Wei for Prepare Gud Showimaot Iumi Interest
1 Gudfala wei for prepare for ministry helpem iumi for showimaot iumi interest long nara pipol. Why nao olsem? Taem iumi prepare gud, iumi bae no tingim nomoa for storyim wanem iumi redyim finis, and from diswan iumi bae fit for lisin gud long haosholder and tingim wanem nao hem needim. And tu, bae iumi no fraet and story long wei wea kam from heart. Bat, hao nao iumi savve preparem wei for startim story wea bae helpem pipol?
2 Iusim Wei for Startim Story wea Fitim: Chusim eni idea from January 2005 Kingdom Ministry Bilong Iumi wea fitim ples wea iu stap, and ting raonem hao iu savve talem datwan long toktok bilong iuseleva. Changem for fitim territory bilong iu. Olsem example, sapos plande pipol wea iu meetim olketa garem sem religion or kam from sem island, ting raonem wanem nao olketa bae interest long hem. Wei for changem story bilong iu fitim olketa wea iu meetim hem showimaot iu barava interest long olketa.—1 Cor. 9:22.
3 Taem iu start iusim story wea iu preparem, gohed for changem datwan mekem hem kamap moabeta. From toktok wea iu talem for startim story hem barava important, lukim wei wea samting iu talem hem affectim pipol iu story witim. Waswe, olketa interest long datfala subject? Waswe, olketa ansarem olketa kwestin wea iu askem? Sapos nomoa, gohed changem story hia go kasem taem wea hem waka gud.
4 Olketa Samting for Help for Remember: Plande faendem hao olketa forgetim wanem for storyim taem olketa kasem haos. Sapos diswan kasem iu, waswe, enitaem iu practice witim eniwan? Diswan savve helpem iu for garem olketa idea wea klia long mind and storyim olketa long wei wea simpol, and wea man savve minim gud. Hem savve helpem iu tu for deal witim olketa difren wei wea haosholder ansarem iu.
5 Nara samting for helpem iu remember hem for raetem olketa main point long story bilong iu long wanfala smol pepa and readim bifor iu kasem haos. Diswan helpem samfala for no seksek tumas and olketa fit for story witim pipol. Long olketa wei olsem, gudfala wei for prepare helpem iumi for showimaot iumi interest long nara pipol and mekem kamap moabeta wei wea iumi story abaotem gud nius.