Wanem for Duim Mekem Iumi Redi for Service Meeting
1. Service Meeting hem for wanem, and hao nao iumi savve kasem gud samting from disfala meeting?
1 Service Meeting hem for helpem iumi for preach gud. Hem mekhae long waka for preachim gud nius abaotem Kingdom, mekem disaepol, and for talemaot hao klosap nao God bae judgem disfala world. (Matt. 28:20; Mark 13:10; 2 Pet. 3:7) Iumi kasem gudfala samting from disfala meeting taem iumi redi gud and tekpart.
2. Wanem nao iumi savve duim mekem iumi redi for herem wanfala tok?
2 Tok: Buk for iusim long disfala part hem stap long schedule long Kingdom Ministry. Iu savve readim part long datfala buk for iusim and olketa scripture, and ting raonem hao iu savve followim wanem datfala buk talem long preaching.
3. Wanem nao iumi savve duim mekem iumi redi for kwestin and ansa part?
3 Kwestin and Ansa: Duim disfala part olsem wanfala Wastaoa Study and startim and finisim witim shortfala toktok. Andalaenem olketa main point long evri paragraf, and redi for talem shortfala ansa wea evriwan savve minim.
4. Wanem nao iumi savve duim mekem iumi redi for story tugeta witim kongregeson?
4 Story Tugeta Witim Kongregeson: Brata bae duim disfala part olsem wanfala tok, bat hem bae askem tu-thri kwestin tu. Iu bae fit for ansa taem brata hia askem olketa kwestin sapos iu andalaenem olketa main point and readim olketa scripture. Brata wea duim disfala part bae story tugeta witim kongregeson abaotem olketa main point.
5. Wanem nao bae helpem iumi for kasem gud samting from olketa demonstration?
5 Olketa Demonstration: Samfala part bae garem demonstration for showimaot hao iumi savve iusim olketa idea long datfala part long preaching. Olketa elder, olketa pablisa wea savve gud for preach, and olketa pioneer savve duim olketa demonstration. Taem iu redi for disfala part, ting raonem wanem kaen demonstration nao olketa maet duim. Taem iu lukim wanfala demonstration, tingim hao iu maet changem for fitim story bilong iu and pipol wea iu preach long olketa. Hem gud for tekem kam buk or magasin wea olketa bae iusim for demonstration. Long evening wea iu duim Famili Worship, iu savve traem tu for duim demonstration.
6. Why nao hem gud for redi for Service Meeting?
6 Iumi bae enjoyim Service Meeting taem iumi redi gudfala and ting raonem samting wea iumi bae lanem. Wei for followim olketa idea hia bae helpem iumi for strongim go moa iumi evriwan. (Rom. 1:11, 12) Sapos iumi markem taem for redi for Service Meeting, iumi bae redi gud for preach.—2 Tim. 3:17.