Waswe, Bae Iu Followim Wei Bilong Jehovah and Jesus Long March, April and May?
1. Wanem nao staka Jehovah’s Witness duim long March, April, and May?
1 Jehovah laekem tumas for mekem plan bilong hem kamap tru. Long Isaiah 9:7 hem showimaot Jehovah barava laekem iumi for kasem olketa blessing bilong Kingdom bilong hem. Jesus tu laekem tumas for sapotim tru worship taem hem duim ministry bilong hem. (John 2:13-17; 4:34) Evri year long March, April and May, plande million pablisa waka hard for followim wei bilong Jehovah and Jesus taem olketa duim moa samting long ministry. Waswe, bae iu joinim olketa?
2. Wanem nao bae iumi laekem tumas for duim start long March 7?
2 Invaetem Pipol Long Memorial: Campaign for givimaot invitation for Memorial bae start long Saturday, March 7. Plan distaem mekem iumi savve duim staka samting long ministry long datfala taem. Olketa long kongregeson bae hapi tumas taem olketa waka hard for givimaot invitation long staka pipol long territory. Iumi laekem tumas for givim invitation long olketa Bible study, return visit, olketa wea iumi waka witim, relative, skulfren or iumi savve iusim jw.org for invaetem olketa.
3. Long March and April, wanem nao bae helpem iumi for duim moa samting long ministry?
3 Auxiliary Pioneer: Long olketa month hia bae iumi laekem tumas for duim moa samting long ministry. Bae staka laek for auxiliary pioneer long March and April, bikos iumi savve duim 30 hour long tufala month hia. Hem bae gud sapos long next famili worship bilong iufala or taem iu duim study seleva, iu ting raonem sapos iu savve auxiliary pioneer. (Prov. 15:22) Taem iu storyim plan bilong iu for duim moa samting long ministry, datwan savve helpem olketa narawan for laek duim olsem. Sapos iu changem schedule bilong iu for duim moa samting long ministry, iu showimaot iu followim wei bilong Jesus.—Mark 6:31-34.
4. Taem iumi followim wei bilong Jehovah and Jesus, wanem nao bae kamaot from datwan?
4 Taem iumi followim wei bilong Jehovah and Jesus and strong for duim samting long March, April, and May, staka gud samting bae kamaot from datwan. Staka pipol bae herem gud nius abaotem Kingdom. Iumi bae barava hapi and satisfae from iumi duim samting for Jehovah and from iumi helpem olketa narawan. (Acts 20:35) Bat barava important samting nao, iumi bae mekem God and Jesus for hapi.