingsley savve duim, mi tu savve duim!”

Long September 6, 2008, bihaen Kingsley studyim Bible for thrifala year, hem baptaes for showimaot hem dedicate long Jehovah. Kingsley hem faithful go kasem taem hem dae long May 13, 2014. Kingsley bilivim hem bae laef bak long paradaes long earth, and long datfala taem hem bae healthy and strong and gohed for worshipim Jehovah. (Isa. 35:5, 6)—Paul McManus nao talem disfala story.