Iumi Mas Gohed Strong Long Ministry
1 Each year start kam long 1992, Olketa Jehovah’s Witness strong for iusim winim wan billion hour long waka for preach abaotem Kingdom and mekem pipol kamap disaepol. Iumi barava hapi for garem smol share long disfala bigfala waka!—Matt. 28:19, 20.
2 Hem tru, evri thankiu and praise hem go for Jehovah, from hem nao strongim iumi long ministry bilong iumi long olketa “nogud taem wea hard for deal witim” distaem. (2 Tim. 3:1) Wanem nao iumi need for duim sapos iumi laek for gohed strong long disfala important waka?
3 Reason for Strong: Bigfala love for God and nara pipol and dedication bilong iumi, hem muvim iumi long Kingdom waka bilong iumi. (Matt. 22:37-39; 1 John 5:3) Love hem muvim iumi for mekem olketa sakrifaes for share evribit long preaching waka.—Luke 9:23.
4 Waka Hard for Gohed Strong: Enemy bilong iumi Devil hem trae hard for mekem iumi wikdaon for duim ministry. Tu-thri samting wea hem iusim for mekem iumi wikdaon nao hem wei wea samfala pipol long territory no interest, olketa samting long disfala world wea pullim iumi, hard taem saed long living, and wei for wari abaotem health.
5 So iumi mas waka hard for gohed strong. Hem important for iumi keepim “datfala love wea [iumi] garem firstaem.” For duim diswan iumi mas evritaem readim and ting raonem Word bilong God, Bible, and mekius long evri spiritual kaikai wea “datfala faithful and wise slave” givim for iumi.—Rev. 2:4; Matt. 24:45; Ps. 119:97.
6 Olsem olketa Bible profesi barava showimaot, day bilong Jehovah for finisim pipol wea no followim God hem klosap tumas. (2 Pet. 2:3; 3:10) From diswan, iumi mas waka hard for gohed strong long ministry, and share evribit long waka wea gohed distaem for preach abaotem Kingdom and mekem pipol kamap disaepol evriwea long world!