Waka Hard for Duim Moa Samting Long Ministry
1 Aposol Paul kaonselem olketa Christian for wakabaot followim wei bilong God and for “gohed followim disfala wei long bigfala wei moa.” (1 Thess. 4:1) Hao nao iumi savve duim datwan? Wanfala wei hem for iumi gohed trae hard for duim moa samting long spiritual waka bilong iumi, and evritaem waka hard for ‘duim evribit ministry bilong iumi.’—2 Tim. 4:5.
2 Samting wea Muvim Iumi: Samting wea muvim iumi for duim moa samting long ministry hem from iumi laek for servem Creator evribit. Iumi laek muv ahed long spiritual wei and duim olketa samting for kamap moabeta long ministry. Wei for garem gudfala schedule from stretfala samting nao muvim iumi for duim olsem bae helpem iumi for kasem olketa spiritual goal.—Ps. 1:1, 2; Phil. 4:6; Heb. 10:24, 25.
3 For duim moa samting long ministry iumi mas willing for sakrifaesim samfala samting for mekem iumi savve duim datwan. Iumi savve duim olsem taem iumi ting raonem nambawan example bilong Jesus. (Matt. 20:28) Samting wea barava mekem Jesus hapi nao hem taem hem servem olketa narawan long ministry bilong hem. (Acts 20:35) Iumi savve followim example bilong Jesus long wei for interest long pipol and iusim olketa chance wea kamap for duim moa samting long ministry.—Isa. 6:8.
4 Samting wea Dadi and Mami Savve Duim: From training wea parents givim long pikinini taem hem smol yet, olketa savve helpem hem for barava laek servem olketa narawan and duim moa samting long ministry. Olketa young wan bae lukim wei wea olketa narawan long famili waka hard and wei wea olketa duim moa samting long ministry. Wei wea wanfala brata go witim grandadi bilong hem for duim olketa Kingdom waka barava muvim hem taem hem smol boy for laek duim moa samting. From hem lukim grandadi bilong hem waka hard and hapi, diswan muvim hem for lukaotem olketa chance for servem olketa Christian brata. Distaem hem wanfala ministerial servant.
5 Kongregeson Needim Olketa Brata for Help: “Sapos eni man waka hard for kasem waka bilong overseer, hem aftarem gudfala waka.” (1 Tim. 3:1) Toktok hia encouragem olketa brata for waka hard mekem olketa kasem mark for garem samfala privilege moa insaed organization bilong Jehovah. Man no need for garem spesol savve for duim datwan. Brata wea laek for servem kongregeson bae lukaotem firstaem Kingdom and strong for duim ministry. (Matt. 6:33; 2 Tim. 4:5) Hem bae trae hard for showimaot gudfala example for olketa narawan.
6 Evriwea Long World: Jehovah hem speedim disfala waka for hipimap pipol. (Isa. 60:22) Hem barava important tumas for evriwan wea followim example bilong Jesus duim moa samting long ministry. Report for 2006 service year showimaot 248,327 nao baptaes. Datwan hem samting olsem 680 niu wan baptaes evri day! Hem gud for iumi evriwan lukaotem eni wei for iumi savve duim moa samting long ministry bilong iumi!